1, 2. Davidi wamwekesheli ñahi nindi washinshika kudi Nzambi? (Talenu mwevulu wakutachikilahu.)

SAWULU nawamashidika indi 3,000 adiña nakumukeñakeña Davidi muchinkalampata muYuda kulonda amujahi. Ilaña ifuku dimu nawufuku, Davidi niantu jindi amuwanini Sawulu niamashidika indi. Adiña mutulu twatweni, dichi Davidi naAbishayi abezeli nakuhita amashidika ejima nakuwana Sawulu. Abishayi wamushawutwilili Davidi nindi: “Ñitiji nimutapi mwani iyoña dimu hohu zwa-a niheseki, hinukumutapa kayeduku.” Ilaña Davidi wamwitejeli wanyi kujaha Sawulu. Wamulejeli Abishayi nindi: “Bayi wumukisañanaku, wambala waYehova awayishawu dehi manji wukutwesha kumwolwela chikasa yobula muloña hinyi?” Davidi hakwila nindi: “Ami kwolwela chikasa wambala waYehova awayishawu dehi manji chinjila nonaku kweyoña dindi didi kwakwihi namutu windi ninsaba yameji  tuyi kwetu mwani.”—1 Samweli 26:8-12.

² Davidi welukili yuma yateleliyi kwila kulonda yekali washinshika kudi Yehova. Welukili nindi watela kumulemesha Sawulu, nawa hamwililuhu chuma chatamaku. Muloñadi? Muloña Nzambi wamutondeli Sawulu kwikala mwanta wawaIsarela. Makonu, neyi chichadiña kunyima, Yehova nakukeña ambuñindi ejima kwikala ashinshika kudi yena nikulemesha antu atondayi kulombola.—Tañenu Mika 6:8.

3. Abishayi wamwekesheli ñahi kashinshi kudi Davidi?

³ Abishayi wamulemeshili Davidi muloña welukili nindi Nzambi wamutondeli Davidi kwikala mwanta. Ilaña Davidi chekaliliyi mwanta wakoñeli nshidi. Wakamini nañoda Uriya nawa walejeli Yowabi nindi Uriya watela kufwa kunjita. (2 Samweli 11:2-4, 14, 15; 1 Kushindulula 2:16) Yowabi wadiña manakwa Abishayi, dichi Abishayi watela welukili chuma chakoñeliyi Davidi, ilaña watwalekeluhu kumulemesha Davidi. Kubombelahu, Abishayi wadiña mukulumpi wawamashidika nawa wateleleli kuzatisha wuswa windi kulonda yekali mwanta, ilaña welilumu wanyi. Wamupulwishili Davidi nikumukiña kudi ayilumbu jindi.—2 Samweli 10:10; 20:6; 21:15-17.

4. (a) Davidi wamwekesheli ñahi nindi washinshika kudi Nzambi? (b) Yumanyi yitukuhanjeka muchinu chibaaba?

⁴ Davidi wadiña washinshika kudi Yehova. Hadiñayi kansi, wajahili chikelamu cheyala Goliyati, watukileña Yehova niaIsarela. (1 Samweli 17:23, 26, 48-51) Davidi hadiñayi mwanta, kaprofwetu kaYehova Natani wamukwashili muloña wanshidi yakoñeliyi. Hohenohu, Davidi wetejeli nindi navulumuni nawa wabalumukili mumuchima. (2 Samweli 12:1-5, 13) Kuhiñahu, chelili Davidi nakuli dehi, wahanini yuma yayivulu yalema kulonda atuñi nachu tembeli yaYehova. (1 Kushindulula 29:1-5) Chinamwekani hatoka to-o nawu hela chakwila Davidi wakoñeli nshidi yahamesu bwi-i, watwalekeluhu kwikala washinshika kudi Nzambi. (Masamu 51:4, 10; 86:2) Muchinu chibaaba, tukuhanjeka hayuma yeliliyi Davidi niantu adiñaku hayina mpinji nawa tukudiza chitunateli kwikala ashinshika kudi Yehova. Tukuhanjeka cheñi hayililu yinateli kutukwasha kwila mwenimu.

