1, 2. Kukalanyi kwamweniyi Yefwata nimwanindi?

KANKAÑA wamumbanda nakusambilila tata yindi. Wazañaleli chikupu hakumona tata yindi nafunti kunjita kwayiliyi. Wembili namuzañalu nikuhañana muloña tata yindi washindili nankashi. Ilaña chuma chelili tata yindi nichahosheliyi chatela chamuhayamishili. Watabwili mahinindi nakuhosha nindi: ‘Yayo, eyi mwanami! Wunankonkololi dehi kweyi.’ Wamulejeli mwanindi nindi wamukanini Yehova nindi wakahimpa chihandilu chindi chikupu. Watalishili mukwila nindi mwanindi wakasumbuka wanyi nawa hakavwala anyanaku. Hohenohu wamwakwili tata yindi chiwahi, wamukolesheli tata yindi kwila mwamukaniniyi Yehova. Ñakwilu yindi yamwekesheli nawu welukili chikupu nindi yuma yejima yamulejeliwu kudi Yehova kwila yayiwahi. (Ansompeshi 11:34-37) Tata yindi watiyili kuwaha chamweniyi chikuhwelelu chamwanindi, muloña welukili nindi kudihana kwamwanindi kukumuzañalesha Yehova.

 ² Yefwata nimwanindi amukuhweleleli chikupu Yehova ninjila mwelilañayi yuma. Adiña ashinshika hela chakwila chayikalilili. Akeñeli kwikala nawubwambu wawuwahi naYehova, chuma chabadikili nyilambu yejima.

3. Yuma yeliliyi Yefwata namwanindi yinateli kutukwasha ñahi makonu?

³ Kutwalekahu kwikala ashinshika kudi Yehova hichuma chakala. Twatela ‘kulwa nañovu’ kulonda twikali ashinshika. (Yuda 3) Hakwila twili mwenimu, tusambilenu kudiza hadi Yefwata nimwanindi chamanishiluwu kukala muchihandilu chawu. Atwalekeli ñahi kwikala ashinshika kudi Yehova?

4, 5. (a) Yehova wayilejeli aIsarela kwiladi hampinji yeñililuwu Mwituña Dachikaninu? (b) Kwesekeja naMasamu 106, yumanyi yayimwekeneni aIsarela chadikañiliwu?

⁴ Mafuku ejima, aYefwata namwanindi atela ayanukishileña yuma yafumini mukudikaña kwawaIsarela naYehova. Kwakwihi nayaaka 300 yahitilihu, Yehova walejeli aIsarela kujaha antu ejima adifukwileña kudi anzambi akutwamba Mwituña Dachikaninu, ilaña adikañili. (Kuhituluka 7:1-4) A Isarela amavulu atachikili kwimbujola aKenani adifukwileña kudi anzambi akutwamba nawa adiña nayilwilu yatama.—Tañenu Masamu 106:34-39.

⁵ Yehova hayikiñili aIsarela kudi ayilumbu jawuku, muloña amwovwahilili wanyi. (Ansompeshi 2:1-3, 11-15; Masamu 106:40-43) Chatela chayikalilili yisaka yamukeñeli Yehova kwikala yashinshika muniyi mpinji yakala. Hela chochu, Bayibolu yashimuna nawu kwadiña antu ashinshika adi neyi Yefwata nimwanindi kushilahu niElekana, Hana niSamweli. Afwilileña kumutiyisha Yehova kuwaha.—1 Samweli 1:20-28; 2:26.

6. Yilwilwinyi yidi mukaayi makonu, nawa twatela kwila ñahi?

⁶ Anu mafuku, antu anakutoñojoka nikwila yuma neyi chelileñawu aKenani. Chihandilu chawu chashindamena hawuvumbi, wubanji nimali. Ilaña Yehova watusoñamishaña. Wakeñaña kutukiña neyi chakeñeleñayi kukiña aIsarela kudi antu atama. Komana tunateli kudizila kuyiluwa yawu? (1 Akorinda 10:6-11) Twatela kuzata nañovu kulonda tubuleña kutoñojoka neyi chatoñojokana antu akwituña. (Aroma 12:2) Tunateli kukañesha yitoñojoka yamuchidiwu?

7. (a) Yefwata amwililidi kudi antaña jindi? (b) Yefwata welili ñahi?

⁷ Mumafuku aYefwata, aIsarela ayikabishileña kudi aFwilistinu nianyana kaAmoni muloña aIsarela adikañili naYehova. (Ansompeshi 10:7, 8) Kubombela hadi ayilumbu jawu, Yefwata wamweneña cheñi kukala nawamanakwindi nianlomboli amuIsarela. Chineli amanakwindi adiña nalwisu nawa amuheleli, amuhiñili chakwila amutambwili iluña dindi. (Ansompeshi 11:1-3) Yefwata hetejeli yilwilu yawu yatama yimuluwañeshiku. Tuneluki ñahi? Chelili akulumpi jamuza enzi nakumulembelela  nawu yayikwashi, wetejeli. (Ansompeshi 11:4-11) Chumanyi chaletesheli Yefwata yeteji?

