1, 2. Jonatani wamwekesheli ñahi nindi washinshika kudi Davidi?

JONATANI watela watiyili kuwaha hakumona kuhamuka kwadiña nakansi Davidi. Davidi wajahili chikelamu cheyala Goliyati nawa waleteli “mutu wakaFwilistinu” kudi tata yaJonatani Mwanta Sawulu wawaIsarela. (1 Samweli 17:57) Jonatani welukili nindi Nzambi wadiña naDavidi, kufuma tuhu yina mpinji Jonatani naDavidi ekalili amabwambu chikupu. Adikanini nawu akutwalekahu kwikala ashinshika kudi wumu namukwawu. (1 Samweli 18:1-3) Jonatani wadiña washinshika kudi Davidi muchihandilu chindi chejima.

² Jonatani watwalekeluhu kwikala washinshika kudi Davidi hela chakwila Yehova watondeli Davidi kwikala mwanta wawaIsarela bayi yenaku. Chelili Sawulu yakeñi kujaha Davidi, Jonatani waneñeli. Welukili nindi Davidi wadiña muchinkalampata chaHoreshi, dichi wayili  nakumukolesha kulonda yatwalekuhu kushindamena hadi Yehova. Jonatani wamulejeli Davidi nindi: ‘Bayi wutiya womaku, muloña tata yami Sawulu hakakuwanaku, eyi wakekala mwanta wawaIsarela, ami nakakukuma munyima.’—1 Samweli 23:16, 17.

3. Chumanyi chalemesheliyi Jonatani kubadika kwikala washinshika kudi Davidi, nawa tweluka ñahi? (Talenu mwevulu wakutachikilahu.)

³ Twahamekaña antu ekala nakashinshi. Komana twahamekaña Jonatani muloña wadiña washinshika kudi Davidi? Inehi, kwikala washinshika kudi Nzambi dikwadiña kwalema muchihandilu chaJonatani. Dichaletesheli yekali washinshika kudi Davidi nikubula kumutiyila lwisu hela chakwila Davidi diyi wekalili mwanta bayi yena. Jonatani wamukwashili Davidi kushindamena hadi Yehova. Adiña ashinshika kudi wumu namukwawu nikudi Yehova. Atwalekeluhu kwila mwadikaninuwu nawu: “Yehova ekali mukachi ketu nanami naneyi nimukachi kawanyanetu niamami nieyeyi haya nyaka.”—1 Samweli 20:42.

4. (a) Chumanyi chikutuzañalesha? (b) Yumanyi yitukuhanjeka muchinu chibaaba?

⁴ Ninetu twatela kwikala ashinshika nachisaka chetu, amabwambu jetu niamanakwetu nawahela muchipompelu. (1 Atesalonika 2:10, 11) Ilaña twatela kwikala ashinshika chikupu kudi Yehova. Diyi watwinka wumi! (Chimwekeshu 4:11) Neyi twikala ashinshika kudi Yehova tukwikala namuzañalu. Tweluka netu twatela kwikala ashinshika kudi Nzambi nimumpinji yakala. Muchinu chibaaba, tukuhanjeka chakutalilahu chaJonatani chichikutukwasha kwikala ashinshika kudi Yehova munjila jiwana: (1) Chitwatela kwila neyi nlomboli nakulondela nshimbi wanyi, (2) muntu wutwatela kumwekeshela kashinshi, (3) neyi manakwetu natwili katama, ni (4) neyi chinakali kwila mutwakanini.

5. Muloñadi aIsarela chabuliluwu kwikala ashinshika kudi Nzambi hampinji yayulileñayi mwanta Sawulu?

⁵ Jonatani niantu amakwawu amuIsarela adiña mukukala. Mwanta Sawulu tata yaJonatani, walekeli kwovwahila nawa Yehova wamukaanini. (1 Samweli 15:17-23) Hela chochu, Nzambi wamwitejeli Sawulu kutwalekahu kuyuula hadi yaaka yayivulu. Dichi chayikalileña antu kwikala ashinshika kudi Nzambi chelili mwanta atondeluwu kushakama “hetanda daYehova” welileña yuma yatama.—1 Kushindulula 29:23.

