1, 2. Pawulu wasonekelelidi mukanda kudi akwaKristu Aheberu?

YIPOMPELU yejima muIsarela yadiña mukuwunda muchaaka cha 61 C.E. Hela chakwila kapostolu Pawulu wadiña mukaleya muRoma, wakuhweleli nindi keña yafumi. Timotewu wendeleñayi nindi dihamufumishiluwu tuhu mukaleya, nawa wejima wawu afwilileña kuya nakuhempula amanakwawu muYudeya. (Aheberu 13:23) Hela chochu, kwashalili hohu yaaka yitanu, akwaKristu ashakamineña muYudeya ateleleli kufuma mumusumba swayi swayi. Muloñadi? Muloña Yesu walejeli atumbanji twindi nindi chamonawu hohu amashidika ananyeñumuki Yerusalema, atela kufuma mumusumba.—Luka 21:20-24.

² Mwahitili yaaka 28 kufuma hayisoñamishiliyi Yesu atumbanji twindi. Haniyi mpinji, akwaKristu muIsarela atwalekeluhu kwikala ashinshika hela chakwila ayikabishileña nikumona kweseka. (Aheberu 10:32-34) Ilaña Pawulu wakeñeleña kuyikwasha kulonda adiloñeshi nayuma yikamwekana kumbidi. Adiña kwakwihi nakumona kweseka kweneni kwachikuhwelelu chawu. (Matewu 24:20, 21; Aheberu 12:4) Ateleleli kuumika nikwikala nachikuhwelelu chakola hakwovwahila  mazu aYesu akufuma mumusumba kulonda apuluki. (Tañenu Aheberu 10:36-39.) Dichi Yehova wamoneneni Pawulu kuyisonekela mukanda ana amanakwetu niahela. Iwu mukanda awitenaña nawu Aheberu nawa awisonekeli kulonda wuyikoleshi.

3. Muloñadi wutwatelela kutañaña mukanda waAheberu?

³ Makonu, wejima wetu twatela kutañaña mukanda waAheberu. Muloñadi? Muloña yuma yidi neyi chiyadiña kudi akwaKristu ashakamineña muYudeya. Tunakushakama ‘munyaka yakala,’ nawa antu amavulu anomiki kweseka kweneni nimakabisha. (2 Timotewu 3:1, 12) Ilaña etu amavulu tunakushakama mukuwunda nawa kwosi anakutukabisha. Dichi, twatela kwikala asoñama neyi cheliluwu akwaKristu amumafuku aPawulu. Muloñadi? Katatakichi tumoni kweseka kweneni kwachikuhwelelu chetu!—Tañenu Luka 21:34-36.

4. Nsonanyi yachaaka cha 2016, nawa muloñadi chiyinawahili?

⁴ Yumanyi yikutukwasha kudiloñesha nayuma yikamwekena kumbindi? Pawulu wateneni yuma yayivulu mumukanda waAheberu yikutukwasha kukolesha chikuhwelelu chetu. Chikuma chimu chalema chasonekeliyi chekala haHeberu 13:1. Iyi nsona yatukoleshaña nawu: ‘Twalekenuhu kukeña amanakwenu.’ Iyi vasi diyi yinatonduwu kwikala nsona yachaaka cha 2016.

5. Kukeña amanakwetu kwatalisha mudihi?

⁵ Kukeña amanakwetu kwatalisha mudihi? Kwatalisha mukukeña kwekalaña muchisaka hela nawamabwambu. (Yowanu 11:36) Twahoshaña hohu wanyi netu tudi amanakwetu niahela. Ilaña tudi amanakwetu niahela. (Matewu 23:8) Pawulu wahosheli nindi: “Keñañanenu nawana kwenu nawushona; itejenu mwinenu abadiki kulema.” (Aroma 12:10) Awa mazu amwekeshaña chitwakeña amanakwetu. Iku kukeña amanakwetu, kushilahu nikukeña kwawakwaKristu kwakwashaña antu jaNzambi kwikala amabwambu nawa anuñañana.

