1. Yumanyi yayililayi Yehova?

MWEKALILI ñahi Chinsahu chaYehova? Chatachi, hadaha mwatiyili “nsañu yayiwahi” kudi avwali jenu, mukwenu mumwazatilaña, mukwenu mukashikola hela hayendeleliwu aYinsahu kwitala. (Maku 13:10) Dichi ashakamini nenu hadi mpinji yayilehi nawa azatili nañovu kuyidizisha Bayibolu. Chimwadizileña, mwamukeñeli Yehova nawa mwelukili nenu wayikeña ninenu. Yehova wayiletesheli mukeñi chalala nawa chineli munekali dehi kambanji kaYesu Kristu, munekali nakuchiñeja kwakwikala nawumi wahaya nyaaka. (Yow. 6:44) Chakadi nikujina, mwamusakililaña Yehova hakutemesha muntu kwinza nakuyidizisha enu chalala nawa nihakuyiteja enu kwikala kambuñindi.

2. Yumanyi yitukuhanjekahu muchinu chibaaba?

² Chineli tuneluki chalala, tudi namudimu wakukwasha antu kulonda niwena ekali munjila yaya kuwumi. Hadaha twashimwinaña kwitala nikwitala, ilaña chinateli kutukalila kulombola atudizi aBayibolu. Komana dichimwatiyaña? Neyi dichimwatiyaña hadaha nsañu yimu yidi muchinu chibaaba yinateli kuyikwasha. Tukuhanjeka chuma chatuleteshaña kwilisha atumbanji. Tukuhanjeka cheñi hakukala kwatukañeshaña kulombola kadizi waBayibolu. Chatachi, tuhanjekenu ntahi chaleteshaña tushimwineña antu nikuyidizisha nsañu yayiwahi.

3. Chumanyi chaleteshaña tushimwineña?

³ Yesu hadiñayi hanu hamaseki wayilejeli akwakumulondela kuzata nyidimu yiyedi. Chatachi, wayilejeli kushimwina nsañu yayiwahi yaWanta nawa wayidizishili chakushimwina. (Mat.  10:7; Luka 8:1) Chakutalilahu, Yesu wayilejeli atumbanji twindi chakwila neyi antu atiyilila nsañu yaWanta, nichatela kwilawu neyi antu akaana kutiyilila. (Luka 9:2-5) Washimwini cheñi nindi atumbanji twindi akashimwina kudi antu amavulu nikumaluña amavulu chahosheliyi nindi “yikekali wunsahu kudi akwanyuza yejima.” (Mat. 24:14; Yilw. 1:8) Hela chakwila antu etejeleña hela nehi, atumbanji twaYesu ateleleli kushimwina haWanta waNzambi niyuma yiwukela.

4. Kwesekeja naMatewu 28:18-20, chumanyi chitwatela kwila kubombela hakushimwina nsañu yaWanta?

⁴ Chumanyi chamuchiyedi chayilejeliyi Yesu atumbanji twindi nindi eli? Wayilejeli akwakumulondela kudizisha atumbanji kuhemba yuma yejima yayilejeliyi. Komana iwu mudimu wakushimwina nikudizisha wawuhanini hohu kudi atumbanji twindi amumafuku awapostolu neyi chahoshañawu antu amakwawu? Inehi, Yesu washimwini nindi iwu mudimu walema wukatwalekahu nimunanu mafuku, “kushika nikukukuma kwanshakaminu yamakonu.” (Tañenu Matewu 28:18-20.) Hadaha Yesu wahanini ilu lushimbi hampinji yamwekeniyi kudi atumbanji twindi akubadika ha 500. (1 Kor. 15:6) Muchimwenu chamumwekesheleliyi Yowanu, Yesu wamwekesheli nindi atumbanji twindi ejima atela kukwasha antu kumwiluka Yehova.—Chim. 22:17.

5. Kwesekeja na 1 AKorinda 3:6-9, Pawulu walumbulwili ñahi kunuñañana kwekala hakushimwina nikudizisha?

⁵ Kapostolu Pawulu wesekejeli mudimu wakwilisha atumbanji nakutumba mbutu, nakumwekesha nindi twatela kuzataku nyidimu yikwawu kubadika kutumba hohu mbutu. Wayilejeli akwaKorinda nindi: “Ami natumbili, Apolosi watukumwinini . . . Enu mudi iha, odu dinakudimayi Nzambi.” (Tañenu 1 AKorinda 3:6-9.) Chineli tudi akwakukalakala ‘mwiha daNzambi,’ bayi neyi twatumbaña hohu mbutuku ilaña twatukumwinaña nikutala chiyinakukula mbutu yetu yitwatumbili. (Yow. 4:35) Hampinji yoyimu, tweluka netu Nzambi diyi wakulishaña mbutu.

