Yeremiya 8:1-22
8 Yehova nahoshi nindi, “Hanoyu mpinji, mafwaha awanyanta amuYuda, mafwaha awayilolu jindi, mafwaha awatupristu, mafwaha awatuprofwetu nimafwaha awantu ashakamaña muYerusalema akayivumbula mumajamu awu.
2 Akayaala mwishina detena, dakakweji nidatutumbwa twejima twamwiwulu* jakeñeliwu, jakalakeleliwu, jalondeleliwu, jakeñakeñeliwu nawa kwadifukwileñawu.+ Hiyakayipompesha hela kuyijiikaku. Akekala neyi wushi heseki.”+
3 Yehova wamazaza nahoshi nindi, “Ashalahu munichi chisaka chatama owu akapuluka, akatondahu kufwa chatela atondihu wumi mumaluña ejima mwinnayipalañesheli.”
4 “Nawa watela kuyileja neyi, ‘Yehova nahoshi nindi:
“Komana akadimbuka nakukañanya kwimana cheñi?
Neyi wumu abalumuka, komana mukwawu niyena kwila abalumuka nehi?
5 Muloñadi awa antu amuYerusalema chiyanatwalekelihu kwikala abula kushinshika kudi ami?
Akakela kumakudi awu;Akaanaña kubalumuka.+
6 Ami nayitiyilili chikupu, ilaña yuma yahosheliwu yadiña yalala wanyi.
Kwosi muntu wunabalumuki nakuleka nshidi jindiku, hela kwihula nindi, ‘Chumanyi chinneli?’+
Muntu wejima natwalekihu kufunta munjila yawantu amavulu, neyi kawalu kanakutemukila kunjita.
7 Nikakumbikumbi muluzwizu keluka yilaaka yaku;*Kateela, kambimbi nichisandamakenyi* elukaña mpinji yatela kufuntawu.*
Ilaña antu jami eluka wanyi wunsompeshi waYehova.”’+
8 ‘Hanu mukuhosha ñahi nenu: “Tudi namaana, nawa tukweti nshimbi* jaYehova”?
Henohu, nsonekeshu* yamakudi+ yawansoneki anayizatishi kusoneka nachu hohu jakutwamba.
9 Akamaana anayitiyishi nsonyi.+
Anatiyi woma nawa akayikwata.
Tiyenu! Anakaani izu daYehova,Hanu dinu akweti maana amuchidinyi?
10 Dichi añodi jawu nakayihana kudi amayala acheñi,Maha awu nakayihana kudi antu acheñi;+Muloña kutachikila kudi muntu wabula kulema nakushika kudi walema, wejima wawu anakuhetela muwupwapoki;+Kufuma kudi kaprofwetu nakushika kudi kapristu, wejima wawu anakutambula majika kanwa.*+
11 Nawa esekaña kuuka nakaneñawudi mwana kawantu jami wamumbanda wakotoka, nakuhosha nawu,“Kudi kuwunda! Kudi kuwunda!”
Henohu kuwunda kwosi.+
12 Komana atiyaña nsonyi nayuma yawuzondu yinakoñiwu?
Hiyatiyaña nsonyi hela hantiku!
Hiyeluka nichatiyakanaña kusawukaku!+
Dichi akadimbukila hamu nanowu anakudimbuka.
Chinakayibabesha akahukana,’+ dichinahoshiyi Yehova.
13 Yehova nahoshi nindi, ‘Neyi nayipompeshi dehi, nakayijilumuna wejima wawu.
Kumuvinyu hikwakashalahu nyivinyuku, kumutondu wachikuyu hikwakashalahu yikuyuku, nawa mafu akalepa.
Nawa yuma yinayinkeli hiyakekala nayuku.’”
14 “Tunashakaminidi kunu?
Tudipompeshenu hamu twiñili munyisumba yakiñewa+ kulonda twakajilumukilimu.
Muloña Yehova Nzambi yetu wakatujilumuna,Nawa natwinki menji awulembi nindi tunwi,+Muloña tunamuvulumuni Yehova.
15 Twachiñejeleña kuwunda, ilaña hikwenjilihu chuma chachiwahiku,Nimpinji yakuukewa, ilaña kudi hohu yuma yakutiyisha woma!+
16 KuDani kunakutiyakana kupwambula kwatuwalu twindi.
Muloña wepumba dakutambeka kwatuwalu twindi twawamayala,Ituña dejima dakankaña.
Enzaña nawa akisañanaña ituña niyuma yejima yidimu,Musumba niantu adimu.”
17 Yehova nahoshi nindi, “Inakutemesha tupela mukachi kenu,Tupela twawulembi twakukañanya kufwomona,Nawa chakadi nikujina, tukayisuma.”
18 Chineñi chami chamanaña wanyi;Muchima wami wakata.
19 Kwituña dakwakulehi kudi mwana kawantu jami wamumbandaWunakudila kulonda amukwashi nindi:
“Komana Yehova hadi muZiyonaku?
Hela mwanta windi hadi mudi yenaku?”
“Muloñadi chinanhilishiliwu nawankishi jawu akubaza,Nawanzambi jawu akutwamba amukunkulwayi?”
20 “Mpinji yakwaañula yinahiti dehi, nooña yinamani dehi,Ilaña hiyanatwamwiniku!”
21 Naneñi chikupu chinakotoki mwana kawantu jami wamumbanda;+Nadihombi.
Chinahayamishi chikupu.
22 Komana muGiliyadi mwosi balisamu?*+
Hela mwosi mukakuuka?*+
Muloñadi mwana kawantu jami wamumbanda chinabuliliyi kukola?+
Tumazu twaheshina
^ MuchiHeberu, “mazaza ejima amumawulu.”
^ Hela “mpinji jatoñolawu.”
^ Hela hekwawu, “munkoloña.”
^ Hela “kutuntuka.”
^ Hela “kuleja.”
^ Hela “peni.”
^ Hela “maseleka.”
^ Hela “manji ovwahishaña.”
^ Hela “ndotolu.”