6. AkwaKristu alala amwekeshelañanyi kukeña, nawa muloñadi?

⁶ Mazu akwila nawu “keñañanenu nawana kwenu” avula kuyisoneka munyikanda yawakwaKristu. A Yudeya atachi, azatishileña izu dakwila nawu ‘manakwami’ hakutena ntaña mpinji yikwawu nimuntu wabula kwikala ntaña. Ilaña hiyateneneña muntu wabula kwikala kaYudeyaku. Hela chochu, akwaKristu alala ejima ‘hiyamanakwetu’ hichikweti muloña netuña kwafumawuku. (Aroma 10:12) Yehova natudizishi kukeñañana wumu namukwawu hamu neyi amanakwamuntu. (1 Atesalonika 4:9) Hanu dinu muloñadi wutwatela kutwalekelahu kukeña amanakwetu?

7. (a) Chumanyi chacheni chaleteshaña tukeñi amanakwetu? (b) Shimunenu cheñi chaleteshaña kukeña amanakwetu.

⁷ Twakeña nankashi amanakwetu muloña Yehova diyi watulejaña kukeñañana. Hitunateli kukeña Yehova neyi tubula  kukeña amanakwetuku. (1 Yowanu 4:7, 20, 21) Cheñi, twakeña amanakwetu muloña wejima wetu twakeñaña wukwashu, sweje-e mumpinji yakala. Hampinji yasonekeleñayi Pawulu mukanda kudi akwaKristu aHeberu, welukili nindi akwaKristu amakwawu akushiya matala niyuma yawu. Yesu washimwini iyi mpinji chiyikekala. (Maku 13:14-18; Luka 21:21-23) Dichi, henohu iyi mpinji kanda yishiki, ana akwaKristu ateleli kukeñañana chikupu.—Aroma 12:9.

8. Twatela kwiladi henohu lukadi lwasweja kanda lutachiki?

⁸ Lukadi lwasweja mukuhanda kwawantu lunakwinza katataka. (Maku 13:19; Chimwekeshu 7:1-3) Twatela kwovwahila kufumba kwakwila nawu: ‘Enu antu ami inzenu, mwiñili mumatalenu mwakadenzelelumu; batamenu kampinji kanti ndombu yihiti.’ (Isaya 26:20) ‘Mumatala’ mwatela kwikala muyipompelu yetu. Dimu twadifukulaña kudi Yehova nawamanakwetu niahela. Ilaña bayi tukuminaña hohu dakudifukulaku. Pawulu walejeli akwaKristu aHeberu kudikolesha wumu namukwawu kulonda akeñañani nikwilila akwawu mwamuwahi. (Aheberu 10:24, 25) Twatela kukeña amanakwetu nankashi chayinu mpinji muloña chikatukwasha kuumika kweseka kwejima kutwakamona kumbindi.

9. (a) Munjilanyi mutukumwekeshela kukeña kudi amanakwetu makonu? (b) Shimunenu yakutalilahu yinakumwesha antu jaYehova chiyamwekeshañawu kukeña.

⁹ Tukweti njila jajivulu jakumwekeshelamu kukeña amanakwetu henohu lukadi lwasweja kanda lutachiki. Amanakwetu amavulu anakukabakana muloña wanyitentanshi, mabaji, mahurricane, matsunami, niwubanji wukwawu wadimwekenaña waweni. Amanakwetu anakuumika makabisha. (Matewu 24:6-9) Nawa kudi kukala kwamali niyakuda muloña wakushakama mwituña datama. (Chimwekeshu 6:5, 6) Hela chochu, neyi amanakwetu amona kukala twekalaña nakukooleka kwakuyimwekeshela kukeña. Hela chakwila antu mukanu kaayi amwekeshaña wanyi kukeña, twatela ‘kutwalekahu kukeña amanakwetu’. (Matewu 24:12) ^[1]—Mazu adi kunsa.

