Felisa: Navwalikilili muchisaka chawuzweñi muSpain. Twayileña muKatolika nawa twakeñeli kuya kuchechi. Antaña jami 13 adiña atupristu amakwawu adiña muchechi. Amusonya wamama adiña akapristu nawa antañishi hashikola yawaKatolika. Chafwiliwu, Papa John Paul II ayilemesheli kuhitila mukuyihameka. Atata adiña achiji, nawa amama adiña andimi. Twadiña 8 muchisaka nawa yami nadiña wedi.

Chinashikijili yaaka 12, njita yatachikili muSpain. Chamanini njita, atata ayitwalili mukaleya muloña nfulumendi yakeñeli wanyi nsañu yahosheleñawu hamapolitiki. Chayikalilileña amama kutukeñela wejima wetu yakuda. Amama ayitwalili anyikijami asatu aAraceli, Lauri, niRamoni, kuya nakushakama mwitala dawakatolika mumusumba waBilbao. Muloña anyiki jami adi kudaña yakuda yayivulu.

Araceli: Hayina mpinji nadiña nayaaka 14, Lauri wadiña nayaaka 12, nawa Ramoni wadiña nayaaka 10. Twadimweneña wanyi. Kutwayili, twadiña namudimu wakuwahisha wayisha. Chimwahitili yaaka yiyedi, akatolika atutwalili kwitala deneni kuZaragoza kwahembelañawu atushinakaji. Twazatileña mudimu wakuwahisha mwakutelekela, dichi watuzeyesheleña nankashi.

Felisa: Anyiki jami chayiliwu kuZaragoza, amama nawamandumi adiña akapristu anlejeli ninami kuya kuZaragoza. Akeñeleña kunfumisha kudi iyala wankeñeleña. Nakeñeleña kushakama hetala  dawakatolika muloña namukeñeli Nzambi. Nayileña kuchechi mpinji yejima chakwila nakeñeleña nikwikala mishonali wamuKatolika neyi musonyami muAfrica.

Ilaña hanidi itala, nakañenyeña kwila yuma yejima yinakeñeleña kwila. Ankaanishileña kumukalakela Nzambi kwituña dacheñi neyi chinakeñeleña. Chimwahitili chaaka, nafuntili kwitala nakuhemba amandumi adiña akapristu. Nayizatilileña nyidimu yahetala, nawa twadiña nakulombela Kolona hamu namelela. Nakeñeli mudimu wakuwahisha nkenu muchechi nikuvwika Mariya nkanji ‘niakwakujila.’

Araceli: Henohu nichidi kuZaragoza, nasanyikili kusanyika kwatachi kulonda nikali katolika. Atwambwili nawanyikijami. Dichi antwalili kwitala dawakatolika kuMadrid nawa Lauri amutwalili kuValencia. Ramoni washalili kuZaragoza. MuMadrid, nasanyikili kamuchiyedi kulonda nikali katolika. Antu amavulu adi neyi atudizi niatushinakaji enjileña nakushakama hanidi itala. Dichi nyidimu yavulileña. Nazatilileña muchipatela chahanidi itala.

Nakeñeleña chikupu kwikala katolika. Natoñojokeleña nami tukutañaña Bayibolu nikuyidiza hadi mpinji yeneni. Ilaña dichi twelileña wanyi. Kwosi muntu watañileña Bayibolu hela kuhosha hadi Nzambi hela Yesu. Nadizili chiLatin, nawa nelukili chihandilu “chawakwakujila’’ awaKatolika nikudifukula kudi Mariya. Ilaña kakavulu twazatileña hohu nyidimu yakola.

Natachikili kuzeya nikwakamena. Natachikili kutoñojoka nami natela kwiñila mudimu kulonda nikwasheña chisaka chami chatela nizateña kunidi itala nakuhetesha antu acheñi. Dichi nahosheli namukulumpi wawamasisita nami inakukeña kuleka. Ilaña wankomeneni mukapeka. Watoñojokeleña nindi nukufuntamu.

