Yoshuwa 18:1-28
18 Kuhiñahu, izaza dawaIsarela dejima dapompeli kuShilo+ nawa alemeni itenti dakubulakena kwenoku,+ muloña haniyi mpinji ituña adiña adiimika dehi mushindu.+
2 Hela chochu, hakachi kanyichidi yawaIsarela, hachidiña nyichidi 7 yadiña kanda yitambwili wuswana wayu.
3 Dichi Yoshuwa wayihwili aIsarela nindi: “Mwamba kaleka mpinjinyi kukaana kuya nakutambula ituña dinayinkiyi Yehova Nzambi yawankakulula jenu kwikala iheta denu?+
4 Nyinkenu amayala, hamuchidi-hamuchidi hafumi amayala asatu kulonda niyitemeshi; atela kuya nakuhitañana mwahita ituña dejima nikusoneka idi ituña kwesekeja nawuswana wawu. Kufumahu dinu, atela kufunta kudi ami.
5 Idi ituña atela kudanzañana hakachi kawu mumaseka 7.+ Yuda wakashala mwiluña dindi dakukabeta kakuchidiilu,+ nawa amwitala daYosefu akashala mwiluña dawu dakukabeta kakuchimunswa.+
6 Ilaña enu kasonekenu ituña nakudanzañana muyibalu 7, mwakayileti kunu kudi ami nawa ami nakayanzañena enu hamesu aYehova Nzambi yetu kuzatisha chinjikijilu.+
7 Ilaña aLevi hiyakweti chibalu champata hakachi kenuku,+ muloña mudimu wakumukalakela Yehova wawupristu diwuswana wawu;+ nawa Gadi, Rubeni nichibalu chamuchidi waManasi+ atambula dehi wuswana wawu kukabadi kakumusela waYodani, wayinkeliwu kudi Mosi kambuña aYehova.”
8 Dichi owu amayala adiloñesheli kuya nawa Yoshuwa walejeli adiña namudimu wakusoneka ituña nindi: “Yenu mwahita ituña dejima nawa mudisoneki, kufumahu mwakafunti kudi ami. Ami nakayanzañena enu kunu kuShilo+ kumesu aYehova kuzatisha chinjikijilu.”
9 Hohenohu owu amayala ayili nawa ahitañeni mwahita ituña dejima. Dichi apulili odu ituña muyibalu 7 hamu ninyisumba yadu nawa adisonekeli mumukanda. Kuhiñahu, afuntili kudi Yoshuwa kuchilombu muShilo.
10 Kufumahu, Yoshuwa wayanzañeneni ituña muShilo kumesu aYehova kuzatisha chinjikijilu.+ Kwenoku Yoshuwa wayanzañeneni aIsarela ituña kwesekeja nayibalu yampata jawu.+
11 Chinjikijilu chatachi chaholokeleli hamuchidi waBenjamini kwesekeja nayisaka yawu, nawa chibalu champata chayanzañeneniwu nachinjikijilu chadiña hakachi kawantu jaYuda+ nawantu jaYosefu.+
12 Kukabeta kakuchimunswa, ñinza yawu yatachikilili kuYodani nawa yayili nakushika kumukunkumuki waYeriku+ kukabeta kakuchimunswa nawa yakandukili nakuya kukabadi kakumujika wampidi ndo-o nimwisaña daBetaveni.+
13 Nawa iyi ñinza yafumini kwenoku nakuya kuLuzi, kumukunkumuki waLuzi wakukabeta kakuchidiilu, dikwila nawu Beteli;+ iyi ñinza yakunkumukili nakuya kuAtaroti Adara+ hampidi yakukabeta kakuchidiilu kaBetihoroni yakuChikulu.+
14 Nawa iyi ñinza ayipulilili kukabadi kakumujika nawa yanyeñumukili nakuya kukabeta kakuchidiilu kufuma kumpidi yatalañana naBetihoroni kukabeta kakuchidiilu; yakuminini kuKiriyati Bayali, dikwila nawu Kiriyati Yeyarimi,+ musumba waYuda. Aka hikabadi kakumujika.
15 Kukabadi kakuchidiilu, ñinza yafumini kwakumina Kiriyati Yeyarimi nawa yayili kukabadi kakumujika; yayili nakushika kukaseloki kamenji aNefitowa.+
16 Iyi ñinza yakunkumukili nakuya kwakumina mpidi yatalañana naChinekineki chaMwana kaHinomi,+ yekala muChinekineki chawaRefa+ kukabeta kakuchimunswa nawa yakunkumukili nakuya kuChinekineki chaHinomi, kumukunkumuki wawaYebusi+ kukabeta kakuchidiilu nakukunkumuka ndo-o nikuEnirogeli.+
17 Kuhiñahu, iyi ñinza yafumini kumujika nakuya kuEnshemeshi, cheñi nawa yayili kuGeliloti, wekalila kumbidi yamukunkumuki waAdumimi+ nawa yakunkumukili ndo-o nikwilola+ daBohani+ mwana kaRubeni.
18 Iyi ñinza yatwalekelihu nakuya kumukunkumuki wakukabeta kakuchimunswa kumbidi yaAraba nawa yakunkumukili nakushika kuAraba.
19 Nawa yatwalekelihu nakuya kumukunkumuki wakukabeta kakuchimunswa waBeti Hogila+ nawa iyi ñinza yakuminini kuchikumu chaKaluñalwiji kaMuñwa*+ kukabeta kakuchimunswa kunsa yakabeta kakuchidiilu kaYodani. Iyi diyadiña ñinza yakukabeta kuchidiilu.
20 Nawa Yodani diyadiña ñinza yeluña dawu dakukabadi kakumusela. Iwu diwadiña wuswana wawanyana kaBenjamini kwesekeja nayisaka yawu nikwesekeja nañinza jeluña dawu kutubadi twejima.
21 Nawa nyisumba yamuchidi waBenjamini kwesekeja nayisaka yawu yadiña: Yeriku, Beti Hogila, Emekikezizi,
22 Betaraba,+ Zemarayimi, Beteli,+
23 Avimi, Para, Ofira,
24 Kefari Amoni, Ofini niGeba.+ Nyisumba 12 hamu nanyikala yayu.
25 Gibeyoni,+ Rama, Beyeroti,
26 Mizipi, Kefira, Moza,
27 Rekemi, Iripeyeli, Tarala,
28 Zela,+ Hayelefi, Yebusi, dikwila nawu Yerusalema,+ Gibeya+ niKiriyati. Nyisumba 14 hamu ninyikala yayu.
Iwu diwadiña wuswana wawanyana kaBenjamini kwesekeja nayisaka yawu.
Tumazu twaheshina
^ Dikwila nawu, Kaluñalwiji Kafwa.
