Haykanush, mukwakushimwina wabula kupapatishewa wakuArmenia, wanoneli pasipoti kwakwihi netala dindi. Mukachi wawaninumu kaadi yakutambwila nachu mali kubanki nawa mwadiña mali amavulu. Wamulejeli nfumwindi yuma yamweniyi, niyena wadiña mukwakushimwina wabula kupapatishewa.

Awa adisumbula adiña adana mali nawa adiña mumukudi. Ilaña atondelihu kutwala mali kukeyala yadiña hapasipoti. Iyala waholweli pasipoti hamu nachisaka chindi ahayamini chikupu. Haykanush nanfumwindi alumbulwili nawu adiña ashinshika muloña wansañu yadizileñawu muBayibolu. Kuhiñahu, azatishili iyi mpinji kuhanjeka hadi aYinsahu jaYehova nikuyinka nyikanda.

Ichi chisaka chakeñeleña kumufweta Haykanush mali nayuma yeliliyi, ilana wakaanini. Chikwachili, ñodaniwu iyala wayili kwitala daHaykanush, nakumwekesha kusakilila, nakumukanjikija Haykanush kutambula kazeya kadiyamondi.

Kufwana ichi chisaka, antu amavulu anateli kuhayama kashinshi kwamwekesheliwu aHaykanush nanfumwindi. Hanu dinu Yehova wahayamini? Watiyili ñahi nakashinshi kawu? Kashinshi kawu kayili mumenji?

Kwakula awa malwihu kwakala wanyi. Muloñadi? Muloña ambuña aNzambi eluka nawu kwikala nayilwilu yaYehova kwalema kubadika diyamondi, wuru hela yuma yikwawu yalema. Mwalala, yuma yamonañayi Yehova nindi yalema yambukaku nayuma yalemeshawu antu. (Isaya 55:8, 9) Nawa ambuñindi eluka nawu kwimbujola yilwilu yaYehova kwalema nankashi.

Ichi chikuma achishimuna muBayibolu kutalisha hakashinshi nimaana. Yishimu 3:13-15 yahosha nawu: “Muntu wukuwana maana nimuntu wukuheta kashinshi nakooleki. Kuyilandulula yiwukudiilamu yikubadika yiwadyaña hakulandulula siliva, yiwukumwenamu yikubadika wuru wawuwahi. Wuseya wamaana wabadika wamarubi, yuma yejima yiwakeña hiyesekana nindiku.” Mwalala, Yehova walemesha iyi yilwilu kubadika maheta ejima.

Hanu dinu, indi kashinshi?

Yehova yomweni washinshika. ‘Hatwambañaku.’ (Titusa 1:2) Nawa woneneni kapostolu Pawulu kusonekela akwaKristu aHeberu amuyaaka nkulakaji yakusambila nindi: “Tulombelenuku. Tuneluki chalala netu tukweti chinleji chamuchima chachiwahi, tunakeñi kushakama chakashinshi muyuma yejima.”—Aheberu 13:18.

Yesu Kristu watushilili chakutalilahu chachiwahi chakwikala ashinshika. Chakutalilahu, Kapristu Muneni Kayafwasi chahosheliyi nindi, “Nakusanyikishi Nzambi wamumi, tuleji neyi yeyi Kristu, Mwana kaNzambi,” Yesu washinshikili nakudilumbulula nindi diyi Mesiya. Wahosheli walala hela chakwila welukili nindi aSanihedilini amutwambilili nawu himukwakutukana nawa chumichi chaletesheli amujahi.—Matewu 26:63-67.

Indi etu? Neyi tunakukeña kwikala namaheta kuhitila mukutwamba, tukutwalekahu kwikala ashinshika?

Chinateli kutukalila kwikala ashinshika munanu mafuku akukuminina chineli antu amavulu anekali “akwakudikeña, akwakufwila  mali.” (2 Timotewu 3:2) Neyi antu adi mukukala kwakuwana mali hela nyidimu, chinateli kwikala chaswayi kwiya, kutwamba, nikwila yuma yikwawu yatama. Antu amavulu atoñojokaña muniyi njila muloña amonaña nawu hakwila muntu ekali namaheta watela kwikala wabula kashinshi. NiakwaKristu amakwawu aneli yuma yatama muloña ‘wakufwila kuheta munjila yatama’ nawa wubwambu wawu muchipompelu wunatami.—1 Timotewu 3:8; Titusa 1:7.

