1-3. (a) AkwaKristu amwekeshaña ñahi nawu afwilaña kupompa hamu? (Talenu mwevulu wakutachikilahu.) (b) Tukuhanjekadi muchinu chibaaba?

CORINNA hadiñayi nayaaka 17, amama yindi ayikasili nawa ayitwalili mukaleya kakwakulehi. Kuhiñahu, Corinna niyena amufumishili hetala nakumutwala kwakulehi, kuSiberia. Kwayiliyi wazatileña mufamu nawa amuhembeleña neyi nduñu. Mpinji yikwawu wadiña nakuzatila hanji hatuuta nankashi chakadi yakuvwala yalumbwa yamashika. Hela chochu, Corinna namuhela mukwawu afuukwilihu kuya nakupompa.

² Corinna wahosheli nindi: “Twanyamukili namelela nakuya kuchitesheni chamasuwa hadiña makilomita 25 kufuma kutwazatilileña. Masuwa yanyamukili na 2 koloku yantetemena, twendeli maora 6 namasuwa, chitwasulukili twendeli hamaseki makilomita 10 nakushika kuchipompelu.” Corinna watiyili kuwaha chayiliyi nakupompa. Wahosheli nindi: “Hakupompa, twadizili Kaposhi Kakutalila nawa  twembili tumina twaWanta. Chikuhwelelu chetu chakoleleliku nankashi.” Chimwahitili mafuku asatu, awa ahela ayedi afuntili kwazatilileñawu, ilaña mwini famu welukili wanyi nindi afuminihu.

³ Antu jaYehova afwilaña kwikala hamu nawamanakwawu. Chakutalilahu, akwaKristu akusambila akeñeleña nankashi kubulakana nawamanakwawu nakudifukula kudi Yehova nawa adizileña kulonda amwiluki. (Yililu 2:42) Ninenu mwafwilaña kuya nakupompa. Ilaña chinateli kuyikalila kupompa mpinji yejima neyi chichayikalilaña amanakwenu niahela. Hadaha mwazataña maora amavulu hela mudi nayuma yayivulu yakwila indi kwiji mwazeyaña. Hanu dinu chumanyi chinateli kutukwasha kulonda tupompeña mpinji yejima? ^[1] (Talenu mazu adi kunsa.) Tunateli kukolesha ñahi atudizi etu aBayibolu niamanakwetu kupompa mpinji yejima? Achinu chibaaba chikulumbulula kupompa (1) chikwatukwashaña, (2) chikwakwashaña akwetu, ni (3) chikwazañaleshaña Yehova. ^[2]—Talenu mazu adi kunsa.

4. Kupompa kwatukwashaña ñahi kumwiluka Yehova?

⁴ Kupompa kwatudizishaña. Kupompa kwejima kwatukwashaña kumwiluka Yehova. Chakutalilahu, yipompelu yayivulu katataka yadizileña mukanda waDraw Close to Jehovah haKudiza Bayibolu haChipompelu. Mwatiyili ñahi chitwadizili hayilwilu yaYehova nichimwatiyili chahosheleñawu amanakwenu chamukeñawu? Chumichi chayiletesheli mumukeñi Yehova nankashi. Hakupompa, twadizaña cheñi Bayibolu kuhitila mukutiyilila nakanañachima kujimpanji, kuyimwenu nikukutaña Bayibolu. (Nehemiya 8:8) Nawa toñojokenu yuma yayivulu yitwadizaña mulungu nimulungu neyi tunakuloñesha yikuma yamaneni nikutiya amanakwetu chaloñeshawu.

5. Kupompa kunayikwashi ñahi kuzatisha yuma yimunadizi muBayibolu nichakushimwina?

⁵ Kupompa kwatukwasha kuzatisha yuma yitwadizaña muBayibolu. (1 Atesalonika 4:9, 10) Chakutalilahu, mwadizahu dehi Kaposhi Kakutalila Kakudizamu kayileñeleli mwikali namuchima wakukalakala chikupu mumudimu waYehova, muwahishi njila yimwalombelañamu hela mwanakeni manakwenu hela muhela? Kupompa kutwekalaña naku mukachi kamulungu kwatukwashaña kwiluka chakushimwina nsañu yayiwahi nichakukwasha antu kwiluka chalala chamuBayibolu.—Matewu 28:19, 20.

6. Kupompa kwatukwashaña nikutukolesha ñahi?

⁶ Kupompa kwatukoleshaña. Kaayi kaSatana kakeñaña kuzeyesha chikuhwelelu chetu nawa katwakamishaña nikutuneñesha. Ilaña kupompa kwatukoleshaña nikutukwasha kutwalekahu kumukalakela Yehova. (Tañenu  Yililu 15:30-32.) Kakavulu, twahoshaña hawuprofwetu wamuBayibolu chiwunashikijewi. Chumichi chatukwashaña kukuhwelela chikupu netu yikaninu yaYehova yakashikijewa. Amanakwetu niahela atukoleshaña hampinji yahanañawu jimpanji, kwakulahu nikumuhameka Yehova mukwimba chakufuma hamuchima. (1 Akorinda 14:26) Nawa neyi tuhanjeka nawu henohu kupompa kanda hela hanyima yakupompa, twatiyaña kuwaha muloña twekalaña nawamabwambu amavulu atwakamenaña.—1 Akorinda 16:17, 18.

