Yishimu 29:1-27
29 Muntu wakoleshaña nshiñu* yindi hanyima yakumuzuwila nankashi+Wakakotoka nshiñu mukukasumwisha chakadi kutwesha kumuuka.+
2 Neyi aloña avula, antu azañalalaña,Ilaña neyi watama hakuyuula, antu abaaña.+
3 Muntu wakeña maana wamuzañaleshaña tata yindi,+Ilaña muntu wadikundaña nawayivumbi wakisañanaña maheta indi.+
4 Mwanta wakoleshaña ituña nawuñanji,+Ilaña muntu wakeña majika kanwa wakisañanaña ituña.
5 Muntu wamudimbaña ntuñi nindiWataña kaleñi mwakufwa nyendu yindi.+
6 Kuvulumuna kwamuntu watama kwamulawulaña,+Ilaña muntu waloña wabulaña nyiñula nikuzañalala.+
7 Muntu waloña washaña maana kumuloña wawatuzweñi,+Ilaña muntu watama yena nehi.+
8 Antu adivwimba ochaña tawuni,*+Ilaña ana akweti maana afwomonaña kuzuwa.+
9 Neyi mukamaana hakutaadeka nachisupi,Hakwikala kubobola nikusupisha, nawa kwosi yuma yayiwahi yikufumamuku.+
10 Ambanji ahela wejima wabula muloña,+Nawa akeñaña kujaha muntu* woloka.*
11 Chisupi wamwekeshaña kuzuwa* kwindi kwejima,+Ilaña muntu wamaana wawundaña.+
12 Neyi nyuuli atiyililaña nsañu yakutwamba,Ambuñindi ejima akwikala atama.+
13 Kazweñi nimuntu wakabishaña akwawu, ejima esekana:*
Wejima wawu Yehova wayinkaña chejeji.*
14 Neyi mwanta asompesha atuzweñi chiwahi,+Itanda dindi dakatwalekahu kukiñewa.+
15 Chikoti* nikuzuwila jahanaña maana,+Ilaña mwana abulaña kufumbawu wasawishaña mama yindi.
16 Neyi antu atama avula, kuvulumuna kwavulaña,Ilaña aloña akamona chakayijilumunawu.+
17 Babeshaku mwaneyi nawa wakaletesha wakanooki;Nawa wakakuzañalesha chikupu.+
18 Neyi chimwenu kwosi,* antu aluwankanaña,+Ilaña adi namuzañalu wowu antu ahembaña nshimbi.+
19 Ñamba haketeja kumwolola namazuku,Hela chakwila wayiluka, hovwahilañaku.+
20 Wamonahu dehi muntu wahoshaña mazu chakulusukila?+
Chisupi wakahimpa kubadika yena.+
21 Neyi ñamba amulela nawutotu* kufuma kuwansi windi,Kumbidi wakaleka kusakilila.
22 Muntu wazuwaña swayi wasañumunaña ndombu;+Muntu wekala nandulu wavulumunaña nankashi.+
23 Kudivwimba kwamuntu kwakamuzozesha,+Ilaña wejima wadizoza muspiritu akamulemesha.+
24 Ibwambu dekombi wadihela yomweni.*
Anateli kumuleja kushimuna nsañu,* ilaña washimunaña wanyi.+
25 Kuzaala* antu himuhetu,*+Ilaña muntu wamukuhwelelaña Yehova wakakiñewa.+
26 Antu amavulu ayaña kudi* nyuuli nawu ayikwashi,Ilaña Yehova diyi wahakwilañaku muntu mwawuñanji.+
27 Muntu watama wawuzondu kudi waloña,+Ilaña muntu wukweti njila yoloka wawuzondu kudi watama.+
Tumazu twaheshina
^ Hela “watwalekañahu kudikaña.”
^ Hela “mbaka.”
^ Hela “wumi.”
^ Hela hekwawu, “Ilaña muntu woloka wakeñaña kukiña wumi windi.”
^ MuchiHeberu, “spiritu.”
^ MuchiHeberu, “abulakanaña hamu.”
^ Dikwila nawu, wayinkaña wumi.
^ Hela “kubabesha.”
^ Hela “chimwenu chawuprofwetu; chimwekeshu.”
^ Hela “ntembelekantati.”
^ Hela “wumi windi yomweni.”
^ Hela “kusanyika munabombeli ishiñu.”
^ Hela “Kutiya woma.”
^ Hela “hikuditila muhetu.”
^ Hela hekwawu, “akeñaña wuselewa kudi.” MuchiHeberu, “akeñaña chamesu.”