8, 9. (a) Yishinanyi yamuNshimbi yaMosi yamukwashili Yefwata? (b) Chumanyi chalemesheliyi nankashi Yefwata?

⁸ Yefwata wadiña mushidika wañovu nawa welukili chihandilu chawaIsarela chejima niNshimbi jaMosi. Yehova chayakameneneñayi aIsarela chamukwashili kwiluka yuma yakeñayi Nzambi niyahelayi. (Ansompeshi 11:12-27) Iyi yuma yadiziliyi Yefwata diyazatishileñayi hakufuukula. Welukili chamonañayi Yehova antu azuwa niaditendaña nichakeñañayi antu nindi adikeñeña wumu namukwawu. Kubombelahu, Nshimbi yamudizishili kukeña antu ejima kushilahu niantu amuheleli.—Tañenu Kwidika 23:5; Alevi 19:17, 18.

⁹ Hadaha yuma yamumwekeneni Yosefu yamukwashili Yefwata. Watela wadizilili kudi Yosefu chayitiyililiyi amanakwindi luwi hela chakwila amuheleli. (Kutachika 37:4; 45:4, 5) Kutoñojoka hachumichi kwamukwashili Yefwata kwila yuma yamutiyishili Yehova kuwaha. Yuma yeliliwu amanakwindi yamuneñesheli Yefwata. Ilaña kuhakwilaku ijina daYehova niantu jindi chadina chuma chalema kubadika chaneñeliyi Yefwata. (Ansompeshi 11:9) Wafwililena kwikala washinshika kudi Yehova. Yehova wamukiswilili nikukiswila aIsarela muloña wayuma yeliliyi.—Aheberu 11:32, 33.

10. Yishina yinateli kutukwasha ñahi kwikala akwaKristu?

¹⁰ Komana ninetu tunateli kudizila kudi Yefwata? Chumanyi chitwatela kwila neyi amanakwetu akwaKristu anatuhilishi hela neyi anatwili chatama? Bayi twiteja chineñi chitukañeshi kumukalakela Yehovaku. Bayi muleka kuya kukupompa kwawakwaKristu hela kuhanjeka nawamanakwetu muchipompeluku. Tumwimbujolenu Yefwata kulonda tumwovwahili Yehova. Chumichi chikutukwasha kumanisha kukala kulonda antu amakwawu akadizili kudetu.—Aroma 12:20, 21; Akolose 3:13.

11, 12. Yefwata wakaninidi, nawa mwabombelelidi?

¹¹ Yefwata welukili nindi Nzambi watela kumukwasha kulonda yayamwini aIsarela kudi aAmoni. Wamukanini Yehova nindi neyi yamukwasha kushinda, wakamwinka neyi “mulambu wakushita” muntu watachi kwidika mwitala dindi hakufuma kunjita. (Ansompeshi 11:30, 31) Chumichi chinatalishi mudihi?

¹² Yehova wahela antu alambulaña antu, dichi tuneluki netu Yefwata hadi kuhana mulambu wakushita wamwanindiku. (Ansompeshi 18:9, 10) Mushimbi yaMosi, mulambu wakushita wahanineñayi muntu kudi Yehova  chakufuma hamuchima wadiña walema chikupu. Yefwata watalishili mukwila nindi muntu wukahanayi kudi Yehova wakamukalakelaña hatabanaka muchihandilu chindi chejima. Yehova wamutiyilili Yefwata nawa wamukwashili kushinda njita. (Ansompeshi 11:32, 33) Hanu dinu Yefwata wadi kuhananyi kudi Yehova?

13, 14. Mazu aYefwata ekala haAnsompeshi 11:35 amwekeshaña ñahi kashinshi kindi?

¹³ Anukenu nsañu yitwatena hakutachika kwachinu chibaaba. Chafuntiliyi Yefwata kufuma kunjita, muntu watachi kwidika wadiña mwanindi wamumbanda wakeñayi wavwalika kanka windi. Komana Yefwata wadi kwila mwashikiliyi? Komana wadi kuhana mwanindi kudi Yehova kulonda yakakalakeleña hatabanaka muchihandilu chindi chejima?

¹⁴ Cheñi, yishina yamuNshimbi yaNzambi yatela yamukwashili Yefwata kufuukula chiwahi. Hadaha wanukili mazu ekala haKwidika 23:19 alejeleña antu jaNzambi kwikala namuchima wakumwinka Yehova yuma yayiwahi. Nshimbi yahosheli cheñi nawu neyi muntu namukani Yehova, “bayi akamotoka izu danahoshiyuku chiña akela mumazu ejima anafumi mukanwa kindi.” (Kuchinda 30:2) Kufwana Hana washinshika, hadaha wadiñaku hayina mpinji, Yefwata welili mwakaniniyi hela chakwila welukili chuma chakamumwekena mwanindi niyomweni. Muloña mwanindi wadi kuya hatabanaka nakukalakala chakadi kuvwala anyana. Dichi hikwadi kwikala muntu wakuswana ijina niiluña daYefwataku. (Ansompeshi 11:34) Hela chochu, Yefwata wahosheli nindi: “Yehova namwasamina dehi mukanwa kami, hinukutwesha  kubalumuna mwokuku.” (Ansompeshi 11:35) Yehova wetejeli mulambu wabadika waYefwata nawa wamukiswilili. Komana ninenu mwadi kwikala ashinshika neyi Yefwata?

