1. Twatela kumoñaña ñahi chawaana chakulomba kudi Yehova?

 TUKWETI kukooleka kwakulomba kudi Ntuñi yewulu niiseki. Toñojokenu hachumichi: Tunateli kumuleja Yehova yuma yidi kumuchima mpinjii yidi yejima mumuchidi wudi wejima, chakadi kumulejela chadimu netu nukuhanjeka neyi haniyi mpinji. Tunateli kulomba kudi yena iku tudi mukadiki muchipateli hela mukaleya, nakukuhwelela netu Tata yetu wukweti kukeña wukututiya.Twasakililaña hanichi chawaana.

2. Mwanta Davidi wamwekesheli ñahi nindi walemesheli kulomba?

² Mwanta Davidi walemesheli kulomba. Wembili kudi Yehova nindi: “Kulomba kwami kwiikali neyi insensi yinakuloñesheliwu.” (Mas. 141:1, 2) Mumafuku aDavidi, insensi yajila yazatishileñawu mukudifukula kwalala kudi atupristu ashileñaku muchima nankashi neyi anakuyiloñesha. (Kwid. 30:34, 35) Davidi chateneniyi insensi watalishili mukwila nindi wateleli kushaku muchima kumazu ateleli kuhoshayi kudi Tata yindi wamwiwulu. Dichitwatela kwila ninetu. Kulomba kwetu kwatela kumuzañaleshaña Yehova.

3. Twatela kwila ñahi neyi tunakulomba kudi Yehova, nawa muloñadi?

³ Neyi tunakulomba kudi Yehova twatela kumwekeshaña kalemesha. Toñojokenu hayimwenu yakuhayamisha yamweni Isaya, Ezekeli, Danyeli niYowanu. Iyi yimwenu yejima yambuka, ilaña yikweti chuma chimu chadifwana. Yejima yamumwekeshaña Yehova nawu Mwanta wawukeleñi. Isaya wamumweni “Yehova nashakami hetanda dalema  nawa dazanduka.” (Isa. 6:1-3) Ezekeli wamumweni Yehova nashakami hekalu damwiwulu nawa anamunyeñumuki kudi “chejeji chatoñeka . . . neyi chakansuluñunda.” (Ezek. 1:26-28) Danyeli wamweni “Wakushankulu” navwali yakuvwala yitooka nawa nyizuzu yinakufuma kwitanda Dindi. (Dan. 7:9, 10) Nawa Yowanu wamumweni Yehova nashakami hetanda dinanyeñumukiwu kudi chuma chalubanji chidi neyi kansuluñunda kamwekeneña neyi ilola daemarodi. (Chim. 4:2-4) Chitwatoñojoka hakulema kukwetiyi Yehova, chinakutwanukisha nawu twatela kumulomba Yehova nakalemesha niwoma. Hanu dimu yumanyi yitwatela kulomba?

4. Yumanyi yitwadizilaña kumazu akutachikilahu ekala mukulomba kwachitalilu Matewu 6:9, 10?

⁴ Tañenu Matewu 6:9, 10. Mumpanji yaHampidi, Yesu wayidizishili atumbanji twindi kulomba munjila yatela kumuzañalesha Nzambi. Hanyima yakuhosha nindi “dichi mwatela kulomba nenu,” chatachikiliyi, Yesu wateneni yuma yalema yinakundami kunkeñelu yaYehova: Kujilika ijina Dindi, kwinza kwaWanta wakajilumuna antu adikañaña naNzambi; nihayuma yayiwahi Yakelilayi muchidi mwamuntu hamaseki. Neyi tutenaña iyi yuma mukulomba tunakumwekesha netu twalemesha nkeñelu yaNzambi.

5. Komana chidi hohu chiwahi kulomba yuma yitunakukeña?

⁵ Mumazu akulomba alondelelihu,Yesu wamwekeshili nindi chidi hohu chiwahi kulomba yuma yitunakukeña. Tunateli kumulomba Yehova kutwinka yakuda yefuku dalelu, kutwanakena nshidi, kutukiña mukweseka nikutwamwina kudi watama. (Mat. 6:11-13) Neyi tumulomba Yehova iyi yuma, tunakumwekesha netu twamushindamena nawa tunakufwila kumutiyisha kuwaha.

6. Komana yuma yitwatela kulomba yatela hohu kwikala yuma yamukulomba kwachitalilu? Lumbululenu

⁶ Bayi neyi Yesu wahosheli nindi atumbanji twindi azatisheña mazu ekala mukulomba kwachitalilu hohuku. Mukulomba kukwawu kwalombeliyi Yesu watenenimu yuma yikwawu yalema yakeñekeleña hanoyu  mpinji. (Mat. 26:39, 42; Yow. 17:1-26) Chochimu, ninetu twatela kulomba yuma yitunakukeña. Neyi tunakukeña kufuukula, twatela kulomba maana nikashinshi. (Mas. 119:33, 34) Neyi tunakutachika mudimu walema, twatela kulomba maana nikashinshi. (Yish. 2:6) Avwali atela kulombelaku anyanawu, anyanawu niwena atela kulombelaku avwali jawu, nawa wejima wetu twatela kulombelaku atudizi etu aBayibolu niantu itwashimwinañaku. Hela chochu, bayi tukuminaña dakulomba hohu yuma yitunakukeñaku.

