Yishimu 1:1-33
1 Yishimu yaSolomoni,+ mwana kaDavidi,+ mwanta waIsarela:+
2 Kulonda muntu adizi* maana+ nikubabesha;Eluki mwatalisha mazu amaana;
3 Eteji kubabesha+ kwakwashaña muntu kwikala nakashinshi,Kuloña,+ kufuukula mwamaana,*+ nikwoloka;
4 Kulonda muntu wabula maana ekali wababala;+Kansi weyala ekali nakwiluka niwuswa wakutoñojoka.+
5 Mukamaana watiyililaña nawa wadizaña nshimbi jajivulu;+Muntu wakashinshi wakeñaña wunlomboli wawuwahi*+
6 Kulonda eluki mwatalisha chishimu ninhoshelu yakala,*Mazu awakamaana ninhoshelu yawu yankinji.+
7 Kumutiya Yehova woma diyi ntachikilu yakwiluka.+
Ayisupi hohu diwu ahela maana nikubabesha.+
8 Eyi mwanami, tiyililaku kukubabesha kwatata yeyi,+Nawa bayi wudiwula nshimbi jamama yeyiku.+
9 Hichibañula chalubanji kumutu weyi+Nawa chuma chachiwahi chakukudika munshiñu yeyi.+
10 Eyi mwanami, neyi akanshidi akukudimbeka, bayi witejaku.+
11 Neyi ahosha nawu: “Tuyi hamu.
Tuswami kulonda tupwekeshi mashi.
Tukuswama nakuhembelela antu akadi muloña.
12 Tukuyiminya amomi neyi chelaña Ijamu,*Amukuma, neyi ana anakukunkumukila mwibuku.
13 Twayenu tuyitambuli maheta awu ejima alema;Tukwinzesha matala etu nayuma yakupuupa.
14 Tulondeli,*Nawa tukwanzañana maseka esekana ayuma yitukwiya.”*
15 Eyi mwanami, bayi wuyilondelaku.
Nyendu yeyi bayi yidata munjila yawuku,+
16 Muloña nyendu yawu yatemukilaña kukwila yatama;Anyakalaña kupwekesha mashi.+
17 Chalala kutandumuna kaleñi iku kada kanakumonaku kwamukunkulwayi.
18 Dichaleteshaña awa antu kubelamena nakupwekesha mashi;Aswamaña kulonda ajahi mawumi awakwawu.
19 Iji diji njila janowu akeñaña kuhetela muwupwapoki,Nawa yuma yakahetawu yakajaha wumi wawu.+
20 Maana+ alala adilaña nezu dahewulu mumukwakwa.+
Atwalekañahu kunyamuna izu dawu hewulu mumalubanza.+
21 Atambikilaña hamaakenu* anyikwakwa.
Ahoshelaña hawiñililu wayiisu yamusumba nawu:+
22 “Enu antu abula maana mwakatwalekahu kukeña kubula maana kushika mpinjinyi?
Enu akakusupisha mwakatwalekahu kutiya kuwaha kusupisha kushika mpinjinyi?
Nawa enu ayisupi mwakatwalekahu kuhela kwiluka+ kushika mpinjinyi?
23 Itejenu kuzuwila kwami.*+
Dihu dinu hinukuyihuñunwina spiritu yami;Nukuyikojeja mwiluki mazu ami.+
24 Muloña natambikili, ilaña mwatwalekelihu kukaana,Nolweli chikasa chami, ilaña kwosi niwumu washiliku maanaku,+
25 Mwatwalekelihu kudiwula mwejima munayikwashileñaNikukaana kuzuwila kwami,
26 Ninami nakaseha neyi kukala kunayishikeni;Nakaseha neyi yuma yimwatiyaña woma yinenzi,+
27 Neyi yuma yimwatiyaña woma yinenzi neyi nvula yampepela,Nawa kukala kwenu kunenzi neyi mpepela yañovu,Neyi yihuñu nikukala jinenzi hadi enu.
28 Hanoyu mpinji akantambikaña, ilaña hinakaakulaku;Akankeñakeña chikupu, ilaña hiyakanwanaku,+
29 Muloña aheleli kwiluka,+Hiyatondelihu kumutiya Yehova womaku.+
30 Akaanini munayikwashileña;Adiwili mwejima munayizuwilili.
31 Dichi akamona kukala* muloña wayilwilu yawu,+Nawa akekuta nampuña* yakasañawu aweni.
32 Muloña kudikaña kwawantu abula maana kwakayijaha,Nawa kuditiyisha kuwaha kwawayisupi kwakayijilumuna.
33 Ilaña muntu wunakuntiyilila wakashakama mukukiñewa+Nawa hakaluwankana nawoma walukadiku.”+
Tumazu twaheshina
^ MuchiHeberu, “eluki.”
^ Hela “yuma yaloña.”
^ Hela “wunlomboli wamaana.”
^ Hela “kaanu.”
^ Hela “Shelu,” dikwila nawu, ijamu dawantu ejima. Talenu Kulumbulula.
^ Hela “kwanzañana ipakumuna dimu (chikwama).”
^ Hela “Natilaku chinjikijilu cheyi muyetu.”
^ MuchiHeberu, “mutu.”
^ MuchiHeberu, “Balumukenu neyi niyizuwila.”
^ MuchiHeberu, “kuda kunyikaabu yawu.”
^ Hela “tufuta; kufuukula.”