1-3. Yumanyi yamwekeni yaletesheli Pentekosta kwikala ifuku dadimena, nawa iyi yuma yashikijili ñahi chashimwineñahu dehi Nsona? (Talenu mwevulu wakutachikilahu.)

HADIÑA Hamulungu nantetemena muYerusalema. Idi dadiña ifuku dadimena nawa dakuzañalala. Antu adiña nakwanakana Pentekosta, chawija chajila chakwanakana mpinji yakutachika kumuna tidiku. Hanidi ifuku nantetemena mutembeli, kapristu muneni walambwili nyilambu yampinji yejima. Kuhiñahu, chiyashikili kuma 9 koloku, walambwili mankendi eluñi atuñiliwu natidiku hela nanyikabu yatachi kumuna. Kapristu muneni wahitañeshelumu mankendi nakuyihana kudi Yehova. Chumichi chamwekeni haPentekosta 33 B.C.E.—Alevi 23:15-20.

² Hachaaka hachaaka, hayaaka yayivulu yahitiluhu, kapristu muneni wahanineña iwu mulambu wakunyinkesha. Mulambu watela wemeneneñaku chuma chalema chamwekeni haPentekosta 33 C.E. Nawa chamwekeni kudi atumbanji  twaYesu 120 adiñi nakulomba mukapeka kahewulu muYerusalema. (Yililu 1:13-15) Kaprofwetu Yoweli wasonekeli haniyi yuma yamwekeni henohu kunashali yaaka 800. (Yoweli 2:28-32; Yililu 2:16-21) Yumanyi yalema yamwekeni?

³ Tañenu Yililu 2:2-4. Ha Pentekosta 33 C.E, Nzambi wechilili spiritu yindi yajila hadi ana akwaKristu nawa awayisheweli. (Yililu 1:8) Kufumahu, izaza denjili nakuyiwuña nawa atumbanji atachikili kuhosha yuma yayiwahi yamwenuwu nikutiya. Kapostolu Petulu walumbulwili yuma yamwekeni nikulema kwayu. Kuhiñahu, walejeli izaza nindi: ‘Balumukenu munyichima yenu, ayipapatishi wejima wenu mwijina daYesu Kristu, kulonda kuyanakena nyiloña yenu; mutambuli chamukunkulu chaspiritu yajila.’ Hanidi ifuku, antu akushika ku 3,000 ayipapatishili nawa atambwilili spiritu yajila.—Yililu 2:37, 38, 41.

4. (a) Muloñadi wutwatela kwilukila yuma yamwekeni haPentekosta? (b) Yumanyi yikwawu yalema yateleleli kumwekana haPentekosta 33 B.C.E.? (Talenu mazu adi kunsa.)

⁴ Kapristu muneni nimulambu walambwileñayi haPentekosta wemeneneñaku kwodi? Kapristu muneni wemeneneñaku Yesu. Mankendi emeneneñaku atumbanji twaYesu awayishewa. Ana atumbanji ayitonda kufuma hakachi kawantu abula kuwanina emenañaku “nyikabu yatachi.” (Yakoba 1:18) Nzambi nayiteji kwikala anyanindi nawa nayitondi kuyuula neyi anyanta hamu naYesu mwiwulu muWanta waNzambi. (1 Petulu 2:9) Yehova wakazatisha Wanta windi kukiswila antu ejima amwovwahilaña. Ifuku daPentekosta 33 dalema kudetu chili twakashakamaña mwiwulu naYesu hela muparadisa hamaseki. ^[1] —Talenu mazu adi kunsa.

5. Tuneluki ñahi netu awayishewa ejima ayiwayishaña wanyi munjila yoyimu?

⁵ Atumbanji adiña mukapeka kahewulu akajimbala wanyi idi ifuku. Wejima wawu adiña namuzuzu wudi neyi kesi hanyitu. Yehova wayinkeli wuswa wakuhosha madimi ashiyashana. Ajinokeli wanyi nawu anayiwayishi naspiritu yajila. (Yililu 2:6-12) Ilaña ichi chihayamisha chayimwekenaña wanyi akwaKristu neyi anayiwayishi makonu. Chakutalilahu, Bayibolu yahosha wanyi nawu antu awayishiluwu ifuku dalondeleluhu muYerusalema adiña namuzuzu wudi neyi kesi. Ayiwayishili hampinji yayipapatishiluwu. (Yililu 2:38) Cheñi, bayi neyi akwaKristu ejima ayiwayishaña hampinji yinayipapatishiwuku. A Samariya ayiwayishili hanyima yakuyipapatisha. (Yililu 8:14-17) Kwambukaku, Konelisu niantu amwitala dindi wena ayiwayishili henohu kanda apapatishewi.—Yililu 10:44-48.