10. Tukuhanjekadi?

¹⁰ Tunateli kutwalekahu ñahi kukeña amanakwetu hela tunakumona makabi? Tunateli kumwekesha ñahi netu twakeña amanakwetu? Hanyima yakuhosha nindi ‘twalekenuhu kukeña amanakwenu,’ kapostolu Pawulu washimwini njila jajivulu munateli kumwekeshelawu akwaKristu kukeña. Tuhanjekenu njila 6 jateneniyi.

11, 12. Tunateli kumwekesha ñahi chisambu? (Talenu mwevulu wakutachikilahu.)

¹¹ “Bayi muvulamena kukeña  enyuku.” (Tañenu Aheberu 13:2.) Awa mazu atwanukishaña cheliluwu Abarahama naLoti. Awa amayala ayedi amwekesheli kukeña kudi enyi abuliluwu kwiluka. Nkumininaku, Abarahama naLoti elukili nawu awa enyi adiña añelu. (Kutachika 18:2-5; 19:1-3) Iyi yakutalilahu yakwashili akwaKristu aHeberu kumwekesha kukeña kuhitila mukwikala nachisambu.

¹² Tunateli kumwekesha ñahi chisambu kudi akwetu? Tunateli kutambika amanakwetu niahela kwitala detu nakuda hela nakuyikolesha. Hela chakwila twayiluka chiwahi wanyi ankoñi etu añinza niañodawu, tunateli kuyitambika kwitala neyi anendeli chipompelu chetu. (3 Yowanu 5-8) Hitwatela kuyiloñeshela yakuda yayivulu hela kuzatisha mali amavuluku. Tunakufwila hohu kukolesha amanakwetu, bayi kuyitiyisha kuwaha nayuma yitukwetuku. Bayi tutambika hohu antu ituneluki netu niwena akatukwasha. (Luka 10:42; 14:12-14) Dichi, hela tudi nanyidimu yayivulu, bayi tuvulamena kumwekeshela akwetu chisambuku.

13, 14. Tunateli ‘kwanukaña ñahi adi mutuleya’?

¹³ “Anukenu adi munyonji.” (Tañenu Aheberu 13:3.) Pawulu hasonekeliyi awa mazu, wateneneña amanakwetu adiña mutuleya muloña wachikuhwelelu chawu. Pawulu wahamekeli antu amuchipompelu muloña atiyilili “luwi antu adiñi munyonji.” (Aheberu 10:34) Amanakwetu amakwawu amukwashili Pawulu hadiñayi mukaleya yaaka yiwana, ilaña amakwawu ashakamineña kwakulehi. Hanu dinu amukwashili ñahi? Adiña nakumulombelaku chakadi kuleka.—Afwilipi 1:12-14; Aheberu 13:18, 19.

¹⁴ Makonu, aYinsahu amavulu adi mutuleya muloña wachikuhwelelu chawu. Amanakwetu niahela ashakamaña kwakwihi ayikwashaña. Ilaña etu amavulu twashakamaña kwakulehi nawanakwetu adi mutuleya. Tunateli kuyanukaña ñahi nikuyikwasha? Kukeña amanakwetu kukutusañumuna kutwalekahu kuyilombelaku. Chakutalilahu, tunateli kulombelaku amanakwetu, ahela nianyana adi mukaleya muEritrea, kubombelahu niamanakwetu aPaulos Eyassu, Isaac Mogos, niaNegede Teklemariam, anashakami yaaka 20 mukaleya.

15. Tunateli kulemesha ñahi wuluwi?

¹⁵ “Kusumbula kwikali kwalema kudi antu ejima.” (Tañenu Aheberu 13:4.) Tunateli kumwekesha cheñi kukeña kudi amanakwetu neyi tubula kwila wuvumbi. (1 Timotewu 5:1, 2) Chakutalilahu, neyi twila wuvumbi namanakwetu hela muhela, tukumukatisha  kumuchima niantaña jindi kumu. Tunateli kuleka kudikuhwelela. (1 Atesalonika 4:3-8) Toñojokenu cheñi chikutiyayi ñodenu neyi yayiwana munakutala nyevulu yanzekesi. Nateli kumona nindi mwamukeña nawa mwalemesha ntanjikilu yawuluwi?—Matewu 5:28.

