Yoshuwa 7:1-26
7 Ilaña aIsarela hiyadiña ashinshika kuyuma yateleleli kukisewaku, muloña Akani+ mwana kaKarimi, Karimi mwana kaZabidi, Zabidi mwana kaZera wakumuchidi waYuda, wanoneli yuma yimu yateleleli kukisewa.+ Muloña wachumichi, Yehova wayizuwilili chikupu aIsarela.+
2 Kuhiñahu, Yoshuwa watemesheli amayala kufuma kuYeriku nakuya kumusumba waAyi+ wekala kwakwihi naBetaveni nikumusela waBeteli,+ nakuyileja nindi: “Kandukenu muyi nakwendesha ituña.” Dichi owu amayala akandukili nawa endesheli Ayi.
3 Chafuntiliwu kudi Yoshuwa, amulejeli nawu: “Hikunakukeñeka amashidika ejima kukanduka nakuyaku. Amayala akushika kumakombakaji ayedi hela asatu anateli kwimika Ayi mushindu. Bayi wuzeyesha antu ejima hakuyileja neyi ayiku, muloña mwashakamaña hohu antu antesha.”
4 Dichi amashidika akushika ku 3,000 ayili kwenoku, ilaña ayitemwini kudi amayala akuAyi.+
5 Amayala akuAyi ajahili amayala aIsarela 36, nawa atwalekelihu nakuyikumpisha kufumisha hanji yachiisu chamusumba ndo-o nikuShebarimi,* nawa atwalekelihu nakuyitapa kushika nikwakunkumuka. Dichi nyichima yawantu yasuñunukili nawa yekalili neyi menji.
6 Hohenohu Yoshuwa watabwili yakuvwala yindi nakudibuka chamesu heseki kumbidi yaChimbañu chaYehova kushika nimelela, yena hamu niakulumpi jawaIsarela, nawa atwalekelihu kudisukwila lunkuñu hanyitu yawu.
7 Yoshuwa wahosheli nindi: “Yayo-o! Eyi Yehova Mwanta Wabadika, muloñadi chiwaleteleli awa antu nakuyizambwisha Yodani nakutuhana mumakasa awaAmori kulonda atujilumuni? Chiña tuhu kwetu twadishakaminini hohu mwishinadi* daYodani!
8 Eyi Yehova, ñanakeni, nukuhosha dinu namidi chineli Isarela natemuki* ayilumbu jindi?
9 AKenani niantu ashakamaña mwituña chatiyawu chumichi, akatunyeñumuka nakujima ijina detu hamaseki. Chumanyi chiwakela hakwila wakakiñi ijina deyi dabadika?”+
10 Yehova wamwakwili Yoshuwa nindi: “Nyamukaku! Muloñadi chiwunabulameni heseki?
11 Isarela naputoli. Anafumpi chitiyañenu chami+ chinayilejeli nami ahembeña. Asenda yuma yatelela kukisewa,+ ayiya+ nakuyibombela hamaheta awu mukujinda.+
12 Dichi, aIsarela hiyakutwesha kwimika mushindu ayilumbu jawuku. Akufutalela ayilumbu jawu nikutemuka ayilumbu jawu, muloña anekali chuma chatelela kukisewa. Hinukwikala cheñi nanenuku sampu munakisañani mukachi kenu yuma yatelela kukisewa.+
13 Nyamukaku kulonda wujiliki antu!+ Wuyileji neyi, ‘Kumadiki mwakadijiliki, muloña Yehova Nzambi yaIsarela nahoshi nindi: “Enu aIsarela, yuma yatelela kujilumunewa yidi mukachi kenu. Himukutwesha kwimika mushindu ayilumbu jenuku, sampu munafumishi mukachi kenu yuma yatelela kukisewa.
