Yeremiya 48:1-47
-
Wuprofwetu kutalisha hadi Mowabi (1-47)
48 Yehova wamazaza, Nzambi yaIsarela, nahoshi kudi Mowabi+ nindi:
“Oyihuñu yinamoniyi Nebo,+ muloña anamujilumuni!
Kiriyatayimi+ anamutiyishi nsonyi nikumukwata.
Chiswamu chakiñewa* anachisawuli nawa anachikisañani.+
2 Hiyamushimekaña cheñi Mowabiku.
MuHeshiboni+ anakasi kafuta kakumudimbwisha nawu:
‘Twayenu tujiyishi muza wejima.’
Eyi Madimeni, nineyi watela kumwenahu,Muloña mpoku yakabali yinakukulondela.
3 Kudi nyitetu yakudila muHoronayimi,+Muloña kujilumuka nikukala kwasweja kunayishikeni.
4 Mowabi anamukotoli.
Anyanindi anyanya anakukaloka nyitetu.
5 Kumukandu waLuhiti anatwalekihu kudila hanakukandukawu.
Nawa hanakukunkumukawu kufuma kuHoronayimi anakutiya antu chinakukalokawu nyitetu muloña wakujilumuka.+
6 Temukenu, kulonda mupulwishi mawumi enu!
Mwatela kwikala neyi mutondu wamunjunga wudi mwisaña.
7 Muloña wakwila wakuhwelela munyidimu yeyi nimumaheta eyi,Nineyi akakukwata.
Nawa Kemoshi+ wakaya muwunkoli,Hamu niatupristu indi niayilolu indi.
8 Mukakujilumuna wakeñila mumusumba-himusumba,Nawa kwosi musumba wakapulukaku.+
Chinekineki chakakisika,Nawa iluña desekana akadikisañana, neyi chinahoshiyi Yehova.
9 Mushimikilenu Mowabi chinjikijilu,Muloña chaholokelayi muyihuñu wakatemuka,Nawa nyisumba yindi yakekala chuma chakuhayama chikupu,Chakadi muntu wunashalimu.+
10 Washiñewa yowu muntu wazataña mudimu waYehova nakadiwu!
Washiñewa yowu muntu wakañeshaña mpoku yindi yakabali kupwekesha mashi!
11 Eni Mowabi anashakami kwamwena kufuma tuhu kuwukwenzi wawu,Neyi vinyu yidi hewulu danchiba.
Kanda ayihuñununeñahu dehi kufuma muchipwepu chimu nakuyisha muchikwawu,Nawa kanda ayeñahu dehi muwunkoli.
Dichinaleteshi lumweñumweñu lwawu lubuli kuhimpika,Nawa ivumba dawu dadiwahi hidinahimpikiku.
12 “Yehova nahoshi nindi, ‘Dichi tiyenu! mafuku anakwinza, hinakatemesha amayala kuya nakuyikuvumika. Akayikuvumeka nakufumisha yuma yejima yidi muyipwepu yawu, nawa nsaba jawu jamaneni akajibalola.
13 Nawa aMowabi akatiya nsonyi naKemoshi, neyi chatiyili amwitala daIsarela nsonyi naBeteli, yashindameneniwu.+
14 Mukuhosha ñahi nenu: “Tudi amashidika añovu, anadiloñeshi kuzuña njita”?’+
15 ‘Mowabi anamukisañani,Nyisumba yindi anayilukuki,+Nawa anyikwenzi adimu asweja kuwaha anayijahi,’+
Dichinahoshiyi Mwanta, ijina dindi diyi daYehova wamazaza.+
16 Katataka ichi yihuñu yinakwinza hadi aMowabi,Nawa kudimbuka kwawu kunakwinza swayi-swayi.+
17 Akayikundeja kudi ejima ayinyeñumuka,Ejima eluka ijina dawu.
Yileji neyi: ‘Mbwechi yakola ochinayikotoliwu, mukombu walubanji!’
18 Fumaku hakulema kweyi,Nawa shakamaku nampwila,* eyi mwana wamumbanda wunakushakama muDiboni,+Muloña mukakumujilumuna Mowabi nenzi nakukwimakena,Nawa wukujilumuna maluña eyi akiñewa.+
19 Imanaku kumukwakwa nawa wutalataleña, eyi washakama muAroweri.+
Ihulaku iyala nimumbanda anakutemuka neyi, ‘Kunasoñidi?’
20 Mowabi anamutiyishi nsonyi niwoma.
Dilaku makumbu nikukaloka nyitetu.
Bidikaku muArinoni+ neyi Mowabi anamujilumuni.
21 “Wunsompeshi wunenzi heluña desekana,+ hadi Holoni, Yahazi+ niMefayati;+
22 hadi Diboni,+ Nebo,+ niBeti Dibilatayimi;
23 hadi Kiriyatayimi,+ Beti Gamuli,+ niBeti Meyoni;
24 hadi Keriyoti niBozira;+ nihanyisumba yejima yamwituña daMowabi, yakwakulehi niyamukamwihi.
25 ‘Ñovu* yaMowabi anayiketuli;Chikasa chindi anachikotoli,’ dichinahoshiyi Yehova.
26 ‘Musheteshi,+ muloña nadituumbakeshi nakudikaña naYehova.+
Mowabi nakwalañana mumasanjila indi,Nawa nekali chuma chinakusupishawu.
