1-3. (a) Muloñadi wutukuhoshela netu tunateli kwikala amabwambu jaNzambi? (b) Antwinyi itukuhanjekahu muchinu chibaaba?

MUBAYIBOLU, Abarahama amutena nawu ibwambu daNzambi kapampa kasatu. (2 Kushindulula 20:7; Isaya 41:8; Yakoba 2:23) Diyi muntu hohu atenawu nawu ibwambu daNzambi muBayibolu. Komana chinayi mukwila nawu Abarahama diyi hohu wekalili ibwambu daYehova? Inehi. Bayibolu yahoshaña nawu wejima wetu tunateli kwikala amabwambu jindi.

² Mwizu daNzambi mwekala nsañu yahosha hadi amayala niambanda ashinshika amwakamini Yehova, amukuhweleleli nawa ekalili amabwambu jindi chikupu. (Tañenu Masamu 25:14.) Ekala hezanvu ‘devu dawayinsahu’ dateneniyi Pawulu. Awa antu ejima adiña amabwambu jaNzambi.—Aheberu 12:1.

³ Tuhanjekenu hadi amabwambu jaYehova asatu atenawu muBayibolu: (1) Luti, mumbanda nfwila washinshika wakuMowabi, (2) Hezekiya, mwanta washinshika  wawaYudeya ni (3) Mariya wadizoza, mama yaYesu. Ekalili ñahi amabwambu jaNzambi, nawa tukudizilaku kwodi?

4, 5. Luti wateleli kwiladi, nawa kwila mwenimu kwakalililidi? (Talenu mwevulu wakutachikilahu.)

⁴ Nyawomi niakuwindi awambanda aLuti naOripa, endeli njila yayilehi kufuma kuMowabi nakuya kuIsarela. Hiyayileña, Oripa wafuukwili kufunta kumukala wawu kuMowabi. Ilaña Nyawomi wayili kuIsarela kumukala wawu. Luti welili ñahi? Wateleli kutonda kwakuya. Wukufunta kumukala wawu kuMowabi nakushakama nachisaka chindi tahindi wukuya naNyawomi mukuwindi kuBetelemi?—Luti 1:1-8, 14.

⁵ Antaña jaLuti ashakamineña kuMowabi. Wadi kufunta kudi antaña jindi nawa adi kumuhemba chiwahi. Welukili antu akuMowabi, idimi nichisemwa chawu. Nyawomi wamulejeli wanyi Luti chisemwa nidimi dakuBetelemi. Nawa Nyawomi wakameneni nindi wakatwesha wanyi kumuwanina Luti iyala hela itala mwakukama. Dichi Nyawomi wamulejeli Luti kufunta kuMowabi. Neyi chitwamona, Oripa “wafuntili kumukala wawu nikudi ankishi indi.” (Luti 1:9-15) Ilaña Luti wafuntili wanyi kudi antaña jindi niankishi jawu.

6. (a) Luti watondeliyi ñahi mwamaana? (b) Muloñadi Bowazi chahosheleliyi nindi Luti wakeñeli kubatama mumpuula jaYehova?

⁶ Chinamwekani neyi Luti wamwilukili Yehova kuhitila mudi nfumwindi hela Nyawomi. Welukili nindi Yehova wekala wanyi neyi anzambi akuMowabi. Wamukeñeli Yehova nawa welukili nindi wateleleli kumukeña nikudifukula kudi yena. Dichi Luti watondeliyi mwamaana. Wamulejeli Nyawomi nindi: “Antu eyi akwila antu ami. Nzambi yeyi wukwila Nzambi yami.” (Luti 1:16) Twakoleshewaña neyi tutoñojoka hadi Luti chamukeñeliyi Nyawomi. Ilaña chuma chatukoleshaña chikupu hikukeña kwamwekesheliyi Luti kudi Yehova. Chumichi chamuzañalesheli Bowazi, wamuhamekeli Luti hakukeña ‘kubatama mumpuula jaYehova.’ (Tañenu Luti 2:12.) Mazu azatishiliyi Bowazi anateli kutwanukisha kana kakada chikakeñaña kukikiña mumpuula jamama yindi. (Masamu 36:7; 91:1-4) Munjila yoyimu, Yehova wamukiñili Luti nawa wamukiswilili hamuloña wachikuhwelelu chindi. Luti waditoñesheluhu wanyi namwafuukwiliyi.

7. Chumanyi chikuyikwasha antu ashintajalaña kudihana kudi Yehova?

⁷ Antu amavulu adizaña hadi Yehova ilaña akeñaña wanyi kubatama mudi yena. Ashintajalaña kudihana kudi yena nakupapatishewa. Neyi ninenu mwashintajalaña, toñojokenu hachuma chaleteshaña. Antu ejima ekala nanzambi akalakelañawu. (Yoshuwa 24:15) Mukufuukula mwamaana neyi mukukalakelaña Nzambi walala. Neyi mudihana kudi Yehova mukumwekesha nenu mwakuhwelela nenu wukuyikiñaña. Nawa wukuyikwasha kutwalekahu kumukalakela hela mudi mukukala. Nzambi wamukwashili Luti.

