Yeremiya 49:1-39
49 Kutalisha hadi aAmoni,+ Yehova nahoshi nindi:
“Komana Isarela hakweti anyana awamayalaku?
Komana hakweti nswanaku?
Muloñadi Malikami+ chinakushakaminayi muGadi?+
Nawa muloñadi antu jindi chinakushakaminawu munyisumba yaIsarela?”
2 “Yehova nahoshi nindi, ‘Dichi tiyenu! mafuku anakwinza,Hinakatiyakesha kabobobu kanjita kakulukuka Raba+ wawaAmoni.+
Wakekala mulumba wamukunkulwayi,Nawa matawuni* amunyeñumuka akayocha nakesi.’
‘Nawa Isarela wakayiswana ana amuswanini,’+ dichinahoshiyi Yehova.
3 ‘Dilaku makumbu, eyi Heshiboni, muloña Ayi anamujilumuni!
Dilenu, enu matawuni* anyeñumuka Raba.
Vwalenu yisasa.
Dilenu makumbu nikunyeñumoka mukachi kamayinda amalola,*Muloña Malikami wakaya muwunkoli,Hamu nawatupristu indi niayilolu indi.+
4 Muloñadi chiwadisambilaña nayinekineki,Nachana cheyi chinakuhita menji, eyi mwana wamumbanda wabula kushinshika,Eyi wakuhwelela mumaheta eyiNawa wahoshaña neyi: “Hinyi wukwinza nakuñimakena?”’”
5 “‘Inakuleta chuma chakufwisha mutentu hadi eyi,’ dichinahoshiyi Mwanta Wabadika, Yehova wamazaza,‘Kufuma kudi ejima akunyeñumuka.
Akakupalañeshela kutubadi twejima,Nawa kwosi wakapompesha ana akatemukaku.’”
6 “‘Ilaña hansa yachu, nakapompesha ankoli awaAmoni,’ dichinahoshiyi Yehova.”
7 Kutalisha hadi Edomi, Yehova wamazaza nahoshi nindi:
“Komana muTemani himudihu cheñi maanaku?+
Komana owu akweti kashinshi analeki dehi kuhana wukwashu wawuwahi?
Komana maana awu anatoki dehi?
8 Temukenu, balumukenu!
Yenu mwakashakami mwakunama, enu mwashakama muDedani!+
Muloña Esawu nakamuletela kukalaNeyi mpinji yakumubalumukila yinashiki dehi.
9 Neyi akakukumuna nyivinyu enza kudi eyi,Komana hiyadi kushiyahu yikwawu yakunonojolaku?
Neyi amakombi enza nawufuku,Adi kukisañana hohu yuma yinakukeñawu.+
10 Ilaña nakamuvuula Esawu.
Nakabutununa maluña indi akuswamamu,Kulonda akabuli kuswama.
Anyanindi, amanakwindi niantuñi nindi ejima akajilumuka,+Nawa hakekalaku nawa cheñiku.+
11 Shiyaku anyaneyi abula atata jawu,Nakayihemba amomi,Nawa antuluwa jeyi akakuhwelela mudi ami.”
12 Muloña Yehova nahoshi nindi: “Tiyaña! Neyi chakwila owu anabuli kufuukwilawu kunwa kaapu atela kukinwa, komana eyi atela kukuleka chikupu chakadi kukubabesha? Hiyakabula kukubabeshaku, muloña watela kukinwa.”+
13 Yehova nahoshi nindi, “Muloña nadisanyiki ami aweni nami, Bozira wakekala chuma chakuhayama chikupu,+ chakusawula, mahembi, niishiñu; nawa nyisumba yindi yejima yakekala mahembi haya nyaaka.”+
14 Natiyi mazu anafumi kudi Yehova,Ntemesha anamutemeshi kunyuza, nakuhosha nindi:
“Dipompeshenu hamu mwinzi nakumwimakena;Diloñeshenu kuzuña njita.”+
15 “Muloña tiyaña! Nakubalumuni kwikala wakehelamu hakachi kanyuza,Adiwulawu hakachi kawantu.+
16 Mutentu iwaleteli wunakudimbi,Kudivwimba kwamuchima weyi,Eyi washakama muyiswamu yamumalola,Eyi washakama hakapidi kakalehi nankashi.
Hela chakwila watuñila chisakala cheyi hewulu neyi mbuulu,Nakakutululahu,” dichinahoshiyi Yehova.
17 “Nawa Edomi watela kwikala chuma chakuhayama chikupu.+ Muntu wejima wakahitilaku wakahayama chikupu nikwimbila yipupu yindi yejima muloji.
18 Neyi chajilumwiniwu Sodoma naGomora nimatawuni* ayinyeñumukili,”+ dichinahoshiyi Yehova, “kwosi niwumu wakashakamamu, nawa kwosi muntu wakatuñilamuku.+
19 “Tiyaña! Kwakenza muntu wakalukuka maluña akiñewa akudiishilamu yimuna neyi mutupa+ wunakufuma mwivunda dajika kumukulishu waYodani, ilaña mukapinji kantesha nakamukojeja yakamutemuki. Nawa yena nakamutondela watondewa. Muloña hinyi wudi neyi ami, nawa hinyi wukutaadika nanami? Kabiñanyi wunateli kwimana kumesu ami?+
20 Dichi tiyenu, enu antu, munamufuukwiliwu Edomi kudi Yehova niyuma yinatoñojokeliyi antu ashakamaña muTemani:+
Chalala anyana kanyikoku ahamukanka akayikokañesha.