15. Chikaninwinyi chitwakana etu amavulu, nawa tunateli kumwekesha ñahi netu tukweti chikuhwelelu?

¹⁵ Neyi tudihana kudi Yehova, twamukanaña netu tukwilaña nkeñelu yindi hela chikukala ñahi. Tuneluki netu mpinji yikwawu chatukalilaña kwila yuma yitunakani. Twatiyaña ñahi neyi anatwili nawu twili yuma yitunabuli kukeña? Neyi tuleka kwakama nawa tumwovwahila Nzambi, tukumwekesha netu twelaña mutunakani. Kudihana kwetu kunateli kutuneñesha, ilaña nkisu yaYehova yabadika. (Malaki 3:10) Indi mwana kaYefwata watiyili ñahi? Welili ñahi nachikaninu chatata yindi?

16. Mwana kaYefwata welili ñahi nachikaninu chatata yindi? (Talenu mwevulu wakutachikilahu.)

¹⁶ Chikaninu chaYefwata chadiña chambukaku nachaHana. Wakanini kuhana mwanindi Samweli kulonda yakalakaleña hatabanaka neyi kaNaziri. (1 Samweli 1:11) Nshimbi yetejeli kaNaziri kusumbula nikuvwala anyana. Ilaña mwana kaYefwata wamumbanda amuhanini neyi “mulambu wakushita,” dichi hadi kwikala namuzañalu wekalaña nañoda muntu hela mama yawantuku. (Ansompeshi 11:37-40) Toñojokenu! Mwana kaYefwata wadi kusumbuka neyala walumbuluka muloña tata yindi wadiña nlomboli muIsarela. Ilaña ichi wukwikala ñamba wakehelamu hatabanaka. Chumanyi cheliliyi? Wamwekesheli nindi watwamijiliku mudimu waYehova chahosheliyi natata yindi nindi: ‘Ñili mwejima muwunahoshi.’ (Ansompeshi 11:36) Wafumishiliku muchima wakusumbuka nikwikala nanyana kulonda yamukalakeli Yehova. Tunateli kumwimbujola ñahi?

17. (a) Tunateli kwimbujola ñahi chikuhwelelu chaYefwata nimwanindi? (b) Mazu adi haAheberu 6:10-12 anakuyikwasha ñahi kulonda mudihaneña?

 ¹⁷ Atwansi amavulu akwaKristu anakudihana kubula kwiñila mumaluwi hela kukwata kuñoji chakatataka. Muloñadi? Muloña anakukeña kumukalakela Yehova chikupu. Cheñi, atushinakaji amavulu amanishaña wanyi mpinji yeneni nakuhanjeka nawanyanawu niezukulu awu. Ilaña azatishaña mpinji niñovu yawu kumukalakela Yehova. Amakwawu anakuzata mudimu wakutuña hela kuya Kushikola Yawakwakushimwina aWanta nikuzatila kuyipompelu kudi kukaankila kwawakwakushimwina. Amakwawu afwilaña kuzata nañovu mumudimu waYehova mumpinji yaChanukishu. Wakavulamena wanyi nyidimu yanawa antu ashinshika. (Tañenu Aheberu 6:10-12.) Indenu? Munateli kudihana kulonda mumukalakeli chikupu Yehova?

18, 19. Yumanyi yitunadizili kunsañu yamuBayibolu yaYefwata nimwanindi wamumbanda, nawa tunateli kuyimbujola ñahi?

¹⁸ Chumanyi chamukwashili Yefwata kumanisha kukala kwadiñiyi naku? Walombeli kudi Yehova kulonda yamukwashi yafuukuleña chiwahi. Hakeñeleña kumuluwañesha kudi antu adiñayi nawuku. Watwalekelihu kwikala washinshika hela chakwila antu amwilileña katama. Yehova wamukiswilili Yefwata nimwanindi hakudihana kwawu nawa wayizatishili kulonda atiyakeshi kudifukula kwalala. Yefwata watwalekelihu kwikala washinshika kudi Yehova hela chakwila akwawu elileña yuma yatama.

¹⁹ Bayibolu yahoshaña nawu: “Mwimbujoli wenawa akuswana yikaninu nakukuhwelela nakudiwunjika.” (Aheberu 6:12) Dichi twatela kwimbujola Yefwata nimwanindi wamumbanda nawa twatela kwiluka netu neyi twikala ashinshika, Yehova wakatukiswila.