1, 2. (a) Yumanyi yahosheliyi Yehova nindi yakamwekana mumafuku etu? (b) Achinu chibaaba chikwakula malwihwinyi? (Talenu mwevulu wakutachikilahu.)

YEHOVA wahosheli kutalisha kumafuku etu nindi, “ikumi dawamayala akunyuza yamadimi ejima, akakwata kwihina dakaYudeya, nawu, Tuyi nenu, muloña tunatiyi nawu Nzambi mwekala nindi.” (Zekariya 8:23) ‘KaYudeya’ nakwimenaku antu awayishayi Nzambi naspiritu yajila. Ayitenaña cheñi nawu, “aIsarela ambala aNzambi.” (Aŋalija 6:16) ‘Amayala ikumi’ emenañaku antu akweti kuchiñeja kwakushakama hamaseki haya nyaka. Eluka nawu Yehova wakiswila idi izanvu dawawayishewa nawa nawu hikukooleka kudifukula kudi Yehova hamu nawu.

² Yesu wahosheli nindi antu jaNzambi akekala anuñañana neyi chochahosheli kaprofwetu Zekariya. Wateneni antu akweti kuchiñeja kwakushakama mwiwulu nindi “kamukanka kawanyikoku kantesha” nawa wateneni antu akweti kuchiñeja kwakushakama hamaseki nindi “anyikoku acheñi.”  Ilaña Yesu wahosheli nindi akekala “mukanka wumu” nawa akamulondaña, ‘kabiña wawu wumu.’ (Luka 12:32; Yowanu 10:16) Chineli kudi mazanvu ayedi, amakwawu anateli kwihula nawu: (1) Komana anyikoku acheñi atela kwiluka majina awantu ejima awayishewa makonu? (2) Awayishewa atela kudimona ñahi? (3) Neyi muntu muchipompelu yatachika kudya kudinkendi nikunwa kuvinyu haChanukishu, mwatela kumumona ñahi? (4) Komana natela kwakamena neyi naambala yawantu anakuda nikunwa haChanukishu yinakuvulilaku? Achinu chibaaba chikwakula awa malwihu.

3. Muloñadi chichakalila kwiluka chikupu antu awayishewa?

³ Komana anyikoku acheñi atela kwiluka majina awantu ejima awayishewa makonu? Inehi. Muloñadi? Muloña chakala kwiluka nawu awayishewa ejima akatambwila wuloku wawu. ^[1] (Talenu mazu adi kunsa.) Hela chakwila Nzambi wayitambika kuya mwiwulu, akatambwila wuloku wawu neyi atwalekahu kwikala ashinshika. Satana weluka chumichi, nawa wazatishaña “atuprofwetu akutwamba” kulonda ‘ayiluwañeshi.’ (Matewu 24:24) AkwaKristu awayishewa elukaña wanyi nawu akatambwila wuloku wawu, chiña neyi Yehova nayimwekesheli hatooka nindi ashinshika. Awayishewa atambwilaña chilamiku chawu chakukumishaku henohu kanda afwi hela henohu ‘lukadi lwasweja’ kanda lutachiki.—Chimwekeshu 2:10; 7:3, 14.

4. Neyi chikutwesheka wanyi kwiluka majina awantu awayishewa hamaseki makonu, tunateli ‘kuya’ ñahi nawu?

⁴ Neyi chakala kwiluka majina awantu awayishewa makonu, anyikoku acheñi ‘akaya’ ñahi nawu? Bayibolu yahosha nawu ‘amayala ikumi’ “akakwata kwihina dakaYudeya, nawu, Tuyi nenu, muloña tunatiyi nawu Nzambi mwekala nindi.” Iyi vasi yatena kaYudeya wumu. Ilaña nhoshelu yakwila nawu “tuyi nenu” nawa cheñi nawu “mwekala nindi” yatenaña antu amavulu. Ichi chinayi mukwila nawu kaYudeya himuntu wumu hohuku ilaña wemenañaku mukanka wejima wawawayishewa. Anyikoku acheñi eluka chumichi nawa amukalakelaña Yehova hamu nawu. Hiyatela kwiluka majina awantu ekala munidi izanvu kulonda ayilondeñaku. Yesu diyi Nlomboli yetu, nawa Bayibolu yatuleja nawu twatela kumulonda yena hohu.—Matewu 23:10.