6. Neyi tunakudizisha antu, twatela kuyikwasha kwiladi?

⁶ Tunakukeña antu adi “nanyichima yashinshika yakukeña kwikala nawumi wahaya nyaaka.” (Yilw. 13:48) Hakwila tuyikwashi awa antu ekali atumbanji, twatela kuyikwasha kulonda (1) atiyishishi, (2) eteji (3) nawa azatisheña yuma yinakudizawu muBayibolu. (Yow. 17:3; Kol. 2:6, 7; 1 Tes. 2:13) Ejima muchipompelu atela kuyikwashaña awa atudizi aBayibolu kuhitila mukuyimwekeshela kukeña nikuyitambwila neyi anenzi nakupompa. (Yow. 13:35) Muntu wunakulombola kadizi watela kuzatisha mpinji nikuzata nañovu kukwasha kadizi windi kuleka yuma yakuhwelelayi “yashimata chikupu” hela yelañayi. (2 Kor. 10:4, 5) Hanateli kuhita tukweji twatuvulu hakwila tukwashi muntu kuhimpa kulonda yashikihu nakupapatishewa. Ilaña neyi yahimpa chinateli kumukwasha.

7. Chumanyi chatuleteshaña kuzata mudimu wakushimwina nikwilisha atumbanji?

⁷ Muloñadi chitwazatilaña mudimu wakushimwina nikwilisha atumbanji? Chatachi, muloña twamukeña Yehova. Neyi muzata nañovu kwovwahila lushimbi lwakushimwina nikwilisha atumbanji, mukumwekesha nenu mwamukeña Nzambi. (1 Yow. 5:3) Toñojokenu hachumichi: Kumukeña Yehova dikwaleteshaña mushimwineña kwitala nikwitala. Komana chayipeleleli kwovwahila ilu lushimbi? Inehi mwani. Chimwayili nakushimwina katachi, mwatiyili woma? Eña mwawutiyili! Ilaña mwelukili nenu diwu mudimu wakeñeleñayi Yesu nindi muzateña, nawa mwovwahilili ilu  lushimbi. Nawa hadaha mukuhita kwampinji, chayipelela kuzata mudimu wakushimwina. Indi kulombola kadizi waBayibolu? Komana mwatiyaña woma neyi mutoñojoka hakulombola kadizi? Hekwawu. Neyi mumulomba Yehova kulonda yayikwashi kubula kutiya woma nikwikala ahamuka kulonda mwikali nakadizi, nateli kuyikwasha kwikala namuchima wakwilisha atumbanji.

8. Kwesekeja naMaku 6:34, chumanyi chikwawu chinateli kutuletesha kudizisha antu?

⁸ Chamuchiyedi, kukeña akwetu antu dikwatuleteshaña kuyidizisha chalala. Mpinji yimu, Yesu nawatumbanji twindi azeyeli nankashi muloña wakwila ashimwinini hama. Akeñeleña iluña kwakunookela, ilaña izaza deneni dawantu dayiwanini. Yesu wayitiyilili wushona nawa watachikili kuyitañisha antu “yuma yayivulu.” (Tañenu Maku 6:34.) Wazatili nañovu hela chakwila wazeyeli. Muloñadi? Yesu welukili chatiyileñawu antu. Wamweni chakabakeneñawu, chakeñeleñawu muntu wakuyikwasha nawa wakeñeleña kuyikwasha. Dichidiwu niantu makonu. Bayi mumona hohu chinakumwekanawuku. Adi neyi mukoku wunajimbali, wunabuli kabiña wakumulombola. Kapostolu Pawulu walumbulwili antu amuchidiwu nindi amwiluka wanyi Nzambi nawa hiyakweti kuchiñejaku. (Efwe. 2:12) Adi munjila “yatwalaña kukujilumuka.” (Mat. 7:13) Neyi twiluka chidiwu antu mwiluña detu dakushimwina, kukeña niwushona kunateli kutuletesha kuyikwasha. Nawa njila yayiwahi yitunateli kuyikwashilamu hikuyidizisha Bayibolu.

