Yeremiya 5:1-31
5 Hitañanenu munyikwakwa yamuYerusalema.
Mutalatali nawa mushinshiki chikupu.
Mukeñakeñi mumalubanza amusumba kulonda mumoniNeyi mukutwesha kuwana muntu welaña mwawuñanji,+Wafwilaña kwikala waloña,Nawa ami nukwanakena musumba.
2 Hela chakwila ahoshaña nawu: “Kwesekeja nachahandayi Yehova!”
Ilaña asanyikaña mwakutwamba.+
3 Eyi Yehova, komana mesu eyi hiyatalaña hakashinshiku?+
Wayeteli, ilaña hiyahimpiliku.*
Wayijilumwini, ilaña akaanini kutambwila kufumba.+
Akolesheli kumesu awu kubadika ilola,+Nawa akaanini kubalumuka.+
4 Ilaña ami nadihoshesheli nami: “Mwamweni awa hiyantu abula kulema.
Elaña mwawusupi, muloña hiyeluka njila yaYehovaku,Wunsompeshi waNzambi yawu.
5 Nukuya kudi antu alema kulonda nihoshi nawu,Muloña atela elukili njila yaYehova,Wunsompeshi waNzambi yawu.+
Ilaña wejima wawu akotweli mpaandaNikuketola nyonji.”
6 Dichayilukukilañawu kudi mutupa wamwisaña,Kañwidi kamuyana yachinkalampata kanakuyikisañana,Chisumpa wayibelaminaña kunyisumba yawu.
Muntu wejima wukwidikamu amutabolaña.
Muloña akweti yiluwa yayivulu;Yilwilu yawu yakubula kushinshika yayivulu nankashi.+
7 Nateli kukwanakena ñahi hachumichi?
Anyaneyi ananshiyi,Nawa asanyikaña kuchuma chabula kwikala Nzambi.+
Nayinkeleña yuma yakeñeleñawu,Ilaña wena atwalekelihu kwila wujila,Nawa akuñulukilileña kwitala danyakalwalu.
8 Adi neyi atuwalu, akweti mpwila yawuvumbi chikupu,Muntu-himuntu nakukobola ñoda mukwawu.+
9 Yehova nahoshi nindi, “Komana kwila niyisompesha hayumiyi nehi?”
“Komana ami* kwila niditenda ami aweni naniwu muza nehi?”+
10 “Inzaku kumatempa indi anyivinyu nawa wuyikisañani,Ilaña bayi wuyikisañana chikupuku.+
Kunkulaku nyitayi yindi yinasapuki,Muloña yaYehova wanyi.
11 Muloña amwitala daIsarela niamwitala daYudaAdikañaña chikupu nanami,” dichinahoshiyi Yehova.+
12 “Anamukaani Yehova, nawa anakuhoshaña nawu,‘Kwosi jakelayiku.*+
Kwosi kukala kwakenza hadi etuku;Hitwakamonahu mpoku yakabali hela nzala yakapwelendendiku.’+
13 Atuprofwetu ahoshaña jakutwamba,Izu* hididi mudi wenaku.
Chumichi chiyimwekeni!”
14 Dichi, Yehova, Nzambi wamazaza, nahoshi nindi:
“Chineli ichi dichinakuhoshawu awa antu,Inakwilisha mazu ami ekali kesi mukanwa keyi,+Nawa awa antu akwikala nchawa,Nawa kakuyocha.”+
15 Yehova nahoshi nindi, “Enu amwitala daIsarela, inakuyiletela muza kufuma kwakulehi.+
Muza wunashimbuli.
Himuza wakushankulu,Muza wahoshaña idimi dimwabula kwiluka,Nawa wukweti nhoshelu yimukukañanya kutiya.+
16 Ipakumuna dawu danyivu didi neyi ijamu dachashi;Wejima wawu hiyakakuzuña njita.
17 Akakisañana jiwakañula niyakuda yeyi.+
Akakisañana anyaneyi awamayala niawambanda.
Akakisañana nyikanka yeyi yanyikoku niyawañombi.
Akakisañana nyivinyu yeyi ninyitondu yeyi yayikuyu.
Akajilumuna nyisumba yeyi yiwakuhwelela nampoku yakabali.”
18 Yehova nahoshi nindi, “Ilaña nihanowu mafuku, hinakayikisañana chikupuku.+
19 Nawa neyi ehula nawu, ‘Muloñadi Yehova Nzambi yetu chinatukoñeliyi yuma yejimiyi?’ wakayakuli neyi, ‘Neyi chimwanshili nakukalakela nzambi wakutwamba mwituña denu, dichimwakakalakela niañiinza mwituña dambala.’”+
20 Wushimuni chumichi kudi amwitala daYakoba,Nawa wuchibidiki muYuda neyi:
21 Enu antu asupa nawa abula maana,* tiyenu chumichi:+
Akweti mesu, ilaña hiyamonañaku;+Akweti matu, ilaña hiyatiyañaku.+
22 ‘Mwantiyaña woma wanyi?’ dichinahoshiyi Yehova,‘Komana kwila munzaala nehi?
Yami nashili wusekulula kwikala ñinza yakaluñalwiji,Nalushimbi lwahaya nyaaka kulonda kabuli kubadikahu.
Hela chakwila mankanda aku akubwankañila ñahi, hiyakutweshaku;Hela chakwila akuvuma ñahi, hohamu hiyakutwesha kupandakanahuku.+
23 Ilaña awa antu akweti nyichima yachinchika nawa yadikaña;Anasenuki nakuya munjila yinakeñiwu awenawu.+
24 Nawa ahoshaña wanyi mumuchima wawu nawu:
“Ichi dinu tumutiyenu Yehova Nzambi yetu woma,Owu wahanaña nvula muchilaaka chayu,Nvula yakusambila ninvula yakukumishaku,Watuhembelaña nyilungu yakutoñola dehi yakwaañwilahu.”+
25 Yiluwa yenu enu aweni yinakañeshi yumiyi kwinza;Nshidi jenu enu aweni jinayibondi yuma yayiwahi.+
26 Muloña hakachi kawantu jami hadi antu atama.
Atwalekañahu kubelamina, neyi chafukamaña ayibinda atuda.
Ataña nyihetu yafwana.
Alawulaña antu.
27 Matala awu anenzali namakudi,+Neyi chikalaña chinenzali natuda.
Dichinekaliliwu nañovu nimaheta.
28 Anatohi nawa analambi;Anakwila yuma yatama chikupu
Mwana wabula tata yindi hiyamuhakwilaña mwawuñanjiku,+Kulonda yuma yiyiwahileña;Nawa hiyasompeshaña atuzweñi mwawuñanjiku.’”+
29 Yehova nahoshi nindi, “Komana kwila niyisompesha hayumiyi nehi?”
“Komana ami* kwila niditenda ami aweni naniwu muza nehi?
30 Chishimashima nichuma chakuhayamisha chinamwekani mwituña:
31 Atuprofwetu anakuprofweta jamakudi,+Nawa atupristu anakuyuula antu kuzatisha wuswa wawu.
Antu jami dichakeñawu chochenichi.+
Ilaña mwakeladi neyi kukuma kunashiki dehi?”
Tumazu twaheshina
^ MuchiHeberu, “hiyazeyeliku.”
^ Hela “wumi wami.”
^ Hela hekwawu, “Wekalaku wanyi.”
^ Dikwila nawu, izu daNzambi.
^ MuchiHeberu, “Enu antu asupa akadi muchima.”
^ Hela “wumi wami.”