6. Awayishewa ejima atambwilañadi, nawa yayikwashaña kwilukadi?

⁶ Mwamweni, akwaKristu elukaña munjila jashiyashana nawu anayiwayishi. Amakwawu ashikeneni dakwiluka hohenohu nawu Yehova nayiwayishi. Amakwawu elukili henohu munahiti dehi mpinji. Ilaña Pawulu walumbulwili chuma chayimwekenaña wejima wawu. Wahosheli nindi: ‘Himwamwitiyili yena, ayifundili nawa naSpiritu yajila yakukana. Spiritu dichijikilu chawuswana  wetu.’ (Aefwesesa 1:13, 14) Dichi, Yehova wazatishaña spiritu yindi yajila hakuyimwekeshela hatooka chikupu awa akwaKristu nindi nayitondi kuya mwiwulu. Muniyi njila, spiritu yajila ‘dichijikilu’ chakumwekesha nawu kumbidi akashakama mwiwulu bayi hamasekuku.—Tañenu 2 Akorinda 1:21, 22; 5:5.

7. AkwaKristu awayishewa ejima atela kwiladi hakwila akatambwili wuloku wawu mwiwulu?

⁷ Neyi mukwaKristu anamuwayishi, komana chinayi mukwila nawu wakatambula wuloku windi? Inehi. Neluki chikupu nindi anamutondi kuya mwiwulu. Ilaña nateli kutambwila wuloku windi neyi yatwalekahu kwikala washinshika kudi Yehova. Petulu walumbulwili muniyi njila, nindi: “Dichi enu ana kwetu, dikwatishenu nakukolesha kutambika kwayitambikiluwu, nikutonda kwayitondeluwu; muloña neyi mukwila yumiyi himwamba kadimbukaku. Neyi mukwila mwenimu akayenzulwila muwiñililu wakwiñila chachiwahi muWanta wahaya nyaka, waMwanta wetu yowu Chamwinu Yesu Kristu.” (2 Petulu 1:10, 11) Dichi mukwaKristu wawayishewa wejima bayi eteja chuma chidi chejima chimukañeshi kukalakela Yehovaku. Hela chakwila amutambika kuya mwiwulu, neyi yabula kushinshika, hanateli kutambwila wuloku winduku.—Aheberu 3:1; Chimwekeshu 2:10.

8, 9. (a) Muloñadi chichayikalilaña antu amavulu kwiluka chatiyañayi muntu anawayishuwu? (b) Muntu welukaña ñahi nindi anamutondi kuya mwiwulu?

⁸ Ambuña aNzambi amavulu makonu chayikalilaña kwiluka chatiyañayi muntu neyi anamuwayishi kudi Nzambi. Kutoñojoka muniyi njila kwatama wanyi muloña wena awayishewa wanyi. Nzambi waleñeli antu nindi akashakameña hamaseki haya nyaka, bayi mwiwuluku. (Kutachika 1:28; Masamu 37:29) Ilaña Yehova watonda antu amakwawu kwikala anyanta niatupristu mwiwulu. Dichi neyi anayiwayishi, yuma yachiñejeleñawu niyatoñojokeleñawu yahimpaña, kulonda adiloñeshi kutambwila wumi wamwiwulu.—Tañenu Aefwesesa 1:18.

⁹ Hanu dinu muntu welukaña ñahi nindi anamutondi kuya mwiwulu? Talenu yuma yahosheliyi Pawulu hadi amanakwindi awayishewa amuRoma, ‘atambikiluwu kwikala akwakujila.’ Wayilejeli nindi: ‘Himwatambwili spiritu yawuduñu mwaka mutiyi cheñi womaku; mwatambwili spiritu yakwikala anyana, yitwatambikaña nachu netu, Aba, Tata! Spiritu yayeni yashimunaña wunsahu hamu naspiritu yetu, nawu tuyanyana kaNzambi.’ (Aroma 1:7; 8:15, 16) Kuzatisha spiritu yindi yajila, Nzambi wamwekeshelaña muntu hatooka nindi namutondi  kuyuula neyi mwanta mwiwulu hamu naYesu.—1 Atesalonika 2:12.

10. Indi mukanda wa 1 Yowanu 2:27 watalishaña mudihi chiwahosha nawu mukwaKristu wawayishewa wakeñekaña wanyi muntu wakumuleja?

