1, 2. (a) Muloñadi mazu ekala haKuhituluka 6:4 chayilukilawu kudi antu amavulu? (b) Mosi wahoshelelidi awa mazu?

A YUDEYA anazatishi mazu ekala haKuhituluka 6:4 hadi yaaka yayivulu hakulomba kwadimena. Iku kulomba akutenaña nawu Shema, izu datachi yina vasi muchiHeberu. A Yudeya amavulu azatishaña iku kulomba mafuku ejima nantetemena nimelela hakumwekesha nawu amwakama Nzambi.

² Awa mazu ekala mumpanji yakukumishaku yahaniniyi Mosi kudi aIsarela. Muchaaka cha 1473 henohu Kristu kanda yavwaliki, aIsarela adiña mwituña daMowabi kulonda azambuki Kaloña Yodana nakushinda Ituña daChikaninu. (Kuhituluka 6:1) Mosi walombweli antu hadi yaaka 40, nawa wakeñeleña nindi ekali ahamuka kulonda ashindi kukala kwejima kwakumonawu. Ateleleli kumukuhwelela Nzambi yawu, Yehova nikwikala ashinshika. Dichi mazu akukumishaku ahosheliyi Mosi ayikolesheli kumukuhwelela Nzambi nikwikala ashinshika. Hanyima yakuhosha Nshimbi Ikumi ninshimbi  jikwawu jafumini kudi Yehova, Mosi wayanukishili antu mazu ekala haKuhituluka 6:4, 5. (Tañenu.)

3. Malwihwinyi itukuhanjekahu muchinu chibaaba?

³ A Isarela elukili nawu Yehova Nzambi yawu “hiYehova wumu hohu.” A Isarela ashinshika adifukwileña kudi Nzambi wumu hohu, Nzambi yawankakulula jawu. Hanu dinu muloñadi Mosi chayilejeleliyi aIsarela nindi Yehova Nzambi yawu “hiYehova wumu”? Kwiluka nawu Yehova hiNzambi wumu hohu kunesekani ñahi nakukeña Nzambi yetu namuchima wetu wejima, nawumi wetu wejima ninañovu jetu jejima? Nawa mazu ekala haKuhituluka 6:4, 5 tunateli kuyizatisha ñahi makonu?

4, 5. (a) Mazu akwila nawu “Yehova wumu hohu” atalisha mudihi? (b) Yehova wambuka ñahi nawanzambi amunyunza?

⁴ Wadimena. Mazu akwila nawu “Yehova wumu hohu” atalisha mukwila nawu Yehova wadimena, kwosi muntu wesekana nindi hela wekala neyi yena. Mosi wazatishililidi awa mazu? Hampinji yahanineñayi mpanji yindi, wahosheleña wanyi hadi anzambi asatu. Yehova diyi Nleñi wewulu niiseki nawa diyi Nyuuli wayuma yejima. Diyi Nzambi walala hohu nawa kwosi nzambi wudi neyi yena. (2 Samweli 7:22) Dichi mazu aMosi ayanukishileña aIsarela nawu atela kudifukula kudi Yehova hohu. Hiyateleli kwimbujola antu ashakamineñawu nawu adifukwileña kudi anzambi akutwambaku. Ana antu akuhweleleli nawu anzambi jawu adiña nañovu yakuyuula yileñaleña.

⁵ Chakutalilahu, aEjipitu adifukwileña kudi nzambi wamutena Ra, nzambi waluzwizu Nut, nzambi weseki Geb, nzambi wakaloña Nile Hapi, kushilahu niatunyama. Yehova wamwekesheli nindi wabadika awa anzambi akutwamba hampinji yaleteliyi Yipupu 10. Nzambi walemesheliwu nankashi aKenani wadiña Bayali, nzambi wakutwamba akuhweleleliwu nawu diyi waleñeli wumi. Akuhweleleli cheñi nawu diyi nzambi waluzwizu, wanvula ninvula yampepela. Mumaluña amavulu, antu amukuhweleleli Bayali kuyikiña. (Kuchinda 25:3) A Isarela ateleleli kwiluka nawu Nzambi yawu, ‘Nzambi walala,’ wadimena. “HiYehova wumu hohu.”—Kuhituluka 4:35, 39.