5. Yumanyi yitunateli kudizila kuchiluwa chaAbishayi?

⁵ Abishayi wakeñeleña kujaha Sawulu muloña wakeñeleña kwikala washinshika kudi Davidi. Ilaña Davidi welukili nindi chikutama kujaha “wambala waYehova,” dichi wamwitejeli wanyi kujaha mwanta. (1 Samweli 26:8-11) Chuma  cheliliyi Abishayi chatudizishaña chuma chalema: neyi tunakutonda muntu wutwatela kumwekeshela kashinshi, twatela kutoñojoka hanshimbi jamuBayibolu jinateli kutukwasha.

6. Hela chakwila twakeñaña kwikala ashinshika kudi amabwambu niantaña, muloñadi wutwatelela kwikala ababala?

⁶ Chatama wanyi kwikala washinshika kudi muntu wutwakeña chidi neyi ibwambu hela ntaña yetu. Chineli twawanina wanyi, chitwatiyaña chinateli kutuluwañesha. (Yeremiya 17:9) Dichi neyi muntu wutwakeña nakwila yuma yatama nawa anamuhañi muchipompelu, twatela kwikala ashinshika kudi Yehova bayi kudi muntu wudi wejimaku.—Tañenu Matewu 22:37.

7. Muhela wumu wamwekesheli ñahi kashinshi kudi Nzambi mumpinji yakala?

⁷ Neyi muntu wumu anamuhañi muchipompelu, munateli kumwekesha nenu mwashinshika kudi Yehova. Chakutalilahu, ifuku dimu amama yaAnne ahañiluwu muchipompelu, amutemesheleli Anne foni nakumuleja nawu anakukeña kuya nakumutala. ^[1] (Talenu mazu adi kunsa.) Amama yaAnne ahosheli nawu aneñeli muloña chisaka chawu chakaanineña kuhosha nawu. Chumichi chamuneñesheli Anne, nawa wayilejeli nindi wukusoneka mukanda. Henohu kanda yasoneki mukanda, Anne watoñojokeli hayishina yamuBayibolu. (1 Akorinda 5:11; 2 Yowanu 9-11) Mumukanda windi walumbulwili nakalemesha nindi amama yindi diwu ashili chisaka chelili avulumuni nikubula kubalumuka mumuchima. Anne wayilejeli amama yindi nindi anateli kwikala namuzañalu neyi afunta kudi Yehova.—Yakoba 4:8.

8. Yililwinyi yikutukwasha kwikala ashinshika kudi Nzambi?

⁸ Ambuña aNzambi amumafuku aDavidi adiña adizoza, naluwi nawa ahamuka. Tushinshikenu haniyi yililu chiyikutukwasha kwikala ashinshika kudi Yehova.

9. Muloñadi Abineri chakeñeleleñayi kumujaha Davidi?

 ⁹ Mwana kaSawulu Jonatani nimukulumpi wamashidika awaIsarela, Abineri wamweni Davidi nasendi mutu waGoliyati nakutwala kudi Mwanta Sawulu. Jonatani wekalili ibwambu daDavidi nawa wadiña washinshika kudi yena. (1 Samweli 17:57–18:3) Ilaña Abineri wadiña washinshika wanyi. Abineri wamukwashili Sawulu wakeñeleña kujaha Davidi. (1 Samweli 26:1-5; Masamu 54:3) Jonatani naAbineri elukili nawu Nzambi wakeñeli Davidi kwikala mwanta wawaIsarela. Ilaña chelili Sawulu nafwi dehi, Abineri wamukwashili wanyi Davidi. Wakeñeleña kuswanisha Ishibosheti mwana kaSawulu kwikala mwanta. Kuhiñahu Abineri watela wakeñeleña kwikala mwanta nawa hadaha dichaletesheli yakami nañoda Mwanta Sawulu. (2 Samweli 2:8-10; 3:6-11) Muloñadi aJonatani naAbineri chamumweneneñawu Davidi munjila yambuka? Muloña Jonatani wadiña washinshika kudi Yehova nawa wadiña wadizoza ilaña Abineri nehi.

