Yoshuwa 24:1-33
-
Yoshuwa nahituluki muchihandilu chaIsarela (1-13)
-
Kukonkomwena kumukalakela Yehova (14-24)
-
“Ilaña ami niamwitala dami, tukumukalakelaña Yehova” (15)
-
-
Chitiyañenu chaYoshuwa naIsarela (25-28)
-
Kufwa kwaYoshuwa nikumujiika (29-31)
-
Mafwaha aYosefu anayijiiki kuShekemi (32)
-
Kufwa kwaEleyazari nikumujiika (33)
24 Kuhiñahu, Yoshuwa wapompesheli hamu nyichidi yejima yaIsarela kuShekemi nawa watambikili akulumpi jawaIsarela, anlomboli jawu, ansompeshi jawu niantwamina jawu,+ nawa emeni kumesu aNzambi walala.
2 Yoshuwa wayilejeli antu ejima nindi: “Yehova Nzambi yaIsarela nahoshi nindi, ‘Kunyima kwakweni+ ankakulula jenu+ ashakamineña kwishinadi daKaloña,* hamu niTera tata yaAbarahama nawa tata yaNahori, nawa akalakeleleña anzambi acheñi.+
3 “‘Chimwahitili mpinji, nasendeli nkakulula yenu Abarahama+ kufuma kwishinadi daKaloña* nawa namuhitishili mwituña dejima daKenani nawa navulishili anyanindi.*+ Namwinkeli Isaka;+
4 kuhiñahu, Isaka namwinkeli Yakoba niEsawu.+ Mukuhita kwampinji, Esawu namwinkeli Mpidi yaSeyiri kwikala iheta dindi;+ ilaña Yakoba nianyanindi awamayala akunkumukili nakuya kuEjipitu.+
5 Chimwahitili mpinji, natemesheli aMosi naAroni+ nawa namweteli Ejipitu nayipupu yinakoñeli hakachi kawu,+ kuhiñahu enu nayidishilimu.
6 Chinedishileña ankakulula jenu muEjipitu+ nawa chimwashikili kukaluñalwiji, aEjipitu adiña nakukumpisha ankakulula jenu namakalu anjita ninamashidika endeleleña hatuwalu ndo-o nikuKaluñalwiji Kachinana.+
7 Atachikili kundilila ami Yehova,+ dichi nashili mwidima hakachi kenu nawaEjipitu. Kuhiñahu, nayibuvwilili menji akaluñalwiji nawa kayibutili,+ nawa mwadimweneni namesu enu chuma chinamukoñeli Ejipitu.+ Kufumahu, mwashakamini mwisaña yaaka yayivulu.*+
8 “‘Nawa enu nayileteli mwituña dawaAmori anakushakama mwishinadi* daYodani nawa azuñili nanenu.+ Ilaña nayihanini mumakasa enu kulonda mutambuli ituña dawu nakwikala iheta denu, nawa nayijilumwini iku munakutalaku.+
9 Kuhiñahu, Balaki mwanta wakuMowabi, mwana kaZipori, wanyamukili nakuzuña naIsarela. Dichi watambikili Balami mwana kaBeyori kulonda ayishiñi.+
10 Ilaña ami hinamutiyilili Balamiku.+ Dichi wayikiswilili kapampa kakavulu+ nawa ami nayamwinini muchikasa chindi.+
11 “‘Kufumahu, mwazambukili Yodani+ nakwinza kuYeriku. Nawa anlomboli* amuYeriku,+ aAmori, aPerizi, aKenani, aHiti, aGirigashi, aHivi niaYebusi azuñili nanenu, ilaña nayihanini mumakasa enu.+
12 Dichi naletesheli antu kudihomba* henohu enu kanda mushiki, nawa dichayitemukililiwu+ neyi chatemukili anyanta ayedi awaAmori. Himwayitemwini nampoku yenu yakabali hela nawuta wenu wamukunjiku.+
13 Kufumahu, nayinkeli enu ituña dimwabulili kukabakena nimusumba wumwabulili kutuña,+ nawa mwashakamini mwenomu. Munakuda mumatempa anyivinyu nianyiolivi imwabulili kudima.’+
14 “Dichi, mutiyenuña Yehova woma nawa mukalakelenuña namuchima wutooka ninakashinshi,*+ nawa fumishenu anzambi adiña nakukalakelawu ankakulula jenu mwishinadi daKaloña* nimuEjipitu,+ nawa mukalakelenuña Yehova.
15 Dichi, neyi chinayitiyishi enu kutama kumukalakela Yehova, dalelu ditondelenu imwatela kukalakela,+ hela anzambi adiña nakukalakelawu ankakulula jenu mwishinadi daKaloña*+ hela anzambi awaAmori akweti ituña mumunakushakama.+ Ilaña ami niamwitala dami, tukumukalakelaña Yehova.”
