Yeremiya 52:1-34
52 Zedekiya+ wadiña nayaaka 21 hekaliliyi mwanta nawa wayuulili yaaka 11 muYerusalema. Ijina damama yindi dadiña Hamutali+ mwana kaYeremiya wakuLibina.
2 Watwalekelihu kukoña yuma yatama kumesu aYehova kwesekeja nayuma yejima yakoñeliyi Yehoyakimi.+
3 Yumiyi yamwekeni muYerusalema nimuYuda muloña wakuzuwa kwaYehova, sampu nichayifumishiliyi kumesu indi.+ Nawa Zedekiya wadikañili namwanta wakuBabiloni.+
4 Muchaaka chamu 9 chachiyuulu chaZedekiya, mukakweji kamu 10, hefuku damu 10 dakakweji, Mwanta Nebukaneza* wakuBabiloni wenjili hamu nanjita yindi yejima nakuzuña naYerusalema. Ateekeleli kwakwihi naniwu musumba nawa atuñili mpwembu yakukuchika nachu nakuwunyeñumwisha kwi-i ndo-o.+
5 Nawa iwu musumba awukuchikili kushika nimuchaaka chamu 11 chaMwanta Zedekiya.
6 Mukakweji kamuchiwana, hefuku damu 9 dakakweji,+ nzala yakapwelendendi yaswejeli mumusumba nawa himwadiña yakuda yateleleli kuda antu amwituñaku.+
7 Nkumininaku, mpwembu yamusumba ayilokweli nawa amashidika ejima atemukili mumusumba nawufuku kuzatisha chiisu chadiña hakachi kampwembu jiyedi kwakwihi netempa damwanta iku aKalideya anawukuchiki iwu musumba. Nawa atwalekelihu kuya munjila yaya kuAraba.+
8 Ilaña njita yawaKalideya yamukumpishili mwanta, nawa amuwanini Zedekiya+ muyana yachinkalampata yakuYeriku nawa mazanvu amashidika indi ejima amupalañeni.
9 Kufumahu, mwanta amukwatili nawa amukandwishili nakumuleta kudi mwanta wakuBabiloni kuRibila mwituña daHamati nawa wamusompesheli.
10 Nawa mwanta wakuBabiloni wajahili anyana kaZedekiya awamayala iku nakutalaku, wajahili niatulamba ejima amuYuda kwenoku kuRibila.
11 Kuhiñahu, mwanta wakuBabiloni wamuputishili Zedekiya mesu,+ wamuhatili mumpompa jawuneñu, wamuleteli muBabiloni nawa wamushili mukaleya kushika niifuku dafwiliyi.
12 Mukakweji kamuchitanu, hefuku damu 10 dakakweji, dikwila nawu muchaaka chamu 19 chachiyuulu chaMwanta Nebukaneza* mwanta wakuBabiloni, Nebuzaradani mukulumpi wawatulama, owu wadiña mukakukalakela mwanta wakuBabiloni, wenjili muYerusalema.+
13 Wocheli itala daYehova,+ itala* damwanta nimatala ejima amuYerusalema; wocheli nimatala ejima amaneni.
14 Nawa mpwembu janyeñumukili Yerusalema ajihumwini kudi mashidika awaKalideya ejima owu adiña namukulumpi wawatulama.+
15 Nebuzaradani mukulumpi wawatulama wasendeli antu amakwawu akehelamu niejima ashalili mumusumba nakuyitwala muwunkoli. Wasendeli cheñi niantu ayili nakudibomba namwanta wakuBabiloni kushilahu niakawukalawenu ejima elukisha nyidimu.+
16 Ilaña Nebuzaradani mukulumpi wawatulama washiyilihu atuzweñi chikupu amakwawu amwituña kulonda ekali akakukalakala anyivinyu niakakuzata nyidimu yakudima yakola yashiyashana.+
17 Nawa aKalideya abalwili yishimi yawuneñu muyibalu-yibalu+ yakwitala daYehova, matemba+ niKaluñalwiji+ jadiña mwitala daYehova, nawa asendeli wuneñu wejima nakuwutwala kuBabiloni.+
18 Asendeli niyifwoyu, mafosholu, jakujima nachu kesi, yeña yakunama,+ makaapu*+ niyipwepu yejima yawuneñu yazatishileñawu kumudimu wamutembeli.
19 Mukulumpi wawatulama wasendeli mabeseni,*+ jakusendelahu kesi, yeña yakunama, yifwoyu, jakutentekahu manoñu,+ makaapu* niyeña yakunama yatuñiliwu nawuru nisiliva yayeni.+
20 Hakwila yishimi yiyedi, Kaluñalwiji, añombi ayizamba 12+ hashakamini Kaluñalwiji nimatemba atuñiliyi Mwanta Solomoni amwitala daYehova, wuneñu wejima wayumiyi wadiña wakukañanya kutwesha nikupima.
