1. Muloñadi Yehova chekalilayi Kañemi wabadika?

MU November 2010, iwumba danyaka dakuChina akeñeleña kudilandisha namali akushika kwakwihi na 779, 100,008 kwacha (U$ 70 million), muEngland. Chakuhayamisha hakumona nawu kañemi nateli kuzatisha ndambu kuwumba chuma chalubanji nawa chalema wuseya. Yehova Kañemi ketu, wabadika atuñemi ejima. Bayibolu yahoshaña nawu Yehova waleñeli muntu wawanina “nalunkuñu lwamaseki,” dikwila nawu wazatishili ndambu. (Kutachika 2:7) Iwu muntu, Adama wadiña “mwana kaNzambi” nawa amuleñeli nawuswa wakwimbujola yilwilu yaNzambi.—Luka 3:38.

2, 3. Tunateli kwimbujola ñahi aIsarela abalumukili?

² Adama chadikañiliyi naNleñi yindi, hekalili mwana kaNzambi cheñiku. Ilaña anyana kaAdama amavulu atonda Yehova kwikala Nyuuli yawu. (Aheberu 12:1) Kuhitila mukwovwahila Nleñi yawu, anamwekeshi nawu anakukeña yekali Tata yawu nawa Kañemi kawu bayi Satanaku. (Yowanu 8:44) Kashinshi kawu kudi Nzambi katwanukishaña  mazu ahosheliwu aIsarela abalumukili, ahosheli nawu: “Eyi Yehova yeyi tata yetu; etu yetu iwumba, eyi wuKañemi ketu; wejima wetu tudi mudimu wakumakaseyi.”—Isaya 64:8.

³ Akwakudifukula alala aYehova niwena makonu azataña nañovu kwikala adizoza nawa ovwahila. Eluka nawu kutena Yehova nawu Tata yawu hikukooleka, nawa akeñaña yekali Kañemi kawu. Tukwiteja kwikala neyi ndambu yayovu yinateli kuzatishayi Nzambi kuwumba chuma chalema? Twamonaña amanakwetu niahela netu achidi kuyiwumba kudi Nzambi? Nsañu yitukuhanjeka yikutukwasha nankashi kwiluka Yehova chelukañayi antu akuwumba, chawumbilañayi antu nichayiwumbañayi.

4. Yehova watondaña ñahi antu? Hanenu chakutalilahu.

⁴ Yehova wamonaña wanyi antu neyi chitwayimonaña. Ilaña washinshikaña mumuchima nikwiluka chitwekala wejima wetu. (Tañenu 1 Samweli 16:7b.) Yehova welili mwenimu hampinji yatuñiliyi chipompelu chawakwaKristu. Watondeli antu kwikala muchipompelu anateli kumonawu kudi antu nawu amukunkulwayi. (Yowanu 6:44) Chakutalilahu, watondeli Sawulu kaFwarisi, wadiña “mukwakutuka Nzambi, mukwakukabisha akwawu, mukwawinyi.” (1 Timotewu 1:13) Dichi Yehova watalili mumuchima waSawulu nawa hatoñojokeli nindi wadiña ndambu yamukunkulwayiku. (Yishimu 17:3) Ilaña, Yehova welukili nindi nateli kumuwumba Sawulu kwikala ‘nsaba yakutonda’ wakashimwina “kudi aJentili, nikudi anyanta ankanu, nikudi aIsarela.” (Yililu 9:15) Yehova watondeli cheñi antu amakwawu anateli kuwumbayi kwikala ‘yuma yalema,’ kushilahu tuhu niantu adiña akwakusheta walwa, amakombi niadiña nayilwilu yikwawu yatama. (Aroma 9:21; 1 Akorinda 6:9-11) Chiyadiziliwu Nsona, amukuhweleleli Yehova nawa amwitejeli kuyiwumba.

5, 6. Kumukuhwelela Yehova netu hiKañemi ketu kunateli kuhimpa ñahi chitwamonaña (a) antu itwashimwinaña? (b) amanakwetu niahela?

