1, 2. (a) Yumanyi yitukudizila kukuumika kwaGideyona niantu jindi 300? (Talenu mwevulu wakutachikilahu.) (b) Kwesekeja namukanda waLuka 21:19, kuumika kwalemenadi?

FWIKIJENU chakoleli njita nichazeyeliwu amashidika awaIsarela alombweliwu kudi Nsompeshi Gideyona hakuzuña nawayilumbu jawu. Gideyona nawantu jindi ahañili aMidiyani niantu jawu wufuku wejima hadi makilomita 32. Bayibolu yatulejaña chuma chamwekeni cheñi nawu: “Gideyona washikili kuYodana yozambuka nikuzambuka, niyena niamayala makulakaji asatu adiñiyi nawu, azeya dehi.” Ilaña adiña kanda ashindi, nawa ateleli kuzuña nawamashidika 15,000. Awa ayilumbu ayiyandishili aIsarela hadi yaaka yayivulu, dichaletesheli atwalekuhu kuyihaña. Dichi, Gideyona nawantu jindi atwalekeluhu kuhaña ayilumbu jawu sampu nichashindiliwu.—Ansompeshi 7:22; 8:4, 10, 28.

² Ninetu tunakuzuña njita yakola nawa yakuzeyesha. Satana, kaayi kindi nikubula kuwanina diwu ayilumbu jetu. Etu amakwawu tunazuñi nanawa ayilumbu hadi yaaka  yayivulu. Tunashindi njita yayivulu nawukwashu waYehova. Hela chochu, kanda tushindi njita yakukumishaku. Mpinji yikwawu twazeyaña iku tunakuzuña. Tunateli kuzeya nakuhembelela kukuma kwakanu kaayi. Yesu watusoñamishili nindi tukamona kukala kweneni nimakabi munanu mafuku akukuminina. Ilaña wahosheli cheñi nindi neyi tuumika, tukushinda. (Tañenu Luka 21:19.) Kuumika kwatalisha mudihi? Yumanyi yikutukwasha kuumika? Tukudizila kwodi kudi antu anomiki? Nawa tunateli ‘kwiteja ñahi kuumika kukukalakali mudimu wachu’?—Yakoba 1:4.

3. Kuumika kwatalisha mudihi?

³ MuBayibolu, kuumika hikwatalisha hohu kukudiwula hela kwiteja kukalaku. Kwabombelamu chitwatoñojokaña nichitwatiyaña neyi tudi mukweseka. Kuumika kwatukwashaña kwikala ahamuka, ashinshika nawa adiwunjika. Mukanda wumu wahosha nawu kuumika hichilwilu chimu chakwashaña muntu kuchiñeja kulonda yabuli kuzeya neyi wudi mukweseka. Kwatukwashaña kwikala ahamuka nawa akola mukweseka kwasweja. Nawa kwatukwashaña kushinda iku kweseka nikusha maana hakumuzatila Nzambi bayi hakukala kutunakumonaku.

4. Muloñadi chitukuhoshela netu tunateli kuumika neyi twikala nakukeña?

⁴ Kukeña kwatukwashaña kuumika. (Tañenu 1 Akorinda 13:4, 7.) Munjilanyi? Kumukeña Yehova kwatukwashaña kuumika chuma chejima chetejañayi kumwekana. (Luka 22:41, 42) Kukeña kutwakeña amanakwetu kwatukwasha kuumika neyi anatuvulumuni. (1 Petulu 4:8) Kukeña kutwakeña enikwetu kwatukwashaña kuumika “yihuñu” yamonañawu niantu ekala muwulu wamuzañalu nawa kwakoleshaña wulu wetu.—1 Akorinda 7:28.

5. Muloñadi wutukuhoshela netu Yehova diyi hohu wunateli kutwikwasha kuumika?

⁵ Lombenu kudi Yehova yayikoleshi. Yehova ‘hiNzambi wakuumika nikukundeja.’ (Aroma 15:5) Diyi hohu weluka chitwekala, chitwatiyaña nichitachi chetu. Dichi weluka yuma yitwakankilaña kulonda tuumiki. Bayibolu yahoshaña nawu: “Wukwila mwakeñawu amwakama, wukutiya nawa chakubilelawu, wukuyamwina.” (Masamu 145:19) Hanu dinu Nzambi wukwakula ñahi kulomba kwetu kulonda twikali nañovu yakuumika?