8. Nkulilu yaHezekiya yadiña ñahi?

 ⁸ Nkulilu yaHezekiya yadiña yambuka chikupu nayaLuti. Muloña yena wakulilili mumunza wadihanini kudi Nzambi. Ilaña bayi neyi aIsarela ejima atwalekeluhu kwikala ashinshikaku. Tata yaHezekiya, Mwanta Ahazi, wadiña watama. Walemesheleña wanyi tembeli yaNzambi nawa waletesheli antu adifukuleña kudi anzambi akutwamba. Ahazi wocheli niamana kwaHezekiya nakuyilambula kudi anzambi akutwamba. Hezekiya wakulili muchisaka chatama!—2 Anyanta 16:2-4, 10-17; 2 Kushindulula 28:1-3.

9, 10. (a) Muloñadi Hezekiya chadi kuhililayi? (b) Muloñadi wutwatela kubula kumuhilila Nzambi? (c) Muloñadi wutukubulila kuhosha netu anvwali jetu anateli kutukojeja kwila yuma yayiwahi hela yatama?

⁹ Yuma yatama yelileñayi Ahazi yadi kuletesha mwanindi Hezekiya kumuhilila Yehova. Makonu, antu amakwawu anomiki kukala kwanti kubadika kwaHezekiya atoñojokaña nawu chachiwahi ‘kumuzuwila Yehova’ hela kuhilila kuloñesha kwindi. (Yishimu 19:3) Amakwawu atoñojokaña nawu nkulilu yawantaña jawu yinateli kuyiletesha kwikala nachihandilu chatama hela kwila yuma yatama yelileñawu anvwali jawu. (Ezekeli 18:2, 3) Yitoñojoka yeniyi yalala?

¹⁰ Chihandilu chaHezekiya chamwekesha nawu ñakwilu yanilu lwihu yidi nawu inehi. Kwosi chuma chidi chejima chinateli kuletesha tumuhilili Yehova. Wakojejaña wanyi yuma yatama kumwekena antu. (Yoba 34:10) Anvwali anateli kuleja anyanawu kwila yuma yayiwahi hela yatama. (Yishimu 22:6; Akolose 3:21) Ilaña chumichi hichinayi mukwila nawu anvwali jetu anateli kutuletesha kwikala amawahi hela atamaku. Muloñadi? Muloña Yehova watwinka wuswa wakufuukula, dikwila nawu tunateli kutonda kwila yuma yayiwahi hela yatama. (Kuhituluka 30:19) Hezekiya wazatishili ñahi wuswa wakufukula?

11. Chumanyi chaletesheli Hezekiya yekali mwanta waYuda wamuwahi?

¹¹ Hela chakwila tata yindi wadiña  mwanta watama muYuda, Hezekiya wekalili wamuwahi. (Tañenu 2 Anyanta 18:5, 6.) Wadiña wanyi nayililu yatama yatata yindi. Ilaña wadiña nakutiyilila atuprofwetu twaYehova adi neyi Isaya, Mika niHoseya. Watiyileña mwamufumbileñawu. Chumichi chamukwashili kumanisha kukala kwaleteliyi tata yindi. Wawayishili tembeli, wamulombeli Nzambi kwanakena nshidi jawantu nikukisañana ankishi mwituña dejima. (2 Kushindulula 29:1-11, 18-24; 31:1) Kuhiñahu, chelili mwanta wawaAsiriya, Senakeribi yakeñi kulukuka Yerusalema Hezekiya wamwekesheli kuhamuka nichikuhwelelu. Wakuhweleli muwukwashu waYehova nawa wakolesheli antu jindi. (2 Kushindulula 32:7, 8) Mpinji yimu Hezekiya wadinkeli wanta, ilaña chamufumbiluwu kudi Yehova wadizozeli. (2 Kushindulula 32:24-26) Mwamweni, twatela kudizoza neyi cheliliyi Hezekiya. Wetejeli wanyi chihandilu chawantaña jindi kukisañana chihandilu chindi. Ilaña, wamwekesheli nindi Yehova diyi ibwambu dindi.

12. Kufwana Hezekiya, antu amavulu anekali ñahi amabwambu jaYehova?

¹² Makonu kaayi kanatami chikupu, anyana amavulu anakukula chakadi anvwali jawu akweti kukeña. (2 Timotewu 3:1-5) Hela chakwila akwaKristu amavulu akulila muyisaka yatama, afuukulahu kwikala amabwambu jaYehova. Kufwana Hezekiya, nkulilu yawanvwali jawu diyi yayiletesheli wanyi kwikala nachihandilu chachiwahi. Nzambi watwinka wuswa wakudifuukwila nawa tunateli kufuukulahu kumuzatila nikumulemesha, neyi cheliliyi Hezekiya.

13, 14. Muloñadi mudimu wamwinkeluwu Mariya chiwamwekeneña kukala, ilaña Gabireli wamulejeli nindidi?