Akwawu anfumishilimu, ilaña chelukiliwu nawu inakukeña kuya, ankomeneni cheñi mukapeka. Hanyima yakunkomenamu kasatu, ahosheli nawu hakwila niyi nateli kusoneka nami: “Inakuya muloña inakukeña kukalakela Satana bayi Nzambiku.” Chaneñesheli. Nakeñeleña kuya ilaña nasonekeli wanyi awa mazu. Nkumininaku, nahosheli nakapristu nawa namulejeli yuma yamwekeni. Watambwili lusesa kudi shikofu kulonda afuntishi kuZaragoza. Chinashakaminiku tukweji twanti, añitejeli kuya. Hashimbwili wanyi, aLauri naRamoni niwena afuminiku.

Felisa: Chimwahitili mpinji, nasumbukili nawa twayili nakushakama kuCantabria, musumba wamuSpain. Nayileña kuchechi mpinji yejima. Ifuku  dimu Hamulungu twadiña muchechi, kapristu wabidikili iku nahili nindi, “Munawumoni iwu mukanda!” Watulejeli mukanda waThe Truth That Leads to Eternal Life. Wahosheli nindi, “Neyi muntu yayinka mukanda wamuchidiwu, mwakanleteli hela mwakawunati!”

Iwu mukanda nadiña nawu wanyi, ilaña nawukeñeli. Chimwahitili mafuku antesha, ambanda ayedi enjili kwitala dami. Adiña aYinsahu jaYehova nawa anyinkeli wowuna mukanda. Nawutañili wowuna wufuku. Awa ambanda chafuntiliwu cheñi añihwili neyi inakukeña kudiza Bayibolu nawa nakwili nami inakukeña.

Mpinji yejima nafwilileña kumuzañalesha Nzambi. Dichi nadizili nsañu yayiwahi yaYehova nawa natachikili kumukeña chikupu. Nakeñeleña kuleja antu ejima amwiluki Nzambi. Mu 1973, napapatisheweli. Mpinji yejima, nadiña nakushimwina chalala kudi antaña jami. Ilaña chisaka chami, sweje-e mwanyikami wamumbanda Araceli, wahosheleña nindi yuma yinakuhwelela yaheña.

Araceli: Muloña anhembeleña chatama kudina itala, natiyileña kutama nawa naheleli nsakililu yami. Ilaña nayileña kuchechi haMulungu nawa nalombeleleña kolona hefuku hefuku. Hela chochu, nakeñeleña kwiluka chahosha Bayibolu, nawa nalombeli kudi Nzambi kulonda yankwashi. Dichi Felisa wanlejeli yuma yadiziliyi. Wazañaleli nayuma yakuhweleleliyi yinatoñojokeli nami naluwankani. Netejeli wanyi yuma yahosheleñayi.

Kuhiñahu, nafuntili kuMadrid nakwiñila mudimu nawa nasumbukili. Hadi yaaka yayivulu yinahitihu, namweneña antu anakuya kuchechi ilaña elileña wanyi yuma yadizishileñayi Yesu. Dichi nalekeli kuya kuchechi. Nalekeli kukuhwelela mudi “akwakujila” hela kesi kahelu, nawa natoñojokeli nami kapristu hakutwesha kwanakena nshidiku. Nanatili ankishi ejima inadiña nawu. Nelukili wanyi nami yuma yinelileña yadiña yayiwahi. Natiyili kutama, ilaña natwalekelihu kulomba kudi Nzambi nami: “Inakukeña nikwiluki. Nkwashi!” Nanukili nami aYinsahu jaYehova enjileña mpinji yejima kwitala, ilaña nayikaanineña. Nakuhweleli nsakililu yidi yejima wanyi.

 Mwanyikami Lauri washakamineña kuFrance, nawa Ramoni yena washakamineña muSpain. Mu 1980, atachikili kudiza Bayibolu nawaYinsahu jaYehova. Nelukili nami, neyi chochabuliliyi Felisa kwiluka chalala, niwena elukili wanyi nawu anakuyidimba. Kuhiñahu, nadilukili naAngelines, ntuñi netu nawa wekalili ibwambu dami chikupu. Niyena wadiña Chinsahu chaYehova. Angelines ninfumwindi añilili kakavulu neyi nukwiteja kudiza Bayibolu. Elukili nawu hela chakwila nakanineña kuya kuchechi, ilaña nakeñeleña kudiza Bayibolu. Nkumininaku, nayilejeli nami: “Chachiwahi. Nukwiteja kudiza ilaña nukuzatishaña Bayibolu yami.” Nadiña naBayibolu yamwidimi daNácar-Colunga.