6. Kwesekeja nachahosha Bayibolu, Yehova ‘wabuzilañaku ñahi njila’ neyi tudi mukweseka?

⁶ Neyi tumulomba Yehova netu yatukwashi, watukana “kubuzilaku njila yakupulukila.” (Tañenu 1 Akorinda 10:13.) Wabuzaña ñahi? Mpinji yikwawu watufumishaña mukweseka. Ilaña kakavulu, watwinkaña ñovu kulonda ‘tuumiki nakudiwunjika nimuzañalu.’ (Akolose 1:11) Chineli Yehova weluka chikupu kuzeyazeya kwetu kwakumujimba, muyitoñojoka,  wetejaña wanyi kukala kusweji nankashi chakwila kutukañeshi kwikala ashinshika.

7. Shimunenu chakutalilahu chinakumwekesha kuda yakuda yakuspiritu chikwawahila hakwila nawu tuumiki.

⁷ Itejenu yakuda yakuspiritu yikoleshi chikuhwelelu chenu. Muloñadi kuda kwakuspiritu chikwalemena? Chakutalilahu: Hakwila nawu muntu yakandami Mpidi ya Everest, ifuku dimu wukuda yakuda yetela kudayi mumafuku asatu hela awana. Muntu kwila yada yakuda yayivulu ñana nehi. Hakwila yomiki nakushika hewulu, muntu watela kuda yakuda yayivulu. Munjila yoyimu, twatela kuda yakuda yayivulu yakuspiritu hakwila tuumiki nakushika kunsa. Twatela kwikala nampinji yakudiza halwetu nikupompa. Neyi tukwilaña mwenimu chikutukwasha kwikala ashinshika.—Yowanu 6:27.

8, 9. (a) Kwesekeja naYoba 2:4, 5, neyi tudi mukweseka yumanyi yitwatela kwanuka? (b) Neyi mudi mukweseka, anyi imwatela kufwikija?

⁸ Anukenu chimwashinshika kudi Nzambi. Neyi tudi nakukala kudi yuma yikwawu yabombelamu, bayi neyi tunakukabakana hohuku. Tudi mukweseka kwakufumpa kashinshi ketu kudi Nzambi. Yuma yitwelaña neyi tudi mukweseka yamwekeshaña chitwamumonaña Yehova neyi hiNyuuli wabadika hela nehi. Chumichi chinateli kumwekana ñahi? Satana, chilumbu chaNzambi wadikañaña nachiyuulu chindi, wamuhosheli Yehova chatama hakuhosha nindi antu amukalakelaña Nzambi muloña wayuma yayinkañayi. Satana wahosheli nindi: ‘Muntu wukuhana yuma yakwetiyi yejima kukoola wumi windi.’ Satana wahosheli cheñi hadi Yoba nindi: “Ololaku ntahi chikasa cheyi katataka wukwati hamujimba windi, wutali neyi wukubula kukuhosha chatama kumesu eyi.” (Yoba 2:4, 5) Komana Satana nahimpi yitoñojoka yindi kufuma hahosheliyi awa mazu? Inehi! Chimwahitili yaaka yayivulu, Satana chamunatiliwu hamaseki, watwalekelihu kutwambila ambuña Nzambi. (Chimwekeshu 12:10) Makonu, Satana wuchidi kuhosha nindi antu adifukulaña kudi Nzambi muloña wayuma yayinkañayi. Nakufwila nindi tudikañi nawuswa waNzambi wakuyuula kulonda aleki kumukalakela.

⁹ Neyi mudi mukweseka nawa munakukabakana fwikijenu awa antu abulaña kumwekana. Satana niandemoni adi kukabadi kamu. Anakuyitala kulonda atali chimukwila nawa anakuhosha nawu muleki. Kukabadi kakwawu, kudi Yehova, Mwanta wetu Yesu Kristu, awayishewa asañulawu dehi, niañelu amavulu. Niwena anakumona chimunakukabakana, ilaña anakuyikwasha. Anakutiya kuwaha chinakumonawu munakuumika nikumwovwahila Yehova. Hohenohu mutiya nikutiya Yehova nakuyileja nindi: “Eyi mwanami, ikalaku mukwamaana, wutiyishaña muchima wami kuwaha, kulonda nakatweshi kwakula muntu wukunsawula.”—Yishimu 27:11.

