Yeremiya 6:1-30
6 Enu anyana kaBenjamini, fumenu muYerusalema muyi nakuswama kwacheñi.
Vumishenu luseñu+ muTekowa;+Mubutwilenu Betihakeremi chinjikijilu chakesi!
Muloña yihuñu yinakufumina kukabeta kakuchimunswa, yayivulu nankashi.+
2 Mwana kaZiyona wamumbanda wadifwana namumbanda walubanji nawa wamwovu.+
3 Atubiña akenza hamu nanyikanka yawu yayimuna.
Akalema matenti awu nakumunyeñumuka,+Muntu-himuntu wakadiishaña mukanka windi.+
4 “Diloñeshenu* tuzuñi nindi njita!
Nyamukenu, tuyenu tumulukuki itena mwiwulu!”
“Oyihuñu yitukumona, muloña itena hidikuhuma,Muloña nyevulu yamelela yinakulehelaku!”
5 “Nyamukenu, nawa tuyenu tulukuki nawufukuKulonda tukisañani tuposhi twindi twakola.”+
6 Muloña Yehova wamazaza nahoshi nindi:
“Temenu nyitondu mutuñi mbañu yakukuchika nachu Yerusalema.+
Himusumba atela kufwishawu namuloña;Mudi yena mwosi chuma chacheñiku, mudi hohu kukabishana.+
7 Neyi chatuutishaña ishima menji adu,Niyena dichatuutishañayi kutama kwindi.
Mudi yena mwatiyakanaña hohu madombu nikujilumuka;+Mpinji yejima namonaña yikatu niyipupu.
8 Eyi Yerusalema, soñamaku, neyi nehi nukukufutalela nakukuhela;+Nukukubalumuna mahembi, wiikali ituña dakadi antu anashalimu.”+
9 Yehova wamazaza nahoshi nindi:
“AIsarela anashalihu akayihuhujola chikupu neyi chahuhujolañawu nyikaabu yakukumishaku kumuvinyu.
Ololaku chikasa cheyi cheñi neyi muntu wunakukumuna nyikaabu kunyivinyu.”
10 “Hinyi inatela kuhosha nindi kulonda nimusoñamishi?
Hinyi wukutiyilila?
Tiyenu! Anajiki matu awu,* kulonda abuleña kutiyilila.+
Tiyenu! Izu daYehova dinekali chuma chinakudiwulawu;+Hiyadikeñaku.
11 Dichi ami nenzali nakuzuwa kwaYehova,Nawa nazeyi nakukuhemba.”+
“Kuhuñunwini hadi mwana wudi mumukwakwa,+Hezanvu dawanyikwenzi anapompi hamu.
Wejima wawu akuyisenda, iyala wejima hamu nañodindi,Mukulumpi hamu nakashinakaji.*+
12 Matala awu akwikala awantu acheñi,Hamu nimaha awu niañodi jawu.+
Muloña nukwolwela antu ashakama mwituña chikasa chami,” dichinahoshiyi Yehova.
13 “Muloña kutachikila kudi muntu wabula kulema nakushika kudi walema, wejima wawu anakuhetela muwupwapoki;+Kutachikila kudi kaprofwetu nakushika kudi kapristu, wejima wawu anakutambula majika kanwa.*+
14 Nawa esekaña kuuka nakaneñawudi antu jami akotoka, nakuhosha nawu,‘Kudi kuwunda! Kudi kuwunda!’
Henohu kuwunda kwosi.+
15 Komana atiyaña nsonyi nayuma yawuzondu yinakoñiwu?
Hiyatiyaña nsonyi hela hantiku!
Hiyeluka nichatiyakanaña kusawukaku!+
Dichi akadimbukila hamu nanowu anakudimbuka.
Chinakayibabesha akahukana,” dichinahoshiyi Yehova.
16 Yehova nahoshi nindi:
“Imanenu hamaakenu ajinjila kulonda mumoni.
