1, 2. Bayibolu yahosheleñahu dehi nawudi hakuvula kwawantu jaYehova?

MUKAAYI kejima, kwekala kuloñesha kumu kwekala nawantu amukeña Yehova nawa akeñaña kumukalakela. Awa antu hiyaYinsahu jaYehova. Hela chakwila awanina wanyi nawa aluwañeshaña, Yehova wayilombolaña naspiritu yindi yajila. Tushinshikenu chinayikiswiliyi.

² Mu 1914, kwadiña hohu antu antesha adifukwileña kudi Yehova. Ilaña Yehova nakiswili mudimu wakushimwina. Chinafumimu, antu amavulu anadizi chalala chamuBayibolu nawa anekali aYinsahu jindi. Yehova walumbulwili iku kuvula chikukekala hahosheliyi nindi: “Kakehelamu kakabalumuka ikombakaji, wadiñi wanyanya wakekala muza wañovu. Ami Yehova yami nakachinyakisha hamwaka wachu.” (Isaya 60:22) Makonu tunakumona iwu wuprofwetu  chiwunakushikijewa. Antu jaYehova adi neyi muza weneni. Muloña mukaayi kejima mwekala nyuza yayivulu yidi nawantu antesha kubadika kuvula kwawantu jaYehova.

3. Ambuña aYehova anamwekeshi ñahi kukeña?

³ Munanu mafuku akukuminina, Yehova nakwashi antu jindi kudikeña wumu namukwawu. “Nzambi diyi kukeña,” nawa antu jindi amwimbujolaña. (1 Yowanu 4:8) Yesu walejeli atumbanji twindi ‘kukeñañana.’ Wayilejeli cheñi nindi: “Neyi mukukeñañana, dihu hakayilukilawu antu ejima nawu mudi atumbanji twami.” (Yowanu 13:34, 35) Mumafuku akunyima, ambuña aYehova amwekesheli nawu akeña akwawu nihampinji yazuñileña nyuza njita. Chakutalilahu, antu kwakwihi na 55 miliyoni afwili munjita yakaayi yamuchiyedi. Ilaña antu jaYehova adiñijili wanyi muniyi njita. (Tañenu Mika 4:1, 3.) Chumichi chinayikwashi kubula kwikala “namuloña wamashi awantu ejima.”—Yililu 20:26.

4. Muloñadi kuvula kwawantu jaYehova chikunekalili kwakuhayamisha?

⁴ Antu jaNzambi anakuvulilaku hela chakwila adi nachilumbu muneni, Satana. Diyi “nzambi yampata yamakonu.” (2 Akorinda 4:4) Satana walombolaña mapolitiki amunu mukaayi niakwayikunzulemba nawa wayizatishaña kulonda yakañeshi mudimu wakushimwina. Ilaña wukutwesha wanyi kukañesha iwu mudimu. Hela chochu, Satana neluki nindi nashali nakapinji kantesha, dichi nakuzata nañovu kulonda atukañeshi kudifukula kudi Yehova.—Chimwekeshu 12:12.

5. Muloñadi amanakwetu chiyanateli kutuneñeshelawu mpinji yikwawu? (Talenu mwevulu wakutachikilahu.)

⁵ Antu jaNzambi eluka nawu kukeña Yehova niantu kwalema nankashi. Yesu wahosheli nindi: “Keñaku Yehova Nzambi yeyi namuchima weyi wejima, nawumi weyi wejima, namaaneyi ejima. Dilu lushimbi lwabadika lwakusambila. Kudi nawa lwamuchiyedi lwafwana neyi ilu nawu, Keñaku mukwenu neyi chiwadikeña eyi aweni.” (Matewu 22:35-39) Hela chochu, Bayibolu yahoshaña nawu antu ejima awanina wanyi muloña wanshidi yaAdama. (Tañenu Aroma 5:12, 19.) Dichi mpinji yikwawu amanakwetu muchipompelu anateli kuhosha hela kwila yuma yikutuneñesha. Neyi chumichi chimwekana, tukwila ñahi? Tukutwalekahu kumukeña Yehova? Twikwikala ashinshika kudi Nzambi niantu jindi? Bayibolu yatulejaña antu jaNzambi ahosheli hela elili yuma yaneñesheli akwawu. Tushinshikenu chitunateli kudizila kuyuma yeliliwu.

