1. Tunateli kwovwahila ñahi Nzambi ninfulumendi jawantu?

BAYIBOLU yatulejaña kwovwahila nfulumendi yawantu, ilaña yatuleja cheñi nawu twatela kwovwahila Nzambi kubadika antu. (Yililu 5:29; Titusa 3:1) Tunateli kwila ñahi mwenimu? Yesu walumbulwili chishina chatukwashaña kwiluka itwatela kwovwahila. Wahosheli nindi twatela kuhana ‘yuma yaKesari kudi Kesari; yuma yaNzambi kudi Nzambi.’ ^[1] (Talenu mazu adi kunsa.) (Matewu 22:21) Twahanaña yuma ‘yaKesari kudi Kesari’ neyi twovwahila nshimbi yanfulumendi, tulemesha akulumpi janfulumendi nikufweta nyisonku. (Aroma 13:7) Ilaña neyi nfulumendi yituleja kwila yuma yabulaña kukeñayi Nzambi nindi twileña, twakanaña, ilaña nakalemesha.

2. Tukumwekesha ñahi netu twadiñijaña wanyi mumapolitiki?

² Njila yimu yitwahaninañamu ‘yuma yaNzambi kudi Nzambi’ hikubula kudiñija mujipolitiki jamukaayi. Twadiñijaña wanyi munsañu jamatuña. (Isaya 2:4) Chineli Yehova weteja nfulumendi yawantu kuyuula, twayovwahilaña.  Cheñi hitwadiñijaña munsañu jakuhameka ituñaku. (Aroma 13:1, 2) Twakeñaña wanyi kuhimpa jinfulumendi hela kuluwañesha akapolitiki nawa hitwavotaña hela kwikala apolitishaniku.

3. Muloña chitwabulilaña kudiñija mumapolitiki?

³ Kudi yuma yayivulu yatukaanishilañayi Nzambi kudiñija munsañu jamatuña. Chatachi, twamwimbujolaña Yesu wabulili kwikala “wampata yamunu mwishina.” Wadiñijileña wanyi mujipolitiki hela munjita. (Yowanu 6:15; 17:16) Chamuchiyedi, twahakwilañaku Wanta waNzambi. Chineli twahakwilañaku nfulumendi yawantu wanyi, twekalaña nachinleji chitooka neyi tunakushimwina netu Wanta Nzambi hohu diwakafumishahu kukala kwawantu ejima. Nsakililu yakutwamba yadiñijaña mumapolitiki, nawa chumichi chaletaña chaambu. Chineli hitwadiñijaña mujamapolitikiku, twanuñañana nawamanakwetu niahela mukaayi kejima.—1 Petulu 2:17.

4. (a) Tuneluki ñahi netu chikakala chikupu kubula kudiñija munsañu jamapolitiki? (b) Muloñadi wutwatela kudiloñeshela kubula kudiñija munsañu jamapolitiki?

⁴ Hadaha twashakamaña mwiluña mwatwilukawu nawu hitwadiñijaña mujamapolitikiku. Ilaña chitunakuswila kwakwihi nakukuma kwakaayi kaSatana, chikutukalilaña kubula kudiñija munsañu jamapolitiki. Makonu, antu ‘oma nyichima’ nawa ‘achinchika,’ nawa akasweja kwambokelamu. (2 Timotewu 3:3, 4) Amanakwetu amakwawu adi mukukala muloña wakuhimpika kwajipolitiki mwituña dawu. Dimuloña waweni wutwatelela kudiloñesha chadimu kubula kudiñija munsañu jamapolitiki nimumpinji yakala. Twayenu tushinshiki hayuma yiwana yikutukwasha kudiloñesha.

5. Yehova wamonaña ñahi nfulumendi jawantu?

⁵ Njila yimu yitwatela kudiloñeshela chayinu mpinji kulonda tubuleña kudiñija mujamapolitiki hikumona nfulumendi jawantu neyi chajimonañayi Yehova. Yehova wayinkeli wanyi antu wuswa wakuyuula akwawu hampinji yayileñeliyi. (Yeremiya 10:23) Wamonaña antu ejima nindi hichisaka chimu. Ilaña nfulumendi jawantu jinambuli antu muloña wakuhosha nawu ituña dawu dabadika. Hela nfulumendi jinakumwekana neyi jinakuzata chiwahi, jikutwesha wanyi kumanisha kukala kwejima. Nawa jinekali yilumbu yaWanta waNzambi, watachikili kuyuula mu 1914. Katataka iwu Wanta wufumishuhu nfulumendi jejima jawantu .—Tañenu Masamu 2:2, 7-9.