Ihulenu njila jakushankulu,Ihulenu kudi njila yayiwahi, nawa endenumu,+Kulonda mumoni* kunooka.”
Ilaña wena anahoshi nawu: “Etu kwetu tukwendamu wanyi.”+
17 “Nawa natondeli mukakutalatala+ wahosheli nindi,‘Tiyililenu chivumina chaluseñu!’”+
Ilaña wena ahosheli nawu: “Etu kwetu tukutiyilila wanyi.”+
18 “Dichi enu nyuza, tiyenu!
Nawa enu izaza, ilukenu,Chuma chikuyimwekena awa antu.
19 Eyi iseki, tiyaku!
Inakuleta kukala hadi awa antu+Nyikaabu yatufuta twawu aweni,Muloña hiyatiyilili kumazu amikuNawa akaanini nshimbi* jami.”
20 “Nukuwaninamu mwodi neyi muleta manaña evumba dadiwahi kufuma kuShebaNikalamasi yatowala* yakwituña dakwakulehi?
Nyilambu yenu yamukuma yakushita hinayitambwilañaku,Nawa nyilambu yenu yantiyishaña kuwaha wanyi.”+
21 Dichi, Yehova nahoshi nindi:
“Awa antu inakuyishilaku yuma yakuhukesha,Nawa yikuyihukesha,Atata jawantu nianyanawu hamu,Muntu niibwambu dindi,Nawa wejima wawu akujilumuka.”+
22 Yehova nahoshi nindi:
“Tiyenu! Luntu lunakwinza kufuma kwituña dakukabeta kakuchimunswa,Nimuza weneni wakahinduka kufuma kumaluña akwakulehi ahamaseki.+
23 Akakwata kuwuta wamukunji nikwiyoña.
Hiyantu atama nyichima nawa hiyakatiya luwiku.
Mazu awu akavuma neyi kaluñalwiji,Nawa endelaña hatuwalu.+
Aditanjikaña munyisululu neyi iyala mukanjita wunakukulukuka, eyi mwana kaZiyona wamumbanda.”
24 Tunatiyi dehi nsañu kutalisha hayumiyi.
Makasa etu aneli tuhu kwalehu-u;+Yihuñu yinatuwani,Nyisoñu* neyi yamumbanda wunakupaapa.+
25 Bayi muya mwihaku,Nawa bayi mwenda mumukwakwaku,Muloña chilumbu wudi nampoku yakabali;Kwejima kudi yuma yakutiyisha woma.
26 Eyi mwana kawantu jami wamumbanda,Vwalaku yisasa+ nawa alañanaku mumawuti.
Dilaku neyi wunakudila mwaneyi weyala wumu hohu, namakumbu chikupu,+Muloña mukakujilumuna nakutulukuka katataka.+
27 “Nakwilishi eyi* kwikala mukakupima yikuñu mukachi kawantu jami,Owu watalatalaña chiwahi;Watela kwiluka nikushinshika yuma yinakwilawu.
28 Wejima wawu hiyantu achinchika,+Akimbokaña nakutwambila akwawu.+
Adi neyi wuneñu nichikuñu;Wejima wawu anakwila mwawupwapoki.
29 Nyuuba yinahi.
Mukesi munakufuma hohu nsumbu.
Muntu nakusuñununa hohu chamukunkulwayi,+Nawa owu atama anayaambuli wanyi.+
30 Akayitena kudi antu nawu hisiliva yinakaaniwu,Muloña Yehova nayikaani.”+
Tumazu twaheshina
^ Hela “Dijilikenu.”
^ MuchiHeberu, “Matu awu akadi kwalama.”
^ MuchiHeberu, “owu enzala namafuku.”
^ Hela “maseleka.”
^ Hela “mawumi enu.”
^ Hela “kuleja.”
^ Iteti devumba dadiwahi.
^ MuchiHeberu, “Nyisoñu yakuvwala.”
^ Dikwila nawu, Yeremiya.