6, 7. Mazu akwila nawu “wumu hohu,” atalisha cheñi mudihi, nawa Yehova wamwekesheli ñahi nindi wekala “wumu hohu”?

⁶ Wahimpaña Wanyi nawa Washinshika. Izu dakwila nawu “wumu” mumazu akwila nawu “Yehova wumu hohu” alumbuluka cheñi nawu welaña mwejima mwafuukulañayi. Yehova hiNzambi wakuluwañeshaku nawa wahimpaña wanyi.  Wekala washinshika mpinji yejima, wahimpaña wanyi nawa walala. Chakutalilahu, wamukanini Abarahama nindi anyanindi akashakama Mwituña daChikaninu. Nawa Yehova wakoñeli yihayamisha yayivulu hakwila yashikiji chikaninu chindi. Chimwahitili yaaka 430, Yehova wahimpili wanyi mwakaniniyi.—Kutachika 12:1, 2, 7; Kwidika 12:40, 41.

⁷ Chimwahitili yaaka yayivulu, Yehova wateneni aIsarela nindi ayinsahu jindi nawa wayilejeli nindi: “Yami diyi. Nenu, Kwosi Nzambi asambililuwu kuwumba, ami nikumininaku, hikwamba kekala nawa wakanlondelaku.” Yehova wamwekesheli hatooka nindi wahimpaña wanyi mwafuukulañayi chahosheliyi nindi: “Yami watachi yami wankumininaku.” (Isaya 43:10, 13; 44:6; 48:12) AIsarela adiña nakukooleka kwakukalakela Nzambi washinshika nawa wabulaña kuhimpa. Ninetu tukweti kukoleka kokumu makonu.—Malaki 3:6; Yakoba 1:17.

8, 9. (a) Yehova wakeñañadi kudi akwakudifukula indi? (b) Yesu wakonkomweneni ñahi kulema kwamazu ahosheliyi Mosi?

⁸ Mosi wayilejeli aIsarela nindi Yehova wakatwalekahu kuyikeña nikuyakamena. Dichi, Yehova wakeñeleña nindi niwena adifukuleña kudi yena hohu nikumukeña namuchima wawu wejima, nawumi wawu wejima ninañovu jawu jejima. Anvwali ateleleli kudizisha anyanawu mpinji yejima kumwiluka Yehova kulonda niwena adifukuleña kudi Yehova hohu.—Kuhituluka 6:6-9.

⁹ Yehova wahimpaña wanyi nkeñelu yindi, dichi wakahimpa wanyi yuma yatela kwilawu akwakudifukula indi alala. Neyi tunakukeña Yehova yeteji kudifukula kwetu, twatela kudifukula kudi yena hohu nikumukeña namuchima wetu wejima, namana etu ejima ninañovu jetu jejima. Yesu wahosheli nindi ilu dilu lushimbi lwabadika. (Tañenu Maku 12:28-31.) Tushinshikenu chitunateli kumwekesha muyilwilu yetu netu twakuhwelela netu “Yehova Nzambi yetu hiYehova wumu hohu.”

10, 11. (a) Twamwekeshaña ñahi netu twamulemesha Yehova? (b) Anyikwenzi aHeberu adiña muBabiloni amulemesheli ñahi Yehova?

¹⁰ Yehova diyi Nzambi yetu wumu hohu. Twamulemeshaña neyi tudifukula kudi yena hohu. Twatela kudifukula kudi anzambi acheñi wanyi hela kwiteja ntañishilu yakutwamba neyi tunakudifukula kudi Yehova. Wabadika anzambi ejima nawa wayibadika ñovu. Diyi Nzambi walala. Dichi twatela kudifukula kudi Yehova hohu.—Tañenu Chimwekeshu 4:11.

¹¹ Mumukanda waDanyeli, twatañaña hadi anyikwenzi aHeberu, Danyeli, Hananiya, Mishayeli niAzariya. Amulemesheli Nzambi hiyakaaniniwu kuda yakuda yadiña yamajilu kudi akwakudifukula aYehova. Nawa amabwambu jaDanyeli asatu akaanini kufukamina nkishi wawuru watuñiliyi Nebukaneza. Muloña wena amwakamineña Yehova. Adiña ashinshika kudi Nzambi.—Danyeli 2:1–3:30.

