1, 2. (a) ‘Chamukunkulu chaNzambi chakañanya kushimunewa’ mwabombeladi? (b) Malwihwinyi itukuhanjekahu muchinu chibaaba?

YEHOVA watwinka chawaana chabadika hakutemesha Mwanindi wumu hohu hamaseki, Yesu. (Yowanu 3:16; 1 Yowanu 4:9, 10) Kapostolu Pawulu wateneni ichi chawaana nindi ‘chamukunkulu chakañanya kushimunewa.’ (2 Akorinda 9:15) Pawulu wahoshelelidi awa mazu?

² Pawulu welukili nindi yikaninu yaNzambi yejima yakashikijewa kuhitila mumulambu waYesu. (Tañenu 2 Akorinda 1:20.) Ichi chinayi mukwila nawu ‘chamukunkulu chaNzambi chakañanya kushimunewa’ chabombelamu mulambu waYesu, yuma yayiwahi nikukeña kwalala kwatumwekeshelañayi Yehova. Ichi chawaana chalema chakala kuchilumbulula munjila yitunateli kutiya. Twatela kutiya ñahi nanichi chamukunkulu chalema? Nawa chatela kutusañumuna kwiladi hampinji yitunakudiloñesha kuya  kuChanukishu chakufwa kwaKristu chakekalaku haChisatu, March 23, 2016?

3, 4. (a) Mwatiyaña ñahi neyi muntu yayinka chawaana? (b) Chawaana chalema chinateli kuhimpa ñahi chihandilu chenu?

³ Twatiyaña kuwaha neyi muntu yatwinka chawaana. Ilaña yawaana yikwawu yalema nankashi chakwila yinateli kuhimpa chihandilu chetu. Chakutalilahu, twili netu mudi namuloña. Nawa anayileji nawu mwatela kufwa. Ilaña kukashimuka, muntu wumwabula kwiluka yahosha nindi wukuyikwasha. Nadihani kuyifwila! Munateli kutiya ñahi nachuma chamuchidiwu?

⁴ Neyi muntu yayilila chuma chamuchidiwu, chikuyiletesha kuhimpa chihandilu chenu. Chakadi nikujina, ninenu mukwikala nachisambu nikukeña nawa mukwanakenaña antu ayilaña katama. Mukusakililaña mpinji yejima hachuma chinayililuwu.

5. Chawaana chefutu danyiloña chabadika ñahi yawaana yejima?

⁵ Chawaana chahanayi Nzambi chefutu danyiloña chabadika chawaana chitunateni muchakutalilahu. (1 Petulu 3:18) Toñojokenu hachumichi: Wejima wetu twaswana nshidi kufuma kudi Adama, nawa wufwetu wanshidi hikufwa. (Aroma 5:12) Kukeña kwamusañumwini Yehova kutuma Yesu hamaseki nakufwila antu ejima, ‘kutompela antu ejima kufwa.’ (Aheberu 2:9) Nawa mulambu waYesu wakakoña yuma yayivulu. Wakafumishahu kufwa haya nyaka. (Isaya 25:7, 8; 1 Akorinda 15:22, 26) Antu ejima akumukuhwelela Yesu akekala mukuwunda nawa akazañalala haya nyaka, chili akayuula neyi anyanta naKristu mwiwulu hela neyi antu akayuulawu hamaseki kudi Wanta waNzambi. (Aroma 6:23; Chimwekeshu 5:9, 10) Nkiswinyi yikwawu yabombela muchawaana chaYehova?

6. (a) Nkiswinyi yaYehova yimunakukeña kumona? (b) Tenenu yuma yisatu yikutusañumunawu kwila kudi chawaana chaNzambi.

⁶ Chawaana chaNzambi chikaleta paradisa hamaseki, kuuka akata nikusañula afu. (Isaya 33:24; 35:5, 6; Yowanu 5:28, 29) Twamusakililaña Yehova nimwanindi Yesu hakutwinka ‘chamukunkulu chakañanya kushimunewa.’ Ichi chawaana chikutusañumuna kwiladi? Chikutusañumuna (1) kumwimbujola Kristu Yesu chikupu, (2) kukeña amanakwetu ni (3) kwanakena akwetu chakufuma hamuchima.