10. Chumanyi chaletesheli Abisalomi yabuli kwikala washinshika kudi Nzambi?

¹⁰ Abisalomi, mwana kaMwanta Davidi wadiña washinshika wanyi kudi Nzambi muloña hadizozeluku. Chineli wakeñeleña kwikala mwanta, dichi wasendeli “itemba nituwalu niamayala makumi atanu akuyañahu dehi kumbidi yindi lufuchi.” (2 Samweli 15:1) Waletesheli aIsarela amavulu kwikala ashinshika kudi yena. Wakeñeleña kujaha taata yindi, hela chakwila welukili nindi Yehova diyi wamwilishili Davidi kwikala mwanta wawaIsarela.—2 Samweli 15:13, 14; 17:1-4.

11. Yumanyi yitukudizila kudi Abineri, Abisalomi niBaruki?

¹¹ Neyi muntu wadizoza wanyi nawa nakukeña kuzata nyidimu yayivulu, chamukalilaña kwikala washinshika kudi Nzambi. Twamukeña Yehova nawa tunakukeña wanyi kuditiyisha etu aweni kuwaha neyi chelili Abineri  naAbisalomi. Ilaña twatela kubabala kuchina twakenda katachika kufwila mali amavulu hela nyidimu yikuletesha tudimoneña kulema. Chumichi chikumanisha wubwambu wetu naYehova. Baruki, nsoneki waYeremiya, wadiña nakufwila yuma yabuliliyi nawa wadiña namuzañalu wanyi hakumukalakela Nzambi. Dichi Yehova wamulejeli Baruki nindi: “Tiya, chinatuñi nakachisanda, chinatumbi nakachibwita; kafwampi ituña dejima. Yehova nindi, Wudi nakukeñakeña yuma yeyi yamaneni tahindi? Bayi wuyikeñakeñaku.” (Yeremiya 45:4, 5) Baruki wamutiyilili Yehova. Ninetu twatela kumutiyilila muloña katataka yajilumuni kanu kaayi katama.

12. Lumbululenu chitunateli kubulila kwikala ashinshika kudi Nzambi neyi twaditiyishaña etu aweni kuwaha.

¹² Daniel, manakwetu wakuMexico, watondeluhu muntu watela kumwekeshelayi kashinshi. Wakeñeleña kusumbula mumbanda wabulaña kwikala Chinsahu chaYehova. Daniel wahosheli nindi: “Natwalekeluhu kumusonekela mameseji nihampinji yinadiña nakuzata wupayiniya.” Kutwala muna, welukili nindi wadiña nakwila chuma chatama. Wadiña washinshika kudi Yehova wanyi nawa wateleli kwikala wadizoza. Dichi walejeli eluda wakuluka yitembi haniku kukala. Daniel walumbulwili nindi: “Ankwashili nawu hakwila nikali washinshika kudi Nzambi natela kuleka kumutemeshela ona mumbanda mameseji. Chinalombeli iku inakudila, nalekeli kumutemeshela mameseji. Dichi, nazatileña chiwahi mumudimu wakushimwina.” Ichi Daniel wudi namumbanda wamukeña Yehova nawa hinkoñi wañinza.

13. Natani wadiña ñahi washinshika kudi Yehova nikudi Davidi hampinji yavulumwiniyi Davidi?

¹³ Neyi twikala ashinshika kudi Yehova tunateli kwikala cheñi ashinshika kudi antu nikuyikwasha munjila yayiwahi. Kaprofwetu Natani wadiña washinshika kudi Yehova nikudi Davidi. Chelili Davidi natambuli dehi ñoda ambala nikumujahila nfumwindi, Yehova watemesheleli Natani kulonda yamufumbi. Natani wadiña wahamuka nawa washinshika kudi Yehova. Wamulejeli Davidi munjila yayiwahi nawa mukubabala. Wakeñeleña Davidi yeluki nindi nshidi yakoñeliyi yadiña yahamesu bwi-i. Dichi wamulejeli hadi muntu waheta weyili kana kamukoku kamuntu kazweñi. Davidi chatiyili iyi nsañu, wazuwili chikupu nayuma yeliliyi ona iyala waheta. Dichi Natani wamulejeli nindi: “Iyalowu yeyi!” Davidi  welukili nindi navulumuni kudi Yehova.—2 Samweli 12:1-7, 13.