12. Chitunakumukalakela Yehova, yumanyi yitwatela kutondolwela?

 ¹² Twatela kutwamijaku Yehova muchihandilu chetu. Neyi tunakukeña netu tudifukuleña kudi yena hohu, hitwatela kwiteja yuma yacheñi kutuluwañeshiku. Hiyumanyi yeniyi? MuNshimbi Ikumi, Yehova wahosheli nindi antu jindi hiyatela kudifukula kudi anzambi acheñiku. Hiyatela kwila yuma yejima yakundama kukupeshaku. (Kuhituluka 5:6-10) Makonu, kudi yuma yayivulu yakundama kukupesha nawa yuma yikwawu yakala kuyiluka. Ilaña Yehova wahimpa wanyi nshimbi jindi. Wuchidi ‘Yehova wumu hohu.’ Tushinshikenu chitunateli kutondolwela kupesha makonu.

13. Yumanyi yitunateli kutachika kukeña nankashi kubadika chitwamukeña Yehova?

¹³ Akolose 3:5 (tañenu), yashimuna yuma yinateli kuluwañesha wubwambu wetu naYehova. Tunamoni netu lwisu lwesekana nakupesha. Munjilanyi? Kusweja kufwila yuma, yidi neyi kwikala namali amavulu hela yuma yakuditiyisha kuwaha, kukwikala diyi nzambi yetu. Nshidi jejima jatenawu haAkolose 3:5 jesekana nalwisu, lwesekana nakupesha. Dichi neyi tukufwilaña yuma yamuchidiwu, tukutachika kuyikeña kubadika chitwamukeña Nzambi. Nawa Yehova wukwikala wanyi “Yehova wumu hohu” kudi etu. Bayi chuma chamuchidiwu chitumwekenaku.

14. Kapostolu Yowanu wasoñamishilidi kutalisha hakumukeña Nzambi?

¹⁴ Kapostolu Yowanu wakonkomweneni hachuma chochimu. Wasoñamishili nindi neyi muntu wukukeña yuma yamukaayi, yidi neyi “kufwila kwachisemwa chaheseki, nikufwila kwamesu, nikudisamba kwamukunkulwayi kwawumi wunu,” dikwila nawu “kukeña kwaTata hikwekala mudi yenaku.” (1 Yowanu 2:15, 16) Dichi twatela kudishinshikaña mpinji yejima kulonda twiluki neyi twakeña yuma yamukaayi. Hadaha tukuwana netu tunatachiki kukeña yisela, kudikunda nawantu nikuvwala nvwalilu yamukaayi. Indi kwiji tunakufwila kwila ‘yuma yamaneni’ kuhitila mukukeña kutaña shikola yahewulu. (Yeremiya 45:4, 5) Ituña dadiha didi kwakwihi nankashi. Dichi twatela kwanuka mazu aMosi. Neyi tukwiluka nikukuhwelela chikupu netu “Yehova Nzambi yetu hiYehova wumu hohu,” tukudifukulaña kudi yena hohu nawa tukumukalakelaña munjila yinakukeñayi.—Aheberu 12:28, 29.

15. Pawulu wayanukishililidi akwaKristu nindi Nzambi “hiYehova wumu”?

¹⁵ Mazu akwila nawu “Yehova wumu hohu” atukwashaña kwiluka netu Yehova wakeñaña ambuñindi kwikala anuñañana nikwila nachikwonkwanyi chochimu muchihandilu chawu. Muchipompelu chawakwaKristu akusambila, mwadiña aYudeya,  aGriki, aRoma niantu afumini kumatuña acheñi. Adiña nayitachi yashiyashana, tushidikilu nawa akeñili yuma yashiyashana. Dichi, chayikalili kwiteja njila yayiha yakudifukwilamu nikuleka yuma yelileñawu kunyima. Dichaletesheli Pawulu yayanukishi nindi akwaKristu ekala naNzambi wumu, Yehova.—Tañenu 1 Akorinda 8:5, 6.

