MUDIMU wetu wakushimwina walema chikupu. Ilaña bayi neyi antu ejima itwashimwinaña eluka chumichiku. Hela chakwila antu akeña chahosha Bayibolu, elukaña wanyi nawu atela kudiza Izu daNzambi nanetu.

Dicheliliyi Gavin. Wapompeleña Kwitala daWanta, ilaña wakeñeli wanyi kudiza Bayibolu. Gavin walumbulwili nindi welukili nsañu yantesha yamuBayibolu ilaña wakeñeleña wanyi antu kwiluka. Wachinineña nindi akumwila nawu yekali chinsahu, nawa wakeñeleña wanyi kumuseha. Munatoñojoki nenudi? Chadiña chapela kumukwasha Gavin? Toñojokenu hansañu yamuBayibolu chiyinateli kumukwasha muntu. Yehova walejeli aIsarela nindi: ‘Mazu ami akalembama neyi wuumi, neyi chelaña nvula yamusanvu hamunyenvu.’ (Kuhituluka 31:19, 30; 32:2) Tuhanjekenu hawuumi nawa tuwesekeji namudimu wetu wakushimwina kulonda tukwashi chiwahi “antu ejima.”—1 Timotewu 2:3, 4.

Wuumi walembamaña. Wuumi welikaña chochu chovu namukekemena. Mazu aYehova ‘alembamini ñahi neyi wuumi’? Wahosheleña nawantu jindi munjila yaluwi, yayiwahi nawa yakukeña. Twelaña mwenimu neyi tulemesha yuma yakuhwelelawu antu. Twayikoleshaña kulonda atoñojokuhu awenawu nikudifuukwila. Neyi tuyilemesha muniyi njila, antu akutiya nsañu yitunakuyileja nawa akwiteja chalala.

Wuumi wakwashaña. Mudimu wetu wakushimwina wunateli kukwasha antu neyi tukutoñojokaña hanjila jikuyikwasha kwiluka chalala. Manakwetu Chris, watachikili kumudizisha Gavin Bayibolu wamukanjikili wanyi. Ilaña, wawanini njila yakumukwashilamu Gavin kwikala wakasunuka kuhanjeka nsañu yamuBayibolu. Chris wamulejeli Gavin nindi kudi nsañu yalema yashimunawu muBayibolu nawa neyi yadiza iyi nsañu yikumukwasha kwiluka kulema kwakupompa. Dichi, Chris walumbulwili nindi wuprofwetu wamuBayibolu wamukwashili kwiluka nindi Bayibolu yalala. Chafuminimu, ahanjekeli wuprofwetu wawuvulu chiwashikijeweli. Mpanji yahanjekeleñawu yamukwashili Gavin, nawa wetejeli kudiza Bayibolu.

Wuumi walema muwumi. Neyi kunatati muchilaaka chanoña muIsarela, nvula yanokaña wanyi hadi tukweji twatuvulu. Neyi chinyanjinyanji chawuumi kwosi, nyitondu yomaña nikujiya. Yehova washimwineñahu dehi nindi mafuku etu akekala neyi kudi chaaña, dikwila nawu antu akatiya mpwila “yakutiya mazu aYehova.” (Amosi 8:11) Wakanini nindi awayishewa akekala “neyi wuumi wakudi Yehova” chakashimwinañawu nsañu yayiwahi yaWanta iku anakuyikwasha kudi “anyikoku acheñi.” (Mika 5:7; Yowanu 10:16) Nsañu yitwashimwinaña hinjila yimu yahaninañamu Yehova wumi kudi antu atiyaña mpwila yachalala. Komana twalemesha nsañu yitwashimwinaña?

Wuumi hinkisu yafumaña kudi Yehova. (Kuhituluka 33:13) Mudimu wetu wakushimwina wakwashaña antu etejaña. Kudiza Bayibolu kwamukwashili Gavin muloña wawanini ñakwilu yamalwihu ejima adiñayi nawu. Wahimpili chihandilu chindi, wapapatisheweli nawa chayinu mpinji nakushimwina nsañu yayiwahi yaWanta hamu nañodindi, Joyce.

Neyi twesekeja mudimu wetu wakushimwina nawuumi chikutukwasha kwiluka netu mudimu wakushimwina wutwadikitaña hamuntu hamuntu walema. Munjilanyi? Musa wamenji wafumaña kuwuumi wazoweshaña iseki wanyi, ilaña chiyavula, iseki dazowaña. Munjila yoyimu, mudimu wakushimwina wutukuzata nkawetu wunateli kumwekana neyi wanyanya. Ilaña neyi tuzatila hamu nawambuña aYehova amavulu, tukushimwina “nyunza yejima.” (Matewu 24:14) Komana mudimu wetu wakushimwina watwinkayi Yehova wunateli kukwasha antu? Mwamweni, nsañu yitwashimwinaña yikwikala neyi wuumi, dikwila nawu wukulembama, wukukwasha nawa walema muwumi.