¹⁰ Antu atambikañawu kudi Nzambi akeñekaña wanyi muntu wakuyileja nawu anayiwayishi. Yehova wayimwekeshelaña hatooka nindi nayitondi. Kapostolu Yowanu walejeli akwaKristu awayishewa nindi: ‘Enu awayishawu dehi kudi wajila, mweluka dehi yuma yejima.’ Wayilejeli cheñi nindi: “Kuwaya kwayiwayishiluwu kudi yena kwekala mudenu; himunabuli wakuyilejaku. Chela kuwaya kwayiwayishiluwu kudi yena kwayilejaña mwaya yuma yejima, kwalala, hikwatwambañaku, shakamenu mudi yena mwomwayilejeli kuwaya.” (1 Yowanu 2:20, 27) AkwaKristu awayishewa atela kuyidizisha kudi Yehova neyi chadizishañayi ejima. Ilaña akeñekaña wanyi muntu wakuyileja nindi awayishewa. Yehova wazatishaña ñovu yindi yazatikaña, spiritu yajila, hakuyimwekeshela hatooka to-o nindi nayiwayishi!

11, 12. MukwaKristu wawayishewa nateli kutoñojokadi, ilaña chumanyi chabulañayi kujinoka?

¹¹ Neyi akwaKristu anayiwayishi naspiritu yajila, ahimpaña chikupu. Yesu wahosheli nindi “avwalika chachiha.” (Yowanu 3:3, 5.) Walumbulwili nindi: “Bayi wuhayama chinakwili nami chiña muvwalika chachihaku. Mpepela yakunkaña kwokuyinakeñi kuya kwoku, eyi watiyaña chiyikuvuma, ilaña kwiluka kuyikufuma, hela kuyikuya nehi, dichi chaduwu ejima akuvwalika kudi spiritu.” (Yowanu 3:7, 8) Kuhosha hohu chalala, chakala kulumbulula chichatiyakanaña neyi muntu anamuwayishi. ^[2]—Talenu mazu adi kunsa.

¹² Muntu wawayishewa nateli kutoñojoka nindi, ‘Muloñadi Yehova chantondeliyi ami chatela yatondi wacheñi?’ Hadaha nateli kudijinooka neyi nashikilumu kutondewa. Wajinokaña wanyi nindi Yehova namutondi. Ilaña, watiyaña kuwaha nawa wasakililaña hanichi chawaana. Awayishewa atiyaña neyi chatiyiliyi Petulu wahosheli nindi: “Amukiswili Nzambi yaMwanta wetu Yesu Kristu, yowu Tata yindi watuvweli chachiha tukwati kukuchiñeja kwakuumi nakusañuka kwaYesu Kristu mudi afu, mwaya luwi lwindi lwasweja. Watuvweleli niwuswana wakatokaña, wakadi kujilola, wabulaña kujimuka, wanayiswekeluwu enu mwiwulu.” (1 Petulu 1:3, 4) Neyi awayishewa ataña awa mazu, chakadi nikujina elukaña nawu Tata yawu nakuhosha nawena.

13. Muntu wahimpaña ñahi yitoñojoka neyi anamuwayishi naspiritu yajila, nawa chumanyi chaleteshaña yahimpi?

¹³ Henohu Yehova kanda yatondi awa akwaKristu kuya mwiwulu, adiña nachikuhwelelu  chakushakama hamaseki haya nyaka. Atalileña mpinji yakelishayi Yehova iseki kwikala paradisa nikufumishahu kutama kwejima. Hadaha afwikijileña chiyakatambwilaña antaña jawu hela amabwambu afwili. Adiña nakutalila mpinji yakatuñawu matala nikushakamamu hela kutumba nyitondu nakuda nyikambu yachu. (Isaya 65:21-23) Muloñadi chahimpilañawu yitoñojoka yawu? Ahimpili muloña wakwila aneñeleña hela kukabakana nankashi? Komana afuukwili hohu nawu kushakama haya nyaka hamaseki kukaletaña wuudi nawa hiyakekalaña namuzañaluku? Tahindi akeñeleña kwiluka chichatiyakanaña kushakama mwiwulu? Inehi. Nzambi diyi wayifuukwilili. Chayitambikiliyi, wazatishili spiritu yajila kuhimpa chatoñojokeleñawu niwuloku watalilileñawu.

14. Awayishewa atiyaña ñahi kushakama hamaseki?

¹⁴ Komana chinayi mukwila nawu awayishewa akeñaña kufwa swayi? Pawulu walumbulwili chatiyañawu awayishewa. Wesekejeli nyijimba yawu ‘netenti,’ nindi: “Muloña chalala etu tudi mwitenti idi twaabaña, twatiyaña kulema; hitunakeñi netu akatuvuuluku, ilaña netu akatuvwiki, kulonda ichi chanoñaña akachiminyi kudi wumi.” (2 Akorinda 5:4) Awa akwaKristu akeñaña wanyi kufwa. Atiyaña kuwaha kuhanda nawa akeñaña kuzata mafuku ejima kumukalakela Yehova hamu nachisaka niamabwambu jawu. Hichikweti muloña nayuma yinakwilawuku, anukaña nawu Nzambi wayikana yuma yayiwahi kumbidi.—1 Akorinda 15:53; 2 Petulu 1:4; 1 Yowanu 3:2, 3; Chimwekeshu 20:6.

