Yehova wakeñaña antu ayedi anadisumbuli kwikala namuzañalu nikudikunda chikupu wumu namukwawu mukuhanda kwawu kwejima. (Mat. 19:4-6) Neyi munakukeña kusumbula hela kusumbuka, munateli kuwana ñahi muntu watelela? Chineli Yehova diyi nleñi yetu, weluka yuma yinateli kutuletela muzañalu hakudiluka nimuwulu. Dichi, neyi muzatishaña yishina yatwinkayi mukekala namuzañalu chikupu. Talenu iyi yishina.

Chatachi, twatela kwiluka ntahi ichi chishina chakwila nawu: “Muchima wasweja kudimbana, wadimbana chakubadika yuma yejima, wasweja nikukata.” (Yere. 17:9) Neyi antu ayedi anakukeña kudisumbula atachika kuhanjeka nikudiluka, anateli kudikeña chikupu, chakwila anateli kukañanya kufuukula mwamaana. Neyi antu anakukeña kudisumbula afuukula kushindamena hachinakutiyawu hansa yachu mwafumaña chineñi nimakumbu. (Yish. 28:26) Dimuloña waweni anakukeña kudisumbula atela kuhembelela muhita mpinji hakwila adileji chinakutiyawu hela kudikana henohu kanda adiluki chikupu.

Yishimu 22:3 yahosha nawu: “Muntu wadihoñeshaña mumuchima wamonaña katama, hakubatama; ilaña abula maana ayaña tuhu kwawu, hiyakumwenamu jakala.” Yumanyi yatama yinateli kufumamu muloña wakuzatisha mawebusayiti akudilukilahu? Chawushona, antu amakwawu atachikili kudiluka nawantu iyabula kwilukawu haIntaneti nkumininaku enjili nakwiluka nawu awa antu atachikili kudilukawu nawu ayidimbileña. Cheñi, antu abula kushinshika adimbaña antu nikuyiyila mali. Mpinji jikwawu, antu elaña yuma yamuchidiwu atwambaña nawu hiyaYinsahu.

Talenu cheñi wubanji wukwawu. Antu amakwawu azatishaña makumi kulonda ayitondeli antu amakwawu antu iyatela kudilukawu nawu. Hela chochu, kwosi wunsahu wamwekeshaña nawu iji njila jazatikaña. Chinateli kwikala hiwusupi kukuhwelela maprogiramu ahakompyuta yuma yatuñañawu antu kulonda tufuukwileñahu yuma yalema, chidi neyi kuwana muntu wakwiñila nindi muwulu. Maprogiramu ahakompyuta hiyanateli kwikala ashindamenewa kubadika yishina yamuBayiboluku.—Yish. 1:7; 3:5-7.

Chishina chekala haYishimu 14:15 chahosha nawu: “Muntu wakadi maana wetiyaña mazu ejima, ilaña muntu wadihoñeshaña mumuchima watalaña chachiwahi mwakuyayi.” Henohu kanda mufuukulihu neyi owu muntu nashikilimu kwiñila  nindi muwulu hela nehi, mwatela kusambila ntahi kumwiluka chiwahi. Ilaña himunateli kumwiluka chiwahi muntu kuzatisha Intanetiku. Hela chakwila mwaditemeshelaña nyevulu nikuhanjeka hadi mpinji yayilehi, komana mukuhosha nenu munamwiluki owu muntu chiwahi? Antu amakwawu amweneña nawu anawani muntu wakwiñila nindi muwulu atiyili kutama nankashi chadimweniwu mesu namesu nanowu muntu.

Ñimbi yamasamu wahosheli nindi: “Hinashakami hamu nawantu amaswimbuku; hinukwiñila mwaduwu akwakujinda nsañuku.” (Mas. 26:4) Antu amavulu atoñojokaña nawu chidi hohu chiwahi kutwamba haIntaneti yakudilukilahu kulonda amwekani neyi hiyantu amawahi. Anateli kusweka yilwilu yawu yatama nawa yilwilu yawu yatama hiyinateli kumwekana neyi anakutemeshela antu mamesejiku. Hela chakwila antu amakwawu anateli kuditena nawu hiyaYinsahu jaYehova, komana mwamweni apapatishewa? Komana akweti wubwambu wawuwahi naYehova? Komana muchipompelu ayiluka nawu hiyantu amawahi? Komana ekala nachakutalilahu chatama, ntahindi ekala ‘antu atama kudikunda nawu’? (1 Kor. 15:33; 2 Tim. 2:20, 21) Komana atela kwiñila muwulu kwesekeja nayishina yamuBayibolu? Mwatela kwiluka ñakwilu yanawa malwihu, ilaña chinateli kwikala chakala kwiluka ñakwilu yanawa malwihu, neyi chakwila munehuli wanyi antu amwiluka chiwahi owu muntu. (Yish. 15:22) Hela chochu, kwosi kambuña aYehova wunateli kutoñojoka kwiñila muwulu namuntu wabula kwitiya hela “kudikasa mumpaanda yimu” nanowu muntuku.—2 Kor. 6:14; 1 Kor. 7:39.

Chineli chekala chatama kuzatisha mawebusayiti akudilukilahu, kudi njila jajiwahi jakukeñelahu hela kwilukilahu muntu wakwiñila nindi muwulu. Kudihi kumunateli kuwana muntu wamuwahi wakwiñila nindi muwulu? Neyi tunatachiki dehi kupompa hamu, aYinsahu jaYehova anateli kukeña muntu wakudiluka nindi hakupompa kwahachipompelu, hakupompa kwañinza, hakupompa kweluña nihakupompa kukwawu.

Neyi chikutwesheka wanyi kuzatisha iji njila, sweje-e muyinu mpinji yachipupu chaCOVID-19, tunakuzatishaña yozelu yidi neyi mazoom niyuma yikwawu hakupompa kupompa kwahachipompelu, henaha dihu himunateli kuwana aYinsahu ajiki. Munateli kuyitiya chinakuhanawu jimpanji jawu hakupompa nichinakumwekeshawu chikuhwelelu chawu muñakwilu jawu. (1 Tim. 6:11, 12) Munateli cheñi kuhanjeka nawu mubreakout room hanyima yakupompa. Neyi munabulakani hamu nawakwenu aYinsahu munateli kutala owu muntu chinakuhanjekayi chiwahi nawantu amakwawu, nawa munateli kumwiluka chiwahi chekalayi owu muntu. (1 Pet. 3:4) Chimukuhanjekaña mukumona neyi chakwila yuma yafwilañayi kwilayi niyalemeshayi yinesekani nayenu nawa neyi wejima wenu ayedi munadishikili.

Neyi ajiki azatishaña iyi yishina yamuBayibolu hakukeña muntu wakwiñila nindi muwulu, akekala namuzañalu chikupu muwulu wawu neyi chahosha yishimu nawu: “Yowu wukuwana mumbanda [hela iyala] nawani chuma chachiwahi, namoni dehi wuselewa wakudi Yehova.”—Yish. 18:22.