Yoba 21:1-34
21 Yoba waakwili nindi:
2 “Tiyililenu nakanañachima kumazu inukuhosha;Iku kwiikali kukundeja kumukunkundeja.
3 Bayi mutiyi kutama chinukuhoshañaku;Neyi nahoshi dehi, dihu dinu himukunsupisha.+
4 Komana inakutoobela muntu?
Neyi diyi, komana nadi* kudiwunjika?
5 Ntalenu kulonda muhayami;Kwatenu hakanwa.
6 Neyi nitoñojokahu, naluwankanaña,Nawa mujimba wami wejima wazaalaña.
7 Muloñadi antu atama chatwalekelañawu kuhanda,+Kushinakaja nikwikala namaheta?*+
8 Anyanawu ekalaña nawu mpinji yejima,Nawa amonaña niakachisaka chawu.
9 Matala awu akiñewa, atiyaña woma wanyi,+Nawa Nzambi hayibabeshaña nambwechi yindiku.
10 Añombi jawu ayizamba hiyakañanyaña kusemeshaku;Añombi jawu anyikaji asemaña nawa hiyasulumunañaku.
11 Anyanawu awamayala atemokaña hanji neyi mukanka wayimuna,Nawa anyanawu akilokaña.
12 Embaña nañoma yanyanya* ninatudadaNawa azañalalaña hakutiya chivumina chepeleli.*+
13 Azatishaña mafuku awu nakudiluñishaNawa ayaña Mwijamu* mukuwunda.*
14 Ilaña amulejaña Nzambi walala nawu, ‘Tushiyi nkawetu!
Hitunakukeña kwiluka njila jeyiku.+
15 Indi Wañovu Jejima hinyi, mwaka tumukalakeli?+
Kudikunda nindi kukutukwasha ñahi?’+
16 Ilaña neluki nami hiyakweti ñovu hamaheta awuku.+
Yitoñojoka* yawantu atama yidi kwakulehi nanami.+
17 Komana inoñu dawantu atama adijimahu dehi?+
Wena amonahu dehi kukala?
Hela Nzambi wayijilumunahu dehi nakuzuwa kwindi?
18 Komana ekalahu dehi neyi matahu oma alelukaña nampepelaNawa neyi muzuñu wasendañawu kudi mpepela yeneni?
19 Nzambi wakababesha anyana muloña wanshidi yatata yawu.
Nawa Nzambi amubabeshi niyena kulonda achiluki.+
20 Mesu indi amoni kukisika kwindi,Nawa yena anwi kuzuwa kwaWañovu Jejima.+
21 Wukwakamadi hayuma yikumwekana kwitala dindi neyi nafwiNeyi tukweji twindi anatuketwishi?*+
22 Komana kudihu muntu wukumuleja Nzambi maana?*+Henohu Yena diyi wasompeshaña niantu alema?+
23 Muntu wumu wafwaña henohu wuchidi nañovu+Nakushakama chiwahi nawa mukuwunda,+
24 Henohu makata indi anatohi namanjiNawa mafwaha indi akola.*
25 Ilaña muntu mukwawu wafwaña nachineñi chikupu,*Chakadi kutompahu yuma yayiwahi.
26 Wejima wawu akakaama mulunkuñu,+Nawa wejima wawu akayiwuña kudi mavunyi.+
27 Tiyenu! Neluki chikupu yuma yimunakutoñojokaNitufuta tumunankwatili kulonda muñili chatama.*+
28 Muloña munakuhosha nenu, ‘Itala damuntu walema didi kudihi,Niitenti dashakamineñamu muntu watama didi kudihi?’+
29 Komana himwayihula akakwendaku?
Mwashinshika chikupu yuma yamweniwu wanyi,*
30 Yakwila nawu muntu watama hiyamubabeshaña hefuku dakukalaNawa amupulwishaña hefuku dakuzuwaku?
31 Hinyi wukumusolomoka hanjila yindi,Nawa hinyi wukumubabesha hayuma yinakoñiyi?
32 Neyi anamutwali dehi kumajamu,Ijamu dindi akadihembaña.
33 Mawumbulu amaseki amuchinekineki* wakayitiya kutowala,+Niantu ejima akamulondela hanyima*+Neyi chamwekeneni antu akadi kutwesha kuchinda afwili henohu yena kanda.
34 Hanu dinu munakunkundejeladi nakukundeja kwamukunkulwayi?+
Muñakwilu yenu mudi hohu kutwamba!”
Tumazu twaheshina
^ MuchiHeberu, “spiritu yami.”
^ Hela “kwikala nañovu.”
^ Iyi hiñoma yanyanya kwakudekawu tuyikuñu nawa neyi ayinyinkesha yavumaña neyi manchakayi.
^ Hela “ihululu.”
^ Hela “mukulabula kwadisu,” dikwila nawu, kufwa swayi-swayi nawa chakadi kutiya kukata.
^ Hela “Shelu,” dikwila nawu, ijamu dawantu ejima. Talenu Kulumbulula.
^ Hela “maana; kafuta.”
^ Hela “atubalula hayedi.”
^ Hela “kumudizisha Nzambi chuma chidi chejima.”
^ MuchiHeberu, “manji amumafwaha indi achidi atuuta.”
^ Hela “nawumi walula.”
^ Hela hekwawu, “kulonda muleti ndombu nanami.”
^ MuchiHeberu, “yinjikijilu.”
^ Hela “muhoñi.”
^ MuchiHeberu, “Nawa wakadikokela antu ejima akamulondeleña.”
