1. Hela chakwila Yehova Wabadika, waleja antu amakwawu kwiladi?

YEHOVA Wabadika. Waleñeli yuma yejima, nawa wekala namaana niñovu yasweja. Chelili namukwashi dehi Yoba kwiluka yumiyi, Yoba wahosheli nindi: ‘Neluki nami wunatweshi kwila yuma yejima; nami hikudi wunatweshi kukulekesha muwunatondi kwilaku.’ (Yoba 42:2) Yehova nateli kwila yuma yejima yinakeñi kwilayi chakadi kumukwasha. Ilaña wamwekeshaña kukeña hakuleja antu kulonda azati nindi hakushikija nkeñelu yindi.

2. Yehova wamwinkeli Yesu mudimwinyi walema?

² Yehova waleñeli Mwanindi Yesu, henohu kanda yaleñi yuma yejima. Kuhiñahu, Yehova wamulejeli Mwanindi kumukwasha kuleña yuma yejima. Kapostolu Pawulu wasonekeli hadi Yesu nindi: “Muloña mudi yena dimu mwaleñeleluwu yuma yejima, niyamumawulu niyahamaseki;  niyuma yamonewaña, niyuma yakamonewaña; hela matanda awanta, hela mawanta antuumba, hela akwakuyuula, hela akwañovu. Yuma yejima ayileñeleli mudi yena; diyi aleñeleleluwu yuma yejima.” (Akolose 1:15-17) Dichi Yehova wamwinkeli Mwanindi mudimu walema nawa walejeli antu mudimu wazatañayi Yesu. Iku hikukooleka kweneni.

3. Yehova wamwinkeli Adama mudimwinyi, nawa muloñadi?

³ Yehova walejeli antu kuzata nindi. Chakutalilahu, wamwinkeli Adama mudimu wakutumba atunyama majina. (Kutachika 2:19, 20) Toñojokenu muzañalu watiyiliyi Adama kuzata iwu mudimu. Wasambilili kutala chamwekeneña atunyama niyuma yelileñawu, kufumahu dinu hakuyitumba majina. Yehova diyi waleñeli atunyama nawa wateleleli kuyitumba majina. Ilaña, wamwekesheli nindi wamukeña Adama hakumwinka mudimu wakutumba atunyama majina. Nzambi wamwinkeli cheñi Adama mudimu wakwilisha iseki dejima kwikala paradisa. (Kutachika 1:27, 28) Nkumininaku Adama wafuukwiluhu kuleka kuzata naNzambi nawa chamuleteleli yuma yomisha mbaña kushilahu nianyanindi.—Kutachika 3:17-19, 23.

4. Antu amakwawu azatili ñahi naNzambi hakushikija nkeñelu yindi?

⁴ Kuhiñahu, Nzambi walejeli antu acheñi kuzata nindi. Nowa wasoñeli waatu wamupulwishili haDibaji hamu nachisaka chindi. Mosi wafumishili munza wawaIsarela muEjipitu. Yoshuwa watwalili aIsarela Mwituña daChikaninu. Solomoni watuñili tembeli muYerusalema. Mariya wekalili mama yaYesu. Awa antu ashinshika ejima niamakwawu azatili naYehova hakushikija nkeñelu yindi.

5. Mudimwinyi wutwatela kukalakala, nawa Yehova wateleli kutwinka iwu mudimu? (Talenu mwevulu wakutachikilahu.)

⁵ Makonu, Yehova natuleji kuzata hakumina ñovu jetu kukwasha Wanta windi. Kudi jinjila jajivulu mutwatela kukalakela Nzambi. Hela chakwila wejima wetu tunateli kumukalakela munjila yoyimu wanyi, twatela kushimwina nsañu yayiwahi yaWanta. Yehova wateleli kuzata iwu mudimu yomweni. Wadi kuhoshaña nawantu adi hamaseki iku wudi mwiwulu. Yesu wahosheli nindi Yehova nateli kuzatisha malola kuleja antu Mwanta waWanta Windi. (Luka 19:37-40) Yehova watwiteja kwikala ‘akwakukalakala hamu’ nindi. (1 Akorinda 3:9) Kapostolu Pawulu wasonekeli nindi: “Chitukukalakala chimu nindi, hitukuyilembelela netu, bayi mutambula luwi lwaNzambi chamukunkulwayuku.” (2 Akorinda 6:1) Hikukooleka kweneni kwakukalakala hamu naNzambi. Tushinshikenu kukalakala hamu naNzambi chikunateli kutuletela muzañalu.

