Yoshuwa 22:1-34
22 Kuhiñahu, Yoshuwa watambikili aRubeni, aGadi nichibalu chamuchidi waManasi
2 nakuyileja nindi: “Muneli yuma yejima yayilejeliwu kudi Mosi kambuña aYehova,+ nawa munovwahili izu dami muyuma yejima yinayilejeli.+
3 Hampinji yejimiyi, amanakwenu munayuumbi wanyi kushika nikulelu;+ nawa munatwalekihu kuhemba lushimbi lwaYehova Nzambi yenu.+
4 Ichi dinu Yehova nayinookeshi dehi amanakwenu neyi chayikaniniyi.+ Dichi munateli kufunta kumatenti enu mwituña dayinkeliwu kudi Mosi kambuña aYehova kwikala iheta denu kwishinadi dikwawu* daYodani.+
5 Muhembeña chikupu kuleja niNshimbi jayinkeliyi Mosi kambuña aYehova+ nakumukeña Yehova Nzambi yenu,+ nakwenda munjila jindi jejima,+ nakuhemba kuleja kwindi kwejima,+ nakukakela kudi yena+ nikumukalakela+ namuchima wenu wejima ninawumi wenu wejima.”*+
6 Kufumahu, Yoshuwa wayikiswilili nawa wayilejeli nindi ayi, dichi ayili kumatenti awu.
7 Mosi wenkeli chibalu chamuchidi waManasi wuswana muBashani,+ nawa chibalu chikwawu chamuchidi, Yoshuwa wachinkeli ituña kukabadi kakumujika waYodani+ hamu nawamanakwawu. Kubombelahu, Yoshuwa chayilejeliyi nindi ayi kumatenti awu, wayikiswilili
8 nawa wayilejeli nindi: “Funtenu kumatenti enu namaheta amavulu, nayimuna yayivulu nankashi, nasiliva niwuru, nawuneñu niyikuñu niyakuvwala yayivulu chikupu.+ Sendenu iseka denu dayuma yimunapuupi+ mwakanzañani hamu nawamanakwenu.”
9 Kufumahu, aRubeni, aGadi nichibalu chamuchidi waManasi anyamukili nakufuma kudi aIsarela kuShilo mwituña daKenani nakufunta kumpata yaGiliyadi,+ mpata yayinkeliwu kulonda yiikali iheta dawu nawa mwashakaminiwu hanyima yakuyileja kudi Yehova kuhitila mudi Mosi.+
10 Chenjiliwu kumaluña aYodani mwituña daKenani, aRubeni, aGadi nichibalu chamuchidi waManasi atuñili kameña kwenoku kwakwihi naYodani, kameña keneni nawa kakawahi nankashi.
11 Chimwahitili mpinji, akwawu aIsarela achitiyili+ nawa ahosheli nawu: “Tiyenu! ARubeni, aGadi nichibalu chamuchidi waManasi anatuñili kameña kuñinza yetuña daKenani mumaluña aYodani kukabadi kawaIsarela.”
12 AIsarela chachitiyiliwu, izaza dawaIsarela dejima dapompeli kuShilo+ kulonda ayi nakuzuña nawu njita.
13 Kuhiñahu, aIsarela atemesheli Finihasi+ mwana kakapristu Eleyazari kuya kudi aRubeni, kudi aGadi nikuchibalu chamuchidi waManasi mumpata yaGiliyadi,
14 nawa anlomboli 10 adiña hamu nayena, kuchisaka-hichisaka chakukatata yanyichidi yejima yaIsarela kwafumini nlomboli wumu, nlomboli-hinlomboli* wemeneneñaku chisaka chakukatata yindi hakachi kamakombakaji* awaIsarela.+
15 Chashikiliwu kudi aRubeni, aGadi nikuchibalu chamuchidi waManasi mumpata yaGiliyadi, ayilejeli nawu:
16 “Izaza dawantu jaYehova dejima dinahoshi nawu: ‘Muloñadi chimunakoñeli ichi chuma chatama+ kudi Nzambi yaIsarela? Dalelu munabalumuki nakuleka kumulondela Yehova chimunadituñili enu aweni kameña nakudikaña naYehova.+
17 Komana chiluwa chitwakoñeli kuPeyori chanyanya? Nikulelu, tuchidi kanda tuditookeshi kuchiluwa chitwakoñeli, hela chakwila chipupu chenjili hezaza dawantu jaYehova.+
18 Nawa dalelu munakukeña kubalumuka nakuleka kumulondela Yehova! Neyi dalelu mukudikaña naYehova, kumadiki yena wakazuwila izaza dawaIsarela dejima.+
19 Dichi neyi mpata yimunatambuli yamajilu, zambukenu mwinzi mwituña dinatambuliyi Yehova+ mudi tabanaka yaYehova+ nakushakama hakachi ketu, ilaña bayi mudikaña naYehovaku, nawa bayi mutwilisha etu twiikali akakudikaña nanochu chimunadituñili enu aweni kameña kimunabombeli hakameña kaYehova Nzambi yetuku.+
20 Akani+ mwana kaZera chakoñeliyi chuma chatama kutalisha hayuma yateleleli kukisewa, komana Nzambi hazuwilili izaza dawaIsarela dejimaku?+ Nawa yena hidiyi hohu wafwili kankawindi kukoola nshidi yindiku.’”+
21 Hohenohu eni Rubeni, eni Gadi nichibalu chamuchidi waManasi aakwili anlomboli amakombakaji* awaIsarela+ nawu:
22 “Nzambi yawanzambi, Yehova!* Nzambi yawanzambi, Yehova!+ Yena neluki nawa aIsarela niwena akwiluka chumichi. Neyi twadikañili nikubula kwikala ashinshika kudi Yehova, bayi mutupulwishi daleluku.