Wakabalumuna maluña awu akushakama akekali mahembi muloña wawena.+
21 Iseki dinakanki muloña walushindu lwakudimbuka kwawu.
Kudi kwanyitetu!
Yinatiyakani nikuKaluñalwiji Kachinana.+
22 Tiyaña! Kufwana mbuulu, wakatuuka mwiwulu nikuzenzumuka,+Nawa wakatandumwina mpuula jindi hadi Bozira.+
Hanodu ifuku muchima wamashidika awaEdomiWakekala neyi muchima wamumbanda wunakuvwala mwana.”
23 Kudi Damakasa nindi:+
“Hamati+ niAripadi anayitiyishi nsonyi,Muloña anatiyi nsañu yatama.
Anasuñunuki nawoma.
Mukaluñalwiji mudi kwakama kwakukañanya kuwundisha.
24 Damakasa kuhamuka kunamumani.
Nabalumuki nindi atemuki, ilaña woma wunamukwati.
Yihuñu ninyisoñu jinamukwati,Neyi mumbanda wunakuvwala mwana.
25 Muloñadi musumba washimekañawu chinabuli kuwushiyawu chisayikila,Tawuni* yenzala namuzañalu?
26 Muloña anyikwenzi indi akadimbuka mumalubanza indi,Nawa amashidika ejima akajilumuka hanodu ifuku,” dichinahoshiyi Yehova wamazaza.
27 “Nakwocha mpwembu yaDamakasa nakesi,Nawa kakanoñesha tuposhi twakola twaBenihadadi.”+
28 Kudi Kedari+ nimawanta aHazori, owu ashindiliyi Mwanta Nebukaneza* wakuBabiloni, Yehova nahoshi nindi:
“Nyamukaku, kandukaku kuKedari,Nawa wujilumuni anyana akuMusela.
29 Matenti awu ninyikanka yayimuna yawu akayisenda,Mahina awu akwitenti niyuma yawu yejima.
Angameli awu akayitambula,Nawa akayidilila nawu, ‘Yuma yakutiyisha woma yidi kwejima!’”
30 Yehova nahoshi nindi, “Temukenu, yenu kwakulehi!
Yenu mwakashakami mwakunama, enu mwashakama muHazori.
Muloña Mwanta Nebukaneza* wakuBabiloni nayikasili kafuta,Nawa nakasi kafuta kakuyilukukilamu.”
31 “Nyamukenu, yenu nakwimakena musumba wudi mukuwunda,Wunakushakama chakiñewa!” dichinahoshiyi Yehova.
“Hiwukweti yiisu hela nyikomenuku; ashakamaña kwakankawawu.
32 Angameli awu akayipuupa,Niyimuna yawu yayivulu akayipuupa.
Nakayipalañeshela kumpepela jejima,*Owu alelaña nsuki jawu mumbulukutu,+Nawa nakayiletela kukala kufuma kutubadi twejima,” dichinahoshiyi Yehova.
33 “Nawa Hazori wakekala mwakushakama nyumbu,Mahembi ahaya nyaaka.
Kwosi niwumu wakashakamamuku,Nawa kwosi muntu wakatuña mudi yenaku.”
34 Idi didu izu daYehova denjili kudi kaprofwetu Yeremiya kutalisha hadi Elami+ mukutachika kwachiyuulu chaMwanta Zedekiya+ waYuda nawu:
35 “Yehova wamazaza nahoshi nindi, ‘Ichi inakukotola wuta wamukunji waElami,+ nsulu* yañovu jawu.
36 Inakumuletela Elami mpepela jiwana kufuma kunsa jiwana jamawulu, nawa nakuyipalañeshela kuniji mpepela jejima. Antu amuElami akapalañana akaya kunyuza yejima.’”
37 Yehova nahoshi nindi, “Nakajilumuna aElami hamesu awayilumbu jawu nihamesu anowu anakukeña kuyijaha;* nawa nakaleta yihuñu hadi wena, kuzuwa kwami kwasweja. Nakayitemeshela nimpoku yakabali sampu nayijiyishi.”
38 Yehova nahoshi nindi, “Nawa nakasha itanda dami muElami,+ nawa dimunakamujilumwina mwanta niayilolu jindi.”
39 Yehova nahoshi nindi, “Ilaña mumafuku akukuminina, nakapompesha ankoli amuElami.”
Tumazu twaheshina
^ Hela “jimbaka.”
^ Hela “jimbaka.”
^ Hela “mayinda anyikoku.”
^ Hela “jimbaka.”
^ Hela “Mbaka.”
^ MuchiHeberu, “Nebukareza,” hinsonekelu yaambukaku.
^ MuchiHeberu, “Nebukareza,” hinsonekelu yaambukaku.
^ Hela “kutubadi twejima.”
^ MuchiHeberu, “ntachikilu.”
^ Hela “anakufwila wumi wawu.”