7. Muloñadi chichawahila kuya nakupompa?

⁷ Hakupompa twatambwilaña wukwashu waspiritu yaNzambi. Yesu wazatishaña iyi spiritu yajila kulombola nachu yipompelu. Watuleja nindi twatela ‘kutiya munakuhosha spiritu nayipompelu.’ (Chimwekeshu 2:7) Spiritu yajila yinateli kutukwasha kushinda kweseka nikushimwina chakadi woma. Yinateli cheñi kutukwasha kufuukula chiwahi. Dimuloña waweni wutwatela kuzatila nañovu tupompeña mpinji yejima kulonda tutambwili wukwashu waspiritu yaNzambi.

8. Neyi amanakwetu atumona tunenzi nakupompa, tunakwakulahu nikwimba, chayikoleshaña ñahi? (Talenu chikasha chinakuhosha nawu “ Mpinji Yejima Atiyaña Kuwaha Hanyima Yakupompa.”)

⁸ Hakupompa, twekalaña nakukooleka kwakumwekesha netu twakeña amanakwetu niahela. Antu amavulu muchipompelu chetu anakuumika kukala kwakuvulu. Kapostolu Pawulu wasonekeli nindi: “Tuditoñojokenu muntu himuntu.” (Aheberu 10:24, 25) Tunateli kumwekesha netu twakeña amanakwetu neyi tuya nakupompa nikudikolesha wumu namukwawu. Neyi tuya nakupompa, twamwekeshaña netu tunakukeña kwikala nawamanakwetu, kuhanjeka nawu nawa netu tunakukeña kwiluka chinakutiyawu. Twayikoleshaña cheñi neyi atiya chitunakwakula nichitunakwimba chakufuma hamuchima.—Akolose 3:16.

9, 10. (a) Lumbululenu mazu aYesu ekala haYowanu 10:16 chatukwashañawu kwiluka nawu kupompa hamu nawakwetu kwalema. (b) Tunateli kukwasha ñahi muntu ahelawu kudi antaña jindi neyi tupompaña mpinji yejima?

 ⁹ Neyi tunayi nakupompa, twakwashaña chipompelu kwikala chanuñañana. (Tañenu Yowanu 10:16.) Yesu wadesekejeli nakabiña nawa wesekejeli atumbanji twindi namukanka wanyikoku. Toñojokenu hachumichi: Neyi anyikoku ayedi adi hampidi, ayedi adi muchinekineki nawa wumu wudi kwacheñi, mwalala tukuhosha netu awa anyikoku atanu adi mukanka wumu? Inehi, muloña mukanka wanyikoku wekalaña hamu nawa walondelaña kabiña. Munjila yoyimu, bayi tudambulaña kudi amanakwetu kuhitila mukupompaku. Twatela kupompa hamu kulonda twikali “mukanka wumu” nikulondela “kabiña wumu.”

¹⁰ Kupompa kwatukwashaña kwikala anuñañana neyi chisaka chakeñañana. (Masamu 133:1) Antu amakwawu muchipompelu ayihela kudi yisaka yawu, anvwali, amanakwawu hela ahelawu. Ilaña Yesu wayikana kuyinka chisaka chayikeña nawa chakayakamenaña. (Maku 10:29, 30) Neyi mukupompaña mpinji yejima, mukwikala neyi tata, mama, manakwa hela muhela muntu muchipompelu. Neyi tutoñojoka hachumichi, tukufwilaña kupompaña mpinji yejima.

11. Kupompa kwatukwashaña ñahi kumwinka Yehova yuma yatelela?

¹¹ Hakupompa, twamwinkaña Yehova yuma yatelela. Chineli diyi Nleñi  yetu, twatela kumusakilila, kumulemesha nikumushimeka. (Tañenu Chimwekeshu 7:12.) Tunateli kwila yumiyi hakupompa neyi tulomba kudi Yehova, kumwimbila nikuhosha hadi yena. Tukweti kukooleka kwakudifukula kudi Yehova mulungu nimulungu.

12. Yehova watiyaña ñahi neyi twovwahila lushimbi lwakuya nakupompa?

¹² Yehova diyi watuleñeli, nawa twatela kumwovwahila. Watulejaña nindi tupompeña hamu, chineli kukuma kudi kwakwihi. Yehova watiyaña kuwaha neyi twovwahila ilu lushimbi. (1 Yowanu 3:22) Welukaña nindi tunakukeña kuya nakupompa nawa walemesha chitwazataña nañovu hakwila tuwanikiku.—Aheberu 6:10.

