Yishimu 31:1-31
31 Mazu aMwanta Lemweli, nsañu yalema yamulejeliwu kudi mama yindi yakumudizisha:+
2 Eyi mwanami, yumanyi yinukukuleja,Yumanyi, eyi mwana wamwivumu dami,Nawa yumanyi, eyi mwana wakukana kwami?+
3 Bayi winka ambanda ñovu jeyi,+Hela kulondela njila jajilumunaña anyantaku.+
4 Eyi Lemweli, hichatelela anyantaku,Hichatelela anyanta kunwa vinyukuIndi kwiji anyuuli kuhosha nawu, “Yakunwa yami yidi kudihi?”+
5 Kulonda abuli kunwa nakuvulamena nshimbiNikuzatisha chatama wuswa wawantu akehelamu.
6 Yinki walwa ana anakujilumuka+Nivinyu ana adi muyihuñu.*+
7 Yileki anwi kulonda avulameni wuzweñi wawu;Abuli kwanuka cheñi kukala kwawu.
8 Yihosheliku ana anakukañanya kudihakwilaku;Hakwilakuku wuswa wanana ejima anakujilumuka.+
9 Hoshaku nawa sompeshaku mwaloña;Hakwilakuku antu akehelamu niatuzweñi.+
א [Alefu]
10 Hinyi wunateli kuwana mumbanda watelela?*+
Wuseya windi wabadika chikupu wakorali.*
ב [Beti]
11 Nfumwindi wamukuhwelela chakufuma hamuchima,Nawa wukweti yuma yejima yakeñañayi.
ג [Gimeli]
12 Mumafuku akuhanda kwindi kwejima,Wamwinkaña nfumwindi yuma yayiwahi, bayi yatamaku.
ד [Daleti]
13 Wakeñakeñaña wanda niihina dadiwahi;Watiyaña kuwaha kuzata namakasa indi.+
ה [Hi]
14 Wudi neyi mbopolu jamukakulanda nakulandulula,+Waletaña yakuda yindi kufuma kwakulehi.
ו [Wawu]
15 Cheñi wahindukaña henohu kuchidi wufuku,Nakwinka amwitala dindi yakudaNikwinka ambuñindi awambanda maseka awu.+
ז [Zayini]
16 Washaña maana kwiha nawa wadilandaña;Watumbaña itempa danyivinyu kufuma hanyidimu yindi.*
ח [Heth]
17 Wadiloñeshaña kuzata mudimu wakola,*+Nawa wakoleshaña makasa indi.
ט [Teti]
18 Weluka nindi yuma yalandishañayi wawaninañamu;Inoñu dindi nawufuku dajimaña wanyi.
י [Yodi]
19 Makasa indi akwataña mutondu wefufu dawanda,Nawa makasa indi akwatishaña kukazala.*+
כ [Kafu]
20 Wolwelaña akehelamu makasa indi,Nawa wakamunwinaña atuzweñi makasa indi.+
ל [Lamedi]
21 Hakamenaña nindi amwitala dindi akufwa nakutuuta kwasinoku,*Muloña amwitala dindi ejima akweti yakuvwala yamashika.*
מ [Memu]
22 Watuñaña mahina indi akwaala hakadidi.
Yakuvwala yindi yakutuña namahina amawahi niwanda wawusombu.
נ [Nuni]
23 Nfumwindi amwiluka chikupu muyiisu yamusumba,+Mwashakamañayi hamu nawakulumpi amwituña.
ס [Sameki]
24 Watuñaña nikulandisha yakuvwala yamahinaWalandishaña nyishipi kudi akakulanda nakulandulula.
ע [Ayini]
25 Wavwala ñovu nilubanji,Nawa hakamaña yuma yakumbidiku.*
פ [Pi]
26 Waasamaña kanwa kindi nakuhosha mwamaana;+Nshimbi yaluwi* yidi hedimi dindi.
צ [Tisadi]
27 Watalaña nyidimu yawantu amwitala dindi,Nawa hakatalaku.+
ק [Kofu]
28 Anyanindi anyamukaña nakumutena nawu wudi namuzañalu;Nfumwindi wanyamukaña nakumuhameka.
ר [Reshi]
29 Kudi ambanda amavulu atelela,*Ilaña eyi—eyi wunayibadiki ejima.
ש [Shini]
30 Kuwaha kunateli kudimbana, nawa lubanji lunateli kwikala lwakapinji kantesha,*+Ilaña mumbanda wamutiyaña Yehova woma akamuhameka.+
ת [Tawu]
31 Mwinki nfwetu hayuma yelañayi,*+Nawa nyidimu yindi yimuhamekeña muyiisu yamusumba.+
Tumazu twaheshina
^ Hela “adi nawumi walula.”
^ Hela “wamuwahi.”
^ Talenu Kulumbulula.
^ Hela “ngalanyi yindi.” MuchiHeberu, “kufuma hanyikaabu yamakasa indi.”
^ MuchiHeberu, “wamanyekaña nkuma jindi nañovu.”
^ Mutondu wefufu nikazala hinyitondu yazatishileñawu kupombelaku hela kuvuñilaku wanda nakwana mbuña.
^ Hela “nvula yachishika yitooka.”
^ MuchiHeberu, “yakulunjika.”
^ Hela “wasehaña ifuku dakumbidi.”
^ Hela “Nshimbi yayiwahi; Nshimbi yakukeña kwakashinshi.”
^ Hela “amawahi.”
^ Hela “lwamukunkulwayi.”
^ MuchiHeberu, “Mwinki kufuma hanyikaabu yamakasa indi.”