¹³ Chimwahitili yaaka kufuma hafwiliyi Hezekiya, mumbanda wadizoza wejina daMariya wekalili nawubwambu wawuwahi naYehova nawa wamwinkeli mudimu walema. Wadi kwimita, kuvwala nikukulisha Mwana kaNzambi. Yehova watela wamukeñeli nikumukuhwelela Mariya hakumwinka mudimu wamuchidiwu. Chamwinkeluwu iwu mudimu welili ñahi?

¹⁴ Kakavulu twahoshaña hakukooleka kwadiñayi naku Mariya. Hanu dinu kuduhu yuma yakameneniyi? Chakutalilahu, kañelu Gabireli wamulejeli nindi  wukwimita chakadi kubulakana neyala. Ilaña Gabireli walumbulwilili wanyi chisaka chindi hela antuñi nindi chakemitayi. Antaña jindi adi kutoñojokadi? Nateli kumuleja ñahi Yosefu nindi nakuhosha walala? Kubombelahu, wadiña namudimu weneni wakukulisha Mwana kaNzambi. Tweluka wanyi yuma yakameneniyi Mariya, ilaña tweluka yuma yeliliyi hanyima yakuhosha naGabireli. Wahosheli nindi: “Tala ami kambuñambala kaYehova; mwonsu muwunahoshi mumwekani kudami.”—Luka 1:26-38.

15. Muloñadi wutukuhoshela netu Mariya wadiña nachikuhwelelu chakola?

¹⁵ Chikuhwelelu chaMariya chadiña chakola chikupu! Wadiloñesheli kwila yuma yejima yamulejeluwu, neyi chelaña ñamba. Wakuhweleleli nindi Yehova wukumwakamena nikumukiña. Mariya wekalili ñahi nachikuhwelelu chakola? Twasemukaña nachikuhwelelu wanyi. Ilaña tunateli kwikala nachikuhwelelu neyi tuzata nañovu kulonda twikali nachu nikulomba kudi Nzambi kulonda yatukwashi. (Aŋalija 5:22; Aefwesesa 2:8) Mariya wazatili nañovu hakukolesha chikuhwelelu chindi. Tuneluki ñahi? Tushinshikenu chatiyililiyi niyuma yahosheliyi.

16. Yumanyi yinakumwekesha nawu Mariya wadiña mukwakutiyilila wamuwahi?

¹⁶ Chatiyililiyi Mariya. Bayibolu yahosha nawu twatela “kunyakala kutiya, kulaba kuhosha.” (Yakoba 1:19) Mariya wadiña mukwakutiyilila wamuwahi. Bayibolu yamwekesha nawu watiyilili nakanañachima kuyuma yamulejeluwu, sweje-e yuma yadiziliyi hadi Yehova. Watoñojokeleña haniyi yuma yalema. Chakutalilahu, hampinji yavwalikiliyi Yesu, atubiña amulejeli Mariya nsañu yayilejeluwu kudi kañelu. Kuhiñahu, Yesu chadiñayi nayaaka 12 wahosheli yuma yahayamishili Mariya. Muniyi yakutalilahu, Mariya watiyilili, wanukili nikutoñojoka chikupu hayuma yatiyiliyi.—Tañenu Luka 2:16-19, 49, 51.

17. Yumanyi yitukudizila kumazu ahosheliyi Mariya?

¹⁷ Yuma yahosheliyi Mariya. Bayibolu yatuleja wanyi yuma yayivulu yahosheliyi Mariya. Mazu amavulu ahosheliyi ekala haLuka 1:46-55. Awa mazu amwekeshaña nawu Mariya welukili Nyikanda yachiHeberu chikupu. Munjilanyi? Mazu ahosheliyi Mariya adifwana namazu alombeliyi Hana, mama yaSamweli. (1 Samweli 2:1-10) Chinamwekani neyi Mariya wazatishili mazu ekala muNsona kapampa 20 mumazu ahosheliyi. Chinamwekani hatooka nawu walejeleña antu chalala chadiziliyi kudi Ibwambu dindi muneni, Yehova.

18. Tunateli kwimbujola ñahi chikuhwelelu chaMariya?

¹⁸ Kufwana Mariya, mpinji yikwawu Yehova nateli kutwinka mudimu wutukumona netu wakala. Twatela kwimbujola cheliliyi, kutambula mudimu nikukuhwelela netu Yehova wukutukwasha. Tunateli cheñi kwimbujola chikuhwelelu chaMariya neyi tutiyililaña chikupu Yehova nikutoñojoka hayuma yitunadizi hadi yena ninkeñelu yindi. Neyi twila mwenimu tukuleja akwetu yuma yitunadizi.—Masamu 77:11, 12; Luka 8:18; Aroma 10:15.

19. Hampinji yitunakwimbujola chikuhwelelu chawantu ekala muBayibolu twatela kukuhwelela yumanyi?

¹⁹ Luti, Hezekiya niMariya adiña amabwambu jaYehova, neyi chochadiña Abarahama. Adiña hakachi ‘kevu dawayinsahu’ adiña nakukooleka kwakwikala amabwambu jaNzambi. Tutwalekenuhu kwimbujola ichi chakutalilahu chachiwahi chachikuhwelelu. (Aheberu 6:11, 12) Neyi twila mwenimu, tukutalilaña nkisu jitukatambwila hakwikala amabwambu daNzambi.