7, 8. Tunateli kumona ñahi kukeña kwaKristu, nawa kunateli kutusañumuna kwiladi?

⁷ Chatachi, twatela kuzatisha wumi wetu kulonda tumulemeshi Yesu. Kapostolu Pawulu wahosheli nindi: ‘Kukeña kwaKristu kwatusañumunaña.’ (Tañenu 2 Akorinda 5:14, 15.) Pawulu welukili nindi neyi twiteja kukeña kwaYesu kwabadika, kukutusañumuna kukeña nikumulemesha Yesu. Neyi twiluka yuma yinatwililiyi Yehova, kukeña kwindi kukutusañumuna kwila yuma yikumwekesha nawu twalemesha Yesu. Kukeña kwindi kunateli kutusañumuna ñahi?

⁸ Kukeña kwaYehova kukutusañumuna kumwimbujola Yesu nikulondela mumahaji indi chikupu. (1 Petulu 2:21; 1 Yowanu 2:6) Tukumwekesha kukeña neyi twovwahila Nzambi niKristu. Yesu wahosheli  nindi: “Muntu wukweti mazu inayilejaña nakuyihemba, diyi wankeña; ninowu wankeña akumukeña kudi Tata yami, ninami nukumukeña, nukudimwekeshaña kudi yena.”—Yowanu 14:21; 1 Yowanu 5:3.

9. Yumanyi yitunateli kutachika kwila?

⁹ Muyinu mpinji yaChanukishu, twatela kutoñojoka hayuma yitunakwila muchihandilu chetu. Dichi dihulenu nenu: ‘Munjilanyi mwinakumwimbujolela Yesu? Kuduhu yuma yinatela kuhimpa?’ Twatela kudihula awa malwihu muloña antu amukaayi akeñaña nawu twileña yuma yinakwilawu. (Aroma 12:2) Neyi kubabala nehi, tunateli kutachika kwila yuma yinakwila antañishi, akwayisela niakwakutuma bola aya mpuhu amukaayi. (Akolose 2:8; 1 Yowanu 2:15-17) Tunateli kubula ñahi kwila yuma yelañawu?

10. Malwihwinyi itwatela kudihula muyinu mpinji yaChanukishu, nawa ñakwilu yikutusañumuna kwila yumanyi? (Talenu mwevulu wakutachikilahu.)

¹⁰ Mumpinji yachanukishu twatela kuwana mpinji yakutoñojoka hayakuvwala, mafwilimu, tumina, yuma yidi hamakompyuta, mafoni hela matabuleti etu. Dihulenu nenu: ‘Neyi Yesu wadiña hohu yamona chinavwali, komana nadi kutiya nsonyi?’ (Tañenu 1 Timotewu 2:9, 10.) ‘Nvwalilu yami yadi kumwekesha nawu nidi kambanji kaKristu? Yesu wukutiya kuwaha kutala mafwilimu inatalaña? Nateli kutiyilila kutumina tunatiyililaña? Neyi Yesu yasendaku foni yami, komana nukutiya nsonyi nayuma yikuwanayi mufoni? Komana chikunkalila kumulumbulwila Yesu chinahemenaña yisela yahavidiyo?’ Kumukeña Yehova kwatela kutusañumuna kuleka yuma yejima yabula kutelela akwaKristu, hela yayiwahi chamuchidinyi. (Yililu 19:19, 20) Chitwahanini wumi wetu kudi Yehova, twamukanini kumwovwahila Kristu muwumi wetu wejima. Dichi bayi tuhemba yuma yidi yejima yinateli kutuleñela chitukalili kumwimbujola Yesu.—Matewu 5:29, 30; Afwilipi 4:8.

