1, 2. Nzambi wamutenenenidi Danyeli nindi “muntu wasweja kukeñewa,” nawa tunateli kwikala ñahi ovwahila neyi Danyeli?

A YUDEYA chayitwaliliwu muBabiloni, atachikili kushakama mumusumba mwadiña ankishi niantu adifukwileña kudi aspiritu atama. Hela chochu, aYudeya ashinshika adi neyi Danyeli niamabwambu jindi asatu, akaanini kuyiluwañesha kudi antu amuBabiloni. (Danyeli 1:6, 8, 12; 3:16-18) Danyeli niamabwambu jindi amwitejeli Yehova kwikala Kañemi kawu nikutwalekahu kudifukula kudi yena. Hela chakwila Danyeli washakamineña nawantu atama, kañelu kaNzambi wamuteneni nindi wadiña “muntu wasweja kukeñewa.”—Danyeli 10:11, 19.

² Kunyima, kañemi washileña ndambu mwakuwumbila iwumba kulonda yawumbi chuma chinakukeñayi. Makonu, akwakudifukula alala eluka nawu Yehova diyi Nyuuli wabadika mukaayi kejima nawa wukweti ñovu yakuwumba nyuza. (Tañenu Yeremiya 18:6.) Nzambi wukweti cheñi ñovu yakutuwumba wejima wetu. Hela chochu, Yehova watukanjikijaña wanyi kuhimpa. Ilaña wakeñaña nindi tudihani kulonda  yatuwumbi. Muchinu chibaaba, tukudiza chitunateli kwikala neyi ndambu yayovu mumakasa aNzambi. Tukuhanjeka hanawa malwihu asatu: (1) Tunateli kutondolwela ñahi yilwilu yinateli kutuletesha kukaana kufumba kwaNzambi nikwikala neyi ndambu yakola? (2) Tunateli kwikala ñahi nayilwilu yikutukwasha kwikala ovwahila nikwikala neyi ndambu yayovu? (3) Anvwali akwaKristu anateli kuzatila ñahi hamu naNzambi neyi anakuwumba anyanawu?

3. Yilwilwinyi yinateli kuchinchikisha muchima wetu? Lumbululenu.

³ Yishimu 4:23 yahosha nawu: “Hembaku muchima weyi chakubadika chiwahembaña yuma yejima, muloña mwenomu dimu mwedikaña wumi.” Hakwila nawu tuhembi muchima wetu wubuli kuchinchika, twatela kutondolwela yilwilu yidi neyi kudivwimba, kuvulumuna nikubula chikuhwelelu. Neyi kubabala nehi, yilwilu yamuchidiwu yinateli kutuleñela kubula kwovwahila nikudikaña. (Danyeli 5:1, 20; Aheberu 3:13, 18, 19) Dichamumwekeneni Mwanta wawaYuda Uziya. (Tañenu 2 Kushindulula 26:3-5, 16-21.) Hatachi, Uziya wadiña wovwahila nawa wadiña nawubwambu wawuwahi naNzambi, dichi Nzambi wamwinkeli ñovu. Ilaña “chakwatiliyi ñovu hakudivwimba mumuchima windi.” Wadivwimbili chakwila wakeñeli kwocha insensi hatembeli hela chakwila atupristu hohu diwu ateleleli kuzata iwu mudimu. Atupristu chamulejeliwu nawu naluwañeshi, Uziya wahilili nankashi! Yehova wamusawili iwu mwanta wadivwimba nawa wadiña nambumba sampu nichafwiliyi.—Yishimu 16:18.

4, 5. Chumanyi chikutumwekena neyi tukubula kutondolwela chilwilu chakudivwimba? Hanenu chakutalilahu.

⁴ Neyi twikala adivwimba, tukutachika kudimona netu twabadika akwetu nawa tukukaanaña nikufumba kwamuBayibolu. (Yishimu 29:1; Aroma 12:3) Dichayimwekeneni aJim aeluda. Aditadikishili nawakwawu aeluda muchipompelu hansañu yamwekeni. A Jim ahosheli nawu, “Nalejeli amanakwami nami atama muchima, dichi nanyamukili nakuya kwitala.” Chimwahitili tukweji 6, abuukilili kuchipompelu chikwawu ilaña ayitondeli wanyi kwikala eluda. A Jim ahilili nankashi. Muloña elukili chikupu nawu aluwañesheli wanyi, dichi alekeli kumukakela Yehova chakwila azeyeli kuspiritu hadi yaaka 10. Ahoshaña nawu adiña adivwimba nawa nawu atachikili kumutwika Yehova nyiloña hayuma yamwekeneña. Amanakwetu ayendeleli nakuyikwasha hadi yaaka yayivulu, ilaña aJim akaanineña.