6. Yumanyi yamwekeshaña nawu Jonatani watwalekeluhu kwikala washinshika kudi Yehova?

⁶ Jonatani watwalekeluhu kwikala washinshika kudi Yehova. Toñojokenu cheliliyi Jonatani chelili Sawulu yatachiki kubula kumwovwahila Nzambi. (1 Samweli 13:13, 14) Hayoyina mpinji, mukanka weneni wawamashidika 30,000 awaFwilistinu enjili namakalu nakulukuka aIsarela. Sawulu wadiña hohu nawamashidika 600, nawa yena naJonatani diwu adiña hohu nayitwa. Ilaña Jonatani watiyili woma wanyi. Wanukili mazu akaprofwetu Samweli  akwila nawu: “Yehova hakayishiya antu induku nanochu chatoha ijina dindi.” (1 Samweli 12:22) Jonatani walejeli mushidika wumu nindi: “Yehova kudi chuma chakumukañesha? Wukwamwina tuhu hela nawamavulu hela nawantesha.” Dichi yena nawamashidika alukukili aFwilistinu nawa ajahiluhu adi 20. Jonatani wakuhweleleli Yehova nawa Yehova wamukiswilili. Yehova waleteli mutentanshi dichi Afwilistinu atiyili mutentu. Dichi atachikili kudilukuka nikudijaha mulwawu nawa aIsarela ashindili.—1 Samweli 13:5, 15, 22; 14:1, 2, 6, 14, 15, 20.

7. Jonatani welileñadi kudi tata yindi?

⁷ Hela chakwila Sawulu watwalekeluhu kubula kumwovwahila Yehova, Jonatani wamwovwahilileña mpinji yejima. Chakutalilahu, wamukwashiluku kuzuña kulonda amwini antu jaYehova.—1 Samweli 31:1, 2.

8, 9. Tukumwekesha ñahi netu twashinshika kudi Nzambi neyi tulemesha anlomboli?

⁸ Kufwana Jonatani, tunateli kwovwahila Yehova kuhitila mukwovwahila nfulumendi yamwituña detu neyi chinatwesheki. Yehova weteja “mawanta” kutwiyula nawa wakeñaña nindi tuyilemesheña. (Tañenu Aroma 13:1, 2.) Dimuloña waweni wutwatelela  kulemeshela akulumpi janfulumendi hela chakwila ashinshika wanyi nawa hiyalondelaña nshimbuku. Twatela kulemesha antu ejima enkayi Yehova wuswa wakuyuula.—1 Akorinda 11:3; Aheberu 13:17.

⁹ Muhela Olga, wakuSouth America, wamwekesheli nindi wamwovwahila Yehova kuhitila mukwovwahila nfumwindi hela chakwila wamukabishileña.. ^[1] (Talenu mazu adi kunsa.) Mpinji yikwawu nfumwindi wahosheleña nindi wanyi muloña wakwikala Chinsahu chaYehova. Wamulejeli nindi wakamuseña nakusendaku hohu nyanindi. Ilaña Olga wafuntishili wanyi “chatama nakatama.” Welileña hohu yuma yayiwahi hamu neyi mumbanda wasumbuka. Wadiña nakumuloñeshela yakudya, kumukosela yakuvwala nikukwasha antaña jindi. (Aroma 12:17) Nawa neyi chinatwesheki wayileña nindi hamu nakuhempula antaña niamabwambu janfumwindi. Chakutalilahu, nfumwindi chayileñayi kuchidilu chawatata yindi, yena wamuloñesheleli yuma yejima yakeñekeleña. Hachipenji, wamuhembeleli nfumwindi hanji yachechi. Chimwahitili yaaka, nfumwa Olga walekeli kumukabisha muloña wadiña nakumwilila kakawahi nikumulemesha. Ichi nfumwindi wamukoleshaña kuya nikumutwala nakupompa. Mpinji yikwawu niyena wapompaña nindi hamu.—1 Petulu 3:1.

10. Jonatani welukili ñahi muntu wakwikalaku washinshika?

¹⁰ Chelili Sawulu yahoshi nindi nakukeña kujaha Davidi, Jonatani chamukalilili kwiluka chakwila. Wakeñeleña kwikala washinshika kudi tata yindi nikudi Davidi. Jonatani welukili nindi Nzambi wadiña naDavidi bayi naSawulu, dichi wafuukwiluhu kwikala washinshika kudi Davidi. Wamusoñamishili Davidi kuswama nawa wamulejeli Sawulu kubula kumujaha Davidi.—Tañenu 1 Samweli 19:1-6.

11, 12. Kumukeña Nzambi kwatukwashaña ñahi kwikala ashinshika kudi yena?

¹¹ Alice, muhela wakuAustralia, wateleli kutonda muntu wakumwekeshela kashinshi. Hampinji yadiña nakudizayi Bayibolu, walejeli chisaka chindi nsañu yadiña nakudizayi. Wayilejeli cheñi nindi wukuya wanyi nakwanakana Krisimansi hamu nawu nawa wayilumbulwilili chaletesheli yabuli kuya. Antaña jindi atiyili kutama. Atoñojokeli nawu Alice wayakamenaña wanyi. Dichi amama yindi ahosheli nawu anakukeña wanyi kumumona cheñi Alice. Alice wahosheli nindi: “Nahayamini nawa natiyili kutama chikupu muloña nakeñeli chisaka chami. Hela chochu, nafuukwiluhu nami natela kukeña chikupu Yehova niMwanindi nikupapatishewa hakupompa kwanyanya kunakwinza.”—Matewu 10:37.