6. Twatela kumonaña ñahi anlomboli amunfulumendi?

⁶ Nzambi weteja nfulumendi jawantu kwikalaku muloña jinateli kuleta kuwunda. Ichi chatukwashaña kushimwina nsañu yayiwahi yaWanta waNzambi. (Aroma 13:3, 4) Dichatulejelañayi Nzambi nindi tulombeleñaku anlomboli  kulonda tudifukuleña kudi yena mukuwunda. (1 Timotewu 2:1, 2) Neyi anakutukabisha, tunateli kulomba wukwashu kudi akulumpi janfulumendi. Dicheliliyi Pawulu. (Yililu 25:11) Hela chakwila Bayibolu yahoshaña nawu Satana diyi wayuulaña nfulumendi jawantu, ilaña yahosha wanyi nawu wayuulaña nlomboli wejima wamunfulumendi. (Luka 4:5, 6) Dichi bayi tuleja antu netu nlomboli wejima wamunfulumendi amuyuulaña kudi Diyaboluku. Bayibolu yashimuna nawu bayi tuhosheña antu chatamaku.—Titusa 3:1, 2.

7. Yumanyi yitwatela kutondolwela?

⁷ Twamwovwahilaña Nzambi neyi tubula kuhakwilaku nlomboli wumu hela chiyuulu chimu, hela chakwila yuma yinakwilawu yikutukwasha. Mpinji yikwawu, yuma yinateli kutukalila. Chakutalilahu, fwikijenu antu anadikañi nanfulumendi yinakuyandisha antu, niaYinsahu jaYehova. Hela chochu, mukudibomba wanyi nawantu anakudikaña, komana mukutoñojoka nenu akwakudikaña anakwila chiwahi nawa nawu akatwesha kuwahisha yuma? (Aefwesesa 2:2) Neyi hitunakukeña kudiñija mujamapolitikiku, twatela kuleka kumona chiyuulu chimu netu chabadika chikwawu. Chumichi chamwekenaña munhoshelu niyilwilu yetu.

8. Tunateli kwikala ñahi ‘ababala’ nawa ‘awunda’ nansañu yakubula kudiñija mujamapolitiki?

⁸ Njila yamuchiyedi yitunateli kubula kudiñijila mujamapolitiki hikwikala ‘ababala neyi atupela nawa awunda neyi atutela.’ (Tañenu Matewu 10:16, 17.) Tukwikala ‘ababala’ neyi tutoñojoka hakukala kunakwinza hambidi. Nawa tukwikala ‘awunda’ neyi tubula kudiñija mujamapolitiki mumpinji yakala. Tuhanjekenu hayuma yinateli kumwekana nichitwatela kwila kulonda tubuli kudiñija mujamapolitiki.

9. Yumanyi yitwatela kutondolwelela neyi tunakuhanjeka?

⁹ Neyi tunakuhanjeka. Twatela kubabala nankashi neyi antu anakuhosha nsañu yamapolitiki. Chakutalilahu, neyi tunakuhosha namuntu nsañu yaWanta waNzambi, bayi tukaana hela kwiteja yuma yinakwilayi nlomboli wumu hela chiyuulu chimuku. Chatela muhosheña hayuma yinakukeña kwilawu antu kulonda amanishi kukala kunakumonawu antu, zatishenu Bayibolu kulonda muyileji Wanta waNzambi chiwakafumishahu kukala kwejima chikupu. Neyi antu anakutadika hansañu yawulu weyala neyala mumbanda namumbanda hela kufumisha ivumu, yilejenu chahosha Izu daNzambi nichimwazatishaña iyi nsañu mukuhanda kwenu. Neyi muntu yahosha nindi atela kufumishaku nshimbi jikwawu hela kujihimpa, hitwatela kwiteja hela kukaana chili kumukwasha kulonda ahimpi yitoñojoka yindiku.