6. Eli wakañenyi ñahi kubabesha anyanindi?

⁶ Chakutalilahu, Eli wadiña kapristu muneni muIsarela, ilaña anyanindi ayedi adiña nakwovwahila wanyi nshimbi jaYehova. Bayibolu yahoshaña nawu: “Anyana kaEli adiñi antu amukunkulwayi, hiyamwilukili Yehovaku.” (1 Samweli 2:12) Eli welukili nindi anyanindi elileña yuma yatama nankashi. Ilaña wayibabesheleña. Chimwahitili mpinji, Yehova wamubabesheli Eli nianyanindi awamayala ayedi. Kuhiñahu, Yehova hetejeli cheñi antu  amuchisaka chaEli kwikala atupristuku. (1 Samweli 3:10-14) Mwadi kwila ñahi neyi mwadiñaku mumafuku aEli halekeliyi anyanindi kwila nshidi yahamesu bwi? Komana chikuhwelelu chenu chadi kuzeya nikuleka kumukalakela Yehova muloña waniyi yuma?

7. Nshidinyi yakoñeliyi Davidi, nawa Nzambi welili ñahi?

⁷ Davidi wadiña nayilwilu yayiwahi, dichaletesheli Yehova yamukeñi nankashi. (1 Samweli 13:13, 14; Yilwilu 13:22) Hela chochu, Davidi niyena wakoñeli nshidi. Uriya chayiliyi kunjita, Davidi welili wuvumbi naBatisheba ñoda Uriya, nawa wemitili. Davidi wakeñeleña wanyi antu kwiluka yuma yeliliyi. Dichi walejeli Uriya kufunta kunjita kwayiliyi, nawa wamukanjikijili kuya kwitala dindi. Davidi watoñojokeleña nindi Uriya wukukaama nañodindi kulonda chemitayi antu akamoni nawu diyi mweni mwana. Ilaña Uriya wayili wanyi kwitala. Dichi Davidi wakwatili kafuta kakumujaha Uriya kunjita. Hamuloña wanshidi yahamesu bwi-i yakoñeliyi, Davidi nichisaka chindi ayibabesheli. (2 Samweli 12:9-12) Ilaña Yehova wamutiyilili luwi nawa wamwanakeneni. Welukili nindi Davidi wadiña muntu wamuwahi. (1 Anyanta 9:4) Neyi mwadiñaku, mwadi kutiya ñahi nanshidi yakoñeliyi Davidi? Mwadi kuleka kumukalakela Yehova?

8. (a) Kapostolu Petulu wakañenyi ñahi kwila mwahosheliyi? (b) Muloñadi Yehova chatwalekelihu kumuzatisha Petulu nihanyima yakuluwañesha?

⁸ Chakutalilahu chikwawu chamuBayibolu chakapostolu Petulu. Yesu wamutondeli kwikala kapostolu. Hela chochu,  mpinji yikwawu Petulu waluwañesheleña. Chakutalilahu, Petulu wahosheli nindi wakamushiya wanyi Yesu hela chakwila ejima akamushiya. (Maku 14:27-31, 50) Ilaña chamukwatiliwu Yesu, apostolu indi ejima, kushilahu niPetulu amushiyili. Nawa, Petulu wahosheli kapampa kasatu nindi wamwilukili wanyi Yesu. (Maku 14:53, 54, 66-72) Ilaña Petulu waneñeli nankashi nayuma yeliliyi. Dichi Yehova wamwanakeneni nawa watwalekelihu kumuzatisha. Neyi mwadiña kambanji hayina mpinji nawa mwiluka yuma yeliliyi Petulu, mwadi kutwalekahu kumukuhwelela Yehova?