5. Awayishewa atela kutoñojoka chikupu hakusoñamishanyi, nawa muloñadi?

⁵ Awayishewa atela kutoñojoka chikupu hakusoñamisha kwekala hamukanda wa 1 Akorinda 11:27-29. (Tañenu.) Wawayishewa nateli kudya ñahi kudinkendi nikunwa kuvinyu “chakadi kutela” haChanukishu? Neyi wahembaña wubwambu  windi naYehova wanyi nawa hashinshikaku, ilaña wadyaña kudinkendi nikunwa kuvinyu dikwila nawu walemesha wanyi Chanukishu. (Aheberu 6:4-6; 10:26-29) Iku kusoñamisha kwayikwashaña awayishewa kutwalekahu kwikala ashinshika neyi anakukeña kutambwila ‘masomu akutambika kwaNzambi kwamudi Kristu Yesu kwamwiwulu.’—Afwilipi 3:13-16.

6. AkwaKristu awayishewa atela kudimona ñahi?

⁶ Pawulu walejeli akwaKristu nindi: “Ami akasilawu mukaleya mudi Mwanta, nayilembeleli nami endenuña mwatelela kutambika kwayitambikiluwu.” Anateli kwila ñahi mwenimu? Walumbulwili nindi: “Nakudizoza kwejima nakwovwaha, nakudiwunjika, nakuditiyilila wumu namukwawu nakukeña, nakusha muchima hakuhemba kunuñañana kwaSpiritu, nakudikasa mwonji wakuwunda.” (Aefwesesa 4:1-3) Spiritu yaYehova yajila yakwashaña ambuñindi kwikala adizoza, bayi adivwimbaku. (Akolose 3:12) Dichi awayishewa hiyadimonaña kulema kubadika akwawuku. Muloña eluka nawu Yehova wahanaña spiritu yajila kudi ambuñindi ejima. Nawa hiyamonaña neyi elukisha Bayibolu kubadika amakwawuku. Hiyalejaña muntu wudi wejima nawu nawayishewi nawa watela kutachika kunwa hela kudya haChanukishuku. Ilaña ekala adizoza nawa eluka nawu Yehova hohu diyi wunateli kutambika antu kuya mwiwulu.

7, 8. AkwaKristu awayishewa abulaña kukeñadi, nawa muloñadi?

⁷ Hela chakwila awayishewa eluka nawu hikukooleka kuya mwiwulu, akeñaña wanyi kuyilemesha kudi antu. (Aefwesesa 1:18, 19; tañenu Afwilipi 2:2, 3.) Eluka cheñi nawu Yehova chayiwayishiliyi halejeluhu muntu wudi wejimaku. Dichi muntu wawayishewa wahayamaña wanyi neyi antu amakwawu ajinoka nawu anamuwayishi. Wanukaña chahosha Bayibolu nawu hitwatela kushikena kukuhwelela muntu wahoshaña nindi Nzambi namutonduku. (Chimwekeshu 2:2) Muntu wawayishewa walejaña wanyi antu enzaña nakumwihula katachi nawu wawayishewa, muloña wakeñaña wanyi kumwihujola. Kuhosha hohu chalala walejaña wanyi muntu wudi wejima. Nawa waditiyaña wanyi nanyidimu yakazatayi mwiwulu.—1 Akorinda 1:28, 29; tañenu 1 Akorinda 4:6-8.

⁸ AkwaKristu awayishewa atoñojokaña wanyi nawu atela kuhanjeka hohu nawakwawu awayishewa, neyi kwiji adi mukilabu. Ayaña wanyi nakukeñakeña akwawu awayishewa kulonda ahenjekeña hakuwayishewa kwawu hela kubulakana mumazanvu kulonda atañileña hamu Bayibolu. (Aŋalija 1:15-17) Chipompelu chinateli kunuñañana wanyi neyi awayishewa elileña mwenimu. Adi kulondelaña wanyi chinakuyilejawu kudi spiritu yajila, yakwashaña ambuña aNzambi kwikala mukuwunda nikunuñañana.—Tañenu Aroma 16:17, 18.

