Yoshuwa 17:1-18
17 Kuhiñahu, muchidi waManasi+ awinkeli chibalu chawu champata kuzatisha chinjikijilu,+ muloña Manasi diyi wadiña wedi waYosefu.+ Chineli Makiri+ wedi waManasi nawa tata yaGiliyadi wadiña iyala mukanjita, watambwili Giliyadi niBashani.+
2 Nawa akumutaña waManasi ashalilihu ayinkeli chibalu chawu champata kwesekeja nayisaka yawu kuzatisha chinjikijilu, anyana kaAbiyezeri,+ anyana kaHeleki, anyana kaAsiriyeli, anyana kaShekemi, anyana kaHeferi nianyana kaShemida. Awa diwu adiña akumutaña waManasi mwana kaYosefu, amayala kwesekeja nayisaka yawu.+
3 Ilaña Zelofehadi+ mwana kaHeferi, Heferi mwana kaGiliyadi, Giliyadi mwana kaMakiri, Makiri mwana kaManasi, havwelihu anyana awamayalaku, wavweli anyana awambanda hohu nawa awa diwu majina awanyanindi awambanda: Mahila, Nowa, Hogila, Milika niTiriza.
4 Dichi, ayili kumesu akapristu Eleyazari,+ kumesu aYoshuwa mwana kaNuni nikumesu awanlomboli nakuhosha nawu: “Yehova diyi walejeli Mosi kulonda atwinki wuswana hakachi kawamanakwetu.”+ Dichi, neyi chamulejeliwu kudi Yehova, wayinkeli wuswana hakachi kawamana kwatata yawu.+
5 Kwadiña cheñi yibalu yampata 10 yamwinkeliwu Manasi kuzatisha chinjikijilu kubombela hampata yaGiliyadi niBashani, jadiña kwishinadi* dikwawu daYodani,+
6 muloña anyana kaManasi awambanda atambwili wuswana hamu nawanyanindi awamayala, nawa mpata yaGiliyadi yekalili iheta damutaña waManasi wejima washalilihu.
7 Nawa ñinza yaManasi yafumini kuAsheri nakuya kuMikimetati,+ watalañana naShekemi+ nawa iyi ñinza yahitili kukabeta kakuchidiilu nakuya kumpata yawantu ashakamineña muEntapuwa.
8 Mpata yaTapuwa+ yekalili yaManasi, ilaña musumba waTapuwa wadiña kuñinza yaManasi, wadiña wamutaña waEfuremu.
9 Nawa iyi ñinza yakunkumukili nakuya kuMuhoñi waKana, kukabeta kakuchidiilu ndo-o nikumuhoñi. Hakachi kanyisumba yaManasi+ hadiña ninyisumba yaEfuremu, nawa ñinza yaManasi yadiña kukabeta kakuchimunswa kamuhoñi nawa yakuminini kukaluñalwiji.+
10 Ñinza yadiña kukabeta kakuchidiilu yadiña yaEfuremu, yadiña kukabeta kakuchimunswa yadiña yaManasi nawa kaluñalwiji dikadiña ñinza+ yaManasi. Kukabeta kakuchimunswa ashikili* kuAsheri nawa kumusela ashikili kuIsakari.
11 Mumaluña aIsakari niaAsheri, Manasi amwinkelimu Betisheyani nimatawuni* anyeñumukiliku, Ibileyami+ nimatawuni anyeñumukiliku, antu ashakamineña muDori+ nimumatawuni anyeñumukiliku, antu ashakamineña muEndori+ nimumatawuni anyeñumukiliku, antu ashakamineña muTayanaki+ nimumatawuni anyeñumukiliku niantu ashakamineña muMegido nimumatawuni anyeñumukiliku. Awa himaluña asatu amapidi.
12 Ilaña amumutaña waManasi hiyatwesheli kutambula iyi nyisumbaku; aKenani adikañili nakutwalekahu kushakama munidi ituña.+
13 AIsarela chekaliliwu nañovu, atachikili kuyizatisha aKenani nyidimu yawuduñu,+ hela chochu, hiyayitemwinimu ejimaku.+
14 Amumutaña waYosefu amwilili Yoshuwa nawu: “Muloñadi dinu chiwunatwinkeli* hohu chibalu chimu+ nikabadi kamu hohu kampata kwikala wuswana wetu? Tudi antu amavulu nankashi, muloña Yehova nakutukiswila kushika nikulelu.”+
15 Yoshuwa wayakwili nindi: “Neyi munavuli ochu, yenu mwivunda mwakadiwahishili kwenoku iluña mumpata yawaPerizi+ niaRefa,+ chineli iluña damapidi daEfuremu+ dinayikeheli.”
16 Kuhiñahu, amumutaña waYosefu ahosheli nawu: “Iluña damapidi dinatukeheli nawa aKenani ejima anakushakama mumpata yachinekineki, akweti makalu+ anjita adi nampoku jajilehi jayikuñu kutufumbu,* ejima adi muBetisheyani+ nimumatawuni* anyeñumukaku ninowu adi muChinekineki chaYezireyeli.”+
17 Dichi Yoshuwa wayilejeli amwitala daYosefu, aEfuremu niManasi nindi: “Mudi antu amavulu nankashi nawa mukweti ñovu yasweja. Himukutambula chibalu chimu champata hohuku,+
18 ilaña iluña damapidi nidena dikwikala denu.+ Hela chakwila hiivunda, mukudiwahisha nawa dikukukumina iluña denu. Muloña enu mukuyitemunamu aKenani hela chakwila akola nawa akweti makalu adi nampoku jajilehi jayikuñu kutufumbu.”*+
Tumazu twaheshina
^ Dikwila nawu, kukabadi kamusela.
^ Dikwila nawu, antu jaManasi hela iluña daManasi.
^ Hela “jimbaka.”
^ MuchiHeberu, “chiwunanyinkeli.”
^ Hela “nayikwakwa yayikuñu.” MuchiHeberu, “namakalu ayikuñu.”
^ Hela “jimbaka.”
^ Hela “nayikwakwa yayikuñu.” MuchiHeberu, “namakalu ayikuñu.”
