Yeremiya 9:1-26
9 Neyi mutu wami wadiña menji,Mesu ami adiña kaseloki kamadilu!+
Mutenowu nadi kuyidilaña mwaana niwufukuAntu jami anajahiwu.
2 Neyi nadiña neluña mwisaña mwakukaama akakwenda!
Mutenowu nadi kushiya antu jami nakuya kwakulehi nawena,Muloña wejima wawu hiyakawujila,+Hiizanvu dawayipwapoki.
3 Azembaña madimi awu neyi wuta wamukunji;Mwituña munenzali hohu makudi nikubula kushinshika.+
Yehova nahoshi nindi, “Anatwalekihu kwila yuma yatama,Nawa hiyantiyililañaku.”+
4 “Muntu-himuntu, asoñami namukwawu,Nawa bayi mukuhwelela hela manakwenuku.
Muloña manakwenu wejima hinfukeji,+Nawa ntuñi neyi wejima himukakutwamba.+
5 Muntu-himuntu wadimbaña mukwawu,Nawa kwosi wahoshaña mwalalaku.
Anadizishi madimi awu kuhosha jamakudi.+
Adizeyeshaña nakwila yuma yatama.
6 Munakushakama mukachi kamakudi.
Akaanaña kuñiluka muloña wamakudi awu,” dichinahoshiyi Yehova.
7 Dichi, Yehova wamazaza nahoshi nindi:
“Nukuyisuñununa nawa nukuyeseka,+Dichi chumanyi chikwawu chinadi kumwila mwana kawantu jami wamumbanda?
8 Idimi dawu himuvu wafwana, dahoshaña jamakudi.
Muntu wahoshaña nsañu jakuwunda namukwawu,Ilaña mukachi kamuchima windi wamubelaminaña.”
9 Yehova nahoshi nindi, “Komana kwila niyisompesha hayumiyi nehi?”
“Komana ami* kwila niditenda ami aweni naniwu muza nehi?+
10 Mapidi nakayidila makumbu aweniNawa maluña amwisaña akudiishilamu yimuna nakayimbila mukeña,*Muloña anayochi chakwila kwosi muntu wunakuhitamuku,Nawa ipumba dayimuna dinaleki kutiyakana.
Atuda amuluzwizu nianyama anatemuki; anayi.+
11 Yerusalema nakamubalumuna nyilumba yamalola,+ mwakushakama nyumbu,+Nawa nyisumba yaYuda nakayibalumuna mahembi, chakadi muntu wakashalamu.+
12 Hinyi wukweti maana akwiluka chumichi?
Hinyi analejiwu kudi kanwa kaYehova, kulonda achishimuni?
Muloñadi ituña chidinakisikili?
Muloñadi chidinababikili neyi isaña,Chakwila kwosi muntu wunakuhitamuku?”
13 Yehova waakwili nindi: “Muloña anakaani nshimbi* jami jinashili kumesu awu, nawa muloña hiyanajilondeli nikwovwahila izu damiku.
14 Ilaña, anadikañi nakulondela nyichima yawu,+ nawa analondeli ankishi aBayali, neyi chayidizishiliwu kudi atata jawu nawu eleña.+
15 Dichi Yehova wamazaza, Nzambi yaIsarela, nahoshi nindi, ‘Awa antu inakuyidiisha mutondu walula, nawa inakuyinwisha menji awulembi.+
16 Inakuyipalañeshela munyuza yabulili kwilukawu wena niatata jawu,+ nawa nakayitemeshela mpoku yakabali sampu nayijilumuni ejima.’+
17 Yehova wamazaza nahoshi nindi,‘Toñojokenu hayuma yinakumwekana.
Tambikenu ambanda embaña nyikeña,*+Nawa tambikenu ambanda elukisha kwimba enzi,
18 Kulonda enzi swayi-swayi nakutudilishaku makumbu,Kulonda mumesu etu mupolomoki madiluNawa muyikenyikenyi yetu mutupuki menji.+
19 Muloña muZiyona munatiyakani ipumba damukeña nawu:+
“Ochinatujilumuniwu!
Oyu nsonyi yitunatiyi!
Muloña tunashiyi ituña, nawa matala etu anayihumuni.”+
20 Enu ambanda, tiyenu izu daYehova.
Matu enu atiyi izu damukanwa kindi.
Dizishenu anyanenu awambanda iwu mukeña,Nawa didizishenu wumu namukwawu iwu mukeña.*+
21 Muloña kufwa kuneñilili hamawindu* etu;Kuneñili mutuposhi twetu twakolaNakufumisha anyanetu munyikwakwaNianyikwenzi jetu mumalubanza anyisumba.’+
22 Wuhoshi neyi, ‘Yehova nahoshi nindi:
“Yibimbi yawantu yakaholoka neyi wushi mumaha,Neyi mbutu yinafumiwu nakumunawu kudi mukakumuna,Chakadi muntu hela wumu wakuyikuñula.”’”+
23 Yehova nahoshi nindi:
“Mukamaana bayi adisamba namaana indiku;+Mukañovu bayi adisamba nañovu yindiku;Nawa mukamaheta bayi adisamba namaheta indiku.”+
24 Yehova nahoshi nindi, “Muntu wunakudisamba adisambili muyumiyi:
Nindi wukweti kashinshi nikwiluka kwakuñiluka,+Nindi yami Yehova, Owu wamwekeshaña kukeña kwakashinshi, wuñanji nikuloña hamaseki,+Muloña ami natiyaña kuwaha nayumiyi.”+
25 Yehova nahoshi nindi, “Tiyenu! Mafuku anakwinza, nawa nakasompesha wejima waalama iku waalama jalumbwa wanyi,+
26 hamu naEjipitu,+ Yuda,+ Edomi,+ aAmoni,+ Mowabi+ hamu ninowu aleleli nsuki mumbulukutu anakushakama mwisaña;+ muloña nyuza yejima yaalama wanyi nawa amwitala daIsarela ejima aalama wanyi munyichima.”+
Tumazu twaheshina
^ Hela “wumi wami.”
^ Hela “kamina kakudila nachu.”
^ Hela “kuleja.”
^ Hela “tumina twakudila nachu.”
^ Hela “kamina kakudila nachu.”
^ Hela “Hajinjanina.”