Yeremiya 7:1-34
7 Idi didu izu denjili kudi Yeremiya kufuma kudi Yehova nawu:
2 “Imanaku muchiisu chetala daYehova nawa wubidiki iyi nsañu kwenoku neyi, ‘Tiyenu mazu aYehova, enu antu ejima amuYuda mweñililaña muniyi yiisu nakudibuka kudi Yehova.
3 Yehova wamazaza, Nzambi yaIsarela, nahoshi nindi: “Himpenu njila jenu niyilwilu yenu, kulonda niyiteji kutwalekahu kushakama munidi iluña.+
4 Bayi mukuhwelela mumazu amakudiku, nakuhosha nenu, ‘Iyi hitembeli yaYehova, tembeli yaYehova, tembeli yaYehova!’+
5 Muloña neyi mwamweni mukuhimpa njila jenu niyilwilu yenu; neyi chalala mukuhakulaña nsañu yamuntu namukwawu mwawuñanji;+
6 neyi mubula kukabisha añiinza, anshona* niantuluwa; neyi mubula kupwekesha mashi akadi muloña munidi iluña;+ nawa neyi mubula kulondela anzambi acheñi nakudiletela kukala;+
7 dihu dinu hinukuyiteja kutwalekahu kushakama munidi iluña, mwituña dinenkeli ankakulula jenu haya nyaaka.”’”*
8 “Ilaña munakukuhwelela mumazu amakudi,+ chuma chikabula kuyikwasha hela hanti.
9 Komana munateli kwiya,+ kujahana, kwila wujila, kusanyika mwakutwamba,+ kulambula nyilambu* kudi Bayali+ nikulondela anzambi imwabulili kwiluka,
10 kufumahu himukwinza nakwimana kumesu ami munidi itala dikweti ijina dami nakuhosha nenu, ‘Akutwamwina,’ hela chakwila munakukoña yuma yejimiyi yawuzondu?
11 Komana idi itala dikweti ijina dami dinekali iyeñu dawatupondu kudi enu?+ Nadimweni ami aweni yuma yimunakwila,” dichinahoshiyi Yehova.
12 “‘Hela chochu, yenu kwiluña dami muShilo,+ kunasambilili kusha ijina dami,+ kulonda mukamoni chinelili idi iluña muloña wakutama kwawantu jami aIsarela.+
13 Ilaña mwatwalekelihu kukoña yuma yejimiyi,’ dichinahoshiyi Yehova, ‘nawa hela chakwila nahosheleña nanenu kapampa kakavulu,* himwatiyililiku.+ Natwalekelihu kuyitambika, ilaña enu himwetiyiliku.+
14 Neyi chinelili naShilo,+ dichinakela ninetala dikweti ijina dami,+ dimwakuhwelela,+ ninanidi iluña dinayinkeli enu niankakulula jenu.
15 Nakayinatila kwakulehi namesu ami, neyi chinayinatili anakwenu ejima, mutaña wejima waEfuremu.’+
16 “Ilaña eyi, bayi wuyilombelaku awa antuku. Bayi wuyidililaku hela kuyilombelaku hela kuyilembelaku kudi amiku,+ muloña ami nukukutiya wanyi.+