10. Munateli kumwimbujola ñahi Yesu neyi mutoñojoka hamasomu imwakatambwila neyi muumika?

 ¹⁰ Toñojokenuña hankisu. Fwikijenu mudi halwendu. Hakwila mushiki kumunakuya mwatela kwenda wufuku wejima. Nawa kudi mwidima. Ilaña muneluki nenu chikwacha mukumona chejeji. Chihandilu chinateli kwikala neyi ilu lwendu. Hadaha munateli kuhita mukukala kweneni, nawa mukuneña. Yesu niyena dichatiyiliyi. Chamujahileñawu hamutondu wakuyandishila, amusawili nawa watiyili kukata. Iyi yatela diyi yadiña mpinji yakala nankashi muchihandilu chindi! Chumanyi chamukwashili kuumika? Bayibolu yahoshaña nawu washili maana “hansañu yamuzañalu wamushililuwu kumesu indi.” (Aheberu 12:2, 3) Yesu washili maana hamasomu adi kutambwilayi neyi yomika, sweje-e muloña afwilileña kujilika ijina daNzambi nikuhakwilaku wuswa windi wakuyuula. Welukili nindi iku kweseka kwadiña kwakapinji kantesha ilaña masomu akatambwilayi mwiwulu ahaya nyaka. Kweseka kumunakumona makonu hadaha kweneni nankashi, ilaña anukenu nenu kwakapinji kantesha.

11. Muloñadi wutukushinshikila yakutalilahu ‘yawantu anomiki’?

¹¹ Twatela kuumikila hamu nawakwetu. Kapostolu Petulu wayikolesheleña akwaKristu kuumika kweseka kwaSatana, wasonekeli nindi: “Dikañenu nindi, nakukola mukukuhwelela kwenu mbe, nakwiluka nenu ana kwenu adi mumpata yamunu mwishina niwena enda awanisha makabi wowamu.” (1 Petulu 5:9) Yakutalilahu ‘yawantu anomiki’ yatudizishaña chakwikala ashinshika, yatukoleshaña nawu tunateli kushinda nawa yatwanukishaña nawu akatukiswila neyi twikala ashinshika. (Yakoba 5:11) Tushinshikenu yakutalilahu yantesha. ^[1]—Talenu mazu adi kunsa.

12. Chumanyi chitwadizilaña kudi akerubi emikiliwu muEdeni?

¹² Akerubi hiyañelu ekala nachifulu cheneni. Chelili aAdama naEva anavulumuni dehi, Yehova wayinkeli akerubi amakwawu mudimu wacheñi hamaseki. Wadiña wambukaku chikupu nawazatileñawu mwiwulu. Chuma cheliliwu chatudizishaña chitunateli kuumika neyi anatwinki mudimu wakala. Bayibolu yahoshaña nawu Yehova ‘wemikili akerubi kwitempa daEdeni, mbadi yadu yamusela, nimulañi wakesi wampoku yakabali wenda wubalumuka niniku niniku, kulonda ahembeña njila yamutondu wawumi.’ ^[2] (Talenu mazu adi kunsa.) (Kutachika  3:24) Bayibolu yahosha wanyi nawu akerubi akaanini hela adimweni nawu aswejeli kulema chakwila hiyakutwesha kuzata iwu mudimuku. Hiyatiyili wuudi hela kuzeyaku. Ilaña, atwalekelihu kuzata iwu mudimu sampu nichiwamanini, hadaha kushika nimpinji yaDibaji henohu munahiti dehi yaaka kubadika ha 1,600.

13. Chumanyi chamukwashili Yoba kuumika kweseka?

¹³ Yoba muntu washinshika. Mpinji yikwawu twaneñaña neyi ibwambu detu hela ntaña yetu yahosha mazu atama. Indi kwiji mwakata hela munaneñi muloña muntu imwakeña nafwi. Hela chochu, yuma yeliliyi Yoba yinateli kuyikundeja. (Yoba 1:18, 19; 2:7, 9; 19:1-3) Yoba welukili wanyi chaletesheli yakabakani nankashi, ilaña watwalekelihu kuumika. Chumanyi chamukwashili kuumika? Chatachi, wamukeñeli Yehova nawa wakeñeli wanyi kumuneñesha. (Yoba 1:1) Yoba wakeñeleña kumuzañalesha Nzambi mumpinji yayiwahi niyakala. Kubombelahu, Yehova wamukwashili Yoba kumona ñovu Jindi chamulejeliyi yuma yakuhayamisha yaleñayi. Chumichi chamuletesheli Yoba yakuhweleli nindi Yehova wakamanisha kukala kwindi hampinji yatelela. (Yoba 42:1, 2) Dichamwekeni. ‘Yehova wamanishili yihuñu yaYoba nawa wamufuntishilili maheta indi. Yehova wamulunjikililimu niyikwawu yashikila muyakusambila.’ Yoba ‘washinakajili, mafuku indi avulili.’—Yoba 42:10, 17.

