Yoba 38:1-41
38 Kuhiñahu Yehova wamwakwili Yoba mumpepela yeneni nindi:+
2 “Hinyi yeniwu wunakutaadika mwinnafuukuliNawa wunakuhosha chakadi maana?+
3 Mwani diloñeshi neyi iyala;Nukukwihula, nawa wuñakuli.
4 Wadiña kudihi hinaalili chikuku cheseki?+
Nleji, neyi wunakutoñojoka neyi weluka.
5 Hinyi wadipimineña, hekwawu wuneluki,Hela hinyi wavuñulwili mwonji nakudipima?
6 Yishimi yachu ayishimikili munkahi,Hela hinyi waalili ilola dadu damwiwombu,+
7 Helili ntanda jakumacha+ jidikuwi hamu namuzañalu,Nianyana kaNzambi*+ ejima atachiki kudikuwa nakusakilila?
8 Nawa hinyi washinkili yiisu yakaluñalwiji+Hikabuzikili kufuma mwivumu,
9 Hinakivwikili mavuNikukivuñila* mumwidima wiyila bwi-i,
10 Hinakinkeli nshimbi mwakukuminaNikushaku nyikomenu niyiisu yaku,+
11 Kuhiñahu nakilejeli nami, ‘Watela kukumina aha, kubadikahu nehi;Aha dihatela kukumina mankanda eyi adivwimba’?+
12 Komana walejahu dehi* ntetemena mwakwililaIndi kwiji kukojeja kucha kwiluki iluña daku dakuchiilahu,+
13 Kulonda kukwati insa jesekiNikulukumunahu antu atama?+
14 Dabalumukaña neyi ndambu yinalamikiwu,Nawa yuma yidihu yamwekanaña chiwahi neyi chakuvwala chakuchima chiwahi.
15 Ilaña antu atama anayitambuli chejeji chawu,Nawa makasa awu anyamunañawu anayikotoli.
16 Komana wayahu dehi kutusulu twakaluñalwijiIndi kwiji wahitañanahu dehi nakutalatala manyiñi?+
17 Komana akumwekeshelahu dehi yiisu yakufwa,+Indi kwiji wamonahu dehi yiisu yamwidima wasweja?*+
18 Komana weluka kutoha kweseki?+
Nleji, neyi weluka yuma yejimiyi.
19 Chejeji chashakamaña kudihi?+
Nawa iluña damwidima dekala kudihi,
20 Hakwila wujitwali kumaluña ajuNikwiluka njila jaya kumatala aju?
21 Komana wuneluki yumiyi muloña wakwila wavwalikileñahu dehiNawa wudi nayaaka* yayivulu?
22 Weñilahu dehi mumatala mwahembelañawu sino,*+Indi kwiji wamonahu dehi mumatala mwahembelañawu nvula yamalola,+
23 Oyu yinahembela mpinji yayihuñu,Yefuku dandombu ninjita?+
24 Chejeji* chafuminaña kukabadi kadihi,Nawa mpepela yakumusela yakunkilaña heseki yafumaña kudihi?+
25 Hinyi wabalula njila mwakuhitila dibajiNikupula njila mwakuhitila ivu dakudidima danvula yampepela,+
26 Nakuyinokesha habulaña kushakama antu,Hesaña habula antu,+
27 Kulonda kwovwahisha iluña dakadi yumaNikukojeja matahu kumena?+
28 Komana nvula yikweti tata yayu,+Hela hinyi wavweli nyisa yawuumi?+
29 Indi ayisi* yafumini mwivumu danyi,Nawa hinyi wavweli kutuuta kwamwiwulu+
30 Henohu menji anayibuti neyi kwiji nelola,Nawa hewulu denyiñi hakoli mbe-e?+
31 Wunateli kukasa nyonji yamukanka watutumbwa twaKima*Indi kwiji kukasununa nyonji yamukanka watutumbwa twaKesili?*+
32 Komana wunateli kulombola mukanka watutumbwa* muchilaaka chawuHela kulombola mukanka watutumbwa twaAshi* hamu nanyanawu?
33 Komana weluka nshimbi jalombolaña mawulu,+Indi kwiji wunateli kuzatisha ñovu jayu* heseki?
34 Komana wunateli kunyamwina mavu izu deyiNakuletesha dibaji damenji kukubuta?+
35 Komana wunateli kutuma kukenashana?
Komana kunateli kwinza nakukuleja nawu, ‘Yetu anu!’
36 Hinyi washili maana mumavu*+Hela wahanini kashinshi kudi yuma yalubanji yamuluzwizu?*+
37 Hinyi wudi namaana chikupu wunateli kuchinda mavu,Hela wunateli kuhinona nsaba jamenji jamwiwulu+
38 Neyi lunkuñu lusukumuka lwaluvulu chikupuNawa mawumbulu amaseki alamata hamu?
39 Komana mutupa wunateli kumuzombela kanyamaHela kwikutisha nyenzi yanyitupa+
40 Neyi anafukami mumeena awuHela anakubelamina mumeena awu?
41 Hinyi wayiloñeshelaña makololu yakuda+Neyi anyanawu hiyakumudilila Nzambi nawu ayikwashiNawa neyi anakululuta muloña wakubula yakuda?
Tumazu twaheshina
^ Iyi hinhoshelu yankinji yamuchiHeberu yatalisha kudi añelu anyana kaNzambi.
^ Hela “nikukipombekela.”
^ MuchiHeberu, “mumafuku eyi.”
^ Hela “mwevulu wakufwa.”
^ MuchiHeberu, “namafuku.”
^ Hela “nvula yachishika yitooka.”
^ Hela hekwawu, “nzaji.”
^ Hela “mayimakanza.”
^ Hadaha mukanka watutumbwa twaOriyoni.
^ Hadaha tutumbwa twaPiliyadisi twekala mumukanka watutumbwa waÑombi.
^ MuchiHeberu, “Mazaroti.”
^ Hadaha mukanka watutumbwa twaBera Muneni (Ursa Major).
^ Hela hekwawu, “Yindi.”
^ Hela hekwawu “mudi muntu.”
^ Hela hekwawu, “kuyitoñojoka.”