11. (a) Kumukeña Yehova niYesu kwatusañumunaña ñahi kuzata mudimu wakushimwina? (b) Kukeña kwetu kunateli kutusañumuna ñahi kukwasha amakwawu muchipompelu?

¹¹ Kumukeña Yesu kukutusañumuna kushimwina nikudizisha neyena. (Matewu 28:19, 20; Luka 4:43) Mumpinji yaChanukishu, kwila muzataku wupayiniya wakukwasha wamaora 30 hela 50 mumudimu wakushimwina nehi? Iyala wudi nayaaka 84 wafwisha mumbanda watoñojokeleña nindi wukutwesha wanyi kuzata wupayiniya muloña wakukula nikukatakata. Ilaña apayiniya amwiluña dindi amukwashili. Amuloñesheleli ñendelu nikumwinka iluña datela kushimwinayi. Chafuminumu, iwu manakwetu washikijili maora 30. Kuduhu muntu wumwatela kukwasha muchipompelu chenu kulonda yazati wupayiniya wakukwasha muMarch hela April? Bayi neyi antu ejima anateli kuzata wupayiniyaku, ilaña tunateli kuzatisha mpinji niñovu yetu hakuzataku mudimu waYehova. Neyi twila cheliliyi Pawulu, tukumwekesha netu kukeña kwaYesu kunakutusañumuna. Kukeña kunateli kutusañumuna kwila yumanyi cheñi?

12. Kukeña kwaNzambi kwatusañumunaña kwiladi?

¹² Chamuchiyedi, kukeña kwaNzambi kwatela kutusañumuna kukeña amanakwetu. Kapostolu Yowanu wasonekeli nindi: “Enu akwetu twakeña, chatukeñeluwu kudi Nzambi chochochu, ninetu twadi  kukeñañana nawa.” (1 Yowanu 4:7-11) Dichi neyi twiteja kukeña kwaNzambi, twatela kukeña amanakwetu. (1 Yowanu 3:16) Tunateli kuyimwekeshela ñahi kukeña?

13. Yumanyi yeliliyi Yesu yatukwashaña kwiluka chitunateli kukeña antu?

¹³ Yuma yeliliyi Yesu yatukwashaña kwiluka chitunateli kukeña antu. Hampinji yadiñayi hamaseki, wakwashili antu, sweje-e adizoza. Wokili akata, ayifwayi, amputa mesu, atumama niajika matu. (Matewu 11:4, 5) Kwambukaku nawakulumpi jansakililu, Yesu wadizishileña antu akeñeleña kumwiluka Nzambi. (Yowanu 7:49) Wakeñeli antu adizoza nawa wazatili nañovu hakuyikwasha.—Matewu 20:28.

14. Yumanyi yimukwila kulonda mumwekesheli amanakwenu kukeña?

¹⁴ Mpinji yaChanukishu himpinji yayiwahi kutoñojoka chimunateli kukwasha amanakwenu niahela adi muchipompelu chenu, sweje-e atushinakaji. Kwila muyendela nehi? Kwila muyitwalila yakuda, kuyikwashaku nyidimu yahetala, kuyanawu nakupompa hela mumudimu wakushimwina nehi? (Tañenu Luka 14:12-14.) Lekenu kukeña kwaNzambi kuyisañumuni kukeña amanakwenu!

15. Yumanyi yitwatela kwiluka?

¹⁵ Chamuchisatu, kukeña kwaYehova kwatusañumunaña kwanakena amanakwetu niahela. Wejima wetu twaswana nshidi nikufwa kudi Adama, dichi kwosi muntu wukuhosha nindi, “Ami nateleli ifutu danyiloña wanyi.” Nikambuña Nzambi washinshika chikupu watelela ifutu danyiloña. Wejima wetu atwanakena dehi nyikudi yetu yejima. Muloñadi wutwatela kwilukila chumichi? Twawanaña ñakwilu muchishimu chaYesu.