9. Muloñadi wutwatelela kubulila kuyilemesha antu adyaña kudinkendi nikunwa kuvinyu haChanukishu? (Talenu chikasha chinakwila nawu Kukeña “Hikwelaña Chuma Chabula Kutelaku”)

⁹ Mwatela kuyimona ñahi amanakwetu niahela awayishewa? Yesu walejeli atumbanji twindi nindi: “Wejima wenu ivumu denu dimu.” Watwalekeluhu nindi:  “Muntu wukuditohesha akamukehesha, muntu wukudikehesha akamutohesha.” (Matewu 23:8-12) Dichi chatama kukumbwa muntu nankashi, hela wekala mana kwaKristu wawayishewa. Bayibolu neyi yinakuhosha hadi aeluda, yatukoleshaña kwimbujola chikuhwelelu chawu ilaña yatulejaña wanyi kwilisha muntu wudi wejima kwikala nlomboli yetu. (Aheberu 13:7) Bayibolu yahosha nawu antu amakwawu atela “kuyilemesha chakubadika.” Ilaña ichi chinayi mukwila nawu “ayulaña chachiwahi” nawa ‘ashimwinaña nikuleja,’ bayi neyi muloña awayishewaku. (1 Timotewu 5:17) Neyi tusweja kuhameka awayishewa, tukuyitiyisha nsonyi. Chikusweja kutama neyi tuyiletesha atachika kudimona kulema. (Aroma 12:3) Kwosi wumu hakachi ketu wunakukeña kwila chuma chikuletesha amanakwaKristu awayishewa kwila chuma chamuchidiwu.—Luka 17:2.

10. Munateli kumwekesha ñahi nenu mwalemesha akwaKristu awayishewa?

¹⁰ Hanu tunateli kuyilemesha ñahi antu awayishayi Yehova? Twatela kuyihula wanyi chiyekalili awayishewa. Hinsañu yelukawu awenawu, tukweti wuswa wakuyihula wanyi. (1 Atesalonika 4:11; 2 Atesalonika 3:11) Twatela cheñi kutoñojoka wanyi netu anfumwawu hela añodawu, anvwali jawu hela antaña jawu niwena awayishewa. Muntu waswanaña wanyi kuchiñeja kudi antaña jindi. (1 Atesalonika 2:12) Hitwatela cheñi kwihula malwihu akuneñesha antu amakwawuku. Chakutalilahu, twatela wanyi kwihula ñoda manakwetu wawayishewa chakatiyañayi kushakama hamaseki haya nyaka chakubula anfumwawu. Henohu tweluka netu mwituña dadiha Yehova ‘wakayiikutishaña nayuma yakeñawu.’—Masamu 145:16.

11. Tukudikiña ñahi neyi tubula “kulemesha antu kumesu”?

¹¹ Neyi tukumonaña wanyi awayishewa netu alema kubadika antu amakwawu, tukudikiña etu aweni. Munjilanyi? Bayibolu yatuleja nawu muchipompelu munateli kwikala “ana kwetu akutwamba” aditenaña nawu awayishewa. (Aŋalija 2:4, 5; 1 Yowanu 2:19) Cheñi, awayishewa amakwawu anateli kwikala ashinshika wanyi. (Matewu 25:10-12; 2 Petulu 2:20, 21) Ilaña neyi tuleka “kulemesha antu kumesu,” tukutiyililaña wanyi antu acheñi, hela awayishewa, ayampuhu hela antu anamukalakeli Yehova hadi yaaka yayivulu. Dichi, neyi abula kushinshika hela ayihaña muchipompelu, etu tukutwalekahu kwikala ashinshika kudi Yehova nikumukalakela.—Yuda 16.

12, 13. Muloñadi wutwatela kubula kwakamena hakuvula kwawantu adaña kudinkendi nikunwa kuvinyu haChanukishu?

¹² Kunyima, naambala yawantu adileña kudinkendi nikunwa kuvinyu haChanukishu yafuntileña mwishina. Ilaña makonu, naambala yinakuvulilaku chaaka nichaaka. Komana twatela kwakamena? Inehi. Tushinshikenu chikuletesha tubuli kwakamena.

