ANUKENU ifuku dimwazañaleli chikupu. Hifuku dimwasumbwili tahindi dimwavwalili mwana watachi? Indi kwiji ifuku dimwapapatisheweli? Odu ifuku dalema nawa dayizañalesheli chikupu. Nawa hanodu ifuku, amanakwenu niahela amweni chikupu nawu mwamukeña Nzambi namuchima, nawumi, namaana ninañovu jenu jejima!—Maku 12:30.

Chakadi nikujina, mwazañalalaña chikupu hakumuzatila Yehova kufuma tuhu himwapapatisheweli. Hela chochu, akwakushimwina amavulu anakañanyi kutwalekahu kwikala namuzañalu wuyadiñawu nawu hatachi. Muloñadi chakañenyañawu kutwalekahu kwikala namuzañalu? Muloñadi chitwatelela kutwalekahu kumukalakela Yehova namuzañalu?

Nsañu yaWanta yatuletelaña muzañalu chikupu. Muloñadi? Muloña Yehova washiika nindi Wanta keña wufumishuhu kaayi katama nakuleta ituña dadiha daNzambi. Zefwaniya 1:14 yatulejaña nawu: “Ifuku daYehova deneni didi kwakwihi, didi kwakwihi, didi nakunyakala nankashi.” Ilaña neyi tutoñojokaña netu didi kwakulehi, tunateli kujimbesha muzañalu wutwadiña nawu hatachi. Chumichi chinateli kutufuntisha hanyima mumudimu waNzambi.—Yishimu 13:12.

Neyi twikalaña nampinji yakuhanjeka nawamanakwetu niahela, tukukoleshewa nawa tukutwalekahu kukalakela Yehova namuzañalu. Yililu yayiwahi yawantu jaYehova yatuletesheli kwiluka kudifukula kwalala nikutukwasha kutachika kumukalakela Yehova namuzañalu. (1 Petulu 2:12) Chumanyi chinateli kumwekana neyi manakwetu hela muhela anamuhañi muchipompelu muloña wakubula kwovwahila nshimbi jaNzambi? Chumichi chinateli kuneñesha amakwawu muchipompelu nawa anateli kujimbesha muzañalu wawu.

Maheta niwena anateli kujimbesha muzañalu wetu. Munjilanyi? Antu amukanu kaayi akakeñaña nawu tulandeña yuma yitunabuli kukeña. Dichi twatela kwanuka mazu aYesu akwila nawu: “Kwosi muntu natweshi kukalakela anyanta ayeduku; chiña yohelahu wumu, akeñahu mukwawu; hela yokakelahu wumu, mukwawu amudiwula. Himukutwesha kukalakela niNzambi nimahetaku.” (Matewu 6:24) Tunateli wanyi kumukalakela Yehova namuzañalu iku tunakufwila kwikala namaheta amukaayi.

Antu amukeña Yehova amukalakelaña namuchima wumu. (1 Yowanu 5:3) Anukenu nenu  Yesu wahosheli nindi: “Inzenu kudami enu ejima mudi nakukabakana, mwasenda yalema, ami nukuyinookesha. Ditwikenu mpanda yami, mudizili kudami muloña ami nawunda, nadizoza mumuchima, ninenu mukumona kunooka munyichima yenu. Muloña mpanda yami yaswayi, nichisenda chami chapepela.” (Matewu 11:28-30) Kwikala akwaKristu alala kwakuwahi nawa kwatuletelaña muzañalu. Mwamweni wejima wetu twatela kwikala namuzañalu mumudimu waYehova. Tushinshikenu hayuma yisatu.—Habakuki 3:18.

Twamukalakelaña Nzambi wamuzañalu, Watwinka Wumi. (Yililu 17:28; 1 Timotewu 1:11) Chineli tweluka netu hiNleñi yetu. Dichi tutwalekenuhu kumukalakela namuzañalu, hichidi namuloña nayaaka yinahituhu kufuma hitwapapatisheweluku.

Toñojokenu hadi aHéctor, akalakeleli Yehova neyi nkoñi wendaña hadi yaaka 40. ‘Nimuwushinakaji’ atwalekeluhu kumukalakela Yehova namuzañalu. (Masamu 92:12-14) A Héctor atwalekeluhu kwikala namuzañalu hela chakwila añodawu akatili. Ahosheli nawu: “Hela chakwila yikatu yañodami yadiña nakuswejelaku nawa chankalilili kumwakamena, chumichi chankañesheli wanyi kumukalakela Nzambi namuzañalu. Kwiluka nami anyinka wumi kudi Yehova, waleñeli muntu nankeñelu, chaleteshaña nimukeñi chikupu nikumukalakela namuchima wejima. Nesekaña nañovu jami jejima kuzata mumudimu wakushimwina nawa natoñojokaña hankisu yikaleta Wanta hakwila nitwalekuhu kwikala namuzañalu.”

