NASEMUKILI muchaaka cha 1926 muCrooksville, Ohio, kuUnited States. Atata niAmama adiña munsakililu yidi yejima wanyi, ilaña atulejeleña etu anyana 8 kuya kuchechi. Nayileña kuchechi yaMethodist. Hinadiña nayaaka 14, mukulumpi wachechi wanyinkeli chawaana muloña nayili kuchechi chaaka chejima chakubula kujiña.

Hayina mpinji, aMargaret Walker, aChinsahu chaYehova adiña nakudizisha amama Bayibolu. Ifuku dimu, nakeñeleña kudiza nawu. Amama amweni nawu nikuyiluwañesha, dichi anhañili mwitala. Ilaña natiyileña nsañu yahanjekeleñawu. Ifuku dimu, aMargaret añihwili nawu, “Weluka ijina daNzambi?” Nakwili nami, “Muntu wejima weluka nindi ijina dindi hiNzambi.” Ahosheli nawu, “Nonaku Bayibolu yeyi wutañi haMasamu 83:18.” Nataliluhu, nawa nawanini nami ijina daNzambi diyi Yehova. Natemukili nakuleja akwetu nami, “Chimwafunta kwitala lelu, mutañi Masamu 83:18 muBayibolu kulonda mwiluki ijina daNzambi.” Munateli kuhosha nenu natachikili kushimwina hohenahana.

Nadizili Bayibolu nawa napapatisheweli mu 1941. Chinapapatisheweli hohu, anyinkeli kulombola kudiza kwamukanda hachipompelu. Nalejeli amama nianyikijami kwinza nakutiyilila, nawa atachikili kwinza nakutiyilila kumukanda wunalombweleña. Atata enjileña wanyi.

Anyinkeli cheñi mudimu wukwawu muchipompelu nawa nahembeleña nyikanda yayivulu yasonekeleñawu aYinsahu jaYehova. Ifuku dimu, aTata enyikili kunyikanda nakuhosha nawu: “Wunamoni jejimiji? Wujifumishi mwitala dami nineyi wuyeña.” Nafumini hetala nakuya nakushakama kuZanesville, Ohio, ilaña nafuntili cheñi nakukolesha chisaka chami.

Atata akaanishileña aMama kuya nakupompa. Mpinji yikwawu neyi amama hiyakuya, atata adiña nakuyifuntisha. Ilaña adiña nakwidikila kuchinsu  chacheñi nakuya nakupompa. Nayilejeli aMama nami: “Bayi mwakamaku. Akazeya tuhu awenawu nakuyifuntisha.” Mukuhita kwampinji, aTata azeyeli nawa amama ayileña nakupompa chakadi kuyikañesha.

Chatachikili Shikola yaMudimu waTeokalatiki mu 1943 natachikili kuhana jimpanji jawakashikola muchipompelu. Kufumba kwanfumbiluwu kwankwashili kwikala nhoshi wamuwahi.

Mu 1944, hampinji yadiña Njita Yakaayi Yamuchiyedi, anlejeli nawu niñili muwushidika. Nayili nakudimona nawa Fort Hayes muColumbus, Ohio, ampimini mujimba nawa nafwachikili yipapilu. Nalejeli mukulumpi wamashidika nami nukwikala wanyi mushidika. Nafuntili kwitala. Ilaña chimwahitili mafuku antesha, kapokola wenjili kwitala nakunleja nindi, “Corwin Robison, Nenzi nakukwata.”

Chimwahitili nyilungu yiyedi hinadiña mukoti, mukwakusompesha wahosheli nindi: “Neyi nadiña nañovu nadi kukusha mukaleya haya nyaaka. Wukuhoshahu neyidi?” Nakwili nami: “Añanji mwani, natela kwikala mukwakushimwina. Nashimwinaña antu ejima, nawa nashimwini nsañu yayiwahi yaWanta kudi antu amavulu.” Nsompeshi wumu walejeli akwawu nindi: “Tunenzi wanyi munu nakufuukula netu iwu muntu wekala mukwakushimwina hela nehi. Tunenzi nakukeña kwiluka neyi wetejeli kwiñila muwushidika hela nehi.” Chimwahitili kwakwihi naora yimu akwakusompesha ahosheli nawu anawani namuloña. Nsompeshi wanshili mukaleya hadi yaaka 5 muAshland, Kentucky.

