Chaaka chalondelelihu, amanakwetu alejeli chisaka chaBeteli nawu kasanji kamutayi kakuSouth Africa kanakukeña akwakudihana, muloña ashileñahu ikina dadiha dakupulinta nachu. Nasonekesheli ijina dami nawa atondeli. Amanakwetu asatu ahaBeteli yamuCanada niwena ayitondeli, Dennis Leech, Bill McLellan, niKen Nordin. Atulejeli nawu tukashakamaña muSouth Africa hadi mpinji yayilehi!

Nayitemesheleli amama nakuyileja nami: “Mama, kudi nsañu yinakukeña kuyileja. Innakuya kuSouth Africa!” Amama adiña amwena, ilaña adiña nachikuhwelelu chakola niwubwambu wawuwahi naYehova. Ahosheli jajivulu wanyi, ilaña nelukili nami etejeli. Hela chakwila atata namama aneñeli nawu nikwikala kwakulehi nawena, akaanini wanyi munafuukwili.

Twasambilili kuya kuBeteli yakuBrooklyn, kwatudizishiliwu hadi tukweji tusatu chakuzata nekina dakupulinta nachu. Kuhiñahu twakandamini watu wasendaña yiteli wayileña kuCape Town, kuSouth Africa. Dihu hinashikijili yaaka 20. Yadiña mpinji yamelela yitwakandamini masuwa kufuma kuCape Town nakuya kuJohannesburg. Twemeni mumbaka yanyanya yaKaroo. Munidi iluña mwadiña lunkuñu chikupu nawa mutata. Wejima wetu awana twatalili hawindu nawa twahayamini idi iluña chidadiña. Twakameneni chitukazataña iwu mudimu wetu wawuha. Chimwahitili yaaka, hitwenjili cheñi kunawa maluña twamweni netu awa maluña adiña amawahi nawa awunda.

Mudimu wami wunazatili hadi yaaka yantesha wadiña wakuzata nekina daLinotype, kuloñesha nyifunda yajinsona kulonda apulinti magazini yaKaposhi Kakutalila niAwake! Kasanji kamutayi kapulintileña magazini mumadimi amavulu amuAfrica, bayi muSouth Africa hohuku. Twatiyileña kuwaha hakwiluka netu ikina dadiha ditwenjili nakuzatilahu kufuma kuCanada, adizatishileña nankashi!

Chimwahitili mpinji natachikili kuzatila kumaDipatimenti amboka-mboka, kwakupulintila, kwapakiñilañawu nyikanda nikudipatimenti yakubalumuna. Nadiña nanyidimu yayivulu nankashi nawa nadiña namuzañalu.

Mu 1968, nasumbwili muhela payiniya, Laura Bowen, washakamineña kwakwihi naBeteli. Niyena wadiña nakukwashaku akwakubalumuna kusoneka. Hayina mpinji kwadiña wanyi ntanjikilu yakwila nawu adisumbula amaha atela kushakama muBeteli, dichi atwinkeli mudimu wawupayiniya wadimena. Nadakameneni chantesha. Hadi yaaka 10 yinadiña haBeteli, anyinkeleña yakuda nawa nihakukaama, dichi nadakameneni nami tukutweshaña ñahi kuhanda nakadali kantesha katwinkeleñawu kuhanda nachu? Twatambwileña hamuntu-hamuntu 25 rand (hayina mpinji adiña mali hakushika ku $35, U.S.) hakakweji-hakakweji, chiña hohu tushikija maora akeñekeleña, kufuntila nikuhanda nyikanda. Awa mali diwu itwasonkeleleñamu nachu, kulandamu yakuda, kwendelamu, kushilahu tuhu nikulandamu yitumbu niyuma yikwawu yakeñekeleña.

Atutumini kuya nakuzatila kwadiña izanvu danyanya dadiña kwakwihi namusumba waDurban, kuIndian Ocean. Kwadiña antu amavulu akuIndia, amavulu adiña anyana kawantu enjili nakuzatila kuSouth Africa mukampani yashuga mu 1875. Hela chakwila azatileña nyidimu yacheñi atwalekelihu kuhemba yisemwa yawu, ntelekelu nindiilu yawu. Nawa ahosheleña English, chadiña chaswayi kuhanjeka nawu.

Hayina mpinji apayiniya adimena azatileña maora 150 hakakweji nikakweji, dichi Laura ninami twafuukwilihu kuzata maora 6 ifuku datachi. Kunidi iluña kwadiña kutata nankashi. Hitwadiña nakufuntila hela atudizi aBayiboluku, twadiña hohu namaora 6 itwatela kushimwina kwitala nikwitala. Kufuma hitwatachikili kushimwina, natalili hankoloku nawa namweni nami munahiti jiminiti 40 kufuma hitwatachikila kushimwina! Najinokeli neyi chakwila tukutwesha kuzata iwu mudimu.