16 Hohenohu antu ahosheli nawu: “Chinjila etu kumushiya Yehova nakukalakela anzambi acheñi.
17 Yehova Nzambi yetu diyi watufumishili etu niankakulula jetu mwituña daEjipitu,+ mwitala dawuduñu,+ nawa diyi wakoñeli iyi yinjikijilu yamaneni hamesu etu+ nawa diyi watukiñileña munjila mwejima mutwendeleña nimukachi kawantu ejima mutwahitileña.+
18 Yehova watemwini antu ejima kushilahu niaAmori ashakamineña mudinu ituña henohu etu kanda. Dichi ninetu tukumukalakelaña Yehova muloña hiNzambi yetu.”
19 Kuhiñahu, Yoshuwa walejeli antu nindi: “Enu himukutwesha kumukalakela Yehovaku, muloña hiNzambi wajila;+ hiNzambi wakeñaña antu kudifukula kudi yena hohu.+ Hakanakena kuluwa kwenu* ninshidi jenuku.+
20 Neyi mumushiya Yehova nakukalakela anzambi akutwamba,* niyena wakayifutalela nakuyijilumuna hela chakwila wadiña nakuyikoñela yuma yayiwahi.”+
21 Ilaña antu amwakwili Yoshuwa nawu: “Inehi, etu kwetu tukumukalakelaña Yehova!”+
22 Dichi Yoshuwa walejeli antu nindi: “Enu aweni mudi ayinsahu, munadishimwini nawa munaditondeli kumukalakela Yehova.”+ Hohenohu wena ahosheli nawu: “Tudi ayinsahu.”
23 “Dichi, fumishenu anzambi akutwamba adi mukachi kenu nawa shenu nyichima yenu kudi Yehova Nzambi yaIsarela.”
24 Antu amulejeli Yoshuwa nawu: “Tukumukalakelaña Yehova Nzambi yetu, nawa tukwovwahilaña izu dindi!”
25 Dichi hanodu ifuku, Yoshuwa watiyañeni chitiyañenu nawantu nawa wayinkeli lushimbi niwunsompeshi muShekemi.
26 Kuhiñahu, Yoshuwa wasonekeli awa mazu mumukanda waNshimbi jaNzambi+ nawa wanoneli ilola deneni+ nakudiimika mwishina damutondu weneni wadiña kwakwihi neluña dajila daYehova.
27 Yoshuwa watwalekelihu kuleja antu ejima nindi: “Talenu! Idi ilola dikwikala chinsahu hakachi ketu,+ muloña dinatiyi yuma yejima yinatulejiyi Yehova nawa dakekala chinsahu hakachi kenu kulonda mwakabuli kumukaana Nzambi yenu.”
28 Hohenohu, Yoshuwa wayilejeli antu nindi ayi, iwu kuwuswana windi iwu kuwuswana windi.+
29 Yoshuwa kambuña aYehova, mwana kaNuni, chamanishiliyi kuhosha yumiyi, wafwili nayaaka 110.+
30 Dichi amujiikili mwiluña dawuswana windi muTiminati Sera,+ musumba wekala mwiluña damapidi daEfuremu, kukabeta kakuchimunswa kaMpidi yaGayashi.
31 Isarela watwalekelihu kumukalakela Yehova mumafuku ejima aYoshuwa nimumafuku ejima awakulumpi atwalekelihu nakuhanda chelili Yoshuwa nafwi dehi nawa elukili nyidimu yejima yamukoñeleliwu Isarela kudi Yehova.+
32 Mafwaha aYosefu+ asendeliwu aIsarela kufuma muEjipitu, ayijiikili muShekemi mukadiluña kampata kalandiliyi Yakoba namali asiliva 100+ kudi anyana kaHamori+ awamayala, tata yaShekemi; nawa kekalili wuswana wawanyana kaYosefu awamayala.+
33 Eleyazari mwana kaAroni niyena wafwili.+ Dichi amujiikili muKapidi kamwanindi Finihasi,+ kamwinkeliwu mwiluña damapidi daEfuremu.
Tumazu twaheshina
^ Dikwila nawu, Yufurati.
^ Dikwila nawu, Yufurati.
^ MuchiHeberu, “mbutu.”
^ MuchiHeberu, “mafuku amavulu.”
^ Dikwila nawu, kabadi kakumusela.
^ Hela hekwawu, “eni mpata.”
^ Hela hekwawu, “kululuta; kufwa mutentu.”
^ Hela “nimuchalala.”
^ Dikwila nawu, Yufurati.
^ Dikwila nawu, Yufurati.
^ Hela “kudikaña kwenu.”
^ MuchiHeberu, “anzambi akwacheñi.”