13, 14. Hakupompa twakundamaña ñahi kwakwihi naYehova niYesu?

¹³ Neyi tuya nakupompa, twamulejaña Yehova netu tunakukeña kukundama kwakwihi nayena niMwanindi. Hakupompa, twadizaña Bayibolu nikudizila kudi Yehova chitwatela kwila nichakushakama. (Isaya 30:20, 21) Niantu abula kwikala aYinsahu jaYehova neyi aya nakupompa, elukaña nawu Nzambi nakutulombola. (1 Akorinda 14:23-25) Yehova walombolaña kupompa kwetu naspiritu yindi yajila, nawa diyi watudizishaña. Dichi neyi tunayi nakupompa, twatiyililaña chinakuhoshayi Yehova, twelukaña chatukeñayi nawa twakundamaña kwakwihi nayena.

¹⁴ Yesu, Mutu wachipompelu nindi: “Kunapompi hela ayedi hela asatu mwijina dami, diku kunidi mukachi kawu.” (Matewu 18:20) Bayibolu yahoshaña cheñi nawu Yesu “wendaña mukachi” kayipompelu. (Chimwekeshu 1:20–2:1) Mwamweni, Yehova niYesu adi nanetu nawa atukoleshaña hakupompa. Munakutoñojoka nenu Yehova watiyaña ñahi neyi yamona munakufwila kukundama kwakwihi nayena niMwanindi?

15. Kuya nakupompa kwamwekeshaña ñahi nawu tunakukeña kumwovwahila Nzambi?

¹⁵ Neyi tuya nakupompa, twamwekeshaña netu tunakukeña kumwovwahila Yehova. Yehova watukanjikijaña wanyi kwila munahoshiyi. (Isaya 43:23) Neyi twovwahila lushimbi lwindi lwakuya nakupompa, tukumwekesha netu twamukeña nawa netu wudi nawuswa wakutuleja yuma yakwila. (Aroma 6:17) Chakutalilahu, tunateli kwila ñahi neyi muntu watwiñija mudimu nakukeña nindi tuzateña nañovu chakwila tukuyaña nakupompa mpinji yejima wanyi? Hadaha nfulumendi yinahoshi nawu neyi muntu amuwana nakudifukula kudi Yehova, akumufwetesha, akumukasa mukaleya hela kumubabesha chikupu. Mpinji yikwawu twafwilaña kwila yuma yacheñi chatela tuyi nakupompa. Muyuma yejimiyi,  twatela kufuukulahu etu aweni chakwila. (Yililu 5:29) Ilaña mpinji yejima yitwamwovwahilaña Yehova twamuzañaleshaña.—Yishimu 27:11.

16, 17. (a) Tuneluki ñahi netu kupompa kwadiña kwalema kudi akwaKristu amumafuku awapostolu? (b) Amanakwetu aGeorge Gangas atiyileña ñahi hansañu yakupompa kwawakwaKristu?

¹⁶ Hanyima yakubulakana haPentekosta 33 C.E, akwaKristu apompeleña mpinji yejima nakudifukula kudi Yehova. Atwalekeluhu “kukakela mbe mukuleja kwawapostolu, nimukukundañana.” (Yililu 2:42) Alekeli wanyi kupompa hela chakwila ayikabishileña kudi nfulumendi yawaRoma nianlomboli ansakililu yawaYudeya. Hela chakwila yuma yakalili, atwalekelihu kupompa.

¹⁷ Makonu, ambuña aYehova niwena atiyaña kuwaha kuya nakupompa. A George Gangas, adiña amembala aMwizanvu Dalombolaña kubadika hadi yaaka 22 ahosheli nawu: “Kupompa hamu nawamanakwami dichuma chantiyishaña kuwaha muwumi wami nawa nakoleshewaña. Nakeñaña kushika swayi Hetala daWanta nikubula kufumahu swayi. Natiyaña kuwaha chikupu neyi nidi nawantu jaNzambi. Neyi nidi hakachi kawantu jaNzambi nekalaña wakasunuka neyi kwiji nidi muparadisa yakuspiritu.” Ahosheli cheñi nawu: “Nafwilaña kuya nakupompa mpinji yejima.”

18. Mwatiyaña ñahi nsañu yakuya nakupompa, nawa munakufwila kwiladi?

¹⁸ Ninenu dichimwatiyaña hansañu yakudifukula kudi Yehova? Neyi dichimwatiyaña, twalekenuhu kuzata hakumina ñovu jenu kwikala nawamanakwenu hakupompa, nimumpinji yakala. Mwekeshenu kudi Yehova nenu munafwani Mwanta Davidi wahosheli nindi: “Eyi Yehova, ami nakeñi kushakama kwitala deyi.”—Masamu 26:8.