Nashakamini mukaleya nyilungu yiyedi muColumbus, Ohio, nawa ifuku datachi nakamini mukapeka kanyanya. Nalombeli kudi Yehova nami: “nukutwesha wanyi kushakama mukaleya hadi yaaka 5. Neluki wanyi chinatela kwila.”

Chikwachili, akwakuhemba añidishili hanji. Nayili kudi kayili wadiña wataluka, dichi twemeni nakusumbila hawindu. Wañihwili nindi, “Anakukasilidi?” Nahosheli nami, “Nidi Chinsahu chaYehova.” Wahosheli nindi, “Mwalala? Hanu dinu anakukasilidi?” Nahosheli nami, “aYinsahu jaYehova ayaña wanyi kunjita nakujaha antu.” Wahosheli nindi, “Anakushi mukaleya muloña wajahaña wanyi antu. Ilaña ashaña antu amakwawu mukaleya muloña nawu ajahaña antu. Elaña chiwahi?” Nahosheli nami, “Inehi mwani.”

Kuhiñahu wahosheli nindi, “Nadiña nakutaña  nyikanda yenu hinadiña mukaleya kekwawu hadi yaaka 15.” Chinatiyili mazu amuchidiwu, nalombeli nami, “Yehova, nkwashi kulonda iwu iyala yekali kukabadi kami.” Hayina mpinji, iwu kayili wejina daPaul, wahosheli nindi: “Neyi wumu hakachi kanawa atuyili nakukwati nleji. Nukwiluka chakumwila.” Dichi hampinji yinadiña kuna, nadiña nakukala wanyi nawatuyili 50 adiñaku.

Chelili mukulumpi wamashidika yantwali mukaleya kamuAshland, nawaninumu amanakwami apama adiña mwenamuna. Ankwashili hamu nawakwetu kulonda tutwalekuhu kukundama kwakwihi naYehova. Atwinkeli kutañaña Bayibolu hamulungu hamulungu nawa twaloñesheleña malwihu niñakwilu yakuzatisha hakupompa kutwateneneña netu Bible Bees. Twadiña mukapeka keneni mwadiña tudidi kujimbañu. Kwadiña manakwetu wadiña nakutwinka maluña akushimwina. Wanlejeli nindi: “Robison, watela kushimwina Tudidi tudi neyi aka nikana. Muntu wejima wukushawu hanaka kadidi wudi mwiluña deyi. Watela kumushimwina henohu kanda ayi.” Dichi twadiña nakushimwina.

Njita Yakaayi Yamuchiyedi yamanini mu 1945, ilaña nadiña mukaleya nihampinji yamanini iyi njita. Nakameneni chisaka chami muloña aTata anlejeli nawu, “Neyi nitwesha kukulekesha kuya nakupompa awa amakwawu akwikala apela kuyilekesha.” Chinafumini mukaleya, nawanini yuma yayiwahi chikupu. Antu 7 amuchisaka adiña nakuya nakupompa nawa muhelami wumu wapapatisheweli hela chakwila ayikañesheleña kudi aTata.

Chiyatachikili Njita muKorea mu 1950, anlejeli kamuchiyedi nawu nikali mushidika. Anlejeli cheñi kuya nakudimona nawa Fort Hayes. Hanyima yakwiluka wuswa wunadiña nawu, kapokola wanlejeli nindi, “Yeyi wunazati chachiwahi nankashi mwizanvu denu.” Nahosheli nami, “Dimu, ilaña nukuya wanyi kuwushidika.” Nahosheli mazu ekala ha 2 Timotewu 2:3 nami, “Nadiloñeshi kwikala mushidika waKristu.” Hanyima yakumwena hadi mpinji yayilehi wahosheli nindi, “Yaña kweyi.”

Chihahitili mpinji, nayili kukubulakana kwawantu anakukeña kuya kuBeteli kwadiña hakupompa kwañinza muCincinnati, Ohio. Manakwetu Milton Henschel watulejeli nindi haBeteli adiña nakukeña amanakwetu akeñeleña kuzata chikupu mumudimu waWanta. Nasonekeli fomu  yakuya nakuzatila haBeteli nawa añitejeli. Natachikili kuzatila kuBrooklyn muAugust 1954, nawa nichidi kuzatila haBeteli.

Nadiña nanyidimu yayivulu yakuzata muBeteli. Hayaaka yayivulu, nadiña nakuzatisha ikina datenañawu nawu boiler mudipatimenti yakupulintila nyikanda, kuwahisha mutusanji, kuloñesha yikuñu nikuwahisha malooku. Nadiña nakuzatila cheñi kumaluña akupompela Kupompa Kwanyanya muNew York City.