6. Mwana kaNzambi wawedi walumbulwili ñahi chatiyileñayi kuzata hamu naTata yindi?

⁶ Kukalakala hamu naNzambi kwazañaleshaña ambuña Yehova. Henohu kanda yenzi hamaseki, Mwana kaNzambi wawedi wahosheli nindi: “Yehova wanheteli hatachikiliyi njila yindi . . . Nadiñi nindi, nimukalawenu hami; namutiyishilaña kuwaha hefuku hefuku, nakuzañajalaña kumesu indi mafuku ejima.” (Yishimu 8:22, 30) Yesu chazatileñayi  hamu naTata yindi, wadiña namuzañalu muloña wazatili yuma yayivulu nawa welukili nindi Yehova wamukeña. Indetu, tunateli kwikala namuzañalu?

7. Muloñadi mudimu wakushimwina chiwatuletelaña muzañalu?

⁷ Yesu wahosheli nindi neyi tuhana hela tutambwila twazañalalaña. (Yililu 20:35) Hampinji yitwelukili chalala twazañaleli, hanu dinu muloñadi wutwazañalelaña neyi tuleja antu chalala? Muloña chelukawu yuma yahosha Bayibolu nikwikala nawubwambu wawuwahi naNzambi ekalaña namuzañalu. Chitwamona anakuhimpa yitoñojoka nichihandilu chawu twazañalalaña. Mudimu wakushimwina walema nankashi nawa diwu mudimu wawuwahi wutwatela kuzataña. Waleteshaña antu ekalaña amabwambu jaNzambi kwikala nawumi wahaya nyaka.—2 Akorinda 5:20.

8. Antu amakwawu ahoshaña nawudi hamuzañalu watiyañawu hakukalakala naYehova?

⁸ Twamuzañaleshaña Yehova neyi tukwasha antu kumwiluka Nzambi nawa walemeshaña mudimu wutwazataña. Chumichi chatuzañalesha. (Tañenu 1 Akorinda 15:58.) Marco, washakamaña kuItaly, wahosheli nindi: “Nidi namuzañalu chikupu hakumukalakela Yehova hakumina ñovu jami, muntu wabulaña kujimbala nyidimu yami.” Franco, niyena washakamaña kuItaly, wahosheli nindi: “Yehova watwanukishaña mafuku ejima nindi watukeña nawa walemesha mudimu wejima wutwakalakalaña hakutwinka Bayibolu niyakuda yakuspiritu hela chakwila tunakumona mudimu wutunakukalakala netu wamukunkulu. Chumichi chanleteshaña kwikala namuzañalu kuzata hamu naNzambi nikuzata kwesekeja nachakeñañayi.”

9. Wubwambwinyi wadiña hakachi kaYehova naYesu, nawa muloñadi?

⁹ Neyi tuzatila hamu nawantu itwakeña, tukukundama kwakwihi nawena. Twayilukaña chikupu chekalawu niyililu yawu. Twelukaña yuma yafwilañawu kwila nichakayilawu. Yesu wazatili naYehova hadaha hadi mabiliyoni ayaaka. Wubwambu wawu wakoleleluku chakwila kwosi chuma chateleleli kuwijimbesha. Yesu walumbulwili chadiña iwu wubwambu hampinji yahosheliyi nindi: “Ami niTata twekala wumu.” (Yowanu 10:30) Adiña anuñañana chikupu nawa adiña nakudikwasha chiyadiña nakuzatila hamu.