10. Tunateli ñahi kubula kudiñija munsañu jamapolitiki neyi tunakutiyila hela kutaña nsañu hayikunzulemba?

¹⁰ Yikunzulemba. Mpinji yikwawu nsañu yashimunañawu yakundamaña hohu kukabadi kamu. Chumichi chavula kumwekana mumatuña mwekala yikunzulemba yanfulumendi. Neyi yikunzulemba hela akamba nsañu anakuhakwilaku kabadi kamu, twatela kubabala neyi nehi tukutachika kutoñojoka neyi  chinakutoñojokawu. Chakutalilahu, dihulenu nenu, ‘Natiyililaña kudi kamba nsañu muloña netejaña jahoshañayi hamapolitiki?’ Hakwila mubuli kudiñija munsañu jamapolitiki, lekenu kutala hela kutaña nsañu yinakuhakwilaku mbadi yimu mujapolitiki. Ilaña, talenu hela tañenu nsañu yinakubula kuhakwilaku kabadi kamu. Nawa esekejenuña yuma yimunakutiya ‘namazu amawahi’ amuBayibolu.—2 Timotewu 1:13.

11. Muloñadi chichinateli kutukalila kubula kudiñija munsañu jamapolitiki neyi tulemesha maheta etu?

¹¹ Maheta. Neyi twalemesha mali nimaheta, chikwikala chaswayi kudiñija munsañu jamatuña. Hanyima ya 1970, aYinsahu amavulu kuMalawi ahanini mahetawu ejima muloña akaanini kudiñija mujipati. Chawushona, antu amakwawu akaanaña kushiya chihandilu chachiwahi. Muhela Ruth wahosheli nindi, “Amanakwetu amakwawu twayili nawu muwunkoli, ilaña adiñijili munsañu jamatuña nawa afuntili muloña akeñeleña wanyi kukabakana muchilombu chawa matunduka.” Ilaña antu jaNzambi amavulu dichelañawu wanyi. Adiñijaña wanyi mujamapolitiki, hela chakwila akwikala namali antesha hela akujimbesha yuma yawu yejima.—Aheberu 10:34.

12, 13. (a) Yehova wayimonaña ñahi antu ejima? (b) Tunateli kwiluka ñahi netu tunakudisamba netuña detu?

¹² Kudisamba. Antu amavulu adisambaña nekowa, muchidi, chisemwa, musumba hela ituña dawu. Ilaña Yehova hamonaña nindi muntu hela antu amu abadika amakwawuku. Yena wamonaña nindi kwosi wabadika mukwawu. Hela chochu, Yehova watuleñeli munjila yashiyashana, nawa twazañalalaña muloña wakushiyashana mummwekenu. Wakeñaña wanyi nindi tudiwuli chisemwa chetu. Ilaña wakeñaña wanyi cheñi nindi tudimoneña netu twabadika akwetu.—Aroma 10:12.

¹³ Dichi bayi tudisambeña netuña hela musumba wetu netu wabadika wukwawuku. Neyi tukudisambaña, tukudiñija mupolitiki. Chumichi chamwekeni mumafuku awapostolu. Amanakwetu amakwawu achiHeberu adiña nakwakamena wanyi anfwila awaHeleni. (Yililu 6:1) Tunateli kwiluka ñahi netu tunatachiki kudisamba? Neyi manakwetu hela muhela wakwacheñi nayileji chakwila, komana mwashikenaña kutoñojoka nenu: ‘Dichi twelaña wanyi,’ mukaana nimwanayilejiyi? Neyi dichimwelaña, toñojokenu haniku kufumba kwalema: ‘nakudizoza, muntu wejima atoñojoki mukwawu nindi wambadikami.’—Afwilipi 2:3.

14. Kulomba kunateli kutukwasha ñahi, nawa hanenu chakutalilahu chamuBayibolu?

¹⁴ Njila yamuchisatu yitunateli kubula kudiñijila munsañu jamatuña hikushindamena hadi Yehova. Lombenu spiritu yajila kulonda yiyikwashi kwikala adiwunjika nawa adihemba. Iyi yilwilu yinateli  kuyikwasha neyi nfulumendi yila yuma yabula kutelela hela kuloña. Lombenu kudi Yehova kulonda yayinki maana akwiluka chimwatela kwila neyi mudi mukukala kwakudiñija munsañu jamatuña. Neyi mumona kukala kwamuchidiwu mulombenu kulonda yayikwashi. (Yakoba 1:5) Hadaha anateli kuyikasa mukaleya hela kuyibabesha muloña wakwikala ashinshika kudi Yehova. Neyi ayila mwenimu, lombenu kulonda mwikali ahamuka hakwila muleji antu chinaleteshi mubuli kudiñija munsañu jamatuña. Yehova wukuyikwasha kuumika.—Tañenu Yililu 4:27-31.