7. Muloñadi chitwatela kumushimekela Yehova mukulomba?

⁷ Twatela kwanukaña kumushimeka Yehova mukulomba kwetu. Nzambi yetu diyi hohu itwatela kushimeka. Wekala “muwahi nawa wanakenaña swayi.” Cheñi “wukweti luwi niwushona, hiwazuwaña swayiku nawa wavulisha kukeña kwakashinshi nikushinshika.” (Mas. 86:5, 15) Chinateleli kumushimeka Yehova nanochu chekalayi niyuma yatwililañayi.

8. Yumanyi yikwawu yitwatela kumusakililahu Yehova? (Isamu 104:12-15, 24)

⁸ Kubombela hakumushimeka Yehova mukulomba kwetu, twatela kumusakililaña hayuma yayivulu yatwililayi. Chakutalilahu, tunateli kumusakilila hawulombu wawuwahi wamwekenaña mujinkenu, yakuda yayivulu yayiwahi niwubwambu wawuwahi wutwadiluñishaña nawakwetu. Tata yetu wukweti kukeña watwinka iyi yuma niyikwawu yitunabuli kutena kulonda tuzañalaleña. (Tañenu Isamu 104:12-15, 24.) Nawa chasweja kulema, twamusakililaña Yehova hayakuda yakuspiritu yatwinkayi nihakuchiñeja kwakumbindi.

9. Yumanyi yinateli kuyikwasha kwanuka kumusakilila Yehova? (1 ATesalonika 5:17, 18.)

⁹ Chinateli kwikala chaswayi kuvulamena kumusakilila Yehova hayuma yayiwahi yatwililayi. Yumanyi yinateli kuyikwasha kwanuka? Munateli kusoneka yuma yimwalombahu dehi nawa shinshikenu mumoni kulonda Yehova chayakwiliyi. Kuhiñahu lombenu nakumusakilila chayikwashiliyi. (Tañenu 1 ATesalonika 5:17, 18.) Toñojokenu  hachumichi: Twatiyaña kuwaha neyi antu atusakilila. Munjila yoyimu, neyi twanukaña kumusakilila Yehova chakulañayi kulomba kwetu chamutiyishaña kuwaha. (Kol. 3:15) Hela chochu, chumanyi chikwawu chalema chikuletesha tumusakilileña Nzambi?

10. Kwesekeja na1 Petulu 2:21, muloñadi chitwatela kumusakilila Yehova hakumutemesha Yesu hamaseki?

¹⁰ Tañenu 1 Petulu 2:21. Twatela kumusakilila Yehova hakututemeshela Mwanindi akeñayi kulonda atudizishi. Neyi tunakudiza nsañu yachihandilu chaYesu, twamwilukaña Yehova nankashi nikwiluka chitwatela kumuzañalesha. Neyi tukuhwelela chikupu mumulambu waKristu, tukwikala nawubwmbu wawuwahi naYehova Nzambi nikwikala mukuwunda naYena.—Rom. 5:1.

11. Mudimwinyi wukweti Yesu neyi tunakulomba kudi Yehova?

¹¹ Twamusakililaña Yehova muloña tunateli kulomba kudi yena kuhitila mudi Mwanindi. Yesu diyi njila yazatishañayi Yehova hakutwinka jitunakukeña. Yehova watiyililaña nikwakula kulomba kwalombañawu mwijina daYesu. Yesu walumbulwili nindi: “Chuma chejima chimukulomba mwijina dami, nukuchikoña, kulonda Tata amulemesheli mudi Mwana.”—Yow. 14:13, 14.

12. Chumanyi chikwawu chikuletesha tumusakilili Yehova hakutwinka Mwanindi?

¹² Yehova watwanakenaña nshidi jetu kushindamena hamulambu wefutu danyiloña daYesu. Nsona jamulumbulula Yesu nawu “kapristu muneni . .  . nashakami kuchikasa chachidiilu chetanda daWukeleñi mumawulu.” (Heb. 8:1) Yesu diyi “nkwashi [yetu] wudi naTata.” (1 Yow. 2:1) Twamusakililaña nankashi Yehova hakutwinka Kapristu Muneni watiyishaña kuzeyazeya kwetuku nawa “watulembelelañaku.” (Rom. 8:34; Heb. 4:15) Tudi antu abula kuwanina, chakadi mulambu waYesu hitunateli kuhanjeka naYehova mukulombaku. Mukwiteja nenu hitukweti mazu amavulu akumusakilila Yehova hachawaana chatwinkayi chaMwandiku!

13. Hawufuku wakwila Yesu kanda afwi, wamwekesheli ñahi nindi wayikeñeli atumbanji twindi?

¹³ Hawufuku wakwila Yesu kanda afwi, wayilombeleliku atumbanji twindi hadi mpinji yayilehi. Wamulombeli Tata yindi nindi “wuyihembi muloña wanowu watama.” (Yow. 17:15) Yesu wadiña wayikeña nankashi. Hela chakwila welukili nindi katataka akabakani nankashi, wayakamenini atumbanji twindi.