17 Komana hiwunakumona yuma yinakwilawu munyisumba yamuYuda nimunyikwakwa yamuYerusalemaku?
18 Anyana anakuchaya nchawa, atata jawantu anakukwatisha kesi, nawa ambanda anakukandula chikanka kulonda ochi mankendi atowala akumulambula Mwanta waMumbanda Wewulu,*+ nawa anakuhuñunwina anzambi acheñi nyilambu yavinyu kulonda anhilishi.+
19 Yehova nahoshi nindi, ‘Komana yami anakutiyishawu kutama?* Tahindi awenawu, kulonda aditiyishi awenawu nsonyi?’+
20 Dichi, Yehova Mwanta Wabadika nahoshi nindi, ‘Tiyenu! Inakuhuñunwina kuzuwa kwami nikulendumuka kwami hadinu iluña,+ hamuntu nihakanyama, hanyitondu yamwisaña nihanyikaabu yaheseki; kukubidima neyi kesi nawa kwosi wukukwijimaku.’+
21 “Yehova wamazaza, Nzambi yaIsarela, nahoshi nindi, ‘Lunjikenu nyilambu yenu yamukuma yakushita hanyilambu yenu yikwawu nawa enu aweni mudii mbiji yayu.+
22 Muloña kufuma tuhu hefuku dinayifumishili ankakulula jenu mwituña daEjipitu, hinahoshelihu nawena hela kuyileja chuma chidi chejima hanyilambu yamukuma yakushita ninyilambu yikwawuku.+
23 Ilaña nayinkeli ilu lushimbi nami: “Ovwahilenu izu dami, nawa ami nukwikala Nzambi yenu, ninenu mukwikala antu jami.+ Mwatela kwenda munjila jejima jinnayileji, kulonda yuma yiyiwahileña.”’+
24 Ilaña wena hiyatiyilili hela kuteñeleka matu awuku;+ hakwila wena, endeli mutufuta* twawu aweni, adikañili nakulondela muchima wawu watama,+ nawa afuntili hanyima, hiyayili kumbidiku,
25 kufuma tuhu hefuku dafuminiwu ankakulula jenu mwituña daEjipitu kushika nidalelu.+ Dichi natwalekelihu kutemesha ambuñami ejima atuprofwetu kudi enu, nayitemesheleña hefuku-hefuku, kapampa kakavulu.*+
26 Ilaña akaanini kuntiyilila, nawa hiyateñelekeli matu awuku.+ Ilaña adiña achinchika,* nawa akoñeli yuma yatama kubadika ankakulula jawu!
27 “Wakayileja awa mazu ejima,+ ilaña wena akakutiyilila wanyi; wakayitambika, ilaña wena akakwitiya wanyi.
28 Nawa wakayila neyi, ‘Iwu diwu muza wabulili kwovwahila izu daYehova Nzambi yawu nawa wakaanini kutambwila kufumba. Kashinshi kanamani nawa hiyanakukitenahu nihakachi kawuku.’*+
29 “Tewulaku nsuki jeyi jiwabulaña kutewula* wujinatili kwakulehi, nawa wimbili mukeña* hewulu datupidi, muloña Yehova nakaani idi ikiñu dinamuzuwishi chikupu nawa wukudishiya.
30 Yehova nahoshi nindi, ‘Muloña antu amuYuda anakoñi yuma yatama kumesu ami. Anemiki ankishi jawu awuzondu mwitala dikweti ijina dami, kulonda aditamishi.+
31 Anatuñi yinañanaña yaTofeti, yidi muChinekineki chaMwana kaHinomi,*+ kulonda ocheleñahu anyanawu awamayala niawambanda mukesi,+ chuma chinabulili kuyileja nawa chabulili kwinzahu nikumuchima wami.’*+
32 “Yehova nahoshi nindi, ‘Dichi tiyenu! mafuku anakwinza, hakaleka kutenawu nawu Tofeti hela Chinekineki chaMwana kaHinomi* ilaña nawu Chinekineki chaKujahana. Akajiikaña muTofeti sampu maluña anamani.+
33 Nawa yibimbi yanawa antu yakekala yakuda yawatuda amuluzwizu niyawanyama ahamaseki, nawa kwosi niwumu wakayitemunahuku.+
34 Nakalekesha ipumba dakudikuwa nidakuzañalala, izu dakalemba niizu dakankaña+ munyisumba yamuYuda nimunyikwakwa yamuYerusalema, muloña ituña akadikisañana.’”+
Tumazu twaheshina
^ Hela “anyana abula atata jawu.”
^ Hela “kufuma kunyaaka nakuya kunyaaka.”
^ Hela “nyilambu yakukakumuka wishi.”
^ MuchiHeberu, “kuhinduka nabudidi nakuhosha.”
^ Hinkumbu yanzambi wamumbanda kwadifukwileña aIsarela akakusekesha; hadaha nzambi wamumbanda walusemu.
^ Hela “anakuhilishawu; anakuvulokawu.”
^ Hela “mukuleja.”
^ MuchiHeberu, “kuhinduka nabudidi hefuku-hefuku nakuyitemesha.”
^ MuchiHeberu, “akolesheli nshiñu yawu.”
^ MuchiHeberu, “anakiketuli mutunwa twawu.”
^ Hela “jakudihana.”
^ Hela “kamina kakudila nachu.”
^ Talenu Kulumbulula, “Gehena.”
^ Hela “kwiñilahu nimuyitoñojoka yami.”
^ Talenu Kulumbulula, “Gehena.”