Yehova waloñesha mulambu wefutu danyiloña, watukwashaña kwikala namuzañalu. Mwamweni, “chaswejeliyi Nzambi kukeña mpata yamunu mwishina, waheni Mwanindi wumu hohu, kulonda muntu wukumukuhwelela aheti wumi wahaya nyaka, akabuli kunoña.” (Yowanu 3:16) Nshidi jetu anateli kujanakena nawa tukwikala nawumi wahaya nyaka neyi tukuhwelela muchawaana chaNzambi chefutu danyiloña. Iwu diwu muloña waweni wutwatela kwikalila namuzañalu. Nawa kusakilila kwetu hefutu danyiloña kukutukwasha kumukalakela Yehova namuzañalu.

Manakwetu Jesús washakamineña muMexico, wahosheli nindi: “Nadiña neyi nduñu namudimu wami, mpinji yikwawu nazatileña mukulondashana hela chakwila chetejewa wanyi. Nelileña mwenimu muloña nakeñeleña kwikala namali  amavulu. Kuhiñahu namwilukili Yehova nichaheniyi Mwanindi akeñayi kulonda yakuuli antu. Nafwilili kumukalakela chikupu. Dichi napapatisheweli nawa hanyima yakuzata kukampani hadi yaaka 28, nalekeli mudimu nakutachika mudimu wampinji yejima.” Dichatachikiluwu aJesús kuzatila Yehova namuzañalu.”

Kwikala nayililu yakadi majilu, kwatuletelaña muzañalu. Munakwanuka chadiña chihandilu chenu henohu kanda mumwiluki Yehova? Kapostolu Pawulu walejeli akwaKristu amuRoma nindi “mwadiña anduñu janshidi” ilaña ayilisha kwikala “anduñu jakuloña.” Chineli adiña nayililu yayiwahi, adiña nakutalila wumi waha nyaaka. (Aroma 6:17-22) Anetu nawa twalondelaña nshimbi jaYehova, dichi twasubuka kuyuma yatama yafumaña muyililu yamajilu hela muwubanji. Chumichi chatuzañaleshaña!

Shinshikenu aJaime, akuhweleleli nawu Nzambi wekalaku wanyi, yuma yadileñeli yayeni nawa adiña muyisela yakuzuña. A Jaime atachikili kuya kukupompa kwawakwaKristu nawa atiyili kuwaha namuzañalu wamwenuwu. Hakwila aleki yililu yawu yadiñawu nayu, aJaime alombeli kudi Yehova kulonda yayikwashi. A Jaime ahosheli nawu, “Natachikili kwiluka chovu chovu Tata wukweti kukeña nawa Nzambi waluwi. Kuhemba nshimbi jaYehova jaloña kunankwashi chikupu. Neyi nahimpili wanyi nadi kufwa, neyi chafwileñawu akwetu inadiña nawu muyisela yakuzuña. Yaaka yinadiluñishi muchihandilu chami yoyakumukalakela Yehova.”

Twatela kutiya ñahi hampinji yitunakuhembelela kukuma kwakanu kaayi katama? Anukenu nenu, tunakwila nkeñelu yaNzambi nawa tunakutalila wumi wahaya nyaaka. “Bayi tuzeyaña nakwila mwamuwahuku, muloña twakadya hachilaaka chakudya, neyi tunabuli kuzeya.” (Aŋalija 6:8, 9) Nawukwashu waYehova, tuumikenu, tuzatenu nañovu kulonda twikali nayililu yikatukwasha kupuluka “lukadi lwasweja,” nikutwalekahu kukalakela Yehova namuzañalu.—Chimwekeshu 7:9, 13, 14; Yakoba 1:2-4.

Tunateli kukuhwelela chikupu netu Yehova wakatukiswila neyi tuumika, muloña weluka mudimu wutwazataña nikukeña kutwamumwekeshelaña. Neyi tutwalekahu kumukalakela Yehova namuzañalu, tukufwana ñimbi yamasamu Davidi wahosheli nindi: “Namushi Yehova kumesu ami mafuku ejima. Chadiyi yena kuchikasa chami chachidiilu hijikunkumaku. Dichi chiwunazañalali muchima wami, nikulema kwami hikukutiya kuwaha; nimujimba wami hiwukushakama nakudiwunjika zo-o.”—Masamu 16:8, 9.