9. Muloñadi chimwakuhwelela nenu Nzambi welaña yuma yaloña?

⁹ Iyi yakutalilahu yejima yinakumwekesha nawu ambuña aYehova akoñeleña yuma yatama nikuneñesha akwawu. Neyi chuma chamuchidiwu chiyimwekena, mukwila ñahi? Mukuleka kupompa, kumukalakela Yehova nikudikunda nawantu jindi? Tahindi mwakeluka nenu Yehova wukweti luwi nawa hadaha nakuhembelela muntu nindi yabalumuki? Ilaña mpinji yikwawu muntu wunavulumuni nateli kubalumuka wanyi mumuchima. Mukukuhwelela nenu Yehova neluki iyi yuma nawa wakazatilahu hampinji yatelela? Nateli nikumuhaña iwu muntu muchipompelu neyi nakeñi. Mwakuhwelela nenu Yehova welaña yuma yaloña mpinji yejima?

10. Yesu welili ñahi nayiluwa yaYudasi Isakaroti niPetulu?

¹⁰ Twatañaña muBayibolu hadi antu adiña ashinshika kudi Yehova nikudi antu jindi hela chakwila antu adiñawu nawu akoñeleña yiluwa yamaneni. Chakutalilahu, toñojokenu hadi Yesu. Hanyima yakulomba wufuku wejima kudi Tata yindi nindi yamukwashi, watondeli apostolu 12. Ilaña wumu hakachi kawu, Yudasi Isakaroti, wamufukejeli. Kapostolu Petulu niyena wahosheli nindi wamwilukili wanyi Yesu. (Luka 6:12-16; 22:2-6, 31, 32) Yesu wamuhililili wanyi Yehova hela atumbanji twindi chelili amuneñeshi kudi amakwawu. Ilaña, Yesu hamushiyili Tata yindiku, nawa watwalekelihu kumukalakela nakashinshi. Dichi, Yehova wamukiswilili kuhitila mukumusañula nikumuswanyika neyi Mwanta waWanta mwiwulu.—Matewu 28:7, 18-20.

11. Bayibolu yahosheli nawudi kutalisha hadi ambuña aYehova munanu mafuku?

¹¹ Chuma cheliliyi Yesu chatudizishaña kwikala ashinshika kudi Yehova niantu jindi. Dichi twatela kumwimbujola. Mwalala Yehova nakulombola ambuñindi munanu mafuku akukumina. Nakuyikwasha kushimwina chalala mukaayi kejima nawa diwu hohu anakuzata iwu mudimu. Cheñi, anuñañana nawa adi namuzañalu muloña wayuma yinakuyidizishayi Yehova. Yehova  wahosheli nindi: “Tiyenu, ambuñami akembaña tumina twachiseki mumuchima.”—Isaya 65:14.

12. Twatela kumona ñahi yiluwa yamanakwetu niahela?

¹² Tudi namuzañalu muloña Yehova nakutulombola nikutukwasha kwila yuma yayiwahi. Ilaña, antu mukaayi kaSatana hiyakweti muzañalu nikuchiñeja kwalalaku. Chikutama neyi muntu wukushiya Yehova niantu jindi muloña muntu wumu muchipompelu naluwañeshi hela namuneñeshi. Twatela kwikala ashinshika kudi Yehova nikulondela wunlomboli windi. Twatela cheñi kwiluka chitwatela kumonaña yiluwa yawamanakwetu niahela.

13, 14. (a) Muloñadi wutwatela kwikalila adiwunjika kudi wumu namukwawu? (b) Mazwinyi itwatela kwanukaña?

¹³ Mukwila ñahi neyi manakwenu yayineñesha munhoshelu hela muyilwilu? Bayibolu yatufumbaña nawu: “Bayi wunyakala kuzuwa mumuchima weyuku; muloña kuzuwa kwashakama muntulu jawayisupi.” (Mukwakutaŋisha 7:9) Wejima wetu twawanina wanyi nawa twaluwañeshaña. Dichi tunateli kukuhwelela netu amanakwetu niwena akuluwañeshaña. Nawa tukuluwañesha neyi tukutoñojokaña hayiluwa yawu. Neyi tukutoñojokaña hayiluwa yawakwetu tukumukalakelaña wanyi Yehova namuzañalu. Ilaña chuma chikusweja kutama, chikuhwelelu chetu chikuzeya nawa tunateli nikufuma mukuloñesha kwaYehova. Kuhiñahu, tukuleka kumukalakela Yehova nikubula kwikala nakuchiñeja kwakushakama mwituña dadiha.