14. Kwesekeja namukanda wa 2 Akorinda 1:6, kuumika kwaPawulu kwakolesheli ñahi anakwindi?

¹⁴ Kapostolu Pawulu. Mudi muyihuñu muloña wekabisha? Mudi eluda hela nkoñi wañinza wudi nanyidimu yayivulu nankashi? Neyi mukweti, chakutalilahu chaPawulu chikuyikwasha. Pawulu amukabishili chikupu, nawa wadiña  nakwakama amanakwindi muyipompelu. (2 Akorinda 11:23-29) Ilaña Pawulu watwalekelihu kuumika nawa kuumika kwindi kwakolesheli anakwindi. (Tañenu 2 Akorinda 1:6.) Neyi mukuumika mukudizisha amanakwenu niwena kuumika.

15, 16. (a) Kuumika kwatela kukalakala ‘mudimwinyi’? (b) Shimunenu yakutalilahu yinakumwekesha chitunateli ‘kwiteja kuumika kukalakala mudimu wachu.’

¹⁵ Kambanji Yakoba amoneneni kusoneka nawu: ‘Itejenu kuumika kukalakali mudimu wachu, kulonda mwikali alala chikupu, mulumbuluki, mubuli chuma chimukukaankila hela chimu.’ (Yakoba 1:4) Kuumika kunateli kukalakala ñahi “mudimu” walala wachu mudi etu? Neyi atweseka, twatela kudiwunjika, kuhameka nikumwekesha kukeña. Chitukuumikaña kweseka, tukwiluka chakumwekesha iyi yilwilu nawa tukwikala akwaKristu apama.

¹⁶ Chineli kuumika kwatukwashaña kwikala akwaKristu apama, tunakukeña wanyi kufumpa nshimbi jaYehova muloña wakwila tunakukeña kumanisha kukala. Chakutalilahu, neyi mwatoñojokaña hayuma yatama, bayi mwila yuma yimwatoñojokañaku. Lombenu kudi Yehova kulonda muleki kutoñojoka yuma yatama. Mudi nantaña yenu wunakuyikañesha? Bayi muzeyaku. Fwilenu kumukalakela Yehova. Neyi mwila mwenimu, mukumukuhwelela Yehova chikupu. Anukenu nenu: Hakwila twikali nawubwambu wawuwahi naNzambi, chiña tuumika.—Aroma 5:3-5; Yakoba 1:12.

17, 18. (a) Shimunenu chichalemena kuumika kushika nikunsa. (b) Chineli tunakuswila kwakwihi nakukuma, twatela kwiladi?

¹⁷ Twatela kuumika kushika nikunsa, bayi hakapinji kantesha. Fwikijenu mbopolu yinakujiya. Hakwila apuluki, antu atela kusala nakushika kuchikumu. Muntu wukuzeyela hakachi wukufwa. Cheñi, neyi muntu yazeya henohu kanda yashiki kuchikumu wukufwa. Munjila yoyimu, neyi tunakukeña netu tukashakami mwituña dadiha, twatela kutwalekahu kuumika. Twikalenu nayilwilu neyi yakapostolu Pawulu wahosheli nindi: “Hitwazeyañaku.”—2 Akorinda 4:1, 16.

¹⁸ Kufwana Pawulu, tweluka chikupu netu Yehova wukutukwasha kuumika kushika nikunsa. Pawulu wasonekeli nindi: “Tunekali akwakwimika mushindu nikubadikamu, nañovu jayena watukeñeli. Muloña neluki chikupu nami hela kufwa, hela wumi, hela añelu, hela mawanta, hela yuma yakatataka, hela yuma yamba kenza, hela yuma yikweti ñovu, hela kuleha kwakwiwulu, hela kukunama, hela chuma chacheñi chaleñeluwu chimu, hiyikutwesha kutwambula kukukeña kwaNzambi kwekala mudi Kristu Yesu, Mwanta wetuku.” (Aroma 8:37-39) Mpinji yikwawu twazeyaña. Ilaña twimbujolenu Gideyona niantu jindi. Azeyeli ilaña omikili. ‘Atwalekelihu kuhaña’ ayilumbu jawu.—Ansompeshi 8:4.