Yoba 36:1-33
36 Elihu watwalekelihu nindi:
2 “Ntiyilili nakanañachima chinukulumbululaña,Muloña nichidi namazu akumuhoshelaku Nzambi.
3 Nukuhosha chiwahi hayuma yineluka,Nukuhosha nami kuloña kwekala nawantuñili.+
4 Chalala, mazu ami akutwamba wanyi;Weluka yuma yejima+ wudi hanu naneyi.
5 Mwamweni, Nzambi wukweti ñovu+ nawa hadiwulaña muntu niwumuku;Wukweti maana chikupu.*
6 Hakapulwisha mawumi awantu atamaku,+Ilaña antu akabishañawu wayimwekeshelaña wuñanji.+
7 Hafumishaña mesu indi hadi antu aloñaku;+Wayiswanyikaña hamatanda hamu nawanyanta*+ nawa ayilemeshaña haya nyaaka.
8 Ilaña neyi anayikasi mumaleñiNawa anayikwati munyonji yamakabi,
9 Wayilejaña yuma yineliwu,Nshidi yawu yakoñeliwu muloña wakudivwimba.
10 Wenzununaña matu awu kulonda atiyi kufumbaNawa wayilejaña abalumuki nakuleka kwila yatama.+
11 Neyi amwovwahila nakumukalakela,Akashakamaña chachiwahi mafuku awu ejima,Nawa yaaka yawu yikawaha.+
12 Ilaña neyi kwovwahila nehi, akahondeka nampoku yakabali*+Nawa akafwa chakadi kwikala namaana.
13 Antu atama* nyichima akahemba nkunyi.
Hela chakwila nayikasi hiyalombaña wukwashuku.
14 Afwaña* nawansi,+Adikundaña* hamu nawayivumbi awamayala ahatembeli.+
15 Ilaña Nzambi* wamwinaña antu anakukabakana hampinji yamakabi;Wenzununaña matu awu neyi anayikabishi.
16 Wakufumishaña kuyihuñu yidi kwakwihi nakukuwana+Nakukutwala kwiluña deneni, kwekala kukasunuka,+Niyakuda yayiwahi yakusha hamesa yeyi yakukukundeja nachu.+
17 Kuhiñahu wakatiya kuwaha chakayisompeshawu antu atama,+Neyi anayisompeshi dehi nawa mwawuñanji.
18 Ilaña babalaku kulonda kuzuwa kubuli kukukojeja kwila chatama,+Nawa bayi witeja majika kanwa akusenuni munjilaku.
19 Komana kulomba wukwashuHela kuzata nañovu kukumanisha yihuñu yeyi?+
20 Bayi wufwila wufuku,Halekañawu antu kumwekana hamaluña awuku.
21 Babalaku kulonda wubuli kwila yuma yatama,Tondaku chumichi chatela wutondi makabi.+
22 Talaña! Nzambi wukweti ñovu jabadika;Ntañishinyi wudi neyi yena?
23 Hinyi walombolahu* dehi njila yindi+Hela kumuleja nawu, ‘Chuma chiwuneli chatama’?+
24 Anukaku kutuumbakesha nyidimu yindi,+Oyu yembawu kudi antu mutumina.+
25 Antu ejima ayimona,Muntu wafwaña wayitalilaña hahalehi.
26 Eña, Nzambi himuneni kubadika chitunateli kumwiluka;+Yaaka yindi hitukutwesha kuyilukaku.*+
27 Wakokaña nyisa yamenji;+Yasuñunukaña nakwikala nvula kufuma kumbundu yindi;
28 Kuhiñahu, mavu ahuñununaña nvula heseki;+Yanokelaña hadi antu.
29 Hinyi wunateli kwiluka chayitanjikawu mavu,Kudidima kwafumaña mwitenti* dindi?+
30 Talaña chaalañayi nzaji*+ yindi hewulu damavu.Nawa wenzeshaña inyiñi* dakaluñalwiji.
31 Wayikutishaña antu nayuma yeniyi;Wayinkaña yakuda yayivulu.+
32 Wabutaña nzaji namakasa indi,Nawa wayiteñululaña kuyinakuya nakuyitwala kwacheñi.+
33 Kudidima kwindi kwashimunaña chekalayi,Niyimuna niyena yashimunaña wunakwinza.*
Tumazu twaheshina
^ MuchiHeberu, “muchima.”
^ Hela hekwawu, “Waswanyikaña anyanta.”
^ Hela “nachitwa (mutendanzumbu).”
^ Hela “akakusekesha.”
^ Hela “Wumi wawu wafwaña.”
^ Hela hekwawu, “Adijahishilaña.”
^ MuchiHeberu, “Yena.”
^ Hela hekwawu, “wasompeshahu.”
^ Hela “yakunama.”
^ Hela “muchisolu.”
^ MuchiHeberu, “chejeji.”
^ MuchiHeberu, “nyiji.”
^ Hela hekwawu, “chinakwinza.”