Hashimbwili wanyi twaloñesheli chitwatela kuzataña. Ifuku nifuku twaloñesheleña yakuda yakusenda. Neyi tunazeyi twemikileña motoka yetu mwishina damutondu mpinji jikwawu atunyeñumukileña kudi anyana kamaIndia nakututala, muloña twamwekeneña chambukaku nawena! Hadi mafuku antesha, neyi tunazatiku dehi maora ayedi hela asatu, twelukileña wanyi chendeleña ifuku.

Twatiyileña kuwaha kushimwina chalala chamuBayibolu kudi antu ekala nachisambu amudina iluña! Antu akuIndia ekala nakavumbi, amawahi nawa amukeña Nzambi. AHindu etejeleña nsañu yitwayishimwinineña. Akeñesheleña kumwiluka Yehova, Yesu, Bayibolu, ituña dadiha mukekala kuwunda niyuma yitwachiñejaña hadi afu. Chimwahitili chaaka chimu, twekalili nawatudizi aBayibolu 20. Ifuku nifuku twadiileña hamu nachisaka chawantu itwadizishileña Bayibolu. Twatiyileña kuwaha nankashi.

Hashimbwili wanyi atutondeli kuzata wunkoñi kunyikala yekala kuchikumu chaIndian Ocean. Mulungu nimulungu, atutambwilileña muyisaka hampinji yitwayileña nakuyihempula nawa twazatilileña nawakwakushimwina amuchipompelu kulonda tuyikoleshi. Atumweneña neyi tudi yisaka yawu, twahanjekeleña nawu chiwahi nawa twadikundileña naejima muchisaka. Hahitili yaaka yiyedi. Kuhiñahu atutuminini foni kudi kasanji kamutayi. Atulejeli nawu: “Tunakuyikeña mufunti muBeteli.” Nayakwili nami: “Kunu kutunakuzatila nikwena kudi hohu chiwahi.” Hela chochu, twadihanini kuzatila kudi kwejima kukututemeshawu.

Chinafuntili muBeteli nazatilileña kuDipatimenti yaMudimu, nazatileña nawamanakwetu amavulu apama. Munana mafuku, chipompelu nichipompelu chatambwilileña mukanda kwesekeja nalipoti yahanineñayi nkoñi wañinza, hanyima yakwendela chipompelu chawu. Iyi nyikanda yadiña yakuyikolesha nikuyileja chinateli kuzatawu. Ansoneki azatileña nañovu kulonda abalumuni lipoti yatemesheleñawu ankoñi añinza kufuma muXhosa, Zulu, nimadimi amakwawu nakuleta muEnglish nawa abalumuneña kufumisha muEnglish nakuleta munyichidi yikwawu yamuAfrica. Namweni chazatileñawu nañovu awa akwakubalumuna nawa chumichi chankwashileña kwiluka kukala kwamonañawu amanakwetu niahela eyila amuAfrica.

 Hayina mpinji, nfulumendi yamuSouth Africa hiyetejeleña antu kushakama hamuku. Anyitooka ashakamineña kwankankawawu nawa antu eyila niwena ashakamineña kwakankawawu hiyayitejeleña kuhanjekaku. Amanakwetu eyila azatishileña idimi dawu, ashimwinineña mwidimi dawu nawa apompeleleña muyipompelu yamwidimi dawu.

Nayilukili wanyi antu amavulu eyila amuAfrica, chineli kwiluña kunazatilileña azatishileña idimi daEnglish. Hela chochu, nadiña nampinji yakuyiluka antu eyila amuAfrica, yisemwa yawu nitushidikilu twawu. Nelukili kukala kwamweneñawu amanakwetu muloña wayisemwa niyuma yakuhwelelawu. Adiña ahamuka akaanineña tushidikilu twabula kwitejawu munsona nawa akaanineña kupesha hela chakwila adiña nakuyidimbulula kudi antaña jawu niantu amumukala wawu! Antu amunyikala, adiña atuzweñi chikupu. Antu amakwawu adiña ataña chantesha, amakwawu nehi ilaña wonsu wawu alemesheli Bayibolu.

Nazatiliku kunyiloña yakwikala asubuka hakudifukula nikubula kudiñija munsañu jamatuña nachiyuulu. Chankolesheleña hama chinamweneña kashinshi nikuhamuka kwamwekesheleñawu atwansi aYinsahu ahañileñawu kumashikola muloña wakukaana kudiñija mumalombu nimutumina twakuchechi.

Amanakwetu amweni kukala kukwawu mwituña danyanya damuAfrica dateneneñawu nawu Swaziland. Chafwiliyi Mwanta Sobhuza Wamuchiyedi, antu ejima ayilejeli nawu eli tushidikilu twelañawu antu neyi muntu nafwi. Amayala ayilejeli kutewula tuwewula, nawa awambanda niwena ayilejeli kulela nsuki jawu. Amanakwetu niahela amavulu ayikabishili muloña wakukaana kudiñija munitu tushidikilu twakudifukula kudi ankakulula. Twatiyili kuwaha chikupu chiyatwalekelihu kwikala ashinshika kudi Yehova! Kudi amanakwetu amuAfrica twadizililiku kwikala ashinshika, adiwunjika nawa chumichi chakolesheli chikuhwelelu chetu.