21 Hakwila yishimi yiyedi, chishimi-hichishimi chadiña namakyubiti* 18 mukuleha kwiwulu, anateli kuchinyeñumuka kudi mwonji wamakyubiti 12;+ mudita wachu wadiña neyi kutoha kwanyinu yiwana,* nawa chadiña nampaku.
22 Nawa mutu wachishimi wadiña wawuneñu; mutu wumu wadiña makyubiti atanu mukuleha kwiwulu;+ nawa chikuñu chamesu-mesu chadiña neyi kaleñi nimapomegiranati anyeñumwishiliwu kumutu, jejimiji jadiña jakutuña nawuneñu. Chishimi chamuchiyedi chadiña neyi chena, nimapomegiranati dichadiñawu.
23 Mutubadi mwadiña mapomegiranati 96;* ejima hamu adiña 100 kunyeñumuka kuchikuñu chamesu-mesu.+
24 Mukulumpi wawatulama wasendeli niSeraya+ kapristu muneni, Zefwaniya+ kapristu wamuchiyedi niakakuhemba kuchiisu asatu.+
25 Nawa wasendeli chilolu wamuchota wumu mumusumba owu wadiña mukulumpi wamashidika. Wasendeli niamabwambu jamwanta chikupu 7 awaniniwu mumusumba, kushilahu ninsoneki yamukulumpi wanjita owu wapompesheleña hamu antu amwituña niamayala 60 afumini hakachi kawantu abula kulema amwituña awaniniwu mumusumba.
26 Nebuzaradani mukulumpi wawatulama wayisendeli nakuyileta kudi mwanta wakuBabiloni kuRibila.
27 Mwanta wakuBabiloni wayitapili nawa wayijahilili kuRibila+ mumpata yaHamati. Dichi Yuda wafumini mwituña dindi nakuya muwunkoli.+
28 Awa diwu antu atwaliliyi Nebukaneza* muwunkoli: muchaaka chamu 7, aYudeya 3,023.+
29 Muchaaka chamu 18 chaNebukaneza,*+ antu* 832 ayifumishili muYerusalema.
30 Muchaaka chamu 23 chaNebukaneza,* Nebuzaradani mukulumpi wawatulama watwalili aYudeya muwunkoli, antu* 745.+
Antu ejima atwaliliwu muwunkoli adiña 4,600.
31 Dichi muchaaka chamu 37 chawunkoli waMwanta Yehoyakini+ waYuda, mukakweji kamu 12, hefuku damu 25 dakakweji, Mwanta Evilimerodaki wakuBabiloni, muchaaka chekaliliyi mwanta, wamuumbiliku* Mwanta Yehoyakini waYuda nawa wamufumishili mukaleya.+
32 Wahosheleña nayena munjila yayiwahi nawa watuumbakesheli chikupu itanda dindi kubadika matanda awanyanta amakwawu adiña hamu nayena muBabiloni.
33 Dichi Yehoyakini wavuulili yakuvwala yindi yamukaleya nawa wadiileña hamu nindi mafuku ejima akuhanda kwindi.
34 Amwinkeleña yakuda mpinji yejima kudi mwanta wakuBabiloni, hefuku-hefuku, kushika niifuku dafwiliyi, mumafuku ejima akuhanda kwindi.
Tumazu twaheshina
^ MuchiHeberu, “Nebukareza,” hinsonekelu yaambukaku.
^ MuchiHeberu, “Nebukareza,” hinsonekelu yaambukaku.
^ Hela “chipañu.”
^ Hela “jimpasa.”
^ Hela “jimpasa.”
^ Hela “jimbashila.”
^ Kyubiti yimu yesekeni namasentimita 44.5 (mainchi 17.5). Talenu Nsañu Jikwawu B14.
^ Chipimu chakutoha kwamunu kwesekana namasentimita 1.85 (mainchi 0.73). Talenu Nsañu Jikwawu B14.
^ Iwu himukaabu wawulombu wameruni nawa wamwekanaña neyi apo.
^ MuchiHeberu, “Nebukareza,” hinsonekelu yaambukaku.
^ MuchiHeberu, “Nebukareza,” hinsonekelu yaambukaku.
^ Hela “mawumi.”
^ MuchiHeberu, “Nebukareza,” hinsonekelu yaambukaku.
^ Hela “mawumi.”
^ MuchiHeberu, “wanyamwini mutu.”