Felisa: Chinapapatisheweli mu 1973, kwadiña hohu aYinsahu 70 muSantander, musumba weneni muCantabria. Twayileña kwakulehi nakushimwina kunyikala yayivulu yamuniwu musumba. Dichi twayileña nabasi kuhiñahu twatachikili kuya namotoka hamukala nimukala.

Hadi yaaka yayivulu, nadizishileña antu amavulu Bayibolu nawa antu 11 apapatisheweli. Antu amavulu inadizishileña adiña aKatolika. Nadiwunjikileña hakuyidizisha. Neyi chochihahitili mpinji hadi ami, niwena akeñekeleña mpinji hakwila eluki nawu yuma yakuhweleleliwu yakutwamba. Nelukili nami Bayibolu hohu nispiritu yaYehova diyi yinateli kukwasha muntu kuhimpa yilwilu yindi nakwiluka chalala. (Aheberu 4:12) Nfumwami, Bienvenido, wadiña kapokola, wapapatisheweli mu 1979, nawa amama atachikili kudiza Bayibolu henohu kanda afwi.

Araceli: Chinatachikili kudiza Bayibolu nawaYinsahu jaYehova, natoñojokeleña nami natela kuyikuhwelela wanyi. Ilaña chimwahitili mpinji, natachikili kuyikuhwelela. A Yinsahu adizishaña antu Bayibolu nawa ovwahilaña yuma yadizishañawu. Natachikili kumukuhwelela chikupu Yehova niBayibolu nawa nazañaleli nankashi. Antuñi nami amakwawu amweni chinahimpili nawa anlejeli nawu, “Araceli, twalekakuhu kweyi!”

Nanukaña chinalombeli nami, “Nakusakilili Yehova hakunkwasha nikunyinka kukooleka kwakuwana yuma yinakeñeleña, chalala chamuBayibolu.” Nalombeli kwanakena kudi ayaya Felisa hamazu atama inahosheli. Kufuma hohenahana, twalekeli kuditadikisha nakutachika kuhanjeka nsañu yamuBayibolu. Mu 1989, napapatisheweli henohu nidi nayaaka 61.

Felisa: Nidi nayaaka 91. Nfumwami wafwa dehi, nawa inakutwesha wanyi kuzata neyi chinazatileña. Ilaña natañaña Bayibolu mpinji yejima, kuya nakupompa nikushimwina.

Araceli: Nakeñaña kuyishimwina akatolika ejima kulonda amwiluki Yehova, muloña ninami nadiña katolika. Amakwawu nahanjekaña chiwahi nawakatolika, nawa amavulu asendaña nyikanda nimagazini. Nanukaña kapristu wumu. Chinahanjekeli nindi hakapinji kantesha, wetejeli munahosheleña. Dichi wanlejeli nindi: “Ilaña nashinakaja dehi nukuya kudihi? Indi akwetu akachechi nichisaka chami akahosha nawudi?” Nakwili nami: “Indi Nzambi wukuhosha nindidi?” Welukili nindi nahosheleña mwalala nawa waneñeli. Ilaña wamwekeneña neyi wakahimpa wanyi.

Nakavulamena wanyi ifuku danlejeliwu anfumwami nawu inakukeña kuya neyi nakupompa. Atachikili kupompa henohu anabadiki yaaka 80, kufuma tuhu oyu mpinji atwalekeluhu kuya nakupompa. Adizili Bayibolu nawa atachikili kuya nakushimwina. Nanukaña chitwazatileña hamu mumudimu wakushimwina. Afwili henohu kunashali tukweji tuyedi nakupapatishewa.

Felisa: Chinatachikili kumukalakela Yehova, anyikijami anheleli. Ilaña mukuhita kwampinji, niwena etejeli chalala. Dichuma chachiwahi chanmwekenahu dehi muchihandilu chami. Kufuma tuhu hayina mpinji, twadiña nakuhanjeka hamu hadi Nzambi yetu Yehova Nizu dindi. Nkumininaku, wejima wetu twadiña nakumukalakela Yehova. *