Mu 1981, nafuntili cheñi kumudimu wakupulinta nakukwashana kulonda eluki chakupulinta kuzatisha makompyuta. Natiyili kuwaha nankashi. Njila jakupulintilamu jahimpikileña. Kampani yimu yenkeli kasanji ikina dadiha nawu adeseki kudizatisha chawana. Chumichi chatuletesheli kuleka  kuzatisha ana makina amakulu 9, nakuhiñishahu makina atanu amaha. Twashilihu cheñi ikina dadiha dakupulinta nachu. Twapulintileña nyikanda yayivulu kubadika kunyima.

Awa makompyuta atukwashileña kuzatisha njila jajiha jakuloñeshelamu nsona hamafu ayipapilu kuzatisha MEPS. Jakutuñatuña jinakuyilaku hambidi kufuma hitwenjili etu awana kufuma kuBeteli yamuCanada kwinza nakuzatila kunu kuSouth Africa! (Isa. 60:17) Hayina mpinji wejima wetu twasumbwili ahela awana amukeña Yehova. Ami nimanakwetu Bill twachidiña nakuzatila haBeteli. Ilaña Ken niDennis ashakamineña kwakwihi nakuhemba yisaka.

Hakasanji hadiña nyidimu yayivulu. Kwadiña kubalumuna nyikanda yayivulu yashindamena haBayibolu nikuyipulinta mumadimi amavulu avulilileñaku, nawa ayitemesheleña kutusanji tukwawu. Dichi kwakeñekeleña kutuña kasanji kakwawu. Amanakwetu atuñili kasanji kakwawu kakawahi kumujika waJohannesburg, nawa akihanini kudi Yehova mu 1987. Natiyaña kuwaha kuzataku nyidimu yejima iyi nikukalakala neyi membala wamuKometi yamutayi muSouth Africa hadi yaaka yayivulu.

Mu 2001, twahayamini muloña antambikili nawu niyi nakwikala membala wamuKometi yaKasanji Kamutayi kamu United States. Hela chakwila twaneñeli kushiya mudimu wutwazatileña niamabwambu muSouth Africa, twazañaleli hama kutachika kuzatila muchisaka chaBeteli kuUnited States.

Hela chochu, twakameneni nankashi kuyishiya amama yañodami Laura, adiña akula dehi. Hitwayikwashileña nankashiku muloña twadiña kuNew York, ilaña anyiki jaLaura asatu ayikwashileña kumujimba, muyitoñojoka nimunsañu jamali. Ahosheli nawu: “Kwila twikala mumudimu wampinji yejima nehi, ilaña neyi tuyihembaña amama, chikuyikwasha enu kutwalekahu kuzata mudimu wenu.” Twayisakililaña nankashi.

Ayayami niañodawu niwena ashakamineña kuToronto, Canada, ayakameneneña amama adiña anfwila. Hayina mpinji, amama ashakamini nawayaya niañodawu hadi yaaka kubadika ha 20. Twasakililaña nankashi hakukeña nichadihaniniwu kulonda ayakameneni sampu nichafwiliwu hampinji yitwenjili muNew York. Twasakililaña nankashi kwikala nawantu amuchisaka adihanaña kulonda ahimpi chihandilu chawu nakwakamena anvwali akula dehi, mudimu wakala chikupu!

Hadi yaaka yayivulu, mudimu wami kuUnited States wadiña wakuzatila kunyikanda, makonu anawupeleshiku. Ichi nazatilaña kuDipatimenti Yatalaña Kujakulanda-landa. Hadi yaaka 20 yinahitihu, nadiluñishi kuzatila hakanu kasanji keneni hadi akwaBeteli akushika ku 5,000 kushilahu niantu amenekaña akushika ku 2,000!

Yaaka 6 yinahitihu, natañojokeleña wanyi nami nakekala kwenakunu. Laura nankwashi chikupu namuchima windi wejima yaaka yejimiyi. Nadiluñishi chihandilu chachiwahi chikupu! Twalemesha nyidimu yashiyashana yitunazati, niantu ejima itunazati nawu kushilahu niadi hatusanji twatuvulu tutunendeli nakuzatilahu nyidimu yaBeteli mumaluña amavulu amukaayi. Ichi chineli nidi dehi nayaaka kubadika ha 80, nazataña nyidimu yantesha muloña kudi amanakwetu atwansi, anadizishiwu kuzata iyi nyidimu.

Ñimbi yamasamu wasonekeli nindi: “Muza wukweti Nzambi yawu Yehova wunakooleki.” (Mas. 33:12) Dimu! Nasakililaña nankashi muloña namukalakeli Yehova hamu nawantu jindi amuzañalu.