Emenañaku ñovu yamwiwulu yazatishiliwu hakujilumuna Yerusalema nawa yakazatishawu hakujilumuna kaayi katama kaSatana haAmagedoni. Iku hikulumbulula kwakuha. Muloñadi chikwalemena?

Henohu chaaka cha 607 B.C.E. kanda chishiki, Yehova wamulejeli Ezekeli muchimwenu yuma yakamwekana muYerusalema henohu kanda awujilumuni. Muchimwenu, Ezekeli wamweni yuma yatama yayivulu yinakumwekana. Kuhiñahu wamweni amayala 6 adiña “nayitwa yawu yakujahana nachu kumakasawu.” Kwadiña cheñi iyala wadiña nawu “wavweli mahina amawahi” nawa wadiña ‘naluseñu lwawulombu.’ (Ezekeli 8:6-12; 9:2, 3) Iwu iyala amulejeli kuhita mumusumba mwejima ‘nakufunda mufunda hamahama awantu ejima adiña nakushikoka nakudila nayishimashima yejima yadiña nakukoñakoñawu mukachi kawu.’ Kuhiñahu, amayala 6 adiña nayitwa ayilejeli kujaha antu ejima adiña mumusumba abulili kufundawu mufunda. (Ezekeli 9:4-7) Yumanyi yitunakudizila kunichi chimwenu, nawa iyala wadiña naluseñu lwamukwakusoneka hinyi?

Ezekeli wamweni ichi chimwenu mu 612 B.C.E. Iwu wadiña wuprofwetu washikijeweli chimwahitili yaaka 5 hampinji yetejeliyi Yehova amashidika aBabiloni kujilumuna Yerusalema. Dikwila nawu, Yehova wazatishili akwaBabiloni kubabesha antu akwakudikaña. (Yeremiya 25:9, 15-18) A Yudeya ashinshika akaanini kwila yuma yatama yadiña  nakumwekana mumusumba ayilili ñahi? Yehova wayipulwishili.

Muchimwenu, hichinayi mukwila nawu Ezekeli wafundili antu hela kudibomba mukujilumuna musumbaku. Ilaña, añelu diwu alombweleña iku kujilumuna kwaYerusalema. Iwu wuprofwetu wunatukwashi kwiluka yuma yamwekanaña mwiwulu. Yehova walejeli añelu jindi kulombola kujilumuna antu atama nakushiyahu antu amawahi. *

Iwu wuprofwetu wukashikijewa cheñi kumbidi. Twahosheleña netu iyala wadiña naluseñu lwawulombu lwamukwakusoneka wemeneneñaku awayishewa achidi hamaseki. Twahosheleña cheñi netu antu ayifundileña kulonda akapuluki neyi atiyilila nikwiteja nsañu yayiwahi yitwashimwinaña. Katataka, chamwekeni hatooka nawu twatela kuhimpa chitunateli kulumbulula iwu wuprofwetu. Tunadizi haMatewu 25:31-33 netu Yesu diyi wasompeshaña antu. Wakazata iwu mudimu kumbidi hampinji yalukadi lwasweja. Hayina mpinji, akasompeshawu neyi anyikoku akahanda ilaña akasompeshawu neyi ampembi akajilumuka.

Yumanyi yitunadizili kuchimwenu chaEzekeli? Tunadiziliku yikuma yitanu:

1. Henohu Yerusalema kanda amujilumuni, Ezekeli kushilahu niYeremiya niIsaya, asoñamishili antu nayuma yikumwekana mumusumba. Adiña neyi atulama. Makonu, Yehova nakuzatisha izanvu danyanya dawawayishewa kulonda adizishi antu jindi nikusoñamisha amakwawu henohu lukadi lwasweja kanda lutachiki. Antu jaNzambi, dikwila nawu, akwetala dindi, atela kuzata iwu mudimu wakusoñamisha.—Matewu 24:45-47.

2. Ezekeli wafundili wanyi antu apulukili. Niantu jaNzambi afundaña wanyi makonu. Ashimwinaña kudi antu nikuyileja yuma yikamwekana kumbidi. Iwu mudimu wakushimwina anakuwuzata nawukwashu wawañelu.—Chimwekeshu 14:6.

3. Antu apulukili mumpinji yaEzekeli, adiña wanyi nanyifunda yayeni hamahamawu. Nimakonu antu akapuluka akekala wanyi nanyifunda yayeni. Yumanyi yatela kwilawu antu hakwila nawu akapuluki halukadi lwasweja? Neyi akutiya munakuyilejawu, atela kwimbujola Kristu, kudihana kudi Nzambi, nikukwasha amanakwaKristu kuhitila mukushimwina nsañu yayiwahi. (Matewu 25:35-40)Hampinji yalukadi lwasweja, awantu akayifunda dikwila nawu akapuluka.

4. Iyala wadiña naluseñu lwawulombu wemenañaku Yesu. Hampinji yalukadi lwasweja, Yesu wakafunda izaza dawantu chakayisompeshayi neyi anyikoku. Akekala nakukooleka kwakushakama haya nyaaka hamaseki.—Matewu 25:34, 46. *

5. Makonu amayala 6 adiña nayitwa yakujaha nachu,emenañaku amashidika amwiwulu alombolañawu kudi Yesu. Keña ajilumuni nyuza nikufumishahu kutama kwejima.—Ezekeli 10:2, 6, 7; Chimwekeshu 19:11-21.

Yuma yitunadizi munichi chimwenu yinatukwashi kukuhwelela netu Yehova wakajilumuna wanyi antu aloña hamu nawantu atama. (2 Petulu 2:9; 3:9) Yuma yitunadizi yinatukwashi cheñi kwiluka nawu mudimu wakushimwina walema nankashi. Antu ejima atela kutiya iku kusoñamisha henohu kukuma kanda kwinzi.—Matewu 24:14.