16, 17. (a) Wuprofwetwinyi wunakushikijewa makonu, nawa yumanyi yinafumimu? (b) Yumanyi yinateli kuluwañesha kunuñañana kwetu?

¹⁶ Indi chipompelu chawakwaKristu makonu? Kaprofwetu Isaya wahosheli nindi “kunyaka yakukuminina,” antu akunyuza yejima akapompa hamu nakudifukula kudi Yehova. Akahosha nawu: ‘Wakatuleja mwendelañayi kulonda twakendaña munjila jindi.’ (Isaya 2:2, 3) Twazañalalaña hakumona iwu wuprofwetu wunakushikijewa makonu! Amanakwetu niahela afuma kumaluña yashiyashana, ahoshaña madimi amboka nawa akweti yisemwa yashiyashana. Ilaña twekala anuñañana mukudifukula kudi Yehova. Hela chochu, chineli twashiyashana, mpinji yikwawu kunateli kwikala kukala.

 ¹⁷ Chakutalilahu, mwayimonaña ñahi amanakwetu niahela akweti chisemwa chambuka nachenu? Munateli kwambuka idimi, nvwalilu, yilwilu niyakuda. Komana mwalekaña kudikunda nawu, nawa mwadikundaña hohu nawantu imwafuma nawu kumu? Mwamonaña ñahi aeluda achidi atwansi hela akweti ikowa hela chisemwa chacheñi? Neyi kubabala nehi, iyi yuma yinateli kutuletesha kwikala nachaambu nawa tukwikala anuñañana wanyi.

18, 19. (a) Kufumbanyi kwekala haAefwesesa 4:1-3? (b) Twatela kwiladi kulonda tutwalekihu kwikala anuñañana?

¹⁸ Tunateli kutondolwela ñahi kukala kwamuchidiwu? Pawulu wayifumbili akwaKristu ashakamineña muEfwesesa, musumba wamaheta mwadiña antu afumini kuyitachi yashiyashana. (Tañenu Aefwesesa 4:1-3.) Pawulu wateneni yilwilu yidi neyi kudizoza, kwovwaha, kudiwunjika nikukeña. Iyi yilwilu yidi neyi yishimi yakola yinateli kukolesha itala. Ilaña chakeñekaña kuzata nañovu hakwila nawu muntu yahembi chiwahi itala. Pawulu wakeñeleña nindi akwaKristu amuEfwesesa azateña nañovu kulonda ‘ahembi kunuñañana kwaspiritu.’

¹⁹ Wejima wetu twatela kuzata nañovu kulonda chipompelu chikali chanuñañana. Tunateli kwilaña ñahi mwenimu? Chatachi, twatela kwikala nayilwilu yateneniyi Pawulu yidi neyi: kudizoza, kwovwaha, kudiwunjika nikukeña. Chamuchiyedi, twatela kuzata nañovu “kudikasa mwonji wakuwunda.” Kubula kutiyashana kudi neyi nyaji, dichi twatela kuzata nañovu kulonda tutiyañaneña nikutwalekahu kwikala mukuwunda nawa anuñañana.

20. Tukumwekesha ñahi netu tweluka chikupu netu “Yehova Nzambi yetu hiYehova wumu hohu”?

²⁰ “Yehova Nzambi yetu hiYehova wumu hohu.” Awa mazu alema nankashi. Akolesheli aIsarela kuumika kukala cheñililiwu nikushinda Ituña daChikaninu. Awa mazu anateli kutukolesha ninetu kulonda twakapuluki lukadi lweneni nikwiñila muParadisa. Tutwalekenuhu kudifukula kudi Yehova hohu. Twatela kumukeña nikumukalakela namuchima wetu wejima, namaana etu ejima ninañovu jetu jejima nawa twatela kuzata nañovu kulonda tuleti kuwunda nikunuñañana nawamanakwetu. Neyi tukutwalekahu kwila mwenimu, Yesu wakatusompesha neyi anyikoku nawa twakamona netu awa mazu akwila nawu: “Inzenu enu anakoolekeshuwu kudi Tata yami, swanenu wanta wenu wayiloñesheleluwu kufumisha haaliluwu chikuku champata yamunu mwishina” netu alala.—Matewu 25:34.