Yoshuwa 6:1-27
6 Dichi Yeriku amwenzeleli chikupu muloña wawaIsarela; kwosi niwumu wedikileña nawa kwosi niwumu weñilileña.+
2 Kuhiñahu, Yehova wamulejeli Yoshuwa nindi: “Talaña, ami nakwinki Yeriku nimwanta wawu niakakuzuña njita awu añovu.+
3 Enu amayala ejima akakuzuña njita mwatela kunyeñumuka musumba, dikwila nawu kunyeñumuka musumba kapampa kamu. Ichi dichimwatela kwila hadi mafuku 6.
4 Atupristu 7 akasendi nseñu 7 jayizamba yanyikoku nakutwaminaku hambidi yaChimbañu. Ilaña hefuku damu 7, mwatela kunyeñumuka musumba mapampa 7 nawa atupristu akavumishi iji nseñu.+
5 Neyi nseñu jayizamba yanyikoku anajivumishi dehi, chimwakatiya tuhu chivumina chanseñu,* amashidika ejima atela kubidika nezu datiyakana danjita. Kuhiñahu, mpwembu yamusumba yakabuvuka chikupu,+ nawa amashidika atela kuyamu, muntu-himuntu akemakani nahindi.”
6 Dichi Yoshuwa mwana kaNuni watambikili atupristu hamu nawa wayilejeli nindi: “Nonenu chimbañu chachitiyañenu nawa atupristu 7 atela kusenda nseñu 7 jayizamba yanyikoku nakutwaminaku hambidi yaChimbañu chaYehova.”+
7 Kufumahu, walejeli amashidika nindi: “Yenu munyeñumuki musumba, nawa mazanvu amashidika anadimanyeki+ atela kutwaminaku hambidi yaChimbañu chaYehova.”
8 Dichi, neyi chalejeliyi Yoshuwa amashidika, atupristu owu asendeli nseñu 7 jayizamba yanyikoku kumesu aYehova atwamininiku hambidi nawa avumishili nseñu, nawa chimbañu chachitiyañenu chaYehova chadiña nakuyilondela hanyima.
9 Nawa mazanvu amashidika adimanyekeli atwamininiku hambidi yawatupristu avumishileña nseñu, nawa amashidika amakwawu alondeleleña hanyima yaChimbañu iku nseñu anatwalekihu kujivumisha.
10 Dichi Yoshuwa walejeli amashidika nindi: “Bayi mubidika hela kuhosheshaku. Mutunwa twenu bayi mufuma izuku kushika niifuku dinakayileja nami, ‘Bidikenu!’ Dihu dinu himwakabidika.”
11 Wanyeñumwishili Chimbañu chaYehova musumba kwi-i ndo-o, kamu hohu, kufumahu, afuntili muchilombu nawa akaamini mwenomu.
12 Hefuku dalondelelihu, Yoshuwa wahindukili nantetemena nankashi nawa atupristu anoneli Chimbañu+ chaYehova,
13 nawa owu atupristu 7 asendeli nseñu 7 jayizamba yanyikoku atwamininiku hambidi yaChimbañu chaYehova iku anatwalekihu nakuvumisha nseñu. Mazanvu amashidika adimanyekeli atwamininiku hambidi yawu nawa amashidika ashalili munyima alondeleleña Chimbañu chaYehova iku nseñu anatwalekihu nakujivumisha.
14 Anyeñumukili musumba hefuku damuchiyedi kwi-i ndo-o, kufumahu, afuntili muchilombu. Ichi dicheliliwu hadi mafuku 6.+
15 Hefuku damu 7, ahindukili nantetemena nankashi hakusela kwetena nawa anyeñumukili musumba kwi-i ndo-o mapampa 7 munjila yoyimu. Hanidi ifuku dihu hohu hanyeñumukiliwu musumba mapampa 7.+
16 Dichi hepampa damu 7, atupristu avumishili nseñu nawa Yoshuwa wayilejeli amashidika nindi: “Bidikenu,+ muloña Yehova nayinki musumba!
17 Musumba niyuma yejima yidimu atela kuyijilumuna chikupu;+ yejima yaYehova. Chiña hohu chivumbi Rahaba+ diyi wukutwalekahu kuhanda, yena niejima adiyi nawu mwitala, muloña waswekeli antemesha itwatemesheli.+
18 Ilaña enu, mwatela kutondolwela yuma yatela kukisewa+ kulonda mubuli kufwila chuma chatelela kukisewa nakuchisenda,+ nakuletesha chilombu chaIsarela kwikala chuma chatelela kukisewa kuhitila mukuchiletela yihuñu.*+
19 Hakwila siliva yejima, wuru yejima niyuma yejima yawuneñu niyachikuñu hiyuma yajila kudi Yehova.+ Atela kuyitwala muchisweku chaYehova chayuma yalema.”+
20 Kuhiñahu, nseñu chiyajivumishiliwu,+ amashidika abidikili. Amashidika chatiyiliwu tuhu chivumina chanseñu, abidikili nezu datiyakana danjita nawa mpwembu yamusumba yabuvukili chikupu.+ Hanyima yachumichi, antu ayili mumusumba, muntu-himuntu wemakeni nahindi nawa atambwili owu musumba.
21 Ajilumwini yuma yejima yadiña mumusumba nampoku yakabali, muntu weyala niwamumbanda, kansi nimukulumpi, ñombi, mukoku nichimbuulu.+
22 Yoshuwa walejeli amayala ayedi endesheli ituña nindi: “Yenu mwitala damumbanda chivumbi, mumwidishimu hamu niejima adiyi nawu neyi chimwasanyikili kudi yena.”+
23 Dichi owu anyikwenzi endesheli ituña eñilili nakumwidishamu Rahaba hamu natata yindi, mama yindi, amanakwindi, niejima adiña kukabadi kindi. Edishili chisaka chindi chejima+ nawa ayisendeli chiwahi nakuyitwala kwiluña dadiña hanji yachilombu chaIsarela.
24 Kuhiñahu, musumba awocheli nakesi niyuma yejima yadiñamu. Ilaña siliva, wuru niyuma yejima yawuneñu niyachikuñu ayitwalili muchisweku chamwitala daYehova chayuma yalema.+
25 Yoshuwa wapulwishiliku hohu chivumbi Rahaba niamwitala datata yindi niejima adiñayi nawu;+ nawa washakamaña muIsarela kushika nikulelu,+ muloña waswekeli antemesha owu atemesheliyi Yoshuwa kuya nakwendesha Yeriku.+
26 Hayina mpinji, Yoshuwa wasanyikili* nakushiñana nindi: “Yowu muntu wakakeña kutuñulula iwu musumba waYeriku, wakashiñewa kumesu aYehova. Hakwaala chikuku chaniwu musumba, wakafwisha mwanindi wawedi, nawa hakwimika yiisu yaniwu musumba, wakafwisha mwanindi wakabinda.”+
27 Dichi Yehova wadiña naYoshuwa+ nawa mpuhu yindi yatiyakeni mwahita iseki dejima.+
Tumazu twaheshina
^ Hela “chivumina chanseñu chakadi kuketuka swayi.”
^ Hela “kukala; makabi.”
^ Hela hekwawu, “waletesheli antu asanyiki iku kusanyika.”