9. Kwesekeja naAFwilipi 2:13, Yehova nateli kuyikwasha ñahi?

⁹ Hadaha mwatiyaña woma kulombola kadizi muloña mwatoñojokaña nenu chakeñekaña kuzatisha mpinji yeneni hakwila muloñeshi nikulombola kadizi. Neyi dichimwatiyaña, mulejenumu Yehova chimunakutiya. Mulombenu yayikwashi kwikala namuchima wakufwila kuwana kadizi nikumulombola. (Tañenu AFwilipi 2:13.) Kapostolu Yowanu watulejeli nindi, Nzambi wukwakula kulomba kunesekani nankeñelu Yindi. (1 Yow. 5:14, 15) Ilukenu chikupu nenu Yehova wukuyikwasha kwikala namuchima wakufwila kuzata mudimu wakwilisha atumbanji.

10-11. Chumanyi chinateli kutukañesha kulombola kadizi waBayibolu?

¹⁰ Twalemesha mudimu wetu wakudizisha hela chakwila tunakumona kukala kwamuchidinyi kunateli kutukañesha kuzata nañovu mumudimu wakwilisha atumbanji. Tuhanjekenu haniku kukala kukwawu nichitunateli kukumanisha.

¹¹ Hadaha hitunateli kuzata neyi chitunakukeñaku. Chakutalilahu, akwakushimwina amakwawu anashinakaji hela akatakataña. Komana ninenu dichimudi? Neyi dimu, talenu chuma chimu chitunadizili kumusoñu waCOVID-19. Tunenzi nakuwana netu tunateli kulombola atudizi aBayibolu kuzatisha mafoni etu hela yozelu yikwawu. Dichi, munateli nikutachika kulombola kadizi waBayibolu iku mudi hetala denu. Kudi cheñi chuma chikwawu chalema. Amakwawu anateli kukeña kudiza Bayibolu, ilaña mpinji yatanjikawu amanakwetu nawu ashimwineña wena ekalañahu wanyi. Hadaha anateli kwikalahu nantetemena hela nawufuku. Kwila mudiza nawu Bayibolu haniji mpinji nehi? Yesu wamudizishileña Nikodemu nawufuku chineli diyi mpinji yakeñeliyi.—Yow. 3:1, 2.

12. Yumanyi yinateli kutukwasha kwiluka netu tunateli kwikala antañishi amawahi?

¹² Tunateli kutoñojoka netu tukutwesha wanyi kulombola atudizi aBayibolu. Hadaha twatoñojokaña netu twatela kwiluka yuma  yayivulu hela jinjila jajivulu henohu kanda tutachiki kudiza namuntu. Neyi dichimwatoñojokaña, talenu jinjila jisatu jinateli kuyikwasha. Chatachi, Yehova weluka nindi munashikilimu kudizisha antu. (2 Kor. 3:5) Chamuchiyedi, Yesu ‘wudi nawuswa wejima wakutala yuma yejima yamwiwulu nihamaseki,’ wayinka mudimu wakudizisha. (Mat. 28:18) Nawa chamuchisatu, mudi nawakwenu anateli kuyikwasha. Yesu amulejeleña yuma yakuhosha kudi Tata yindi, ninenu anateli kuyikwasha. (Yow. 8:28; 12:49) Kubombelahu, munateli kuhanjeka namukulumpi wezanvu denu dakushimwina, payiniya hela namukwakushimwina wunateli kuyikwasha kutachika nikulombola kadizi waBayibolu. Njila yimu yinateli kuyikwasha kwikala antañishi amawahi, hikuzata nanawa akwakushimwina neyi anakulombola atudizi aBayibolu.

13. Muloñadi chitwatela kudizishilaña munjila jamboka-mboka?

¹³ Chinateli kutukalila hakwila twinjilili njila jajiha niyozelu yayiha. Njila yitwalombweleleñamu atudizi aBayibolu yinahimpiki. Mukanda wetu waLuñenu naWumi Haya Nyaaka!, wakeñekaña kuloñesha nikulombola atudizi munjila yambukaku nachitwalombweleña kunyima. Kutaña maparagilafu antesha nikuhanjeka nankashi nakadizi. Neyi tunakudizisha twazatishaña mavidiyo amavulu niyozelu yidi neyi JW Library^®. Neyi muneluki wanyi chakuzatisha iyi yozelu, hanjekenu namuntu wunateli kuyikwasha kwiluka chakuyizatisha. Etu antu twelaña yuma kwesekeja nachitwakeña. Chakalaña hakwila nawu twinjilili njila jajiha jakwililamu yuma. Ilaña nawukwashu waYehova niamanakwenu, chikuyipelela kwinjilila nawa mukutiyaña kuwaha kudiza nawantu. Neyi chahosheliyi payiniya wumu nindi: “Iyi njila yakudizilamu yinakukwasha kadizi nintañishi.”