⁵ A Jim ahosheli nawu, “Nakañenyeña kuleka kutoñojoka hachiluwa chakoñeliwu amanakwami.” Chuma cheliliwu chinakumwekesha nawu kudivwimba kunateli kutuletesha tubuli kwiteja yiluwa yetu. Neyi tukubula kwiteja yiluwa yetu, tukwikala wanyi neyi ndambu yayovu. (Yeremiya 17:9) Ayihilishahu dehi kudi manakwetu hela muhela? Komana mwatwalekelihu kwikala aneña chayitambwiliwu kukooleka kumwadiña naku? Mwelili ñahi? Mwadivwimbili, tahindi mwelukili nenu kwikala mukuwunda nawamanakwenu nikwikala washinshika kudi Yehova dichuma chalema?—Tañenu Masamu 119:165; Akolose 3:13.

6. Chumanyi chikumwekana neyi tukoñaña nshidi?

⁶ Neyi muntu yatwalekahu kukoña nshidi  nawa nakusweka yuma yinakwilayi, chikumukalila kwiteja kufumba kwaNzambi. Nawa chikwikala chaswayi kuvulumuna. Manakwetu wumu wahosheli nindi, mukuhita kwampinji watachikili kumona neyi waluwañesheleña wanyi. (Mukwakutaŋisha 8:11) Manakwetu mukwawu wadiña nachaaku chakutala nyevulu yanzekesi wahosheli nindi, “Natachikili kumona aeluda nami atama.” Chaaku chindi chatama chaluwañesheli wubwambu windi naYehova. Antu amakwawu chelukiliwu chuma chelileñayi, amukwashili kudi aeluda. Wejima wetu twawanina wanyi. Ilaña neyi twikala akalisha kudi antu anakutufumba hela tuleyaleyaña neyi tunaluwañeshi chatela tulombi Nzambi yatwanakeni nikutukwasha, muchima wetu wukuchinchika.

7, 8. (a) AIsarela akushankulu amwekesheli ñahi kubula chikuhwelelu? (b) Tukudizilaku kwodi?

⁷ Yehova chayifumishiliyi aIsarela muEjipitu, amweni yihayamisha yayivulu yakoñeliyi. Ilaña chashikiliwu kwakwihi nakwiñila Mwituña daChikaninu, nyichima yawu yachinchikili. Muloñadi? Amukuhweleleli wanyi Nzambi. Chatela amukuhweleli Yehova, atiyili woma nawa atachikili kumutobela Mosi. Akeñeleña nikufunta kuEjipitu, kwadiñawu muwuduñu! Yehova wahilili nankashi nawa wahosheli nindi: “Awa antu saña andiwilawu tahindi?” (Kuchinda 14:1-4, 11; Masamu 78:40, 41) Ana aIsarela afwilili muchinkalampata muloña wakuchinchika kwanyichima yawu nikubula chikuhwelelu.

⁸ Makonu, tudi kwakwihi nakwiñila mwituña dadiha, nawa chikuhwelelu chetu chidi mukweseka. Dichi twatela kudishinshika kulonda twiluki neyi tudi nachikuhwelelu chakola. Hanu dinu tunateli kwiluka ñahi netu tudi nachikuhwelelu chakola? Twatela kutoñojoka hamazu aYesu ekala haMatewu 6:33. Dihulenu nenu: ‘Komana yuma yinafwilaña kwila kumbidi nikufuukula kwami yamwekeshaña nawu nakuhwelela chikupu mazu aYesu? Nateli kujiña kukupompa hela kubula kuya mumudimu wakushimwina kulonda nikali namali amavulu? Nateli kwila ñahi neyi mudimu wami wunakunmanishila mpinji yeneni niñovu? Nikwiteja kaayi kuwumba hela kunkañesha kumukalakela Yehova?’