14. Munateli kwikala ñahi ashinshika kudi Yehova, antaña niamabwambu?

¹⁴ Ninenu munateli kusambila kwikala ashinshika kudi Yehova dinu kudi antu kuhitila mukwikala naluwi. Chakutalilahu, hadaha muneluki nenu manakwenu nakoñi nshidi yahamesu bwi-i. Mukukeña kwikala washinshika kudi yena, sweje-e neyi hibwambu denu hela hintaña yenu. Ilaña mukwanuka cheñi nenu mwatela kwikala ashinshika kudi Yehova. Kufwana Natani, ovwahilenu Yehova ilaña ikalenu naluwi kudi manakwenu. Mulejenu yayi nakulejamu aeluda nawa watela kuya swayi. Neyi kuya nehi, mwatela kuya nakuyileja aeluda. Neyi mwila mwenimu, mukwikala ashinshika kudi Yehova. Nawa mukumumwekeshela manakwenu luwi muloña aeluda akumukwasha kwikala nawubwambu wawuwahi naYehova. Akumufumba mukuwunda nawa munjila yayiwahi.—Tañenu Alevi 5:1; Aŋalija 6:1.

15, 16. Muloñadi Hushayi chateleliyi kwikala wahamuka kulonda ekali washinshika kudi Nzambi?

¹⁵ Hushayi wadiña ibwambu daMwanta Davidi washinshika. Chelili antu akeñi kumuswanisha Abisalomi wanta, Hushayi wateleli kwikala wahamuka kulonda ekali washinshika kudi Davidi nikudi Nzambi. Welukili nindi Abisalomi nenzi kuYerusalema nawamashidika indi nawa Davidi natemuki. (2 Samweli 15:13; 16:15) Hanu dinu Hushayi welilidi? Komana washili Davidi nakukwasha Abisalomi? Inehi. Hela Davidi wadiña washinakaja dehi nawa antu amavulu akeñeleña kumujaha, Hushayi wekalili washinshika kudi Davidi muloña Yehova watondeli Davidi kwikala mwanta. Dichi Hushayi wayili kuMpidi yaOliveta nakumuwana Davidi.—2 Samweli 15:30, 32.

¹⁶ Davidi walejeli Hushayi kufunta kuYerusalema nakudimwekesha neyi hibwambu daAbisalomi kulonda yamushinjili Abisalomi kutiyila yena chatela atiyilileña Ahitofweli. Hushayi wadiña wahamuka nawa washili wumi windi hakatoña kulonda amwovwahili Davidi nikwikala washinshika kudi Yehova. Davidi walombeli nindi Yehova yamukwashi Hushayi nawa wamukwashili. Abisalomi watiyilili Hushayi chatela atiyilili Ahitofweli.—2 Samweli 15:31; 17:14.

17. Muloñadi chitwatela kwikalila ahamuka hakwila twikali ashinshika?

¹⁷ Twatela kuhamuka kulonda twikali ashinshika kudi Yehova nikumwovwahila chatela twileña yuma yakeñaña antaña jetu, antu itwazataña nawu hela akulumpi janfulumendi. Chakutalilahu, Taro wakuJapan, wazatileña nañovu kulonda yazañaleshi anvwali jindi kufuma tuhu kuwansi. Wayovwahilili nikwikala washinshika kudi wena muloña wayikeñeli. Ilaña chatachikiliyi kudiza Bayibolu nawaYinsahu jaYehova, anvwali jindi akeñeleña nawu yaleki. Chumichi chamuneñesheli nawa chamukalilili kuyileja nindi wukuya nakupompa. Taro wahosheli nindi: “Ahilili chikupu chakwila anlekesheli kuya nakuyihempula. Nalombeli kwikala wahamuka kulonda nili yuma yinafuukwili. Dichi alekeli kunlekesha nawa nayaña nakuyihempula mpinji yejima.”—Tañenu Yishimu 29:25.

18. Munahetelumu ñahi muchinu chibaaba?

¹⁸ Neyi twikala ashinshika kudi Yehova, tukwikala namuzañalu watiyiluwu aDavidi, Jonatani, Natani, niHushayi. Bayi twikala neyi Abineri naAbisalomi abulili kwikala ashinshika. Tuneluki netu twawanina wanyi nawa twaluwañeshaña. Ilaña tumwekeshenu netu kwikala ashinshika kudi Yehova kwalema chikupu.