Yishimu 6:1-35
6 Mwanami, neyi wuneteji kumufwetelaku ntuñi neyi,+Neyi wunakwati muchikasa* chamuntu iwabula kwiluka,+
2 Neyi chikaninu cheyi chinekali muhetu kudi eyi,Wunafwi mumazu amukanwa keyi,+
3 Ilaku chumichi, mwanami, kulonda wudamwini,Muloña wunaholokeli muchikasa chamukwenu:
Yaku wudizozi nawa wulembi swayi-swayi kudi mukwenu.+
4 Mesu eyi bayi akaama,Hela yikenyikenyi yeyi kunoñokaku.
5 Temukaku neyi kapaala kanatemuki muchikasa chachibinda,Neyi kada kanatemuki muchikasa chachibinda chatuda.
6 Eyi nkopi, yaku kudi nzenkeneni;+Shinshikaku chelañayi yuma kulonda wiikali namaana.
7 Hela chakwila hakweti nlomboli, chilolu, hela nyuuliku,
8 Waloñeshaña yakuda yindi munvula,+Nawa wapompeshaña yakuda yindi muchilaaka chakwaañula.
9 Eyi nkopi, wukutwalekahu kukaama kushika mpinjinyi?
Wukuhinduka mutulu mpinjinyi?
10 Kukaama chantesha, tulu twantesha,Kuvuña makasa chantesha nakunooka,+
11 Wuzweñi weyi wakenza neyi ikombi,Nawa yuma yiwakeñaña neyi muntu wunadimanyeki.+
12 Muntu wamukunkulwayi nawa watama wahitañanaña nakuhosha nhoshelu yaheña;+
13 Wakamunaña nadisu dindi,+ walejanaña namwendu windi nawa wenyikaña nanyinu yindi.
14 Muloña wakwikala namuchima watama,Watoñojokaña hohu kwila yuma yatama+ nikutaandisha ntaadi.+
15 Dichi, wubanji wakamushikena mukukasumwisha;Hohenohu wakakotoka chakadi kutwesha kumuuka.+
16 Kudi yuma 6 yahelayi Yehova;Eña, yuma 7 yatiyañayi wuzondu:
17 Mesu adinka wanta,+ idimi datwambaña,+ nimakasa apwekeshaña mashi akadi muloña,+
18 Muchima wakasaña tufuta twafwana,+ nyendu yatemukilaña kuyuma yatama,
19 Chinsahu wakutwamba watwambaña mpinji yejima,+Nimuntu wakuwaña ntaadi hakachi kawantu evumu dimu.+
20 Mwanami, hembaku nshimbi jatata yeyi,Nawa bayi wudiwula nshimbi jamama yeyiku.+
21 Wujikaseña mumuchima weyi mpinji yejima;Wujikaseña munshiñu yeyi.
22 Neyi wunakwenda, yakakulombolaña;Neyi wunakaami, yakakukiñaña;Nawa neyi wunahinduki, yakakulejaña.*
23 Muloña kuleja hiinoñu,+Nawa nshimbi hichejeji,+Nawa kubabesha kwakuzuwila hinjila yaya kuwumi.+
24 Jakakukiña kudi mumbanda watama,+Kumazu ekoku amumbanda* chivumbi.+
25 Bayi wukomoka lubanji lwindi mumuchima weyi+Hela kumwiteja akubakuli muchima namesu indi ekokuku,
26 Muloña wachivumbi, iyala washalaña hohu nadinkendi,+Ilaña iñoda muntu wacheñi washaña wumi walema muwubanji.
27 Komana muntu nateli kudokwela kesi hantulu yindi ilaña yakuvwala yindi kuha nehi?+
28 Indi kwiji muntu nateli kwenda hamakala akesi chakadi kuha nyendu?
29 Dichichekala nikudi muntu wakaamaña nañoda mukwawu;Kwosi muntu wamukwataña akabula kubabeshawuku.+
30 Antu hiyamusehaña ikombiNeyi eya muloña wanzalaku.
31 Hela chochu, neyi anamuwani, wakafweta mapampa 7;Wakahana yuma yejima yalema yamwitala dindi.+
32 Muntu wejima wunakwila wujila namumbanda hakweti maanaku;*Muntu welaña chumichi wadiletelaña yomwenindi* kukala.+
33 Wakekala hohu nayilonda nikusawuka,+Nawa kusawuka kwindi hiyakakufumishahuku.+
34 Muloña mukawu wakojejaña iyala kuhila;Hakamwekesha wushona hakafuntishañayi katama nakatamaku.+
35 Hamba keteja kumufwetaku;*Hamba kawundaku, hela chakwila mulambu weyi weneni ñahi.
Tumazu twaheshina
^ Dikwila nawu, kukana.
^ Hela “kukudizisha.”
^ MuchiHeberu, “hakweti muchimaku.”
^ Hela “wumi windi.”
^ Hela “ifutu danyiloña.”