10. Kushimwina kwatukundamishaña ñahi kwakwihi naNzambi nikudi amanakwetu?

¹⁰ Yesu walombeli kudi Yehova kukiña atumbanji twindi. Muloñadi? Walombeli nindi: “Kulonda ekali wumu neyi chitwekaletu.” (Yowanu 17:11) Neyi twilaña yuma kwesekeja nachakeñañayi Nzambi nikushimwina, tukwiluka chekalayi. Tukwiluka chichawahila kukuhwelela mudi yena nikulondela nshimbi jindi. Nawa neyi tukukundama kwakwihi naNzambi, wukukundama kwakwihi nanetu. (Tañenu Yakoba 4:8.) Twakundamaña cheñi kudi amanakwetu niahela muloña twamonaña kukala kwokumu nimuzañalu wowumu nawa twafwilaña kwila yuma yoyimu. Twazatilaña hamu, twazañalalaña hamu nikuumika hamu. Octavia, washakamaña kuBritain, wahosheli nindi: “Kuzata naNzambi kwankundamishaña kudi akwetu.” Walumbulwili nindi wubwambu wawu washindamena hayuma “yafwilañawu kwila.” Kuhosha hohu chalala, wejima wetu twatiyaña chochimu. Neyi tumona nyidimu yinakuzatawu amanakwetu yinakuzañalesha Yehova, twakundamaña kwakwihi nawena.

11. Muloñadi wutukekalila anuñañana nikukundama kwakwihi Yehova mwituña dadiha?

¹¹ Kukeña kutwamukeña Nzambi niamanakwetu makonu kwakola, ilaña kwakakolelaku chikupu mwituña dadiha. Toñojokenu hanyidimu yayiwahi yitwakazataña kumbidi. Twakashikijaña antu akasañulawu nikuyidizisha kumwiluka Yehova. Twakawahisha iseki kwikala paradisa. Twakatiyaña muzañalu kuzatila hamu nikwikala awanina chovu-chovu muchiyuulu chaKristu. Antu ejima akekala anuñañana nikukundama kwakwihi naYehova, ‘wakekutisha yuma yejima yikweti wumi nayuma yakeñawu.’—Masamu 145:16.

12. Mudimu wakushimwina watukiñaña ñahi?

¹² Twatela kukiña wubwambu wetu naYehova. Chineli tunakushakama mukaayi kaSatana nawa twawanina wanyi, tunateli kutachika kutoñojoka nikwila yuma yamukaayi. Chidi neyi tunakusala  hakaloña hadi mpupa yinakututwala kutunabuli kukeña. Dichi, twatela kudinkaku hakwila tuyi kutunakukeña. Munjila yoyimu, twatela kuzata nañovu hakwila abuli kutuhuñumuna kudi kaayi kaSatana. Hanu dinu kushimwina kwatukiñaña ñahi? Neyi tunakushimwina antu kumwiluka Yehova niBayibolu, twayilejaña yuma yalema nawa yayiwahi, bayi yuma yikuzeyesha chikuhwelelu chetuku. (Afwilipi 4:8) Kushimwina kwakoleshaña chikuhwelelu chetu, muloña kwatwanukishaña yuma yayiwahi yatukanayi Nzambi ninshimbi jindi. Kwatukwashaña cheñi kutwalekahu kwikala nayililu yikutukwasha kudikiña kudi Satana nikaayi kindi.—Tañenu Aefwesesa 6:14-17.

13. Chinsahu wumu wakuAustralia watiyaña ñahi hamudimu wakushimwina?

¹³ Neyi tukushimwinaña, kudizaña nikuzata nyidimu yamuchipompelu, tukukiñewa muloña tukwikala nampinji yakwakamena kukala kutukweti wanyi. Joel, washakamaña kuAustralia wahosheli nindi: “Kushimwina kwankwashaña kutwalekahu kukolela muchalala. Kwañanukishaña kukala kunakumonawu antu nichinahetelañamu hakuzatisha nshimbi jamuBayibolu. Kushimwina kwankwashaña kwikala wadizoza nawa kwankwashaña kushindamena hadi Yehova nihadi amanakwetu niahela.”