15. Bayibolu yinateli kutukwasha ñahi kubula kudiñija munsañu jamatuña? (Talenu cheñi chikasha chinakwila nawu “Izu daNzambi Dayikwashili Kubula Kudiñija Munsañu Jamatuña.”)

¹⁵ Yehova watwinka Bayibolu kulonda yitukoleshi. Toñojokenu hamavasi akuyikwasha kubula kudiñija munsañu jamatuña. Ilukenu awa mavasi nawa yanukenuña, muloña akayikwasha neyi mudana Bayibolu. Bayibolu yinateli cheñi kuyikwasha mukuhweleli chikupu yuma yakanayi Nzambi kumbidi. Twatela kukuhwelela yuma yakanayi Nzambi hakwila tuumiki makabisha. (Aroma 8:25) Tondenu mavasi alumbulula yuma yimwakelaña mwituña dadiha nawa difwikijenu mudi dehi mwomu.

16, 17. Yakutalilahu yawambuña aNzambi ashinshika abulili kudiñija munsañu jamatuña yinateli kutukwasha ñahi? (Talenu mwevulu wakutachikilahu.)

¹⁶ Njila yamuchiwana yikutukwasha kubula kudiñija munsañu jamatuña hikutoñojoka hayuma yakoñeliwu ambuña aYehova ashinshika. Antu amavulu kunyima adiña ahamuka nawa kufuukula kwawu kwakuwahi kwayikwashileña kubula kudiñija munsañu jamatuña. Toñojokenu hadi aShadaraki, Meshaki niAbedinego akaanini kudifuukula kumukishi wemeneneñaku nfulumendi yaBabiloni. (Tañenu Danyeli 3:16-18.) Iyi nsañu yamuBayibolu yinakwashi aYinsahu  amavulu makonu kubula kubuzwila mpandela. Yesu hadiñijili mumapolitiki hela munsañu yaleteleña chaambuku. Welukili nindi atumbanji twindi akudizilaku kudi yena. Wahosheli nindi: ‘Kutiya woma nehi! Ami nemiki mpata yamunu mwishina mushindu.’—Yowanu 16:33.

¹⁷ A Yinsahu amavulu makonu anakudiñija wanyi munsañu jamatuña. Amakwawu ayiyandishili, kuyisha mutuleya nikuyijaha muloña wakwikala ashinshika kudi Yehova. Chakutalilahu chawu chinateli kutukwasha kwikala ahamuka. Manakwetu wakuTurkey wahosheli nindi: “Manakwetu wakansi Franz Reiter amujahili muloña wakaanini kwikala mushidika waHitler. Mukanda wasonekeliyi kudi amama yindi nawufuku henohu kanda yafwi wamwekesheli nawu wamukuhwelela Yehova chikupu nawa nakeñeleña kwimbujola chakutalilahu chindi neyi nimona kukala kwamuchidiwu.” ^[2]—Talenu mazu adi kunsa.

18, 19. (a) Antu amuchipompelu chenu anateli kuyikwasha ñahi kubula kudiñija munsañu jamatuña? (b) Munakufwila kwiladi?

¹⁸ Amanakwenu niahela muchipompelu akuyikwasha mubuli kudiñija munsañu jamatuña. Lejenu aeluda neyi mudi mukukala. Akuyikwasha kuzatisha Bayibolu. Nawa neyi antu muchipompelu eluka kukala kumukweti akuyikwasha. Yilejenu ayilombeliku kudi Nzambi. Ninetu twatela kuyikwasha amanakwetu nikuyilombelaku. (Matewu 7:12) Hakwila muwani majina awamanakwetu adi mukaleya, talenu chibaaba chaha jw.org chahoshaña nawu “Jehovah’s Witnesses Imprisoned for Their Faith—By Location,” mukuya hanasonekiwu nawu NEWSROOM > LEGAL DEVELOPMENTS. Tondenuhu majina amu kulonda mulombi kudi Yehova yakwashi awamanakwetu niahela ekali ahamuka nawa ashinshika kudi yena.—Aefwesesa 6:19, 20.

¹⁹ Chitunakuswila kwakwihi nakukuma, nfulumendi yikutukanjikijaña kudiñija mumapolitiki. Dichi twatela kudiloñesha chayinu mpinji kubula kudiñija munsañu jamatuña mudinu ituña mudi chaambu!