Yoshuwa 5:1-15
5 Anyanta awaAmori+ ejima adiña kukabadi kakumujika waYodani nianyanta ejima awaKenani+ adiña kukamwihi nakaluñalwiji chatiyiliwu tuhu nawu Yehova womisha menji aYodani hamesu awaIsarela kushika nimpinji yazambukawu, atiyili woma nankashi*+ nawa wulobu wejima* wayimanini muloña wawaIsarela.+
2 Hanoyu mpinji, Yehova wamulejeli Yoshuwa nindi: “Dichilili mpoku jamalola jatwa* kulonda waalamishi+ cheñi amayala aIsarela kamuchiyedi.”
3 Dichi Yoshuwa wachilili mpoku jamalola jatwa* nawa waalamishili amayala aIsarela kuGibeyati Hayaraloti.*+
4 Ichi dichaletesheli Yoshuwa ayaalamishi: Muloña amayala ejima awantu afumini muEjipitu, dikwila nawu amayala ejima anjita,* afwilili mwisaña halwendu hanyima yakufuma muEjipitu.+
5 Antu ejima afumini muEjipitu adiña aalama, ilaña antu ejima avwalikilili mwisaña halwendu hanyima yakufuma muEjipitu adiña ayidima.
6 AIsarela endeli hadi yaaka 40+ mwisaña sampu nichafwili muza wejima, dikwila nawu amayala anjita afumini muEjipitu abulili kwovwahila izu daYehova.+ Yehova wasanyikili kudi wena nindi hamba kayiteja kumona ituña+ dasanyikiliyi Yehova kudi ankakulula jawu kutwinka etuku,+ ituña dasweja mayeli niwuchi.+
7 Dichi hadi wena, wasinsishilihu anyanawu.+ Wenawa diwu aalamishiliyi Yoshuwa; adiña ayidima muloña hiyayaalamishili hadiñawu halwenduku.*
8 Chamanishiliwu kwaalamisha muza wejima, atwalekelihu kushakama kwenoku kwadiñawu muchilombu nichakusukiliwu.
9 Kuhiñahu, Yehova wamulejeli Yoshuwa nindi: “Ami dalelu nafumishi kudi enu kasawuntu kawaEjipitu.” Dichi idi iluña aditenaña nawu Giligali*+ kushika nikulelu.
10 AIsarela atwalekelihu kuteekela kuGiligali nawa adiili Chipandakenu namelela hefuku damu 14 dakakweji,+ muyana yachinkalampata yakuYeriku.
11 Ifuku dalondelelihu hanyima yaChipandakenu, atachikili kuda yakuda yamunodu ituña, mankendi akadi iluñi+ nimbutu yakwocha hadodenodu ifuku.
12 Dichi hefuku dalondelelihu, chelili anadii dehi yakuda yimu yamunodu ituña, manina alekeli. Hikwadiñahu cheñi manina akuda aIsarelaku,+ ilaña atachikili kuda yakuda yamwituña daKenani muchochenochu chaaka.+
13 Yoshuwa hadiñayi kwakwihi naYeriku, wenukili nawa wamweni iyala+ nemani kumbidi yindi iku nakwati mpoku yakabali muchikasa chindi yakuhola dehi.+ Dichi Yoshuwa wayili kudi yena nakumwihula nindi: “Wudi kukabadi ketu tahindi wudi kukabadi kawakankunyi netu?”
14 Yena wamwakwili nindi: “Inehi, ami nenzi muloña nidi kalamba kanjita* yaYehova.”+ Hohenohu Yoshuwa wadibukili chamesu heseki nawa wadifukwili nakuhosha nindi: “Eyi mwanta wami, yumanyi yiwunakukeña kunleja ami kambuñeyi?”
15 Kalamba kanjita yaYehova wamwakwili Yoshuwa nindi: “Subulaku nkwabilu kunyendu yeyi, muloña heluña hiwunemani hajila.” Hohenohu Yoshuwa wasubwili.+
Tumazu twaheshina
^ MuchiHeberu, “nawa spiritu hiyayisañumwineña cheñiku.”
^ MuchiHeberu, “nyichima yawu yasuñunukili.”
^ Hela “jawambuka.”
^ Hela “jawambuka.”
^ Daya mukwila nawu, “Kapidi kaTulomulomu.”
^ Hela “amayala ashikilili muyaaka yakuzuña njita.”
^ Hela “hawenyi.”
^ Daya mukwila nawu, “Kufumisha.”
^ Hela “mukulumpi wanjita.”