¹³ “Yehova weluka antu indi.” (2 Timotewu 2:19) Kwambukaku naYehova, amanakwetu achindaña antu adyaña kudinkendi nikunwa kuvinyu haChanukishu  elukaña wanyi chikupu muntu wawayishewa. Naambala yawantu adyaña yabombelamu antu atoñojokaña nawu awayishewa henohu awayishewa wanyi. Chakutalilahu, antu amakwawu adiña nakudya kudinkendi nikunwa kuvinyu alekeli. Amakwawu akata munyitu nawa akuhwelelaña nawu akayuula hamu naKristu mwiwulu. Kuhosha hohu chalala, tweluka wanyi antu awayishewa achidi hamaseki.

14. Bayibolu yahosha nawudi hakuvula kwawawayishewa akekala hamaseki hampinji yakatachika lukadi lwasweja?

¹⁴ Yesu wakawana awayishewa kumaluña ashiyashana hakenzayi nakuyitwala mwiwulu. Bayibolu yahosha nawu Yesu “wakatemesha añelu jindi nampuña yasweja kuvuma, akapompeshi indi atondewa kumpepela jiwana, kufumisha kunsa yewulu yimu, ndo nikunsa yikwawu.” (Matewu 24:31) Bayibolu yamwekeshaña cheñi nawu kumafuku akukuminina, awayishewa akawanawu hamaseki akekala antesha. (Chimwekeshu 12:17) Ilaña yashimuna wanyi naambala yawawayishewa akashalahu hampinji yakatachika lukadi lwasweja.

15, 16. Yumanyi yitwatela kwiluka hadi a 144,000 atondawu kudi Yehova?

¹⁵ Yehova weluka mpinji yatondañayi awayishewa. (Aroma 8:28-30) Yehova watachikili kutonda awayishewa hanyima yakumusañula Yesu. Chinamwekani neyi mumafuku awapostolu, akwaKristu alala ejima ayiwayishili. Chimwahitili yaaka yayivulu, antu amavulu adiña nakuditena nawu akwaKristu alondeleli Kristu wanyi. Hela chochu, hayina mpinji, Yehova wawayishili  antu antesha adiña akwaKristu alala. Adiña neyi tidiku yahosheliyi Yesu nindi yakakulila hamu namatahu. (Matewu 13:24-30) Munanu mafuku akukuminina, Yehova natwalekuhu kutonda antu kwikala hamukanka wawa 144,000. ^[2] (Talenu mazu adi kunsa.) Dichi Nzambi neyi nafuukuluhu kutonda antu amakwawu henohu kukuma kanda, twatela kujinoka wanyi netu nakwila yuma yayiwahi. (Isaya 45:9; Danyeli 4:35; tañenu Aroma 9:11, 16.) ^[3] (Talenu mazu adi kunsa.) Twatela kubabala kuchina twakenda kela neyi chelili akwakukalakala amutobeleleña mukwetempa nawu ayinki mali amavulu kubadika ana akwawu enjili hanyima.—Tañenu Matewu 20:8-15.

¹⁶ Bayi neyi antu ejima akweti kuchiñeja kwakushakama mwiwulu ekala ‘hiyanduñu amaana nikashinshiku.’ (Matewu 24:45-47) Neyi chochadiña mumafuku awapostolu, makonu Yehova niYesu anakuzatisha antu antesha kulonda adiishi hela kudizisha antu amavulu. Mumafuku awapostolu akwaKristu awayishewa antesha ayizatishili kusoneka Nyikanda yachiGiriki yawakwaKristu. Makonu, akwaKristu awayishewa antesha diwu ekala namudimu wakwinka antu jaNzambi ‘yakudya hampinji yatelela.’

17. Yumanyi yimunadizi muchinu chibaba?

¹⁷ Yumanyi yitunadizi muchinu chibaaba? Yehova nafuukuluhu kwinka antu jindi wumi wahaya nyaka hamaseki nikwinka wumi antu akayuulaña naYesu mwiwulu. Yehova wenkaña wuloku kudi ambuñindi, “aYudeya” nikudi “amayala ikumi,” nawa wakeñaña nindi wejima wawu ovwahileña lushimbi lwolumu nikwikala ashinshika. Antu ejima atela kwikala adizoza. Ejima atela kumukalakela Nzambi hamu nikwikala anuñañana. Nawa ejima atela kutwalekahu kuleta kuwunda muchipompelu. Chitunakuswila kwakwihi nakukuma kwakaayi,twatela kutwalekahu kumukalakela Yehova nikulondela Kristu neyi anyikoku amwiyinda dimu.