16. Kumona yuma yitukweti netu yinawanini kukutukwasha ñahi kumwekeshela amanakwetu kukeña?

¹⁶ Monenu “yuma yimudi nayu nenu yinawanini” (Tañenu Aheberu 13:5.) Kukuhwelela Yehova kunateli kutukwasha kumona yuma yitukweti netu yinawanini. Chumichi chinateli kutukwasha ñahi kumwekesha kukeña kudi amanakwetu? Neyi tumonaña yuma yitukweti netu yinawanini, tukwiluka netu amanakwetu niahela alema kubadika mali hela yuma. (1 Timotewu 6:6-8) Tukukeñaña wanyi kuwana yiluwa mudi amanakwetu hela kudishona. Nawa tukuyitiyilaña antu amakwawu lwisu wanyi. Neyi tumonaña netu yuma yitukweti yinawanini, tukwikala nachisambu.—1 Timotewu 6:17-19.

17. ‘Kwikala akadi woma’ kukutukwasha ñahi kumwekesha kukeña kudi amanakwetu?

¹⁷ ‘Ikalenu akadi woma.’ (Tañenu Aheberu 13:6.) Kukuhwelela Yehova kwatukwashaña kubula woma wakuumika kweseka kwakala. Kuhamuka  kwatukwashaña kwikala nayililu yayiwahi. Nawa neyi twikala nayililu yayiwahi, tukumwekesha kukeña kudi amanakwetu kuhitila mukukwasha nikukundeja amanakwetu niahela. (1 Atesalonika 5:14, 15) Nihampinji yalukadi lwasweja, tunateli kwikala ahamuka chineli tuneluki netu kupuluka kudi mukamwihi.—Luka 21:25-28.

18. Tunateli kutwalekahu ñahi kukeña aeluda?

¹⁸ “Anukenu anlomboli jenu.” (Tañenu Aheberu 13:7, 17.) Aeluda muchipompelu chetu azatishaña mpinji yawu hakutuzatila. Neyi tutoñojoka yuma yejima yelañawu, twayisakililaña nikuyikeña chikupu. Tunakukeña wanyi wena kuleka kutuzatila hela kuhila muloña wayuma yitunakwila. Ilaña, tunakukeña kuyitiyilila chakufuma hamuchima. Neyi twila mwenimu dikwila nawu tunakuyilemesha “nankashi mukukeña, hansañu yanyidimu yawu.”—1 Atesalonika 5:13.

19, 20. Tunateli kutwalekahu ñahi kukeña amanakwetu chikupu?

¹⁹ Antu jaYehova ayilukilaña kukukeña amanakwawu. Chumichi chamwekeni nimumafuku aPawulu. Ilaña Pawulu wakolesheli amanakwetu kumwekesha kukeña kwabadika. Wahosheli nindi: “hitukuyilembela netu muswejeshumu.” (1 Atesalonika 4:9, 10) Kuhosha hohu chalala, kwosi chuma chinateli kutukañesha kukeña amanakwetu.

²⁰ Dichi hampinji yitukutalaña hansona yachaaka, tutoñojokeña hanawa malwihu: Nateli kwikala ñahi nachisambu? Nateli kukwasha ñahi amanakwetu adi mutuleya? Komana nalemesha kuloñesha kwaNzambi hawuluwi? Chumanyi chikunkwasha kumona nami yuma yinidi nayu yinashikili? Nateli kukuhwelela ñahi Yehova nankashi? Nateli kwovwahila ñahi aeluda? Neyi tuzatisha iyi yikuma 6, bayi neyi nsona yachaaka yikwikala hohu chinjikijilu hambañuku, ilaña yikutwanukishaña kwovwahila kufumba kwaPawulu kwakwila nawu: ‘Twalekenuhu kukeña amanakwenu.’—Aheberu 13:1.