¹² Twatela kwikala ashinshika chikupu kudi Yehova kubadika kwikala ashinshika kwiizanvu dayisela, kushikola hela kwituña. Chakutalilahu, Henry wadiluñishileña kuhema chesi  nawakwawu akashikola nawa wakeñeleña kuwinisha shikola yawu. Chineli wahemeneña chesi kunsa yamulungu, wadiña nampinji wanyi yakuya nakushimwina hela kuya nakupompa. Henry wahosheli nindi walemesheli nankashi kwikala washinshika kushikola kubadika kudi Nzambi. Dichi, walekeli kuhema chesi.—Matewu 6:33.

13. Kwikala washinshika kudi Nzambi kukutukwasha ñahi kuumika kukala kwamuchisaka?

¹³ Mpinji yikwawu chinateli kutukalila kwikala ashinshika kudi antaña jetu hampinji yoyimu. Chakutalilahu, Ken wahosheli nindi: “Mpinji yejima nakeñeleña kuya nakuhempula amama nikuyitambika kwinza nakushakama nanetu hakapinji kanti. Ilaña amama niñodami adiña nakutiyashana wanyi. Iku kwadiña kukala kweneni.” Ken watoñojokeli nsañu yahosha Bayibolu nawa wanukili nindi, watela kuzañalesha ñodindi nikwikala washinshika kudi yena. Wawanini njila yakuzañaleshelamu ñodindi. Dichi, wamulumbulwilili ñodindi chaletesheli yayakameneña amama yindi. Wayilumbulwilili cheñi amama yindi chaletesheli yalemeshi ñodindi.—Tañenu Kutachika 2:24; 1 Akorinda 13:4, 5.

14. Sawulu wamwilili ñahi Jonatani chatama?

¹⁴ Tunateli kwikala cheñi ashinshika  kudi Yehova neyi manakwetu wunakulombola natwili katama. Mwanta Sawulu amutondeli kudi Nzambi, ilaña wamwilili chatama mwanindi wakudivwalila. Welukili wanyi chaletesheli Jonatani yamukeñi Davidi. Dichi chelili Jonatani nindi yamukwashi Davidi, Sawulu watiyili kutama nawa wamutiyishili mwanindi nsonyi hakachi kawantu. Ilaña Jonatani watwalekeluhu kumulemesha tata yindi. Hampinji yoyimu, wekalili washinshika kudi Yehova nikudi Davidi atondeluwu kudi Nzambi kwikala mwanta wawaIsarela.—1 Samweli 20:30-41.

15. Neyi anatwili katama, twatela kwiladi?

¹⁵ Muyipompelu yetu makonu, amanakwetu anakulombola azataña nañovu hakwila ekali chiwahi kudi ejima. Ilaña awa amanakwetu awanina wanyi. Chineli awanina wanyi, chinateli kuyikalila kwiluka chinaleteshi twili yuma yituneli. (1 Samweli 1:13-17) Dichi neyi atwila katama, twatela kwikala ashinshika kudi Yehova.

16. Mpinjinyi yitwatela kwikala ashinshika kudi Nzambi?

¹⁶ Sawulu wakeñeleña Jonatani kwikala mwanta bayi Davidiku. (1 Samweli 20:31) Ilaña Jonatani wakeñeli Yehova nawa wadiña washinshika kudiyena. Jonatani wamutiyilili wanyi Davidi ichima, wekalili ibwambu dindi nawa wahembeli mwadikaninuwu. Muntu wejima wamukeña Yehova nawa washinshika “welaña chakusanyikayi hela chakudibonda kubalumunamu nawa cheñi nehi.” (Masamu 15:4) Chineli twashinshika kudi Nzambi, tukwilaña mutwakanini. Chakutalilahu, neyi tutiyañana kwila chuma namuntu, twatela kwila kwesekeja nachitwadikanini hela yuma yinakali ñahi. Nawa neyi tukweti kukala mumaluwi, tukumwekesha kukeña kudi Yehova neyi twikala ashinshika kudi anfumwetu hela añodetu.—Tañenu Malaki 2:13-16.

17. Achinu chibaaba chinayikwashi ñahi?

¹⁷ Twatela kwimbujola Jonatani kuhitila mukwikala ashinshika kudi Nzambi nimumpinji yakala. Dichi tutwalekuhu kwikala ashinshika kudi amanakwetu niahela neyi anatuneñeshi. Neyi twila mwenimu tukumuzañalesha Yehova ninetu aweni. (Yishimu 27:11) Tweluka chikupu netu wukutwililaña yuma yayiwahi nikutwakamena. Muchibaaba chinalondeluhu, tukahanjeka yuma yitunateli kudizila kudi antu ashinshika niabula kushinshika amumafuku aDavidi.