⁵ Twamukuhwelela Yehova netu waluwañeshaña wanyi hakutonda antu. Dichi bayi tusompesha antu itwashimwinaña hela amuchipompeluku. Chakutalilahu, talenu cheliliyi Michael hamwendeleliwu kudi aYinsahu jaYehova. Wahosheli nindi: “Nashinkileña kuchiisu neyi kwiji hosi antu anenzi. Nadiña nawinyi nankashi! Mukuhita kwampinji, nadilukili nachisaka chimu chinakeñeli muloña wayilwilu yawu yayiwahi. Ilaña ifuku dimu nahayamini chinelukili nami hiyaYinsahu jaYehova. Yilwilu yawu yaletesheli nitachiki kutoñojoka nami chumanyi chinayihelela aYinsahu. Nkumininaku nelukili nami nayiheleli hohu muloña wakubula kuyiluka  chiwahi niyuma yahosheleñawu antu.” Michael wakeñeleña kwiluka yuma yayivulu dichi wetejeli kudiza Bayibolu. Kuhiñahu wapapatisheweli nawa watachikili mudimu wampinji yejima.

⁶ Neyi twiluka netu Yehova hiKañemi ketu, tukuhimpa chitwamonaña amanakwetu niahela. Tukuyimonaña netu achidi kuyiwumba kudi Nzambi. Muloña dichayimonañayi Yehova. Wamonaña chiyekalawu mumuchima nawa weluka nindi kubula kuwanina kwawu kwahakampinji kantesha hohu. Weluka cheñi chiyanateli kwikalawu wejima wawu neyi yayiwumba. (Masamu 130:3) Tunateli kumwimbujola Yehova neyi tumonaña amanakwetu neyi chayimonañayi. Tunateli nikuzatila hamu naKañemi ketu kukwasha amanakwetu niahela kuyilaku hambidi. (1 Atesalonika 5:14, 15) Aeluda muchipompelu atela kwikala atachi kwila mwenimu.—Aefwesesa 4:8, 11-13.

7. Muloñadi chimwalemeshela kufumba kwaYehova?

⁷ Antu amakwawu anateli kuhosha nawu: ‘Natachikili kulemesha mwanfumbiliwu anvwali jami hinekalili nanyana.’ Chitunakukula, tunateli kutachika kulemesha kufumba muloña kwamwekeshaña kukeña. (Tañenu Aheberu 12:5, 6, 11.) Yehova watukeña muloña tudi anyanindi, dichaleteshaña yatufumbeña nikutuwumba. Wakeñaña nindi twikali namaana nimuzañalu nawa tumukeñi neyi hiTata yetu. (Yishimu 23:15) Watiyaña kutama neyi yamona tunakukabakana, nawa nakukeña wanyi nindi tukafwi nanshidi jetu.—Aefwesesa 2:2, 3.

8, 9. Yehova nakutudizisha ñahi makonu, nawa iku kudizisha kwakatwalekahu ñahi kumbidi?

⁸ Henohu kanda tumwiluki Yehova, twadiña nayilwilu yatama. Ilaña Yehova watuwumbili nikutukwasha kuhimpa, chakwila tukweti yilwilu yayiwahi. (Isaya 11:6-8; Akolose 3:9, 10) Tunakushakama muparadisa yakuspiritu. Yehova nakuloñesha iyi ntanjikilu yayiwahi kulonda yatuwumbi. Muniyi paradisa yakuspiritu, twakiñewa hela chakwila tudi mukaayi mudi antu atama. Antu akulilili muyisaka mwabulileñawu kuyimwekeshela kukeña, anakuyimwekeshala kukeña kudi amanakwetu niahela muparadisa yakuspiritu. (Yowanu 13:35) Nawa twadiza kumwekesha kukeña kudi antu amakwawu. Ilaña chikuma chalema nankashi chidi chakwila nawu, tunamwiluki Yehova nawa tuneluki netu watukeña.—Yakoba 4:8.

⁹ Mwituña dadiha, twakahetelamu chikupu muparadisa yakuspiritu. Tukadiluñisha cheñi wumi muparadisa yamaseki yikayulewaña naWanta waNzambi. Hayina mpinji, Yehova wukatwalekahu kutuwumba nikutudizisha munjila yitunateli  kukañanya kufwikija makonu. (Isaya 11:9) Cheñi Yehova wakelisha nyijimba niyitoñojoka yetu kwikala yawanina. Chumichi chikaletesha tukatiyishisheña nshimbi jindi nikujovwahila. Dichi tutwalekenuhu kumwiteja Yehova kutuwumba, nawa tumusakililenu hachatumwekeshelañayi kukeña.—Yishimu 3:11, 12.