23 Neyi twadituñilili kameña kulonda tuleki kumulondela Yehova nakulambwilahu nyilambu yakushita, nyilambu yambutu ninyilambu yakuwunda, Yehova wukutubabesha.+
24 Ilaña kudi chuma chaletesheli twili mwenimu, muloña twahosheli netu, ‘Kumbidi, anyanenu amba kayilaña anyanetu nawu: “Wuswanyi wumukweti wakudifukula kudi Yehova Nzambi yaIsarela hamu nanetu?*
25 Yehova nelishi Yodani kwikala ñinza hakachi kanetu nanenu, eni Rubeni nieni Gadi. Enu himukweti iseka hela dimu mudi Yehovaku.” Nawa anyanenu akakañesha anyanetu kudifukula kudi* Yehova.’
26 “Dichi twahosheli netu, ‘Tuzatenu nañovu kulonda tutuñi kameña, bayi kakulambwilahu nyilambu yakushita hela nyilambu yikwawuku,
27 ilaña kekali chinsahu hakachi kanenu nanetu+ nianyanetu* akavwalikaña hanyima yetu nakumwekesha nawu tukamukalakelaña Yehova mudimu wetu nanyilambu yetu yakushita, nanyilambu yetu yikwawu ninanyilambu yetu yakuwunda,+ kulonda anyanenu akabuli kuyila anyanetu kumbidi nawu: “Enu himukweti iseka hela dimu mudi Yehovaku.”’
28 Dichi twahosheli netu, ‘Neyi akatwila mwenimu hela kuyila anyanetu* kumbidi, twakahosha netu: “Talenu kameña kanadifwani nakameña kaYehova katuñiliwu ankakulula jetu, hikakulambwilahu nyilambu yakushita hela nyilambu yikwawuku, ilaña kanekali chinsahu hakachi kanenu nanetu.”’
29 Chinjila etu dalelu kudikaña naYehova nikuleka kumulondela Yehova+ hakutuña kameña kakulambwilahu nyilambu yakushita, nyilambu yambutu ninyilambu yikwawu, chatela tulambwileña hakameña kaYehova Nzambi yetu kadi kumbidi yatabanaka yindi!”+
30 Kapristu Finihasi, anlomboli ezaza dawantu nianlomboli amakombakaji* awaIsarela adiñayi nawu hamu chatiyiliwu mazu ahosheli anyana kaRubeni, anyana kaGadi nianyana kaManasi, atiyili kuwaha nankashi.+
31 Dichi Finihasi mwana kakapristu Eleyazari walejeli anyana kaRubeni, anyana kaGadi nianyana kaManasi nindi: “Dalelu tuneluki netu Yehova wudi hakachi ketu, muloña himunakoñi chumichi chakubula kwikala ashinshika kudi Yehovaku. Ichi dinu, munayipulwishi aIsarela muchikasa chaYehova.”
32 Kuhiñahu, Finihasi mwana kakapristu Eleyazari nialomboli afumini kudi eni Rubeni nikudi eni Gadi mumpata yaGiliyadi nakufunta kwituña daKenani nawa afuntishili mazu kudi akwawu aIsarela.
33 Nawa aIsarela atiyili kuwaha nankashi nanoyu nsañu yatambwililiwu. Kuhiñahu, aIsarela amuhamekeli Nzambi, nawa hiyahoshelihu izu hela dimu dakuya nakuzuña njita naweni Rubeni nieni Gadi kulonda ajilumuni mpata mwashakamineñawuku.
34 Dichi aRubeni niaGadi akituumbili aka kameña* ijina, muloña ahosheli nawu “kanekali chinsahu hakachi ketu nawu Yehova diyi Nzambi walala.”
Tumazu twaheshina
^ Dikwila nawu, kukabadi kakumusela.
^ Talenu Kulumbulula.
^ Hela “nyitaña.”
^ MuchiHeberu, “mutu-himutu.”
^ Hela “nyitaña.”
^ Hela “Nzambi, Yehova.”
^ Hela “Chumanyi chimunateli kumwilila Yehova Nzambi yaIsarela?”
^ MuchiHeberu, “kumutiya woma.”
^ MuchiHeberu, “ikiñu.”
^ MuchiHeberu, “ikiñu detu.”
^ Hela “nyitaña.”
^ Kwesekeja nachalumbululawu, chinamwekeshi nawu kameña akituumbili nawu Chinsahu.