27 Komana Isarela hadiñi chuma chakusupisha kudi eyiku?+
Komana yena wadiña hakachi kawamakombi,Hakwila wumupukumwini mutu weyi nakumuhosha chatama?
28 Enu mwashakama muMowabi, fumenu munyisumba muyi nakushakama helola,Nawa mwiikali neyi kapompa* katuñilaña chisakala chaku kunsa yachinekineki.’”
29 “Tunatiyi Mowabi chinakudinkayi wanta, wadinyamuna chikupu,Chinakudivwimbayi, chinakudinkayi wanta, chinakudinyamunayi nichinakuditoheshayi mumuchima windi.”+
30 “‘Neluka kuzuwa kwindi,’ dichinahoshiyi Yehova,‘Ilaña nhoshelu yindi yamukunkulwayi yakamana.
Kwosi chuma chakelawuku.
31 Dichakaletesha nakamudili Mowabi makumbu,Muloña nakamudila Mowabi wejimaNawa nakayidila amayala amuKiri Heresi.+
32 Nakakudila, eyi muvinyu wakuSibima+Kubadika chinakamudila Yazeri.+
Nyitombu yeyi yinakuli yinakiluki kaluñalwiji.
Yinashiki kukaluñalwiji, kuYazeri.
Mukakukisañana nasulukili dehiNyikaabu yeyi yamunooña ninyivinyu yakwaañula.+
33 Kuzañalala nikutiya kuwaha anajifumishi mwitempa danyikaabuNimwituña daMowabi.+
Ami nalekeshi vinyu kwidika muwukamwinu wavinyu.
Kwosi niwumu wakadatolaña iku nakudikuwa namuzañaluku.
Kwakekala kudikuwa kwambukaku.’”+
34 “‘MuHeshiboni+ mudi nyitetu yinakutiyakana kuEleyela.+
Ananyamuni mazu awu nawa anatiyakani nikuYahazi,+Kufuma kuZowari kushika kuHoronayimi+ ndo-o nikuEgilati Shelishiya.
Nimenji akuNimirimi akooma.+
35 Nakajiyisha muMowabi,’ dichinahoshiyi Yehova,‘Ona waletaña mulambu hachinañanañaNiwalambulaña nyilambu kudi nzambi yindi.
36 Dichakaletesha muchima wami wakamwaabili Mowabi neyi chivumina chepeleli,*+Nawa muchima wami wakayaabila antu amuKiri Heresi neyi chivumina chepeleli.*
Muloña maheta anahetiyi akajiya.
37 Muloña nyitu yejima yidi natuwewula* hohu,+Nawa wevu wejima anawuleli.
Hamakasa ejima hakutapola,+Nawa mumbunda jawu mudi yisasa!’”+
38 “‘Hamawulu ejima amatala aMowabiNimumalubanza indi ejima,Mudi kwamakumbu hohu.
Muloña ami namukotoli MowabiNeyi nsaba yanatawu,’ dichinahoshiyi Yehova.
39 ‘Ochinafwiyi mutentu! Wenowu makumbu!
Ochinabalumukiyi Mowabi nakufuntamu muloña wansonyi!
Mowabi nekali chuma chinakusupishawu,Chuma chakufwisha mutentu kudi ejima amunyeñumuka.’”
40 “Muloña Yehova nahoshi nindi:
‘Tiyaña! Neyi chazenzumukaña mbuulu nakukuupula,+Yena wakatandumwina mpuula jindi hadi Mowabi.+
41 Matawuni* akayitambula,Nawa mpwembu jindi akajitambula.
Hanodu ifuku muchima wawayilobu aMowabiWakekala neyi muchima wamumbanda wunakuvwala mwana.’”
42 “‘Nawa Mowabi akamujilumuna, hakekala cheñi muzaku,+Muloña nadituumbakeshi yomweni nakudikaña naYehova.+
43 Woma, ibuku nimuhetu jidi hambidi yeyi,Eyi washakama muMowabi,’ dichinahoshiyi Yehova.
44 ‘Muntu wejima wakatemuka muloña wawoma, wakaholokela mwibuku,Nawa muntu wejima wakafuma mwibuku, wakafwa mumuhetu.’
‘Muloña nakamuletela Mowabi chaaka chakuyibabesha,’ dichinahoshiyi Yehova.
45 ‘Owu anakutemuka anemani muwulelu waHeshiboni iku ñovu yinayimani.
Muloña kesi kakafuma muHeshiboniNawa muzuzu wakafuma muSihoni.+
Kakanoñesha ihama daMowabiNituwekesi twawanyana awamayala aletaña yikonkojola.’+
46 ‘Yayo-o! eyi Mowabi!
Antu jaKemoshi+ anajilumuki.
Muloña anyaneyi awamayala anayitwali muwunkoli,Nawa anyaneyi awambanda anayi muwunkoli.+
47 Ilaña nakapompesha ankoli jaMowabi mumafuku akukuminina,’ dichinahoshiyi Yehova.
‘Aha dihanakumini nsañu yakumusompesha Mowabi.’”+
Tumazu twaheshina
^ Hela “kaposhi kakiñewa.”
^ Hela hekwawu, “heluña dooma.”
^ MuchiHeberu, “Nseñu.”
^ Hela “kankudimba.”
^ Dikwila nawu, ipeleli davumishañawu hakwimba mukeña hachipenji.
^ Dikwila nawu, ipeleli davumishañawu hakwimba mukeña hachipenji.
^ Hela “nkuubu.”
^ Hela “jimbaka.”