Hela chochu, akwaKristu amavulu embujolaña Yesu. Eluka nawu kwikala nayilwilu yaNzambi kwalema kubadika maheta ejima. Dichaleteshaña atwansi akwaKristu adi kumashikola abuli kutwamba hampinji yakusoneka kweseka. (Yishimu 20:23) Bayi neyi mukwikala ashinshika mukufumaña wufwetu neyi cheliliyi Haykanushku. Ilana kwikala ashinshika dichuma chetejayi Nzambi, nawa chatukwashaña kwikala nachinleji chitooka, chuma chalema nankashi.

 Dicheliliyi niGagik. Wahosheli nindi: “Henohu kanda nikali mukwaKristu, nazatileña kukampani yeneni chakwila mwini kampani wafweteleña wanyi nyisonku kuhitila mukushimuna nindi wadiña nakuwana mali antesha. Chineli nadiña mukulumpi wamudimu, nayileña nakuditeja namukwakutambula nyisonku kuhitila mukumwinka majika kanwa kulonda abuli kwiluka wukombi wadiña hakampani. Chafuminimu, ijina dami datamini muloña wakubula kwikala washinshika. Chinadizili chalala, nakaanini kwila mwenimu hela chakwila anfweteleña mali amavulu. Natachikili bizinisi yami. Nasonekesheli kampani yami nikufweta nyisonku yejima kufuma tuhu hinatachikili bizinisi yami.”—2 Akorinda 8:21.

Gagik Wahosheli nindi: “Mali inawanineña adiña antesha, dichi chakalili kuhemba chisaka chami. Hela chochu, nadiña namuzañalu. Nidi nachinleji chitooka kumesu aYehova. Anyanami akwimbujola chakutalilahu chami chachiwahi nawa nashikilimu kuzata nyidimu muchipompelu. Akwakutambula nyisonku niantu amakwawu inazataña nawu bizinisi añiluka nawu nidi muntu washinshika.”

Yehova watiyaña kuwaha antu amuhamekaña kuhitila mukwimbujola yilwilu yindi yayiwahi, kushilahu tuhu nikashinshi. (Titusa 2:10) Nawa neyi twila mwenimu watushika nindi wakatukwasha. Wamwoneneni Mwanta Davidi kuhosha nindi: “Nadiñi kansi, hanu nakula dehi nankashi, kanda nimonañahu dehi hashiyilawu muntu waloña, hela anyanindi nakulomba yakudyaku.”—Masamu 37:25.

Yuma yamweniyi Luti yamwekeshaña nawu awa mazu alala. Washakamini chachiwahi namukuwindi, Nyawomi, chatela yamushiyi muloña wadiña washinakaja dehi. Luti wayili kuIsarela, kwadiña nakudifukulayi kudi Nzambi walala. (Luti 1:16, 17) Wadiña washinshika nawa wazatili nañovu hakunonojola, kwesekeja nanshimbi yakukwasha atuzweñi. Nawa kwesekeja nayuma yamweniyi Davidi, Yehova wayishiyili wanyi aLuti naNyawomi. (Luti 2:2-18) Wamwilili cheñi Luti yuma yayivulu bayi neyi wamwinkeleña hohu yakudaku. Wamutondeli kwikala wamuchisaka chaMwanta Davidi niMesiya akaniniwu.—Luti 4:13-17; Matewu 1:5, 16.

Chinateli kuyikalila ambuña aYehova kuwana mali amavulu akudikwasha nachu. Ilaña chatela awani njila yapela nawa yawukombi, azataña nañovu. Kuhitila mukuzata nañovu, amwekeshaña nawu yilwilu yayiwahi yaNzambi kushilahu nikashinshi yalema kubadika yuma yakumujimba.—Yishimu 12:24; Aefwesesa 4:28.

Kufwana Luti, akwaKristu mukaayi kejima anakuhweleli muñovu jaYehova nawu jikuyikwasha. Akuhwelela chikupu mudi Muntu wayikana nawu: “Hinamba kakulekaku, hela kukushiya hinakakushiyaku.” (Aheberu 13:5) Kakavulu Yehova namwekeshi nindi nateli kukwasha nawa wukukwashaña antu ashinshikaña mpinji yejima. Natwalekihu kwila mwakanayi kwinka ambuñindi yuma yakeñañawu.—Matewu 6:33.

Mwalala, antu anateli kulemesha diyamondi niyuma yikwawu yalema. Tukukuhwelela chikupu netu Tata yetu wamwiwulu walemesha kashinshi ketu niyilwilu yikwawu kubadika malola alema wuseya.