15. Yumanyi yabulaña kumwekesha nawu muntu anamuwayishi naspiritu yajila?

¹⁵ Hadaha munakujinoka neyi Yehova wayitambika kuya mwiwulu. Neyi munakutiya nenu nayitondi, toñojokenu hanawa malwihu alema: Komana mwazataña neyena mumudimu wakushimwina? Komana mwatiyishaña yuma yimwadizaña muBayibolu nikwiluka “yuma yaNzambi yayeni yakunama”? (1 Akorinda 2:10) Komana mwatiyaña nenu Yehova nayikwashi kuleta antu amavulu muchalala? Mwakeñaña kwila yuma yakeñañayi Yehova kubadika yuma yejima? Komana mwakeña amanakwenu chikupu nawa mwakeñaña kuyikwasha kumukalakela Yehova? Komana munamoni chikupu nenu Yehova nayikwashi munjila jashiyashana muwumi wenu? Neyi ñakwilu yenu yidi nawu eña kunawa malwihu, komana chinayi mukwila nawu anayitondi kuya mwiwulu? Inehi. Muloñadi? Muloña antu jaNzambi ejima atiyaña chochimu, chili awayishewa hela nehi. Nawa Yehova wazatishaña spiritu yindi yajila kwinka ambuñindi ejima ñovu yoyimu, hichikweti muloña nawuloku wakatambwilawuku. Neyi munakujinoka neyi mwakaya mwiwulu hela nehi, dikwila nawu ayitonda wanyi. Antu atondawu kudi Yehova ajinokaña wanyi! Elukaña chikupu!

16. Tuneluki ñahi netu antu ejima atambwila spiritu yaNzambi ayitonda kuya mwiwulu wanyi?

¹⁶ MuBayibolu mwekala yakutalilahu yawantu amavulu adiña nachikuhwelelu  atambwilili spiritu yajila yaYehova ilaña ayili wanyi mwiwulu. Chakutalilahu, Yowanu mpapatishu. Yesu wahosheli nindi kwosi muntu wabadika Yowanu, ilaña wahosheli cheñi nindi Yowanu wakayuula wanyi neyi mwanta mwiwulu. (Matewu 11:10, 11) Davidi niyena amulombweli naspiritu yajila. (1 Samweli 16:13) Spiritu yajila yamukwashili kwiluka yuma yakunama hadi Yehova nawa yamukwashili kusoneka nyikanda yikwawu muBayibolu. (Maku 12:36) Hela chochu, kapostolu Petulu wahosheli nindi Davidi “hakandamini mumawuluku.” (Yililu 2:34) Yehova wazatishili spiritu yindi yajila kulonda yiyikwashi kukoña yihayamisha, ilaña hazatishili spiritu yindi kuyitonda kuya mwiwuluku. Komana chinayi mukwila nawu adiña ashinshika wanyi hela hiyashikililumu wanyi kwikala anyuuli mwiwulu? Inehi. Yehova wakayisañula nakushakama muParadisa hamaseki.—Yowanu 5:28, 29; Yililu 24:15.

17, 18. (a) Wulokwinyi watalilañawu ambuña aNzambi makonu? (b) Malwihwinyi itukuhanjeka muchibaba chinalondeluhu?

¹⁷ Ambuña aNzambi amavulu makonu akaya wanyi mwiwulu. Antu adi neyi Abarahama, Davidi, Yowanu Mpapatishu, niamayala nawambanda akunyima, atalilaña kushakama hamaseki hampinji yakayiyuulañawu kudi Wanta waNzambi. (Aheberu 11:10) Antu akayuula naYesu mwiwulu akekala 144,000. Nawa Bayibolu yahosha hadi ‘ashalahu’ atondewa achidi hamaseki munanu mafuku akukuminina. (Chimwekeshu 12:17) Dichi a 144,000 amavulu afwa dehi nawa adi mwiwulu.

¹⁸ Antu akweti kuchiñeja kwakushakama hamaseki atela kumona ñahi muntu wawayishewa? Neyi muntu wamuchipompelu chenu yatachika kuda kudinkendi nikunwa kuvinyu haChanukishu, mwatela kumumona ñahi? Indi neyi naambala yawantu awayishewa yinakuvulilaku, mukwila ñahi? Komana mwatela kwakamena? Twakakula awa malwihu muchibaba chinalondeluhu.