9. Muloñadi wutwatela ‘kwesekela’ neyi chakwila tukweti chikuhwelelu, nawa tunateli kwila ñahi mwenimu?

⁹ Nyichima yetu yikuchinchika neyi tukulondela wanyi chahosha Bayibolu hakudikunda nawantu atama, ahañawu muchipompelu niyisela. Munateli kwila ñahi neyi mukañanya kwovwahila? Mwatela kudishinshika swayi swayi mumoni neyi mudi nachikuhwelelu. Bayibolu yahoshaña nawu: “Desekenu ntahi, mutali neyi mudi mukwitiya kwakukuhwelela; dishinshikenu.” (2 Akorinda 13:5) Zatishenuña Izu  daNzambi mpinji yejima kulonda mwololi yitoñojoka yenu.

10. Yumanyi yinateli kutwikwasha kwikala neyi ndambu yayovu mumakasa aYehova?

¹⁰ Yehova watwinka Izu dindi, chipompelu chawakwaKristu nimudimu wakushimwina kulonda twikali neyi ndambu yayovu. Neyi tutañaña Bayibolu nikutoñojokahu mpinji yejima, tukwikala neyi ndambu yayovu mumakasa aYehova nawa wukutuwumba. Yehova wayilejeli anyanta awaIsarela kukopa mukanda waNshimbi jaNzambi nikuwutaña mafuku ejima. (Kuhituluka 17:18, 19) Apostolu elukili nawu kutaña haNsona nikutoñojokahu kukuyikwasha mumudimu wakushimwina. Azatishileña Nyikanda yachiHeberu mapampa kakavulu hasonekeleñawu nyikanda yawu, nihampinji yashimwinineñawu akolesheleña antu kuzatisha Nsona. (Yililu 17:11) Munjila yoyimu, ninetu tweluka netu chalema kutaña Izu daNzambi mafuku ejima nikutoñojokahu. (1 Timotewu 4:15) Ichi chatukwashaña kwikala adizoza, nawa Yehova wukutwesha kutuwumba.

11, 12. Yehova nateli kuzatisha ñahi chipompelu hakutuwumba wejima wetu? Lumbululenu.

¹¹ Yehova weluka kuzeya zeya kwetu hamuntu hamuntu nawa wazatishaña chipompelu chawakwaKrstu kutuwumba. A Jim itwatena hakusambila, atachikili kuhimpa yilwilu yawu chayimwekesheleliwu kukeña kudi eluda. A Jim ahosheli nawu: “Wanfwishileña wanyi nanyiloña hela kunhoshola muloña wayilwilu yami yatama.  Ilaña wankolesheleña nawa wamwekesheli nindi wakeñeleña kunkwasha.” Chimwahitili tukweji tusatu, iwu eluda wayitambikili aJimu kukupompa. A Jim ahosheli nawu amanakwetu niahela ayitambwilili chiwahi nawa kukeña kwamwekesheliwu kwayikwashili kuhimpa yitoñojoka yawu. Elukili nawu chiyatiyileñawu chadiña chalema wanyi. A Jim ayikolesheli kudi amwinikwawu nikudi aeluda muchipompelu, nawa atachikili kumukalakela Yehova cheñi. A Jim aheteleli cheñi mukutaña yibaaba yahosheleña nawu “Jehovah Is Not to Blame” (Hitwatela Kumutwika Yehova Muloñaku), “Serve Jehovah Loyally,” (Mukalakelenu Yehova naKashinshi) yadiña muKaposhi Kakutalila kachizungu kaNovember 15, 1992.

¹² Mukuhita kwampinji, aJim ekalili cheñi aeluda. Kufuma tuhu yinampinji, anakwashi amanakwetu amakwawu kumanisha kukala kwokumu nikukolesha chikuhwelelu chawu. Ahosheli nawu, amweneña nawu adiña nawubwambu wawuwahi naYehova komana nehi. Aditoñeshaña chashiliwu maana hayiluwa yawakwawu muloña wakudivwimba chatela ashi maana hayuma yalema.—1 Akorinda 10:12.