¹⁴ Hanu dinu, mukutwalekahu ñahi kumukalakela Yehova namuzañalu neyi amanakwenu niahela ela yuma yatama? Mwanukeña mazu akukundeja ahosheliyi Nzambi nindi: “Tiyenu, hinukuleña mawulu amaha, nimaseki amaha, yuma yakusambila hiyakayanuka nawaku, hiyakenza nikumuchimaku.” (Isaya 65:17; 2 Petulu 3:13) Yehova wukayinka iji nkisu neyi mukutwalekahu kwikala ashinshika.

15. Yesu wahosheli nindi twatela kwiladi neyi akwetu analuwañeshi?

¹⁵ Hela chochu, kanda twiñili mwituña dadiha. Dichi neyi muntu natuneñeshi, twatela kutoñojoka hayuma yinakukeñayi Yehova nindi twili. Chakutalilahu, Yesu wahosheli nindi: “Neyi mukwanakena antu nyiloña yawu, niTata yenu wamwiwulu wakayanakena ninenu nawa. Neyi mukubula kwanakena antu nyiloña yawu, Tata yenu niyena hakayanakena nyiloña yenuku.” Petulu chamwihwiliyi Yesu neyi twatela kwanakena “mapampa katanu nakayedi,” Yesu wamwakwili nindi:  “Kakashiki mumakumi atanu nayedi, mapampa katanu nakayedi.” Yesu watulejeli nindi twatela kwanakenaña akwetu mpinji yejima.—Matewu 6:14, 15; 18:21, 22.

16. Yumani yayiwahi yeliliyi Yosefu yitwatela kwimbujola?

¹⁶ Chakutalilahu chaYosefu chatudizishaña chitwatela kwila neyi akwetu anatwili katama. Yosefu namanakwindi wakansi diwu adiña anyana kaYakoba naRacheli hohu. Yakoba wadiña cheñi nawanyana 10, ilaña wakeñelihu nankashi Yosefu kubadika ejima. Chumichi chaletesheli amanakwindi kumutiyila Yosefu ichima. Dichi, amuheleli nankashi chakwila amulandishili muwunduñu kuEjipitu. Chimwahitili yaaka yayivulu, mwanta wakuEjipitu wamwilishili Yosefu kwikala chinlonda chindi mudina ituña muloña watiyili kuwaha nachazatileñayi. Kuhiñahu amanakwaYosefu enjili kuEjipitu nakulanda yakuda muloña wanzala yadiña mwituña dawu. Chamumweniwu Yosefu, hiyamwilukiliku, ilaña yena wayilukili. Hela chakwila amwilili katama, hayibabesheliku. Ilaña wayesekeli kulonda yamoni neyi mwalala ahimpa. Yosefu chelukiliyi nindi ahimpa, wayilejeli nindi himanakwawu. Kuhiñahu wayikundejeli nawa wayilejeli nindi: “Bayi mutiyaña womaku, nukuyidiishaña ninenu nianyanenu anyanya.”—Kutachika 50:21.

17. Munakukeña kwiladi neyi akwenu ayila katama?

¹⁷ Mwatela kwiluka nenu chineli wejima wetu twaluwañeshaña, ninenu nawa munateli kuneñesha akwenu. Dichi neyi mwiluka nenu munaneñeshi mukwenu, mwatela kulondela kufumba kwamuBayibolu. Lombenu kwanakena nawa fwilenu kuleta kuwunda. (Tañenu Matewu 5:23, 24.) Twatiyaña kuwaha neyi atwanakena. Dichi ninetu twatela kwanakenaña. Akolose 3:13 yatulejaña nawu: ‘Nakudovwahila nikudanakena muntu namukwawu. Neyi kudi muntu wukweti muloña namukwawu amwanakeni; chayanakenenuwu enu kudi Yehova, ninenu nawa ilenu chochimu.’ Neyi twayikeña amanakwetu, tukutwalekahu wanyi kwikala ahila muloña wayuma yakoñeliwu kunyima. (1 Akorinda 13:5) Nawa neyi tukwanakenaña akwetu, Yehova niyena wukatwanakena. Dichi neyi akwetu anakoñi chiluwa, twatela kuyitiyila luwi neyi chatutiyilañayi luwi Tata yetu Yehova.—Tañenu Masamu 103:12-14.