10. Yesu wamwekesheli ñahi kudiwunjika niwunkuluñaña waKañemi Wabadika?

¹⁰ Kufwana kañemi wakuluka yitembi welukaña ndambu yindi chiwahi, Yehova, Kañemi ketu, watwiluka chiwahi. Weluka kuzeya zeya kwetu, weluka yuma yitukutwesha kwila niyitukukañanya kwila nawa welukaña chitunakuzata dichi watwiwumbaña kwesekeja nachatwilukayi. (Tañenu Masamu 103:10-14.) Tunateli kwiluka chatumonañayi Yehova neyi tushinshika cheliliyi Yesu nawatumbanji twindi hiyaluwañesheleñawu. Mpinji yikwawu, apostolu aditadikishileña nawu wabadika hinyi. Neyi mwadiñaku, mwadi kumona ñahi yilwilu yawapostolu? Hadaha mwadi kutoñojoka nenu hiyadiña neyi ndambu yayovuku. Ilaña, Yesu welukili nindi nateli kuyiwumba neyi chakwila atiyilila kukufumba kwindi nikwikala adizoza neyi yena. (Maku 9:33-37; 10:37, 41-45; Luka 22:24-27) Chasañukiliyi Yesu, apostolu atambwilili spiritu yaNzambi nawa alekeli kutoñojoka hadi wadiña mukulumpi. Ashili maana hamudimu wayinkeliyi Yesu.—Yililu 5:42.

11. Davidi wamwekesheli ñahi nindi wadiña ndambu yayovu, nawa tunateli kumwimbujola ñahi?

¹¹ Makonu, Yehova wazatishaña Bayibolu, spiritu yindi yajila nichipompelu hakutuwumba. Bayibolu yinateli kutuwumba ñahi? Twatela kutaña Bayibolu, kutoñojoka hansañu yitunakutaña nikumulomba Yehova yatukwashi kuzatisha yuma yitunadizi. Mwanta Davidi wasonekeli nindi: ‘Nukukwanukaña hakadidi kami nakukutoñojoka hawulama wawufuku.’ (Masamu 63:6) Wasonekeli cheñi nindi: “Nukumukiswila Yehova nkisu, diyi nanleji maana: chalala muchima wami wanlejaña kashinshi nawufuku.” (Masamu 16:7) Mwalala, Davidi watoñojokeli hakufumba kwaYehova nawa wetejeli kuwumbi yitoñojoka yindi hela chakwila chadiña chakala kwiteja. (2 Samweli 12:1-13) Davidi wadiña wadizoza nawa wovwahila, dichi twatela kumwimbujola. Dihulenu nenu: Neyi inakutaña Bayibolu, natoñojokañahu nikwiteja kufumba kwaNzambi kufumbi yitoñojoka yami? Kwila nitoñojoka kubadika aha nehi?’—Masamu 1:2, 3.

12, 13. Yehova watuwumbaña ñahi kuzatisha spiritu yindi yajila nichipompelu chawakwaKristu?

¹² Spiritu yajila yinateli kutuwumba munjila jajivulu. Chakutalilahu, yinateli kutukwasha kwiluka chakwimbujola yilwilu yaYesu, nikumwekesha nyikabu yashiyashana yaspiritu. (Aŋalija 5:22, 23) Kukeña kwekala haniyi nyikabu. Twamukeña Nzambi nawa twakeñaña kumwovwahila nikutuwumba kudi yena muloña tweluka netu nshimbi jindi jatukwashaña. Kubombelahu, spiritu yajila yinateli kutwinka ñovu kulonda tukaani kutuwumba kudi kanu kaayi katama. (Aefwesesa 2:2) Kapostolu Pawulu hadiñayi kansi, welileña yuma yelileñawu akulumpi jansakililu yawaYudeya  adiña adivwimba. Ilaña spiritu yajila yamukwashili kuhimpa. Wasonekeli nindi: “Natweshi kwila yuma yejima mudi Kristu wankoleshaña.” (Afwilipi 4:13) Ninetu twatela kulomba spiritu yajila, muloña tuneluki netu Yehova wukwakula kulomba kwetu kwakufuma hamuchima.—Masamu 10:17.