16, 17. (a) Yumanyi yitukudizila kuchishimu chaYesu chamwanta nawanduñu? (b) Hanyima yakuhanjeka hachishimu chaYesu, yumanyi yimunakufwila kwila?

¹⁶ Yesu wahosheli hachishimu chamwanta wanakeneni nduñu yindi wadiña namukudi weneni wamali adenari 60,000,000. Ilaña ona nduñu wanakeneni wanyi mukwawu nduñu wadiña namukudi wantesha wamadenari 100. Luwi lwamwanta lwateleli kusañumuna ona nduñu yindi kulonda yanakeni mukwawu nduñu. Mwanta wahilili chatiyiliyi nindi nduñu yindi nanakeni wanyi mukwawu nduñu wadiña namukudi wantesha. Wahosheli nindi: “Eyi nduñu watama, ami nakwanakena mukudi wuna wejima nachina chiwanlembelela; eyi kutiyila mukwenu nduñu neyi luwi, neyi china chinakutiyilami nehi?” (Matewu 18:23-35) Kufwana mwanta, Yehova watwanakena mukudi weneni. Kukeña niluwi lwaYehova lwatela kutusañumuna kwiladi?

¹⁷ Chitukudiloñeshaña kuya kuChanukishu, twatela kudihula netu: ‘Kuduhu  manakwami wanvulumuna? Nakañanyaña kumwanakena?’ Neyi wudikoku, yinu diyi mpinji yayiwahi yakwimbujola Yehova “waanakenaña.” (Nehemiya 9:17; Masamu 86:5) Neyi twikala naluwi lwasweja neyi lwaYehova, tukuyitiyila akwetu luwi nawa tukuyanakena chakufuma hamuchima. Neyi tubula kukeña nikuyanakena amanakwetu, Yehova wukutukeña wanyi nawa hakutwanakenaku. (Matewu 6:14, 15) Neyi twanakena akwetu, hichikutukataña kumuchimaku nawa chikutukwasha kwikala namuzañalu kumbindi.

18. Kukeña kwaNzambi kwakwashili ñahi muhela wumu kwanakena muhela mukwawu?

¹⁸ Tunateli kwanakena yiluwa yawamanakwetu niahela. (Tañenu Aefwesesa 4:32; Akolose 3:13, 14.) Muhela Lily welili mwenimu. ^[1] (Talenu mazu adi kunsa.) Wakwashili mumbanda nfwila wejina daCarol. Chakutalilahu, wamutwalileña namotoka kwejima kwakeñeleñayi, wamukwashileña kulanda yuma kumasitolu nawa wamukwashileña nimuyuma yikwawu. Hela chakwila Lily wamwililileña Carol yuma yamuchidiwu, Carol wadiña wakalisha chakwila mpinji yikwawu chakalileña nikumukwasha. Ilaña Lily wamweneña hohu yililu yayiwahi mudi Carol nawa wamukwashili hadi yaaka yayivulu kushika nimpinji yakatiliyi nakufwa. Hela chakwila chamukalilileña Lily kumukwasha Carol, wahosheli nindi: “Natalilaña kumona Carol neyi anamusañuli. Inakukeña nakamumoni neyi nekali dehi wawanina.” Mwamweni, kukeña kwaNzambi kunateli kutusañumuna kwanakena amanakwetu niahela nikutalila mpinji yakela antu ejima anekali dehi awanina.

19. ‘Chamukunkulu chaNzambi chakañanya kushimunewa’ chikutusañumuna kwiladi?

¹⁹ Chalala Yehova natwinki ‘chamukunkulu chakañanya kushimunewa.’ Twatela kusakilila hanichi chawana mpinji yejima. Mpinji yaChanukishu himpinji yayiwahi yakutoñojoka hayuma yayiwahi yatwililawu kudi Yehova naYesu. Kukeña kwawu kutusañumuni kumwimbujola Yesu chikupu, kutukwashi kumwekesha kukeña kudi amanakwetu nikuyanakena chakufuma hamuchima.