14. Chumanyi chitwatela kwanukaña neyi tunakushimwina mwiluña mwabulaña antu kutiyilila kunsañu yetu, nawa 1 AKorinda 3:6, 7 yatukoleshaña ñahi?

¹⁴ Hadaha twashakamaña mwiluña mwakala kutachika atudizi aBayibolu. Antu amakwawu anateli kukaana hela kudimbulula nsañu yetu. Chumanyi chinateli kutukwasha kukuhwelela netu awa antu aketeja nsañu yamuBayibolu? Anukenu nenu chihandilu chawantu chinateli kuhimpika mukanu kaayi munenzali yuma yatama, nawa antu akaanineña nsañu yetu anateli kutachika kukeña kudiza. (Mat. 5:3) Antu amakwawu akaanineña kutambula nyikanda yetu kunyima, etejeli kudiza Bayibolu. Tweluka cheñi netu Yehova diyi Mwini mudimu wakwañula. (Mat. 9:38) Nakukeña nindi tutwalekihu kutumba nikutukumwina, ilaña yena diyi wudi namudimu wakukulisha. (1 Kor. 3:6, 7) Nawa chatukoleshaña hakwiluka netu hela chakwila tunakulombola wanyi kadizi chayinu mpinji, Yehova watufwetaña kwesekeja nachitwazataña nañovu, bayi nayuma yafumañamuku. *

15. Yehova watiyaña ñahi neyi muntu yeteja kudiza Bayibolu nawa yazatishaña yuma yinakudizayi?

¹⁵ Yehova wazañalalaña neyi muntu yeteja chalala chamuBayibolu nawa yalejeñaku antu. (Yish. 23:15, 16) Yehova watela wazañalalaña hakumona yuma yinakumwekana makonu. Chakutalilahu, muchaaka chamudimu chamu 2020, hela chakwila kwadiña musoñu waKorona twalombweli atudizi 7,705,765, nawa twakwashili antu 241,994, kudihana kudi Yehova nakupapatishewa. Awa atumbanji amaha  niwena akulombolaña atudizi aBayibolu nikwilisha atumbanji amavulu. (Luka 6:40) Chakadi nikujina, twamuzañaleshaña Yehova chitwazataña mudimu wakwilisha atumbanji.

16. Chumanyi chachiwahi chimunakufwila kwila?

¹⁶ Mudimu wakwilisha atumbanji wakala, ilaña Yehova nateli kutukwasha kudizisha atumbanji amaha kumukeña Tata yetu wamwiwulu. Komana kwila tuloñesha kulonda tutachiki kulombola kadizi waBayibolu nehi? Hadaha tunateli kuhayama hakumona chuma chinateli kumwekana, neyi twihula antu itwawanaña kulonda tutachiki kudiza nawu Bayibolu. Twatela kukuhwelela netu Yehova wukutukwasha neyi tuzataña nañovu.

17. Tunateli kutiya ñahi neyi tunakulombola kadizi waBayibolu?

¹⁷ Tukweti mudimu wakushimwina nikudizisha antu chalala. Iwu mudimu watuzañaleshaña chikupu. Kapostolu Pawulu, wakwashili antu amavulu amuTesalonika kwikala atumbanji, dichi walumbulwili chatiyiliyi nawa wahosheli nindi: “Indi kuchiñeja kwetu hela muzañalu hela chibaaba chakudisambilamu kudi Mwanta wetu Yesu hampinji yakwikalahu kwindi dichidihi? Komana hiyenuku? Chalala, enu yenu kulema kwetu, yenu muzañalu wetu.” (1 Tes. 2:19, 20; Yilw. 17:1-4) Ichi dichinakutiyawu antu amavulu nimakonu. Muhela Stéphanie hamu ninfumwindi anakwashi antu amavulu kupapatishewa wahosheli nindi: “Kwosi muzañalu wabadika iwu wakukwasha antu amavulu adihani kudi Yehovaku.”