Yishimu 25:1-28
25 Iyi niyena hiyishimu yaSolomoni,+ yatuntulwiliwu* kudi ayilolu amwanta waYuda Hezekiya:+
2 Kuhemba nsañu nakajindilu hichuma chalema kudi Nzambi,+Nawa kusandujola nsañu hikulema kwawanyanta.
3 Neyi chaleha mawulu nichakunama iseki,Dichakunama nimuchima wawanyanta.
4 Fumishaku majilu kusiliva,Nawa yikutooka to-o.+
5 Fumishaku muntu watama kumesu amwanta,Nawa itanda dindi dikushimata chikupu mukuloña.+
6 Bayi wudilemesha eyi aweni kumesu amwantaku,+Nawa bayi wushakama hakachi kawantu alemaku,+
7 Muloña chikuwaha yena kukwila nindi, “Twaya kunu,”
Kubadika kukusawisha hamesu amuntu walema.+
8 Bayi wunyakala kutwala muloña weyi kuchotaku,Muloña neyi mukwenu nakufwishi namuloña, chumanyi chiwukwila?+
9 Manishaku muloña nantuñi neyi,+Ilaña bayi wusolola yuma yakujinda yakulejayiku,*+
10 Kulonda muntu wunakutiyilila abuli kukutiyisha nsonyiNawa wubuli kutaandisha nsañu yatama* yakubula kutwesha kwanuka.
11 Kufwana maapo akutuña nawuru adi muyeña yakubaza nasilivaDichekala niizu dakuhoshela hampinji yatelela.+
12 Kufwana kazeya kawuru kakumatu nichingelingeli chawuru yayiwahiDichekala nimukakuzuwila wamaana kwitu datiyililaña.+
13 Neyi chekalaña kutuuta kwasino* hefuku dakwaañulaDichekala nintemesha washinshika kudi ana amutemeshaña,Muloña wazañaleshaña mwanta windi.*+
14 Kufwana mavu abulaña kunokesha nvulaDichekala nimuntu waditiyaña nachawaana chinabuli kumwinkawu.*+
15 Kudiwunjika kwafwomonaña mukulumpi wamashidika,Nawa idimi dadovu dinateli kukotola ifwaha.+
16 Neyi wuwana wuchi, daku hohu washikila,Muloña neyi wuda wawuvulu nankashi, wunateli kuwusanza.+
17 Bayi wuvulaña kudata mwendu weyi mwitala dantuñi neyiku,Kulonda abuli kukutiya kutama nikukuhela.
18 Kufwana kabama kanjita, mpoku yakabali nimuvu watwaDichekala nimuntu washimunaña wunsahu wakutwamba hadi ntuñi nindi.+
19 Kufwana izewu dakotoka hela mwendu wachiñumukaDichekala nikukuhwelela muntu wabula kushindamenawu* mumpinji yakukala.
20 Kufwana muntu wasubulaña chakuvwala hefuku dachishikaNawa kufwana vinega yinahuñunwiniwu hasodaDichekala nimuntu wembilaña muchima wadihomba tumina.+
21 Neyi chilumbu cheyi* natiyi nzala, mwinki dinkendi adii;Neyi natiyi mpwila, mwinki menji anwi,+
22 Muloña wukumulumbikilaña makala akesi hamuntu windi,*+Nawa Yehova wakakusomwena.
23 Mpepela yakukabeta kakuchimunswa yaletaña nvula yeneni,+Nawa idimi damatuñu daleteshaña kuzuwa.
24 Chachiwahi kushakama hakona* yahewulu detalaKubadika kushakama mwitala dimu namumbanda wayikonkojola.*+
25 Kufwana menji atuuta hawumi* wunazeyiDichekala niwunsahu wawuwahi wunafumi kwituña dakwakulehi.+
26 Kufwana kaseloki kadi namalowa niishima dakisikaDichekala nimuntu waloña wovwahilaña* muntu watama.
27 Chachiwahi wanyi kuda wuchi wawuvulu,+Nawa chachiwahi wanyi kudi muntu kudikeñela kulema kwindi yomweni.+
28 Muntu wakañanyaña kuyuula kuzuwa kwindi,*+Wudi neyi musumba wukweti mbañu jakisika.
Tumazu twaheshina
^ Hela “yakopolweliwu nakuyisoneka hamu.”
^ Hela “tujindilu twawantu acheñi.”
^ Hela “mbonji yatama.”
^ Hela “nvula yachishika yitooka.”
^ Hela “wumi wamwanta windi.”
^ MuchiHeberu, “chawaana chakutwamba.”
^ Hela hekwawu, “watwambaña.”
^ MuchiHeberu, “muntu wakuhela.”
^ Dikwila nawu, kumwovwahisha muntu nikusuñununa kukola kwindi.
^ Hela “iwombu.”
^ Hela “ntaadi.”
^ Talenu Kulumbulula.
^ Hela “kwiteja.” MuchiHeberu, “kutedañila kumesu.”
^ Hela “spiritu yindi.”