Nakeña maprogilamu ekala haBeteli, adi neyi kudifukula kwachisaka kwantetemena niKudiza Kaposhi Kakutalila hamu neyi chisaka, kushilahu nikushimwina hamu nachipompelu. Neyi tutoñojokahu chikupu, yumiyi diyi yatela kwila Yisaka yejima yawaYinsahu jaYehova mpinji yejima. Chisaka chejima chikukundama kwakwihi naYehova neyi anvwali atalatalaña munsona hefuku hefuku hamu nawa nyanawu, ekalaña naKudifukula kwachisaka, kwakulañahu hakupompa nikwikala neyena mumudimu wakushimwina nsañu yayiwahi.

Nekali nawamabwambu amavulu haBeteli nimuchipompelu. Amakwawu adiña awayishewa nawa aya dehi mwiwulu. Amakwawu awayishewa wanyi. Ambuña aYehova ejima ekala awanina wanyi kushilahu tuhu niakaBeteli. Neyi nadihilishi namanakwami, nakeñaña kuleta kuwunda. Natoñojokaña mazu ekala haMatewu 5:23, 24 nichakumanisha iku kukala kwakubula kutiyashana. Chapela wanyi kuhosha nawu “Añanakenuku mwani,” ilaña kukala kwakuvulu akumanishilaña muniyi njila.

Chayinu mpinji nidi nakukala kwakushimwina kwitala nikwitala muloña wakukula, ilaña naleka wanyi. Nadizi chanti idimi daMandarin Chinese nawa nakudiluñisha kuhanjeka nawantu ahoshaña idimi daChinese. Mpinji yikwawu nantentemena nahanaña magazini 30 hela 40 kudi antu anamwekeshi mpwila.

Nekali nakufuntila muChina! Ifuku dimu, kansi wamumbanda wumu wamwemweteli iku nakuhita kungolofwana. Namumwemweteleli nawa namwinkeli Kaposhi Kakutalila niAwake! yamwidimi daChinese. Wayitambwili nawa wanlejeli nindi diyi Katie. Kufuma hayina mpinji, Katie neyi nanmoni wenjileña nakuhosha nanami. Namulejeli majina anyikabu muChizungu, nawa wadiña nakuyitena. Namulumbulwili cheñi nsona yamuBayibolu nawa watambwilili mukanda waChatañishaña Bayibolu. Chimwahitili nyilungu yantesha, walekeli kumwekana.

Chimwahitili tukweji, Nahanini magazini kudi kansi wamumbanda mukwawu wadiña nakuhita kwakulandishila nawa watambwili. Mulungu walondeleluhu, wanyinkeli foni yindi nakuhosha nindi, “Hoshenu namuntu wakuChina.” Nahosheli nami, “Nelukahu wanyi muntu wudi wejima muChina.” Ilaña wankakejeli, nawa natambwili foni nakuhosha nami, “Halo, yami Robison.” Muntu wunadiña nakuhosha nindi wahosheli nindi, “a Robby, yami Katie. Nafunti muChina.” Nahosheli nami, “muChina?” Katie wakwili nindi, “Eña. A Robby, muneluki kansi wamumbanda wayinka foni? Mwanyikami. Mwandizishili nsañu jajivulu jajiwahi. Mwani mudizishenu neyi chimwandizishili ami.” Nahosheli nami, “Katie, Nikuzata nañovu jami jejima. Kusakililaku hakunleja kuwudi chayinu mpinji.” Kuhiñahu, nahosheli namuhelindi kakukumishaku. Nakuhweleli nami kwejima kwaduwu awatwansi anakudiza jajivulu hadi Yehova.

Namukalakeli Yehova hadi yaaka 73, nawa nazañalali kwiluka nami nankwashi kubula kudiñija munsañu jamatuña nachiyuulu nikwikala washinshika mukaleya. Cheñi, anyiki jami anlejaña nawu akolesheweli hakumona chinomikili ikañesha dawaTata chakadi kuzeya. Nkumininaku, aMama niamanakwami niahela 6 apapatisheweli. Niyililu yawaTata yahimpili chanti, nawa adiña nakuya nakupompa henohu kanda afwi.

Neyi Nzambi neteji, antaña jami niamabwambu afwa akasañuka mwituña dadiha. Fwikijenu muzañalu wutwakatiya hakudifukula kudi Yehova hamu nawantu itwakeña. *—Talenu tumazu twaheshina.