14. Tunateli kumwekesha ñahi netu twayikeña amanakwetu niahela?

¹⁴ Kufwana Yesu, hitwatoñojokaña hohu hayuma yitunakukeñaku. Ilaña, mpinji yejima twayilombelañaku amanakwetu niahela. Neyi twila mwenimu, tunakwovwahila lushimbi lwaYesu lwakudikeña wumu namukwawu nawa twamwekeshaña kudi Yehova netu twayikeña akwetu akakwitiya. (Yow. 13:34) Kuyilombelaku amanakwetu niahela hikunata mpinjiku. Izu daNzambi datulejaña nawu “Kulomba kwakulembelela kwamuntu waloña kwekala nañovu chikupu.”—Yak. 5:16.

15. Muloñadi chitwatela kuyilombelaku akwetu akakwitiya?

¹⁵ Akwetu akakwitiya akeñaña kuyilombelaku muloña amonaña kukala kwakuvulu. Twatela kumulomba Yehova ayikwashi kuumika yikatu, wubanji wadimwekenaña, njita, makabisha hela kukala kukwawu. Twatela  cheñi kuyilombelaku amanakwetu niahela adihanaña kuhana yawaana yakukwasha adi mukukala. Hadaha munelukihu anakumona kukala kwamuchiwu. Kwila muyitenaña mukulomba kwenu hamajina nehi? Twamwekeshaña netu twayikeña nankashi neyi tumulomba Yehova netu ayikwashi kuumika.

16. Muloñadi chitwatela kuyilombelaku anakulombola hakachi ketu?

¹⁶ Amanakwetu alombolaña muchipompelu atiyaña kuwaha neyi muyilombelañaku nawa iku kulomba kwayikwashaña. Dichuma chakeñeleñayi kapostolu Pawulu. Wasonekeli nindi: “Nlombelenuñaku ninami kulonda neyi naasami mukanwa kami, nitweshi kushimuna yuma yajila yakujinda yansañu yayiwahi chakadi woma.” (Efwe. 6:19) Nimakonu tukweti amanakwetu anakuzata nañovu kulombola hakachi ketu. Twamwekeshaña kukeña kuhitila mukumulomba Yehova netu akiswili nyidimu yawu.

17-18. Mpinjinyi yinateli kutwilawu nawu tulombi, nawu yumanyi yitwatela kwanukaña?

¹⁷ Mpinji yikwawu, anateli kutwila nawu tulombi. Chakutalilahu, muhela wunakulombola kadizi nateli kumwila muhela wunamutwaliku nindi alombi. Iwu muhela anenziyi nindi hanateli kumwiluka kadiziku, dichi wukukeña kulomba hanyima yakudiza. Muniyi njila, wukwiluka mazu akuhoshayi mukulomba hadi kadizi.

¹⁸ Manakwetu anateli kumwila nawu alombi hakubulakana kwakuya nakushimwina hela hakupompa. Manakwetu anenkiwu iwu mudimu watela kwiluka nkeñelu yiniku kupompa. Kulomba bayi neyi hinjila yakufumbilamu chipompelu hela kubidika nsañuku. Hakupompa kwachipompelu, maminiti 5 akwimbilamu kamina nikulomba, dichi manakwetu wunakulomba bayi “avulisha mazu,” sweje-e hakulomba kwakwenzunwinaku.—Mat. 6:7.

19. Chumanyi chikutukwa kwikala adiloñesha nefuku daYehova dawunsompeshi?

¹⁹ Twatela kulemesha kulomba nankashi muchihandilu chetu nanochu chitunakuswina kwakwihi nefuku daYehova dawunsompeshi.  Yesu wahosheli kutalisha haniyi nsañu nindi: “Tonenuña, lombenuña nakulemba mpinji yejima kulonda mwakatweshi kupuluka kuyuma yejimiyi yakamwekana.” (Luka 21:36) Kulomba mpinji yejima kukutukwasha kwikala atona kuspiritu kulonda ifuku daNzambi dikabuli kutushintakesha.

20. Kulomba kwetu kunateli kwikala ñahi neyi insensi yevumba dadiwahi?

²⁰ Yumanyi yitunahanjekihu? Twalemesha nankashi kulomba. Yuma yalema yitwatela kulomba yatela kukundama kunkeñelu yaYehova. Twamusakililaña cheñi Nzambi hadi Mwanindi, Wanta windi, nikulombelaku akwetu akakwitiya. Hela chochu, twatela cheñi kulomba kulonda atwinki yuma yakujimba nikukolesha chikuhwelelu chetu. Neyi tushaku muchima chikupu kuyuma yitunakukeña kuhosha mukulomba, tukumwekesha netu twalemesha ichi chawaana. Mazu etu akwikala neyi insensi yevumba dadiwahi kudi Yehova, “[ya]muzañaleshaña.”—Yish. 15:8.