Chipandakenu chadiiliyi Yesu chakukumishaku chadiña chalema. Muloña wadiña kwakwihi nakufwa, wafuukwilihu kuda nawapostolu indi Chipandakenu nawa waloñeshili chawija chachiha chaKuda kwaMwanta kwaMelela chatela kwanukañawu hachaaka-hachaaka. Dichi walejeli aPetulu niYowanu kuwahisha mukapeka. (Luk 22:7-13; talenu mwevulu wudi hakava.) Chumichi chinakutwanukisha nawu twatela kudiloñesha twakanakani Chanukishu ha 27 March. Yipompelu yatela yinatondi anhoshi nawa yinaloñeshi yifwikija niyuma yikwawu. Chumanyi chitwatela kwila hamuntu-hamuntu hakwila nawu tudiloñeshi kwanakana Chanukishu?

Diloñeshenu mumuchima. Tañenu nikutoñojoka chikupu haKutaña Bayibolu muMpinji yaChanukishu. Ndandanda yidi muKutalatala muNsona Hefuku Hefuku. Hakapetulu 16 kaMukanda Wakutukwasha Kudiza Izu daNzambi, hadi ndandanda yinalumbululiwu chikupu. (Talenu cheñi Mukanda Wakupompa waApril 2020.) Yisaka yinateli kuwana nsañu yatela kuhanjekawu hakudifukula kwachisaka chalemena ifutu danyiloña kuhitila mukusandujola muWatch Tower Publications Index hela muChitwa Chakukwasha aYinsahu jaYehova hakusandujola nsañu.

Tambikenuku antu akenzi. Zatenu nankashi mukampeni yakutambika antu kuChanukishu. Toñojokenuña hadi antu imwatela kutambika, chidi neyi kufuntila, antu imwadizishileña Bayibolu kunyima, antu imwadiluka nawu niantaña. Akulumpi niwena atela kutambika antu azeya. Anukenu nenu neyi owu muntu washakama kumwashakamaña wanyi, mwatela kwiluka mpinji niiluña kwakapompelawu Chanukishu didi kwakwihi nakwashakamañayi, kuhitila mukuchinta hanasonekiwu nawu CHITWEKALA ha jw.org/lun nawa yenu hanasonekiwu nawu “Chanukishu.”

Yumanyi yikwawu yitwatela kwila hakwila nawu tudiloñeshi?