13. Mudimu wakushimwina watukwashaña kwikala nayilwilwinyi, nawa yumanyi yafumañamu?

¹³ Mudimu wakushimwina niwena wunateli kutuwumba nikutukwasha kwikala antu amawahi. Munjilanyi? Hakushimwina nsañu yayiwahi, twatela kumwekesha yilwilu yidi neyi kudizoza ninyikabu yashiyashana yaspiritu yaNzambi. (Aŋalija 5:22, 23) Toñojokenu hayilwilu yayiwahi yimunekali nayu muloña wakuzata mudimu wakushimwina. Neyi tumwimbujola Kristu, antu akwiteja nsañu yitwayishimwinaña nawa akutukeña. Chakutalilahu, aYinsahu ayedi kuAustralia akeñeleña kushimwina kudi wamumbanda, ilaña wadiña wazuwa nawa wawinyi. Hela chochu, aYinsahu atiyilili mwayilejeliyi. Kuhiñahu, ona mumbanda welukili nindi waluwañesheli dichi wasonekeli mukanda kukasanji kamutayi. Wadanakeneni. Wahosheli nindi, “Nidi chileya hakuhaña antu ayedi anakushimwina Izu daNzambi.” Ichi chakutalilahu chinakumwekesha nawu twatela kwikala awunda neyi tunakushimwina. Mwalala mudimu wetu wakushimwina wakwashaña antu amakwawu, ilaña ninetu watukwashaña kuwahishaku yilwilu yetu.

14. Anvwali atela kwiladi hakwila nawu awumbi anyanawu chiwahi?

¹⁴ Atwansi amavulu ekala adizoza nawa afwilaña kudiza. (Matewu 18:1-4) Dichi anvwali atela kukwasha anyanawu kwiluka chalala nikuchikeña henohu achidi atwansi. (2 Timotewu 3:14, 15) Hakwila nawu anvwali eli mwenimu, atela kukeña chalala awenawu nikuzatisha yuma yadizañawu muBayibolu muchihandilu chawu. Neyi anvwali ela mwenimu, anyana chikuyipelela kukeña chalala. Cheñi, anyana akwiluka  nawu kufumba kwawanvwali jawu kwamwekeshaña nawu ayikeña kudi anvwali jawu nikudi Yehova.

15, 16. Anvwali atela kumwekesha ñahi nawu amukuhwelela Nzambi neyi mwanawu amuhaña muchipompelu?

¹⁵ Hela chakwila anvwali adizishaña anyanawu chalala, anyana amakwawu amushiyaña Yehova hela ahañewaña muchipompelu. Neyi chumichi chimwekana, chisaka chaneñaña nankashi. Muhela wumu wakuSouth Africa wahosheli nindi: “Manakwami chamuhañiliwu muchipompelu, natiyili neyi kwiji manakwami nafwi. Chankatili kumuchima nankashi!” Hanu dinu yena nawanvwali jindi elilidi? Alondeleli kufumba kwekala muBayibolu. (Tañenu 1 Akorinda 5:11, 13.) Anvwali elukili nawu kwovwahila kufumba kwaNzambi kukukwasha ejima muchisaka. Nawa elukili nawu kuhaña muntu muchipompelu hinjila yamwekeshelañamu Yehova kukeña. Dichi ahanjekeleña hohu namwanawu neyi kudi nsañu yinakundami chisaka.

¹⁶ Mwanawu watiyili ñahi? Wahosheli nindi, “Nelukili nami chisaka chami chanheleli wanyi, ilaña adiña nakwovwahila Yehova nikuloñesha kwindi.” Wahosheli cheñi nindi, “Neyi akukanjikija kulomba Yehova yakukwashi nikukwanakena, dihu wukwiluka neyi wunakukeña wukwashu windi.” Fwikijenu chatiyili chisaka hafuntiliyi iwu mukwenzi kudi Yehova. Mwamweni, tukwikalaña namuzañalu neyi tumwovwahilaña Nzambi mpinji yejima.—Yishimu 3:5, 6; 28:26.

17. Muloñadi wutwatela kumwovwahilaña Yehova mpinji yejima, nawa tukuhetelamu ñahi?

¹⁷ Kaprofwetu Isaya wahosheli nindi aYudeya muBabiloni akabalumuka muchima nakuhosha nawu: “Eyi Yehova yeyi Tata yetu; etu yetu iwumba, eyi wuKañemi ketu; wejima wetu tudi mudimu wakumakaseyi.” Amulembeleli Yehova cheñi nawu: “Bayi wanukaña kuluwa haya nyakaku. Tiya, tala chachiwahi tunakulembeli, wejima wetu tuyantu eyi.” (Isaya 64:8, 9) Neyi tukwikala adizoza nikumwovwahilaña Yehova mpinji yejima, tukwikala akeñewa neyi chadiñayi Danyeli. Yehova wukutwalekahu kutuwumba kuzatisha Izu dindi, spiritu nikuloñesha kwindi kulonda kumbidi twakekali “anyana kaNzambi” awanina.—Aroma 8:21.