14. Kutwalekahu kushimwina kwamwekeshaña ñahi nawu spiritu yaNzambi yidi nanetu?

¹⁴ Kushimwina kwatukwashaña kwiluka netu spiritu yaNzambi yidi nanetu. Chakutalilahu: twili netu anayinki mudimu wakwinka antu mankendi muchituñilu. Kwosi wufwetu wudi wejima wukuyinkawu nawa mukuzatishaña mali enu hakutwala mankendi. Ilaña, antu amavulu anakukeña wanyi mankendi, nawa amakwawu anayiheli nachimunakuyitwalila mankendi. Munateli kutwalekahu kuzata mudimu wamuchidiwu? Mukushikena dakutiya kutama nawa mukuleka kuwuzata. Etu amavulu twatwalekañahu kushimwina chaaka nichaaka, hela chakwila twazatishaña mpinji nimali etu, kutusupisha nikutuhilila. Chumichi chamwekeshaña nawu spiritu yaNzambi yinakutukwasha.

15. Kushimwina nsañu yayiwahi kwesekana ñahi nankeñelu yaNzambi kudi antu?

¹⁵ Mudimu wakushimwina wesekana ñahi nankeñelu yaYehova kudi antu? Nkeñelu yaNzambi yadiña yakwila nawu antu ahandeña haya nyaka, chavulumwiniyi Adama yahimpili wanyi. (Isaya 55:11) Nzambi waloñesheli ntanjikilu yakutukuulilamu kunshidi nikukufwa. Munjilanyi? Yesu wenjili hamaseki nakuhana wumi windi. Ilaña hakwila nawu tuheteli muniwu mulambu, twatela kwovwahila Nzambi. Yesu  walejeli antu kwila yuma yakeñañayi Nzambi, nawa walejeli atumbanji kuleja antu neyi cheliliyi. Neyi tunakushimwina nikukwasha antu kwikala amabwambu jaNzambi, dikwila nawu tunakuzata hamu naNzambi mukuloñesha kwindi kwakuwahi kwakukuula antu kunshidi nikukufwa.

16. Kushimwina kwendelaña ñahi hamu nanshimbi jaNzambi jabadika?

¹⁶ Neyi tukwasha antu kuwana njila yaya kuwumi waha nyaka, tukumwekesha netu twayikeña nawa twakeña Yehova. “Yena wakeña antu ejima nindi ahandi, eluki nsañu yalala chikupu.” (1 Timotewu 2:4) Kafwarisi wumu chehwiliyi Yesu lushimbi lwabadika nshimbi jejima jaNzambi, Yesu wakwili nindi: “Keñaku Yehova Nzambi yeyi namuchima weyi wejima, nawumi weyi wejima, namaaneyi ejima.’ Dilu lushimbi lwabadika lwakusambila. Kudi nawa lwamuchiyedi lwafwana neyi ilu nawu, Keñaku mukwenu neyi chiwadikeña eyi aweni.” (Matewu 22:37-39) Neyi tushimwinaña nsañu yayiwahi, tukwovwahilaña ilu lushimbi.—Tañenu Yililu 10:42.

17. Mwatiyaña ñahi hamudimu wayinkawu wakushimwina nsañu yayiwahi?

¹⁷ Twekala akoleka chikupu. Muloña Yehova watwinka mudimu watuletelaña muzañalu nawa watukundamishaña kwakwihi nayena niamanakwetu nawa wakiñaña wubwambu wetu nayena. Watukwashaña cheñi kumwekesha kukeña kutwamukeña Nzambi niamanakwetu. Yehova wukweti ambuñindi amavulu mukaayi kejima, nawa wejima wawu ekala nanshakaminu yambuka. Chili tudi anyiki hela akulumpi, twaheta hela tudi atuzweñi, twakola hela nehi, twazataña hakumina ñovu jetu kushimwina antu. Twatiyaña neyi chatiyiliyi Chantel wakuFrance, wahosheli nindi: “Muntu wasweja ñovu mukuleña kwejima, Nleñi wayuma yejima, Nzambi wamuzañalu, nanleji nindi: ‘Yaaku! Hoshaku! Nhosheluku, hoshaku chakufuma hamuchima weyi. Nakwinki ñovu jami, Izu dami Bayibolu, wukwashu kufuma mwiwulu, wukwashu wahamaseki, kudizisha kwakuwahi ninshimbi hampinji yatelela.’ Tukweti kukooleka kwakwila yuma yatulejañayi Yehova nikuzata hamu naNzambi yetu.”