14 Mwakadipompeshi ntetemena, hamuchidi-hamuchidi nawa muchidi wakatondayi Yehova+ wakenza kwakwihi, hachisaka-hachisaka nawa chochisaka chakatondayi Yehova chakenza kwakwihi, hetala-hetala nawa dodiitala dakatondayi Yehova dakenza kwakwihi, hamuntu-hamuntu.
15 Nawa yowu muntu akakwatawu nayuma yatelela kukisewa akamwocha nakesi,+ yena niyuma yejima yikwetiyi, muloña nafumpi chitiyañenu+ chaYehova nawa nakoñi chuma chawuzondu muIsarela.”’”
16 Dichi hefuku dalondelelihu, Yoshuwa wahindukili nantetemena nankashi nawa waleteli aIsarela kwakwihi, hamuchidi-hamuchidi, nawa muchidi waYuda awutondeli.
17 Walejeli yisaka yaYuda kwinza kwakwihi nawa chisaka chawaZera+ achitondeli. Kufumahu, walejeli chisaka chawaZera kwinza kwakwihi, hamuntu-hamuntu nawa Zabidi amutondeli.
18 Nkumininaku, walejeli amwitala daZabidi kwinza kwakwihi, hamuntu-hamuntu, nawa Akani mwana kaKarimi, Karimi mwana kaZabidi, Zabidi mwana kaZera wakumuchidi waYuda, amutondeli.+
19 Kuhiñahu, Yoshuwa wamulejeli Akani nindi: “Mwanami, mwani mulemeshi Yehova Nzambi yaIsarela nawa shimunaku kudi yena muloña iwunakoñi. Nleji mwani chuma chiwunakoñi. Bayi wunswekachuku.”
20 Akani wamwakwili Yoshuwa nindi: “Chalala yami inamuvulumuni Yehova Nzambi yaIsarela, nawa ichi dichuma chinneli.
21 Chinamweni chakuvwala chachiwahi chawuseya hayuma yakupuupa yakuShinari+ nimashekeli* asiliva 200 niwuru yalema mashekeli 50, najifwilili, dichi najisendeli. Najisweki hamaseki kwishina mukachi ketenti dami hamu namali.”
22 Hohenohu, Yoshuwa watemesheli antemesha nawa ayili lufuchi kwitenti, nawa awanini chakuvwala chakusweka mwitenti dindi hamu namali kwishina dachu.
23 Dichi asendeli oyu yuma mwitenti nawa ayileteli kudi Yoshuwa nikudi aIsarela ejima nakuyitenteka kumesu aYehova.
24 Kuhiñahu, Yoshuwa hamu nawaIsarela ejima asendeli Akani+ mwana kaZera, siliva, chakuvwala chalema wuseya, wuru+ hamu nianyanindi awamayala, nianyanindi awambanda, añombi jindi, yimbuulu yindi, anyikoku indi, mpembi jindi, itenti dindi niyuma yindi yejima, nawa ayileteli muChinekineki chaAkori.+
25 Yoshuwa wamwihwili nindi: “Muloñadi chiwunatuleteli yihuñu?*+ Dalelu, Yehova nakuleta yihuñu hadi eyi.” Hohenohu aIsarela ejima amwasili malola,+ kufumahu, amwocheli nakesi.+ Dichi wejima wawu ayasili malola.
26 Nawa alumbikili mulumba weneni wamalola hadi yena, owu wuchidiku nikulelu. Hohenohu Yehova walekeli kuzuwa.+ Dihafuma ijina danidi iluña aditeneña nawu Chinekineki chaAkori* kushika nikulelu.
Tumazu twaheshina
^ Daya mukwila nawu, “Yimbotela.”
^ Dikwila nawu, kukabadi kakumusela.
^ Hela “wafutaleleli.”
^ Lushekeli lumu lwesekeni namagiramu 11.4. Talenu Nsañu Jikwawu B14.
^ Hela “kukala; makabi.”
^ Daya mukwila nawu, “Kukala; Makabi.”