¹³ Yehova wazatishaña cheñi chipompelu niaeluda kulonda yatuwumbi. Chakutalilahu, neyi aeluda eluka nawu tudi nachiluwa, atukwashaña. Hela chochu, azatishaña wanyi yitoñojoka yawu hakutukwasha. (Aŋalija 6:1) Ilaña, alombaña kudi Yehova kulonda yayikwashi kwikala nakashinshi nimaana. Kuhiñahu, asandujolaña muBayibolu nimunyikanda yetu kulonda awani nsañu yikutukwasha. Neyi aeluda enza kudi enu nakuyikwasha munjila yakukeña, hadaha kutalisha hanvwalilu yenu, ilukenu nenu kufumba kwawu kunakumwekesha nawu Nzambi wayikeña. Neyi muzatisha iku kufumba, mukwikala neyi ndambu yayovu yinatweshi kuwumbayi Yehova, nawa mukuhetelamu.

14. Yehova wamwekeshaña ñahi nindi walemesha wuswa wetu wakudifuukwila hela chakwila wukweti ñovu yakutuwumba?

¹⁴ Neyi tukwiluka chatuwumbañayi Yehova, chikutukwasha kwikala nawubwambu wawuwahi nawamanakwetu niahela. Nawa, tukukeña antu itwashimwinaña kushilahu tuhu niatudizi etu aBayibolu. Mumpinji yakunyima, henohu kañemi kanda yatachiki kuwumba, wakeñekeleña kuwahisha chiwahi ndambu nakufumishaku malola niyuma yikwawu yamajilu. Kañemi Muneni, Yehova wakwashaña antu akeñekaña kuyiwumba. Wayikanjikijaña wanyi  nindi ahimpi, ilaña wayilejaña yuma yayiwahi yatela kwilawu. Kuhiñahu akutondahu aweni neyi akukeña kuhimpa.

15, 16. Atudizi aBayibolu amwekeshaña ñahi nawu anakukeña Yehova yayiwumbi? Lumbululenu.

¹⁵ Talenu yuma yamumwekeneni muhela Tessie, wakuAustralia. Chadiña chaswayi kudi yena kudiza Bayibolu. Ilaña, wayilileñaku wanyi hambidi nawa wayileña wanyi nakupompa. Muhela wadiña nakumudizisha walombeli kudi Yehova nawa wafuukwilihu kuleka kumudizisha. Ilaña kudi chuma chamwekeni. Chadizileñawu, Tessie wamulejeli wamudizishileña chuma chaletesheli yabuli kuyilaku hambidi. Tessie wahosheli nindi wadimweneña nindi hinfwikiji muloña wahemeneña yisela yalwisu. Chayinu mpinji waleka kuhema iyi yisela.

¹⁶ Tessie watachikili kuya nakupompa nikumwekesha yilwilu yawakwaKristu hela chakwila amabwambu jindi amuseheleña. Chimwahitili mpinji, Tessie wapapatisheweli nawa wekalili payiniya wampinji yejima hela chakwila wadiña nawanyana anyanya. Mwalala neyi atudizi aBayibolu atachiki kuhimpa muchihandilu chawu kulonda amutiyishi Nzambi kuwaha, wukukundama kwakwihi nawena nawa wukuyiwumba akwikala chuma chalema.

17. (a) Yumanyi yinayitishi kuha chineli Yehova hiKañemi kenu? (b) Yumanyi yitwakahanjekahu muchibaba chinalondelihu?

¹⁷ Makonu, atuñemi achidi kuwumba yuma yayiwahi namakasawu. Munjila yoyimu,Yehova wuchidi kutuwumba kuzatisha kufumba kwindi, nawa watutalaña neyi tunakuhimpa. (Tañenu Masamu 32:8.) Munamoni nenu Yehova wayikeña? Mwamonaña Yehova chayiwumbañayi munjila yayiwahi? Yilwilwinyi yikuyikwasha kwikala neyi ndambu yayovu yinateli kuwumbayi Yehova? Yilwilwinyi yimwatela kutondolwela kulonda mubuli kwikala neyi ndambu yakola yinateli kubula kuwumbawu? Nawa anvwali anateli kuzatila ñahi hamu naYehova kuwumba anyanawu? Chibaba chinalondelihu chikakula awa malwihu.